Katei buíduburiti le ladügübei Heowá, arufuda lumuti luéirigun
Besafu gürigia hínsiñeti houn haríaguni katei burí le ladügübei Bungiu. Gama lumoun, murusunrügüñanu gürigia gunfurandei luagu larufuduñein lan katei burí le lisaminan luma le tídanbei lanigi Bungiu le adügübaliwa (Rom. 1:20). Lüha meha, chülüti oura lun lasubudiruni Dawidi Heowá lau laliihanu Lererun. Ani “ariha” lumuti giñe yarafa ligía lun dan le laríaguni sun le adüga láalibei (Sal. 8:3, 4). DVD le gíribei Las maravillas de la creación revelan la gloria de Dios gayarati líderaguniwa íderagua láñame wasaanigu hama gürigia ha aturiahabarun Bíbülia wama lun hakütihani sun le ladügübei Bungiu buidu, lun hasubudiruni ka lan ligaburibei luma ida liña lan Wabungiute Heowá, buídugüda wameime giñe wamadagua luma. Lárigiñe haríaguni bideu le, áfaagua humá lun hóunabuni álügüdahani burí le.
1) Dan le warihini óunwenbu ubóu, sielu luma lubuidun laransehóun sun katei le lídanbei, ida liña laganwoundun ínsiñeni le wasandirubei luagu Heowá? (Isa. 40:26.) 2) Dan le waturiahani duna buidu, ka wafurendeirubei luagu Bungiu le adügübalin? (Aruf. 14:7.) 3) Ka larufudubei lueirin Ubóu luma lidise luéi Weyu luagu lichú lau Heowá? 4) Ka san lébunabei anihein lan Hati sielu? (Sal. 89:37.) 5) Ka líchugubei Heowá woun lun gunda lan wabagari? 6) Katei san ADN? (Sal. 139:16.) 7) Ka adügübei lun amu hamá gürigia luéi sun líbiri katei le ladügübei Heowá? (Agu. 1:26.) 8) Ka burí katei hayumahabei hadügün lidan iseri ubóu?
Lanwoun ariñahani: 9) Ka katei adügübei lun ñein lan ámuñegueinarügü koloru? 10) Ida liña san gayara lan lawarirun duna lúmagiñe tílagüle wewe darí lidoun tubana? 11) Ka un leseriwida duna lidan hágubu gürigia? 12) Írida humá fiú hénpulu luagu ida liña lan leseriwidun sun katei le gabagaribei lúmagua, kéiburi tídibu wewe, animaalugu hama gürigia. 13) Ida liña lasubudiruni kada katei le gabagaribei ida luba lan heseriwidun hóuniwagua? 14) Ka mini lubéi “ángulo áureo”, ani ida liña larihíniwa lidan sun le adüga láalibei Bungiu?
Teni wamá buidu lun sun le adüga láalibei Heowá. Ariñagati Hesusu houn lani disipulugu lun haríaguniña “dunuru ha áhamahabaña garabalirugu” luma lun hafurendeirun aban leksióun dan le haríaguni “laweinamudun fuluri” (Mat. 6:26, 28). Anhein wadüga ítara, lederebuguduba wafiñen, wafurendeiruba emenigida luagu Heowá ani wéiritimabei línsiñe woun luagu lichú lau, lubafu lun lesefuhan luma luagu línsiñehabu. Lubaragiñe werederun etenira lun ubóu le, yusu waméi wadaani luma were lun waríaguni sun katei buíduburiti le adüga láalibei Heowá ani samina wamá buidu luagu le larufudahabei katei burí le woun luagu Wabungiute (Sal. 19:1).