Ida luba tayusurún iseri garüdia Kátaña san adügübalin lugundan Heowá uguñe weyu?
Adügǘwatu lun hadundehóun aturiahatiña Bíbülia tidoun lóundarun Heowá
1. Ka un tadügǘwa garüdia Lugundan Heowá?
1 Málügili lúmagiñe weresibirunu garüdia Kátaña san adügübalin lugundan Heowá uguñe weyu? Yusu wamaaru san? Adügǘwatu garüdia to lun hiderawagún aturiahatiña Bíbülia lun: 1) hasubudiruniña lumutuniña Bungiu, 2) buídutima lan hasubudiruni wadagimanu le wagunfulirubei luma 3) harihini tawadigimaridun lóundarun Heowá. Lídanrügüñein aban páhina láfuacha kada aban lídangiñe leksióun le tídanbei garüdia Lugundan Heowá.
2. Ariñaga huméi ida liña lan ligaburi tadügǘn garüdia to luma ka burí lan katei tídanbei.
2 Ligaburi tadügǘn garüdia to. Anihein ǘrüwa fánreinti tidan garüdia to le afuranguagüdübei ámuñegueinarügü katei tuáguti lóundarun Heowá ani írida wamuti ǘrüwagubei katei le lidan furumiñeti párafu. Wein-wídügubei títulu le tídanbei garüdia to adügǘwati kei álügüdahani, ani subtítulu le lídanbei létüra wuritimati ligía óunabubalin álügüdahani. Anuhein iyawaü to adirarúboun lidan lóugiñe dimí-san ageiraü tidan sun garüdia to ani ariñawagúati fulasu le ñein lubéi tadirarúa, arufuda lumuti katei le, adügǘwa lan wadagimanu lánina apurichihani lidan ámuñegueinarügü ageiraü. Lidan saragu leksióun anihein aban rekuáduru gíriti “Lun laganwoundun hisubudin”, le íchugubei adundehani huuti houn aturiahatiña.
3. Ida luba wakutihanu garüdia hama aturiahatiña?
3 Ida luba hayusurunu. Gumese huméi kada leksióun lau hadügüni álügüdahani le luágubei títulu. Lárigiñe, éibume aliiheina humani párafu, afuranguagüda huméi subtítulu. Lagumuhóun, adüga huméi álügüdahani lánina águyuguagüdüni le lídanbei lagumuchun páhina. Gayarati haliihani kada leksióun dayarügü, o anhein himei hubalin, gayarati araramagueina humá lun hayanuhan luagu le haliihabei. Anúadira huméi bérusu le lunbei haliihani lau lichú aau ani mabulieida huméi hadimurehan tuagu iyawaü luma luagu rekuáduru le gíribei “Lun laganwoundun hisubudin”. Libe-agei dan, buídutimabei hakutihani leksióun lúmagiñe furumiñeti darí lagumuhóun. Gama lumoun, ñeinbei dan buídubei lan hachubaragun lidoun somu leksióun lun hakutihan somu tema le mégeiwabei lakutihóun. Aban hénpulu, anhein yarafaali lubéi somu adamurini, gayarabei hakutihani leksióun 11.
4. Ka uagu gunda wabéi lau anuheinharu lan iseri garüdia to wama?
4 Dan le wíchugun aturiahani tídangiñe Bíbülia, íderagua wamutiña gürigia asubudirei Wáguchi le siélubei. Gama lumoun, lunti giñe wíderaguniña asubudiroun lóundarun Heowá (Ari. 6:20). Ma lueirin wagundan lau anuheinharu lan iseri garüdia to wama to adügǘboun lun wagunfulirun lau wadagimanu le!