Kipu humoun yarafa
Hayusuruñoun san garüdia to?
Bíbülia, Ka uganu tídanbei?
Houn gürigia ha subudibaña murusun tuáguti Bíbülia, hóuntima ha lídanbaña relihíon le mámabei kristiánu
Ida luba wapurichihan tau. “Hínsiñeti hamuga woun waganbuni le hisaminabei luagu le tariñagubei Bíbülia (o, líburu sagüráutu to) [aliiha huméi Sálumu 37:11, le uágubei ladimurehóua lidan seksióun 11] Ida liña hisaminan luagu ubóu danme le lagunfulirun profesía le? [Ígira humá lun hóunabun gürigia.] Le buga waliihabei aban hénpulu luagu emenigini luma dugüdaguaü le lunbei gayara lan heresibiruni sun hawuyeri gürigia tídangiñe Bíbülia.” Aliiha huméi furumiñeti párafu le lídanbei páhina 3 ábameti híchugunu garüdia.
Aban adundehani. Anhein harufudahaña lubéi tau líburu Kátima san lun aban gürigia le lídangiñeti relihión le mama kristiánu, ragu huma fiú minutu —lubaragiñe o lárigiñe kada seksióun— ani akutiha humá aban fánreinti tídangiñe garüdia to lunraü lasubudirun aturiahati tuagu Bíbülia.
Gayarati lumadagu wamá bungiu
Houn gürigia ha lóuguabei haleskuelan o ha maliiradibaña
Ida luba wapurichihan tau. “Afiñetün san luagu gayara lan gamadagua wamá luma Bungiu? [Ígira humá lun hóunabun gürigia, lárigiñe ábame haliihani Santiagu 2:23.] Aranseruwaru garüdia to lun tíderaguniwa lun gamada wamani Bungiu, kei meha Abüráamü.”
Aban adundehani. Lidan wabisidahaniña gürigia furumiñeti wéiyaasu o dan le wagiribudun abisidahaña akutiha waméi leksióun 1 hama (o fánreinti lídangiñe), lun larufudúniwa houn ida liña lan ladügun aturiahani tídangiñe Bíbülia.
Sífirigu hani hilaaña
Houn gürigia ha afiñetiña luagu Bungiu, inebe tugía Bíbülia houn ani busentiña hafurendeiruni ka lan lamuriahabei Bungiu hámagiñe.
Ida luba wapurichihan tau. Lidan añaha lan fiú gürigia adüga bula lau saminaü luagu añahein lan gürigia awinwandutiña lidan aban fulasu marihúaditi, añahein amu afiñetiña añahein lan sífirigu buitiña hama ha wuribatiña ha meha awinwandubaña ubouagu lárigiñe aba hóunwegun. Agia hugía, ka hisaminabei? [Ígira humá lun lóunabun gürigia.] Aliiha huméi Agumesehani 3:19 akutiha huméime párafu 3 luma 4 lídangiñe páhina 4. Ru humoun garüdia lun gürigia ani adüga humá aransehani lun hagiribudun lun hakutihan amu burí ariñahani le lídanbei ligíameme arütíkulu.
Aban adundehani. Anhoun larügüda gürigia garüdia ábame hariñagun: “Tarufudahan relihión iyeeni luagu le tariñagubei Bíbülia ligía aban resun le adügübei lun gibe lan ariñawagúti luagu ka lan awinwandubei sielu. Danme nagiribudun hínsiñeti hamuga nun níchugun lanwoun ariñahani súdiniti luagu katei le hun”. Danme hagiribudun akutiha huméi páhina 4 darí 6 tídangiñe garüdia.