Ida luba tayusurún iseri garüdia Uganu buiti lúmagiñeti Bungiu
Adügǘwatu lun tíderaguniwa agiribuda abisidahaña gürigia luma agumesera aturiahani tídangiñeti Bíbülia
1. Ka garüdia to adügǘboun lunya wagiribudun bisidaña gürigia luma lun wagumeserun aturiahani tídangiñeti Bíbülia áfuriduboun lidan adamurini “Gónigi wamóun wanigi”?
1 Óunwenbu wagundan lügürabuga lidan Adamurini Distritu “Góunigi wamóun wanigi” dan le weresibirunbei aban iseri garüdia to lunboun tíderaguniwa lun wagiribudun abisidahaña gürigia luma lun wagumeserun aturiahani tídangiñeti Bíbülia! Garüdia to gíriboun Uganu buiti lúmagiñeti Bungiu tuguya teweñeguaboun garüdia Exige, chátiti leksióun burí le tídanbei, ani huuti lun lagumeserúniwa aturiahani tídangiñeti Bíbülia hama gürigia bénabu. Luagu meha lúrudu le hafalarubei kristiánugu tayanuha garüdia Exige, hénrenguti meha houn gürigia ha agumeserubaña aturiaha gunfuranda hamá fiú lídangiñe. Ánhounti iseri garüdia to tadimurehaña luagu uganu buiti le tídanbei Bíbülia (Adü. 15:35).
2. Ka uagu tadügǘwa garüdia Uganu Buiti?
2 Ka uagu tadügǘwa aban iseri garüdia? Amuriahatiña saragu íbirigu lídangiñetiña sun ubóu aban agumeiraguagüdüni sensiyutu to gayaraboun tídehan lun busén hamá gürigia haturiahanu líburu Kátima san, tótima wayusuruboun lun wíchugun aturiahani. Hanufudetiña besafu gürigia haturiahan tau aban líburu, gama lumoun ánhatiña haturiahan tau aban garüdia ñǘraütimatu. Gíbetimati giñe iñeñein le ídounbei gayara lan tásügürawagüdün aban garüdia.
3. Ka idan amu tan garüdia to tuéi tíbiri agumeiraguagüdüni to luntu lichugún aturiahani?
3 Ligaburi tadügǘn garüdia to. Adügǘwatu tibe-agei tídangiñe wani agumeiraguagüdüni lidan aban igaburi le gayarabei haliihanu gürigia luma lun gunfuranda hamani inarüni tídangiñeti Bíbülia houngua. Ánhounti garüdia to, mégeiwati lídehan aban máisturu lun gayara lan gunfurandawa tan. Ligíati, danme le wíchugunu houn gürigia súnwandan buídubei lan wakutihan aban o bián párafu hama. Kei chati burí lubéi, gayarati laturiahóun hama gürigia bénabu o ñein lubéi hawadigimarida. Íbini gayara lan lagumeserúniwa lúmagiñe furumiñeti leksióun, gayarati giñe lagumeserúniwa lau furumiñeguarügü leksióun le tídanbei.
4. Ida liña tíderaguniwa garüdia to lun warufudahan houn aturiahatiña tau guánarügü Bíbülia?
4 Tidan saragu tídangiñe wani agumeiraguagüdüni, dariwati lóunabagüle álügüdahani le adügǘbei lidan aban párafu lidanmeme párafu ligía. Ánheinti tidan garüdia to, dariwati óunabagülei lidan burí bérusu tídangiñeti Bíbülia le lídanbei párafu, lugundun himei hamuti saragu gürigia hafurendeirun tídangiñe guánarügü Bíbülia, mama lídangiñe le tariñagubei wani agumeiraguagüdüni. Ligíati mabürüdǘn lubéi le lariñagubei libe-agei bérusu tidan garüdia to. Buídutimabei haliiruni tídangiñe guánarügü Bíbülia. Ítara luba hasubudiruni aturiahatiña lúmagiñeti lan Bungiu sun le hafurendeirubei (Isa. 54:13).
5. Ka uagu súdini lubéi lun haranserun íchugutiña aturiahani buidu lidan kada leksióun lubá houdin íchiga aturiahani?
5 Mafuranguagüdün tumuti giñe garüdia to sun burí bérusu tídangiñeti Bíbülia. Adügǘwati katei le, lun gayarabei lan hadügün aturiahatiña álügüdahani luma lun hayusuruni íbirigu iarani le hawagubei kei arufudahatiña. Ligía súdini lubéi waranserun buidu lubá waturiahani kada leksióun. Gama lumoun, moun lumuti wadimurahan saragu. Íbini hínsiñe lan woun wafuranguagüdüni bérusu burí tídangiñeti Bíbülia, buídutimabei wígiruniña aturiahatiña lun hariñaguni woun ida liña lan gunfuranda hamani. Ánhawa adüga álügüdahani le samina wamuti buidu houn lau inebesei gayarabei wíderaguniña murusun murusun lun gunfuranda hamani keisi lubudubu (Hech. 17:2, TNM).
6. Ida luba wayusurunu garüdia to a) lidan fulasu le ídanbei mafiñe hamá gürigia ni luagu Bungiu ni tuagu Bíbülia? b) dan le wapurichihan muna tuagun muna? c) dan le warufudun ida liña lan taturiahóun Bíbülia? d) dan le wagiribudun abisidahaña gürigia?
6 Ítara kei amu agumeiraguagüdüni to luntu lichugún aturiahani tau, gayarati giñe tederegeruniwa garüdia to lidan furumiñeguarügü ókaasion, íbini mama lan tau lapurichihóua lidan hati. Gúndaabaña saragu íbirigu lau hayusurunu garüdia to lun hagumeserun aturiahani tídangiñe Bíbülia bénabu. Ani ítara kei lariñawagún lidan adamurini distritu, “le lúgubu tídehaba lan garüdia to lun línsiñedun woun wagiribudun abisidahaña gürigia” (arihualá rekuáduru burí le lídanbei páhina 7 darí 9).
7. Ida luba wayusurunu garüdia to dan le wíchugun aturiahani tídangiñeti Bíbülia?
7 Ida luba wayusurunu lun wagumeserun aturiahani. Gayarati wagumeserun lau waliihani álügüdahani ganumerunti le áfuachubei lau létüra wuritimati ani aliiha wameime ariñahani le lárigiñebei. Lárigiñe, áluaha waméi bérusu burí le róunñumabei, ani lau álügüdahani, houcha wamá wíderaguni aturiahati lun gunfurandalani buidu. Lubaragiñe wásügürün lidoun le aban seksióun, adügaya waméi álügüdahani le laubei létüra wuritimati lun wachoururuni luagu gunfurandalani buidu. Lidan burí furumiñeti bisida, háfuga buídutimabei wakutihan aban o bián álügüdahani. Lau lásügürün dan, gayarati agibedeina lan ariñahani le wakutihabei darí lun wakutihan aban leksióun dayarüti.
8. Ka lunbei gabaroun wamani danme le waliihan aban bérusu tídangiñe Bíbülia, ani ka uagu?
8 Bérusu tídangiñeti Bíbülia le lárigiñebei dimurei aliiha huméi ligíatima óunabubalin álügüdahani le laubei létüra wuritimati. Danme le waliihan somu bérusu tídangiñe Bíbülia, mayusura wamá dimurei kéiburi “abürühati apostolu Pábulu” o “ariha huméi le lariñagubei lani Heremíasi profesía”, lugundun gayarati lasaminarun gürigia waliihaña lan hererun wügüriña. Buídutimabei wariñagun “ariñagatu Lererun Bungiu” o “ariha huméi le tariñagubei Bíbülia lidan aban profesía”.
9. Lunti san laliihóun sun bérusu le lídanbei párafu?
9 Lunti san waliihani sun bérusu tídangiñeti Bíbülia o lérügü ariñagubei “aliiha huméi”? Segúnme gádanti aturiahati. Mámarügüñein lun larufuduni úaragua lan ariñahani le lídanbei párafu luma le tariñagubei Bíbülia lahuuda le líbiri bérusu; anihein giñe ariñahani súdiniti lidan. Gama lumoun, anhein lougua lubéi dan luma aturiahati, anhein maweirin lubéi labusenrun lafurendeirun o anhein maliihan lubéi buidu, háfuga buídutimabei háluahani bérusu lérügü ariñagubei “aliiha huméi”.
10. Ídaba gayara lan hásügürün tidoun líburu Kátima san?
10 Ídaba hasansira tidoun líburu Kátima san. Danme le gabügürüguaali laturiahan gürigia, gayarabei wasansirun tidoun líburu Kátima san. Gürigia le íchugubei aturiahani ligíaba desidírei dan le buídutimabei lun ladügüni. Gayarati desidírü wamá wadüraaguni waturiahanu garüdia Uganu buiti lun waturihanu líburu Kátima san o wagumuchuni waturiahanu garüdia dayarügubei. Danme le wagumeserun aturiahóun líburu Kátima san, mosu san watatirun lúmagiñe furumiñeti kapítulu? Le linarün katei, mariñawagúnti anhein ítara luba lubéi, lugundun ámuñegueinarügütiña gürigia. Gama lumoun, háfuga buídubei lun aturiahati láguyuguagüdün somu burí tema luma lakutihani hulilitima tídangiñe líburu Kátima san.
11. Ka uagu agurabúa lubéi lun buidu lan wayusurunu iseri garüdia to?
11 Lidan aban ubóu le ídanbei káteirügüñein lan wuribati aganbúa, gani wamuti lubuidun chansi lánina wasubudiragüdüni uganu le buídutimabei: lagumadihaña Larúeihan Bungiu ani yarafa madise lanügüba aban iseri ubóu le ñeinba lubéi lawinwandúa lau irichaü (Mat. 24:14; 2 Fe. 3:13). Chouru wamuti húaraduba lan gürigia ha aganbubalin uganu le luma dimurei tídangiñeti Lererun Bungiu le: “Ma lubuidun larihín lachülürün le anügübei uganu buiti; le anügübei uganu lánina darangilaü, le adimurehabei luagu esefuruni ariñaga ligía lun Sión: Urúei Bubungiute!” (Isa. 52:7). Yusu wamóun lubeiti iseri garüdia to lun wanügüni uganu buiti le anügübei awalidaguni lúmagiñeti Bungiu houn sun ha busenbaña hafurendeirun luagu.
[Rekuáduru le lídanbei páhina 7]
Lun tayusurún lidan fulasu le ñein lubéi mafiñe hamá gürigia luagu Bungiu ni tuagu Bíbülia
● Ariha wamaali anihein lan fulasu le ídanbei mínsiñe lan houn gürigia haganbuni dimurei Bungiu luma dimurei Bíbülia. Lidan fulasu ítarati, buídutimati wadimurehan luagu burí katei le nidiherigüdübaliña gürigia, kéiburi luagu wemeigeirun aban lubuidun arúeihani, halíaba lan wadarira adundehani le huuti houn iduheñu luma kaba lan lanüga weyu le úagilibei. Lárigiñe wayanuhan fiú wéiyaasu luma aban gürigia ani lárigiñe warufuduni lun anihein lan aban Bungiu ani gayara lan lafiñerúniwa tuagu Lererun, gayarahalime wíchugunu garüdia Uganu buiti lun.
[Rekuáduru le lídanbei páhina 8]
Lun tayusurún muna tuagun muna
● “Gíbetiña gürigia álügüdaguatiña houngua ka lan lasaminarubei Bungiu ladügün hau gürigia, hínsiñeti hamuga nun narufuduni hun ménrengu lan wasubudiruni katei le. Aban hénpulu, afiñetün san busén lan Bungiu lagumuchun lau asufuriruni? [Ígira humá lun lóunabun gürigia.] Tíderagubadün garüdia to adarirei óunabagülei lun álügüdahani le tidan guánarügü hibibülian. [Ru humóun garüdia lun, aliiha huméi furumiñeti párafu le lídanbei furumiñeti leksióun ani aliiha huméi Heremíasi 29:11.] Según lariñagun ya, ma furanguti busén lan Bungiu lun buídutima lan wabagari? [Ígira humá lun lóunabun.] Gayarati herederun tau garüdia to, ani danme nagiribudun bisidaün gayarabei wakutihani libiaman párafu lun warihini ida luba lan lagumuchun Bungiu lau sun lébuna asufuriruni.” (Anhein gadaani lubéi gürigia, gayarati haliihani ani akutiha humeime libiaman párafu luma ǘrüwagubei bérusu tídangiñeti Bíbülia. Adüga humá aransehani lun hagiribudun lun haturiahani ariñahani le lídanbei le aban álügüdahani.)
● “Libe-agei dan furíeitiwa lun Bungiu, dántima le gaturóbulin wamá, adián? [Ígira humá lun lóunabun gürigia.] Afiñetün san aganba lani Bungiu sun furíei, o anihein funa san furíei le mínsiñeti lun laganbuni? [Ígira humá lun lóunabun.] Barütina aban garüdia númagua, to arufudubalin halía lan ladarirúa óunabagülei lun burí álügüdahani le tidan Bíbülia. [Ru humóun garüdia lun, akutiha huméi furumiñeti párafu le lídanbei leksióun 12 luma bérusu burí le ariñagubei “aliiha huméi”.] Gúndaatiwa lau wasubudiruni agunbiraha lániwa Bungiu lun wafurieidun lun; gama lumoun, lun wasagarun buiti lídangiñe lubuidun chansi le, mosu wasubudiruni Bungiu buidu. [Áluaha huméi leksióun 2 ani arufuda huméi subtítulu burí lun.] Ánhadün busén, gayarabei nígirunu garüdia to hun giribu nuguyame lidan amu ókaasion lun wakutihani óunabagülei le tíchugubei Bíbülia lun burí álügüdahani súdiniti le.”
● “Wabisidahañanu gürigia hábiñe ladüga subudi wamani samina hamá sun gürigia luagu weyu le úagilibei. Laranseraguba funa san katei lun buídutima lan? [Ígira humá lun lóunabun gürigia.] Subuditi san hun anihein lan uganu buiti tidan Bíbülia le íchugubei emenigini woun? Ariha humá fiú lídangiñe katei le uágubei tadimureha Bíbülia ya.” Ru humóun garüdia lun ani amuriaha humá luma lun lanúadirun aban lídangiñe álügüdahani le lídanbei lagumuhóun páhina. Ábameti hidin lidoun páhina le ñein lubéi tema le lanúadirubei ani arufuda huméi lun ida liña lan taturiahóun garüdia to. Adüga humá aransehani lun hagiribudun lun hakutihani le aban álügüdahani le lídanbei leksióun ligía.
[Rekuáduru le lídanbei páhina 9]
Lun warufuduni ida liña lan taturiahóun Bíbülia
● “Wabisidahañanu gürigia murusun oura lun warufudun aban iseri ligaburi taturiahóun Bíbülia houn. Tidan garüdia to anihein 15 leksióun le burí arufudubalin halía lan ladarirúa óunabagülei tidan Bíbülia lun burí álügüdahani súdiniti le. [Arufuda huméi tidáü garüdia luma lagumuhóun páhina le tídanbei lun gürigia ligía.] Hóuchaadün san gunfuranda humani le tarufudahabei Bíbülia? [Ígira humá lun lóunabun.] Hínsiñeti hamuga nun narufuduni hun sensiyu burí lan leksióun burí le. [Áluaha huméi leksióun 3 ani akutiha huméi furumiñeti párafu lánina álügüdahani 3. Lárigiñe, aliiha huméi Arufudúni 21:4, 5. Anhein gayara lubéi, aliiha huméi párafu le asigirubei luma burí bérusu tídangiñeti Bíbülia le ariñagubei “aliiha huméi”.] Gayarati herederun tau garüdia to. Agunbiraha wamutün aturiaha íbini aban leksióun. Anhein hínsiñe hun, gayarati hasigirun. Danme nagiribudun gayarabei wakutihani le furumiñeti leksióun, ábanrügüñein páhina.”
[Rekuáduru le lídanbei páhina 9]
Lun tayusurún danme le wagiribudun abisidahaña gürigia
● “Ma nugundan lauya nadarirunün. Barǘ numutu garüdia to hun, óunabatu saragu álügüdahani súdiniti lau burí bérusu tídangiñeti Bíbülia. [Ru humóun garüdia lun ani ariñaga humá lun lun láluahani lagumuhóun páhina.] Ka lídangiñe tema le hínsiñetimabei hun? [Ígira humá lun lóunabun gürigia ani ábame hidin lidoun páhina le ñein lubéi tema le lanúadirubei.] Busentina narufuduni hun ida luba lan hayusurunu garüdia to lun hadariruni óunabagülei le tíchugubei Bíbülia lun álügüdahani le.” Arufuda huméi lun ida liña lan ladügǘn aturiahani lau hakutihani aban o bián párafu luma bérusu le ariñagubei “aliiha huméi”. Gayarati sensiyu lan lagumeserúniwa aban aturiahani tídangiñeti Bíbülia. Lárigiñe híchugunu garüdia lun gürigia ligía, adüga humá aransehani lun hagiribudun. Danme le hagumuchuni leksióun, gayarati háluahan amu le lanúadirubei gürigia ligía o hasigirun lúmagiñe furumiñeti leksióun.