WABAGARI KEISI KRISTIÁNUGU
Aranseedün san lubá somu sandi sódiniti?
Ka uagu mosu lubéi aranseñu wamá? Sun wagía gayaraati wagagibudagun luma somu sandi sódiniti o wadagarun háspitalirugun lidan magaradahan wamá. Lubaragiñe lasuseredun lira, mosu wayusuruni sun ídemuei le aniheinbei anhein busén wabéi wibihini agaranihani buídutimati le gayaraabei wibihini. Ítara luba warufudun inebe lan ibagari woun luma lilurudun Heowá luáguti hitaü (Adü 15:28, 29).
Ida luba waranserun?
Lárigiñe hararamagun asaminara ani furíei huguya, bürǘ huméi le hanúadirubei luáguti agaranihani tidan hani (DPA).a Gayaraati hamuriahanu íbirigu ha mégeibarun dugumedu to luma íbiri le arihubei tau agumeiraguagüdüni, gayaraati giñe hamuriahanu agübürigu Tarjeta de identidad (ic) houn hasaanigu ha ñǘbürigiña.
Lidan tikesin aban würi dageinatu, lunti tamuriahanu dugumedu Información para mujeres embarazadas (S-401) hama wéiyaaña lidan afiñeni, to lunboun tíderagunu anúadira buidu lidan agaranihani le gayaraabei lichugún tun lidan dageinañoun lan o danme tagüriahaña lan.
Anhaün emegeira agaranihani le ñein lubéi lariñaga surusia megei humá hitaü o herederun háspitalirugu, wisá humaña wéiyaaña lidan afiñeni lubaragiñe ani ariñaga huguyame houn surusiagu ha tídanbaña háspitali busén humá lun labisidahanün aban gefenti luagu Heowá.
Ida luba hídehan wéiyaaña lidan afiñeni? Gayaraabei híderagunün abuinchagüdoun dugumedu DPA, lau sun siñabei lan hanúadirun huagu ni hariñaguni hun ka lan hasaminanbei lidan katei le lunti lanúadiruni kada gürigia lungua (Rom 14:12; Gal 6:5). Danme le hawisahan houn wéiyaaña lidan afiñeni ha lídanbaña damuriguaü le ñein hubéi luagu hemegeiruba lan agaranihani le ñein lubéi gayara lan hariñagun surusiagu megei humá hitaü, lau lóufudagun, hayanuhaba wéiyaaña hagía huagu luma Sétanu le Arihibei lau luáguti Agaranihani tidan Háspitali.
Ida luba lídehan Sétanu le Arihibei lau luáguti Agaranihani tidan Háspitali? Resibitiña íbirigu ha lídanbaña sétanu le ariñahani le huuti lun híderaguniña surusiagu hama gürigia ha arihibaña lau lúrudu lun gunfuranda hamani ka lan wasaminarubei luagu layusurún hitaü. Gayaraati hayanuhan hama surusiagu ha etenirubaña hun luagu amu agaranihani le gayaraabei hayusuruni leweñegua hitaü, ani anhein mégeiwa lubéi, gayaraati híderaguniña adarira aban surusia le aranseñu liña lun lídehan.
LÁRIGIÑE HARIHINI BIDÉU IDA LUBA WANÚADIRUN BUIDU LIDAN LUÁGUTI HITAÜ?, ÓUNABA HUMÉI ÁLÜGÜDAHANI LE:
Kaba burí katei íderaguawa lun aranseñu wamá lubá aban sandi sódiniti le ñein lubéi lemegeirúa hitaü?
a Gayaraati líderagunün ariñahani le lídanbei arufudahani 39 tidan líburu Winwan humá lau ugundani anúadira buidu lidan luáguti layusurún hitaü.