Ka burí agumeiraguagüdüni gayarabei tahuudun houn gürigia ha mafiñenbaña luagu Bungiu o tuagu Bíbülia
1. Ka uagu gayara lubéi ñéinbaña lan gürigia ha mabusenruntiña haturiahanu líburu Kátima san?
1 Lun lubúeinbei lan Bungiu aban gürigia mosu lafurendeiruni le tarufudahabei Bíbülia. Gama lumoun, máhatiña hiibe-agei gürigia ha mámabaña kristiánugu hánharun tun Bíbülia kei Lererun Bungiu. Añahein amu mafiñentiña ni tuagu Bíbülia ni luagu Bungiu. Másiñati giñe mabusenrunbaña lan gürigia ha haturiahanu líburu Kátima san. Ka burí san agumeiraguagüdüni ídehaaruboun houn gürigia ítaratiña? Sagawati adundehani le lunbei wakutihani lídangiñe le hariñagubei íbirigu ha lídangiñetiña 20 ageiraü.
2. Anhein ariñaga gürigia woun mafiñen lan luagu Bungiu, ka katei lunbei wakutihani, ani ka uagu?
2 Ha mafiñenbaña luagu Bungiu. Anhein ariñaga aban gürigia mafiñen lan luagu Bungiu, buídubei wakutihani ka lan lébunabei. Afiñeti san luagu ewolusión? Adügaali san marichaü le larihibei geyegu lau o bianguaü igibu le aubei hóusera lílana relihión lun leferidiruni lafiñen? Lídangiñeti san aban ageiraü le ídanbei hínchahoua gürigia lun mafiñerun hamá luagu Bungiu? Aban san gürigia le memegeirúnñahagili lafiñerun luagu Bungiu? Arihaaña saragu íbirigu dan le lan hálügüdüni gürigia “Ítaragubeiñein san hisaminan lúmagiñe furumiñeti dan?”, aba lan lafuranguagüdüni ka lan lébunabei mafiñen lan luagu Bungiu. Gama lumoun, súdiniti waganbun sin wadüraaguni danme le aniha lan adimureha, lugundun lun wasubudiruni ida luba lan wíderaguni, furumiñe mosu gunfuranda wamani ka lan uagu mafiñen lubéi luagu Bungiu. Ítararügübei gayara lan wasubudiruni ka lan lunbei wariñaguni lun ani kaba lan agumeiraguagüdüni wígira lun (Ari. 18:13).
3. Ida liña warufudun inebesei lun gürigia luma luagu le lafiñerubei?
3 Danme le hayanuhan luma, arufuda humá inebesei luagu le lasaminarubei. Ru tumuti sukursáli to Merigaboun adundehani le: “Súdiniti warufudun inebesei lun liricha kada gürigia lun lanúadiruni kaba lan uagu lafiñera. Lubaragiñe wáfaagun warufuduni lun gürigia le úmabei wayanuha luagu chará lan, buítimabei wadügün álügüdahani le lunbei líderaguni asaminara luma lun larihini lungua kátima lan lirichabei katei”. Lárigiñe laganbuni aban óunigiruti distritu lóunabagüle gürigia le unbei lapurichiha, aba lálügüdüni: “Saminañahaadün san luagu ábanya katei le?”.
4. Ka katei lunbei gabaroun wamani danme le wapurichihan houn budista?
4 Úagubeiti gunfuranda hamani saragu budista gayara lan lafiñerúniwa luagu aban Bungiu. Arihaaña saragu íbirigu alunduna luagu ibiha hamá buiti resultóu dan le hayusurunu garüdia Cómo hallar paz y felicidad duraderas, dan le hapurichihan houn hawuyeri gürigia ha. Lárigiñe hakutihan somu ariñahani lídangiñe furumiñeti burí páhina, aban houdin lidoun lǘrüwan seksióun le gíribei “¿Existe un Creador todopoderoso?”. Lidan amu ókaasion, aba hakutihani seksióun le gíribei “Una guía para toda la humanidad”. Ánheinti hariha luagu buídubei lan hadügüni, ígira hamutu líburu Kátima san lun ariñageina: “Íbini mafiñen humá luagu Bungiu hasagaruba saragu buiti lídangiñe haturiahanu Bíbülia, lugundun dariwati lubuidun burí adundehani tidan”. Ariñagati aban íbiri le eseriwidubei kei prekursoru lidan aban damuriguaü le ñein lubéi layanuhóua cheiní Meriga: “Hínsiñeti aliihani houn gürigia ha únbaña wapurichiha, ligíati, liibe-agei dan, dan le wagiribudun bisidaña ha erederubaña tau agumeiraguagüdüni súnhali haliihanu. Gama lumoun, hénrenguti houn saragu gunfuranda hamani ka lan lisuunibei taturiahóun Bíbülia. Ligíati hínsiñe lubéi nun nígirunu garüdia Uganu Buiti houn dan le bisida nániña luagu furumiñeti wéiyaasu, lugundun adügǘwatu lun wadimurehan hama gürigia”. Ariñagati aban óunigiruni sirkuitu lidan iñeñein cheiní Meriga gayara lan giñe tigirúniwa líburu Kátima san lidan furumiñeti bisida. Gama lumoun, háfuga buídutimabei lan lagumeserúniwa lúmagiñe kapítulu 2 le afuranguagüdübalin ka lan tuwuyeri líburu Bíbülia, lubaragiñe wagumeserun lídangiñe kapítulu 1 le ayanuhabei luagu Bungiu.
5. Ka uagu súdini lubéi warufudun gurasu?
5 Mégeiwati dan lun gayara lan lafiñerun aban gürigia luagu Bungiu, ligíati súdini lubéi larufudúniwa gurasu. Háfuga úabei buídurügü lan láurügü wayanuhan luma luagu furumiñeti wéiyaasu lun wadügün lun lachoururuni anihein lan aban Bungiu le adügübalin sun katei. Gama lumoun, lárigiñe wagiribudun bisidei saragu wéiyaasu, háfuga lagumeserun ánhara luagu anihein lan aban Bungiu o gunfuranda lani ka lan uagu hafiñera amu luagu.
6. Ka lébunabei mabusenrun hamá besafu gürigia haganbun tuagu Bíbülia?
6 Ha mabusenrunbaña haganbun tuagu Bíbülia o mafiñentiña tuagu. Liibe-agei dan, daritiwa gürigia ha afiñetiña luagu Bungiu, gama lumoun mafiñentiña luagu lúmagiñetu lan Bíbülia, ligíati meberesen habéi lau uganu le tídanbei. Susereti katei le lidan burí ageiraü le ñein lubéi mama hamá kristiánugu hiibe-agei gürigia ani saminatiña haliburun lan tílana ligilisi to ídanboun hariñaga hawougua kristiánugu hamá Bíbülia. Ligiaméme asuseredubei lidan burí ageiraü le ídanbei hariñaga lílana hawougua kristiánugu hamá le ídanbei marihin hamaali lan gürigia ka lan un tahuuda Bíbülia. Ka gayarabei wadügün lun busén hamá gürigia ha hafurendeirun tuagu Bíbülia luma wibihin lun hánharun haturiahanu líburu Kátima san?
7. Ka aban buiti manera aubei gayara lan wadügün lun busén hamá gürigia hafurendeirun tídangiñe Bíbülia?
7 Ariñagatu aban gárada ounahóutu tídangiñe sukursáli to Güresiaboun: “Wadaarunu Bíbülia lun warufuduni houn gürigia ha meberesenbaña tau ka lan tariñagubei, ligía aban lídangiñe manera le buídutimabei lun wíderaguniña. Ariha hamaali saragu íbirigu wéiritima lan efekütu le tánibei Lererun Bungiu tidan hanigi gürigia sügǘ lau furumiñeguarügü katei le gayarabei hariñaguni (Ebü. 4:12). Láurügü harihini saragu gürigia liri Bungiu tidan Bíbülia adügati lun busén hamá hasigirun afurendeira tídangiñe”. Ariñawagúati tidan aban gárada ounahóutu tídangiñe sukursáli to Índiaboun: “Hínsiñeti houn indú haganbuni le tariñagubei Bíbülia luagu ibagari luma óunweni. Hínsiñeti giñe houn hasubudiruni füramase lan Bungiu lagumuchun lau houserúniwa gürigia wuriba ladüga hádangiñe hamá somu rasa o familia le ídanbei nasirua hamá”. Ruti ladimurehóun luagu burí turobuli le adiheridagüdübaliña gürigia chansi houn íbirigu lun hadaarunu Bíbülia lun harufuduni houn kaba lan ladüga Larúeihan Bungiu lun lagidaruni turobuli burí ligía.
8. Ka gayarabei wariñagun lun aban gürigia le asaminarubei wuriba tuagu Bíbülia hadüga tílana burí ligilisi to ídanboun hariñaga hawougua kristiánugu hamá?
8 Anhein wuriba lubéi lasaminarun aban gürigia tuagu Bíbülia hadüga tílana burí ligilisi to ídanboun hariñaga hawougua kristiánugu hamá, mosu wafuranguagüdüni lun ua lan úaragua lan ligaburi hawinwandun luma harufudahan gürigia ha luma le tarufudahabei Bíbülia. Ariñawagúati tídangiñe sukursáli to Índiaboun: “Anihein dan megei wamá wafuranguagüdüni houn gürigia mama lan tílana ligilisi arihibaña tau Bíbülia”. Ariñawagúati giñe tídangiñe sukursáli tuguya wéirigüdalanu seksióun 4 le tídanbei garüdia ¿Qué propósito tiene la vida? ¿Cómo descubrirlo? hanigi indú liibe-agei dan, lugundun arufuda lumuti le hadügübei tílana burí ligilisi lun hálugun hádarun katei le mámagu ligía tidoun Lererun Bungiu o hálugun hagumuchun tau. Ariñagati aban prekursoru lídangiñeti ageiraü Brasil: “Gíbetiña gürigia desidírühaña hakutihanu Bíbülia lau aban lubuidun igaburi, mabasihanga tidoun ni aban ligilisi. Anhein hadüga ligiaméme, másiñati taweiriduba lan hanigi lau le hafurendeirun tídangiñe”.
9. Ka uagu mosu lubéi wasigirun áluga wíderaguni gürigia le ariñagubei woun mabusenrun lan lasubudirun tuagu Bíbülia?
9 Ariha lumutu Heowá hanigi gürigia (1 Sam. 16:7; Ari. 21:2). Ani ligía anügübaliña gürigia ha harumabaña anigi lidoun relihión inarüniti (Huan 6:44). Mibihin hamagili meha saragu hádangiñe gürigia ha chansi lun hasubudiruni Bungiu luma lun haturiahanu Bíbülia. Adügaali wani ministeriu lun gachansin hamá lun “hasalbarun” lárigiñe “hasubudiruni inarüni” (1 Tim. 2:4). Ligíati, anhein ariñaga aban gürigia woun mabusenrun lan lasubudirun tuagu Bíbülia, sigí wamá áluga wíderaguni. Tídangiñe sun agumeiraguagüdüni to anuheinboun áluaha wamá aban to gayaraaboun tínsiñedun lun. Lau lásügürün dan, háfuga gayaraahalime wayusurunu líburu tótima auboun wíchiga aturiahani: líburu Kátima san tarufudahabei Bíbülia?
[Rekuáduru le lídanbei páhina 4]
Le lunbei wadügüni lun wíderaguniña gürigia ha mafiñenbaña luagu Bungiu
• Lun hasubudiruni ka lan uagu, álügüda huméi: “Ítaragubeiñein san hisaminan lúmagiñe furumiñeti dan?”.
• Anhein budista lubéi gürigia, akutiha waméi páhina 9 darí 12 le tídanbei garüdia Cómo hallar paz y felicidad duraderas luma.
• Anhein afiñe lubéi luagu ewolusión, yusu wamóun burí agumeiraguagüdüni to:
Arütíkulu burí le gíribei “¿Casualidad o diseño?”, tidan ¡Despertad!
Bidéu le gíribei Las maravillas de la creación revelan la gloria de Dios
Fánreinti 4 le tídanbei garüdia Cómo lograr una vida llena de satisfacción, tuma burí garüdia ¿Es la vida obra de un Creador? tuma El origen de la vida. Cinco cuestiones dignas de análisis
• Anhein adügaali lubéi asufuriruni luma marichaü lun leferidiruni lafiñen luagu Bungiu, yusu wamóun burí agumeiraguagüdüni to:
Kapítulu 10 tidan líburu ¿Existe un Creador que se interese por nosotros?
Fánreinti 6 le tídanbei garüdia ¿De veras se interesa Dios por nosotros? luma seksióun 6 le tídanbei garüdia ¿Qué propósito tiene la vida? ¿Cómo descubrirlo?
• Keime lagumeserun gürigia ánhara luagu gayara lan anihein lan Bungiu, gayarati wígirunu líburu Kátima san lun. Háfuga buídubei wagumeserun aturiahoun lúmagiñe kapítulu 2 o amu kapítulu le hínsiñeti lun.
[Rekuáduru le lídanbei páhina 5]
Le lunbei wadügüni lun wíderaguniña gürigia ha mafiñenbaña tuagu Bíbülia
• Akutiha waméi kapítulu 17 luma 18 le tídanbei líburu La vida... ¿cómo se presentó aquí? ¿Por evolución, o por creación?
• Anhein indú lubéi gürigia, yusu wamóun garüdia ¿Por qué debemos adorar a Dios con amor y verdad?
• Anhein huríu lubéi gürigia, yusu wamóun garüdia Will There Ever Be a World Without War?, páhina 3 darí 11.
• Ayanuha wamá luagu buiti le ibihúbei lídangiñe lafalarúniwa inarüni méiniti le tídanbei Bíbülia. Lun lira, gayarabei wayusurunu agumeiraguagüdüni burí to:
Arütíkulu burí “Ayuda para las familias”, tidan ¡Despertad!
Bidéu le gíribei La Biblia: el poder que ejerce en su vida
Leksióun 9 luma 11 le tídanbei garüdia Buenas noticias de parte de Dios, A Book for All People, páhina 22 darí 26 luma fánreinti 2 le tídanbei garüdia Cómo lograr una vida llena de satisfacción
Anhein budista lubéi gürigia, akutiha waméi páhina 3 darí 7 le tídanbei garüdia El camino de la paz y la felicidad
Anhein musulmán lubéi gürigia, akutiha waméi seksióun 3 le tídanbei garüdia La fe verdadera, la puerta a una vida feliz
Anhein lídangiñeti lubéi aban fulasu le ídanbei mafiñenwa lan tuagu Bíbülia gürigia ligía, lidan furumiñeti bisida, háfuga buídubei mariñagun wamani lun halíagiñe lan wasagarei lubuidun burí adundehani le wasubudiragüdübei lun
• Afuranguagüda waméi ida liña lan lagunfulirun profesía burí le tídanbei Bíbülia. Lun lira, gayarabei wayusurunu agumeiraguagüdüni burí to:
Bidéu le gíribei La Biblia: historia exacta, profecía confiable
Garüdia A Book for All People, páhina 27darí 29
• Keime warihini lagumeseruña lan gürigia abusenra larihini ka lan tariñagubei Bíbülia libügürü ámuñegueinarügü tema, gayarati wígirunu líburu Kátima san lun.
[Rekuáduru le lídanbei páhina 6]
Anhein ariñaga gürigia: “Mafiñentina luagu Bungiu”
• Gayarabei wálügüdüni: “Subudi humuti ka lan adügübei lun nachoururuni anihein lan aban Bungiu le adügübalin sun katei?”. Ábameti wakutihan fiú puntu lídangiñeti páhina 87 darí 89 tídangiñe líburu Razonamiento luma. Gayarati giñe wariñagun lun wanügüba lan aban agumeiraguagüdüni lun to íderagubaliwa afiñera luagu Bungiu.
• Gayarati giñe wálügüdüni: “Lun hamuga anihein lan Bungiu, ka hamuga igaburi lunbei larufuduni?”. Dan le ladügǘniwa álügüdahani le, óunabatiña hiibe-agei gürigia lunti hamuga lan richá lan, ua lan himei lan aban gürigia luéi aban, buidu lan ligaburi, gudemehabu ligía. Lárigiñe waganbuni lóunabagüle gürigia, yusu wamóun Bíbülia lun warufuduni lun anihein lan igaburi burí le luagu Bungiu. (Háfuga gayarabei wáluahani kapítulu 1 tidan líburu Kátima san ábameti wakutihani lúmagiñe párafu 6.)
Anhein ariñaga gürigia: “Mafiñentina tuagu Bíbülia”
• Gayarabei wóunabuni: “Gíbetiña gürigia saminatiña kei huguya. Laganóun houn saragu múaran lan le tariñagubei Bíbülia luma le larufudubei siensia o mahuudun tan lun wabagari uguñe weyu. Gama lumoun, aliihañaha humaaru san? [Ígira humá lun lóunabun gürigia. Ábameti hakutihani ebelaagülei le lídanbei páhina 3 le tídanbei garüdia A Book for All People, lárigiñe ábame hígirunu lun.] Mafiñentiña saragu gürigia tuagu Bíbülia ladüga adügaali lan relihión lun wuriba lan gunfurandawa tan lau burí katei le harufudahabei. Lidan amu ókaasion, hínsiñeti hamuga nun narufudun fiu adundehani huuti tídangiñeti Bíbülia lau tídehan garüdia to lidan páhina 4 luma 5”.
• O gayarati hariñagun: “Gíbeeña gürigia ariñagutiña ligiaméme woun. Gama lumoun, hínsiñeti hamuga nun narufudun aban bérusu tídangiñeti Bíbülia hun le achawarubalin naritagun [aliiha waméi Hobu 26:7, le arufudubalin ariñaga tani Bíbülia inarüni dan le tadimurehan luagu katei lánina siensia]. Dariwati giñe saragu adundehani huuti houn iduheñu tidan Bíbülia. Hínsiñeti hamuga nun nagiribudun lun narufudun aban hénpulu hun”.
• Gayarati giñe hariñagun: “Seremei numutün luagu hariñaguni le hasaminarubei nun. Gama lumoun, anhein hamuga ru lubéi Bungiu aban líburu woun, ka hamuga luwuyeri ariñahani lunbei wadariruni tidan?”. Ábameti warufudun aban bérusu tídangiñeti Bíbülia le úaraguati luma le lóunabubei gürigia ligía.