Aranseedün san luba aban sandi sódiniti?

Aban sandi sódiniti gayarati lasuseredun woun (Sant. 4:14). Ligíati, gürigia le duaribei aransehati lubaragiñe (Ari. 22:3). Desidirü humaali san ida luba lan lagaranihoun hun luma kaba lan árani heresibira? Bürǘ humaali san desidírü humaalibei? Lun híderawagun lun desidírü humá, aranseruwaali bideu Asistencia médica sin transfusiones. Necesidades y derechos del paciente. Anihán libiaman programa le lani DVD le gíribei Alternativas a las transfusiones. Serie documental. Eibume hariaguñein lan, óunabaha huméi álügüdahani burí le ǘnabubei. Kei le arufuda lubéi bideu le murusun luagu híbugun gürigia, amuriahatiwa hama agübürigu lun duari hamá dan le harihini hamá hasaanigu ha ñǘbürigiña.

1) Ka uagu hasansiruñein lubéi fiú surusiagu hama anosuhatiña le hasaminarubei luagu libihin hitaü? 2) Ru huma ǘrüwa hénpulu luagu íbuguni le denchati le gayarabei ladügǘn sin libihíniwa hitaü. 3) Ka uagu añahein habéi saragu milu surusiagu lidan sun ubóu ha ánhatiña lun hagaranihan sin híchugun hitaü? 4) Ka larufudubei saragu aturiahani le málügili lúmagiñe ladügüniwa tidan fiú háspitali luagu layusurún hitaü? 5) Ka peliguru lanügübei libihin hitaü? 6) Ka hasaminarubei sásaamu luagu buiti le líchugubei agaranihani le ayusurúbei leweñegua hitaü? 7) Ka lebunabei mataü, ani ka gayarabei ladügüniwa lun lagaranihoun lun sandi le? 8) Ida luba lagawoundagüdüniwa eritrocitos (glóbulos rojos) lidan lúgubu sánditi? 9) Ka burí katei ídehabei lun lalouguadun leferidirun gürigia hitaü dan le líbugun? 10) Huuti san agaranihani le ayusurubei leweñegua hitaü dan le aban lan irahü sándibei o dan le weiri lan lisandi aban gürigia? 11) Ka lúrudu súdinitimabei lidan aban lubuidun agaranihani?

Kada gürigia lun desidírü lan anhein lanharuba lubéi lun somu luwuyeri agaranihani le áfuridubei lidan bideu, maguraba humá liabin sándi hun sódini lun desidírü humá kaba lan agaranihani heresibira o kaba lan un hamahara. Lidan kapítulu 7 tidan líburu “Línsiñehabu Bungiu” tuma burí agumeiraguagüdüni to iriduboun ñein, ítara kei lanwoun ariñahani le tídanbei Wani Ministeriu to lánina unsu-hati irumu 2006 líderagubadün lun buidu lan desidirü humá. Anhein badiseihadün lubéi Bürǘ huméi le desidírü hubéi tidan DPA, mabulieida huméi hanügünün húmagua súnwandan.

[Ariñahani burí lidan létüra wéinamuti lidan páhina 3]

Subudi humaali san kaba lan luwuyeri agaranihani unti ánhara? Bürǘ humaali san?