Mosu wáluahaniña gürigia lun wapurichihan houn
1. Lidan burí fulasu le ñein lubéi layanuhóua saragu iñeñein, ka uagu liridúa lun kada damuriguaü kaba lan fulasu hapurichiha según iñeñein le hayanuhabei?
1 Lidan Pentekosutesi irumu 33, lárigiñebei hibihin lani Hesusu disipulugu sífiri sandu, “aba hagumeserun adimureha lidan burí amu luwuyeri iñeñein” houn gürigia ha ñǘbuinbaña lídangiñe ámuñegueinarügü fulasu ubouagu lidoun fedu ligía (Adü 2:4). Kei resultóu, badiseitiña kéiburi ǘrüwa–milu gürigia. Súdiniti wafuranguagüdüni ayanuha hamá híbe-agei gürigia hagía ebüréu luma güriegu. Íbini ítara, himei lumuti meha Heowá haganbuni gürigia hagía uganu luáguti Larúeihan lidan hañeñe. Chóuruti susere lan le luéigiñe aban oubaü, ladüga buídutima lan hóunabun gürigia dan le lapurichihóun houn lidan hañeñe guánarügü. Ligíati, lidan burí fulasu le ñein lubéi ladimurehóua saragu iñeñein anihein damuriguaü lidan amu burí iñeñein ani apurichihatiña houn gürigia según iñeñein le hayanuhabei (ariha humóun líburu Organizados, páh. 107 pár. 1, 2). Sétanu burí le lánina amu iñeñein apurichihatiña houn sun gürigia ha ayanuhabalin iñeñein ligía lidan fulasu le ñein lubéi lapurichiha damuriguaü le arihibei lau sétanu luma lidan sun fulasu le yarafabei houn.
2. a) Ka lunbei wadügüni lun gayara lan wakipurun aban lísüta hau gürigia ha ayanuhabaña amu iñeñein, ani ka burí kesi ídanbei megei wamá wadügüni? b) Dan le gibe lan iñeñein ayanuhóuti lidan aban fulasu, ida liña gayara lan híderagun lílana sun damuriguaü le ñeinbei hámagua? c) Ka lunbei wadügüni anhein arufuda aban gürigia le ayanuhati amu iñeñein luagu busén lan lasigirun afurendeira luagu Bungiu?
2 Íbirigu ha apurichihabaña lidan fulasu le ñein lubéi ladimurehóua ábanrügü iñeñein gayarati hapurichihan tidan sun muna. Ánhañati ha awinwandubaña lidan aban uburugu le ñein lubéi layanuhóua saragu iñeñein, háfuga mosu hapurichihan lidan ligiaméme fulasu luma amu burí damuriguaü le ídanbei layanuhóua amu iñeñein. Ánhaña adarira gürigia ha adimurehabaña amu iñeñein, lunti habürüdüni hani dátosu lun gayara lan habisidahani íbirigu ha apurichihabaña lidan iñeñein ligía, gama lumoun mosu waritaguni íbirigu lan ha apurichihabaña lidan iñeñein ligía, hagía lúnbaña háluahaniña gürigia hagía (ariha huméi rekuaduru “Íderagua wamá wóuniwagua”). Ítarati, mosu ha lan lílana damuriguaü burí le áluahaña gürigia ani bürǘ hameime halía lan heredera gürigia ha ayanuhabalin iñeñein le ídanbei hapurichiha. Wariha fiú manera ida luba lan wadügüni.
3. Kaba lébuna wásügürün dan áluahaña gürigia ha ayanuhatiña somu iñeñein? Mosu san wáluahan lidan sun fulasu kei lidan le ñein lubéi gíbetima hamá gürigia?
3 Ida luba wáluahan. Según átiriñanu lan gürigia ayanuhatiña amu iñeñein lidan fulasu le wapurichihabei, ítara luba dan le lunbei wígiruni lun haluahóun. Kei hénpulu, átiriñanu san gürigia ayanuhatiña iñeñein ligía? Átiriñanu san apurichihatiña lidan damuriguaü o sétanu? Átirihaña gürigia adarirútiña? Magurabúnwati wáluahaba lan gürigia lidan sun fulasu lidan aban; gayarati desidírü lan damuriguaü lun haluahóun gürigia lidan fulasu létima ñein lubéi gíbetima hamá gürigia luma lidan fulasu le manarimebei lidise ñéingiñe. Gama lumoun, mosu ñein lan aban lubuidun aransehani lun gayarabei lan lichugún chansi houn saragu gürigia lun hagúaruni liri Heowá (Rom. 10:13, 14).
4. a) Ida liña aransehani le lunbei ladügǘn lun haluahóun gürigia? b) Írida humá fiú manera ida luba lan haluahóun gürigia ha ayanuhatiña amu iñeñein.
4 Mosu haransehani wéiyaaña lidan afiñeni luáguti haluahóun gürigia, létima íbiri le arihibei lau apurichihani lun madügǘn lan wadagimanu bián wéiyaasu (1 Ko. 9:26). Danme le aban lan sétanu le ayanuhabei amu iñeñein, hanúadiruba wéiyaaña lidan afiñeni ha lídanbaña damuriguaü le arihibei lau sétanu ligía aban íbiri, buítimati aban wéiyaali lidan afiñeni o aban ídehati lidan damuriguaü lun lalidihani wadagimanu. Saragu damuriguaü luma sétanu adügatiña aransehani buiti lun hadügüni furumiñeti áluahani. Háfuga háluahan lidan Internet o tidan líburu to ñein lubéi ladarirúa hiri gürigia ha awinwandubaña lidan aban fulasu luma linumerun hagagamurun lun háluahani iri burí le kamanibei lidan hererun. Lárigiñe, aba hagúarun houn o habisidahaniña lun hachoururuni kátaña lan lúnbaña habürüdǘn tidan lísüta to lunboun hayusurunu lubá apurichihani. Anhein buidu lubéi larihín houn wéiyaaña lidan afiñeni, gayarati desidírü hamá lun kada lan átiri dan háfuridun lílana damuriguaü íderaguaña íbirigu ha lídanbaña sétanu áluahaña gürigia. (ariha huméi rekuaduru “Ka adügǘbei lun haluahóun gürigia ha ayanuhatiña amu iñeñein”).
5. a) Ka burí adundehani lunbei gabaroun hamani ha áfuridutiña áluaha gürigia ha ayanuhabaña amu iñeñein? b) Ka gayarabei wariñaguni houn gürigia?
5 Moun lumuti wáfuridun áluaha gürigia lubaragiñe wasubudiruni ka lan wabusenrubei. Furumiñe mosu wasansiragun ítara kei dan le woudin apurichiha muna tuagu muna lugundun ligía aban fánreinti lídangiñe wani ministeriu keisi kristiánu. Gíbetiña íbirigu asayaha hamuti le lunbei hariñaguni houn ani ayanuhatiña lidan iñeñein ligía lidan háluahañanu lan gürigia, katei le íderaguaali saragu íbirigu lun hakipuruni ubebeni luma lun buídutima lan hayanuhani iñeñein ligía. Gayarati wabürüdüni dan le wásügürübei áluaha gürigia, ánheinti dan le wásügürübei adügoun mapa lau fulasu le ñein habéi gürigia o adügoun lísüta, siñati wabürüdüni. Dan le wadarirun aban gürigia le ayanuhabalin iñeñein ligía, mosu wáfaagun lun wapurichihan lun. Meberesenga anhein busén lubéi laganbuni uganu o mabusenrun lan, lunti wawisahan lau lóufudagun lun íbiri le arihibei lau apurichihani o le unbei líchigei kárugu gayara láamuga labürüdüni tidan lísüta. Inarüni súdiniti lan haluahóun gürigia ha ayanuhabaña amu iñeñein, gama lumoun, mosu wíchuguni sun katei lidan lilugaarun lun gayara lan wagunfulirun lau amu burí katei lidan wani ministeriu (ariha huméi rekuaduru “Ka lunbei wariñaguni dan le woudin áluaha gürigia”).
6. Ka lénrengunga lanügübei haluahóun gürigia maganbuntiña?
6 Ida luba haluahóun gürigia ha maganbuntiña. Hénrenguraüti wadagimanu le ani mégeiwati áfaaguni luma awanduni. Mítaranti haluahóun gürigia maganbuntiña kei haluahóun gürigia ha ayanuhabaña amu iñeñein lugundun aba haríawagun kei sun gürigia, ni hiri ni hadaüragun marufudun tumuti siñati lan haganbun. Libe-agei dan, hanarimeti hóunigiruniña haduheñu hama hamadagu, gayarati mabusenrun hamá híchugun ariñahani houn íbirigu. Wariha fiú adundehani le huuti lun hadarirun dandu gürigia ha maganbuntiña kei ha ayanuhatiña amu iñeñein.
7. a) Ida luba hálügüdahan dan le háluahan gürigia ha maganbuntiña? b) Kaba hadüga lun masaminarun hamá gürigia ni kata wuribati huagu?
7 Íbirigu ha lídanbaña damuriguaü luma sétanu le hounti gürigia maganbuntiña súnwandan hálügüdüniña lílana somu fulasu anhein subudi habéi somu gürigia le maganbunti. Gayarati gabesinanigu hamá o gani hamá paaná lidan wadagimanu o leskuelarugu ha ayanuhabaña lau seini o gayarati gaduhe hamá somu gürigia maganbunti. Háfuga haritaguni ariha hamá somu abürüdǘni le ñein lubéi lariñaga houn abugahatiña karü luagu añahein lan irahüñü maganbuntiña lidan fulasu. Lunti gabaroun hamani luagu gayara lan ladügün álügüdahani le lun hasaminarun gürigia wuriba. Gama lumoun, ánhawa ayanuha lau ínsiñeni, inebesei ani ariñaga waméi le lunbei wariñaguni lau lóufudagun, masaminarunbaña gürigia wuriba. Añahein ibihaaña buiti resultóu dan le harufuduni DVD tani Bíbülia tuma amu agumeiraguagüdüni ani afuranguagüda haméi houn gürigia háluahañanu lan gürigia maganbuntiña lun harufuduni emenigini le tídanbei Bíbülia houn. Dan le harihin hanufude hamá gürigia híchugun ariñahani houn, gayarati hígirun aban ubanaü lau hani dátosu o aban amisuragülei lubá adamuridaguni houn lun hederegerunu lun somu gürigia maganbunti le hasubudirun.
8. Ida luba híderaguniña lílana aban damuriguaü íbirigu ha lídanbaña damuriguaü hani maganbuntiña?
8 Aban o bián wéiyaasu lidan irumu, gayarati lamuriahan damuriguaü le lánina seini ídemuei luma damuriguaü le yarafatimabei lun líderaguni áluahaña gürigia ha maganbuntiña lidan aban fulasu wéiriti. Lidan adamuridaguni lubá háfuridun apurichiha, le lunbei lalidihani aban íbiri lídangiñeti damuriguaü le hani maganbuntiña, gayarati lichugún adundehani luagu ida luba lan ladügǘn wadagimanu le ani adügǘwa ligíame aban demostrasión. Anhein afanreinragúa sétanu lun houdin tidan karü, lunti ñein lan íbini aban hádangiñe íbirigu ha lídangiñetiña damuriguaü lánina seini tidan kada karü tau aban mapa to lunboun tarufuduni houn halíaba lan háluahan gürigia.
9. Ka gayarabei ladügǘn lun libihín hani maganbuntiña dátosu lidan fulasu le ñein lubéi gachülüradi hamá?
9 Gayarati giñe labisidahóun fulasu burí le ñein lubéi houdin gürigia maganbuntiña áluaha isebáhari o lun habihin somu ídemuei. Lunti hasansiragun íbirigu según fulasu le ñeinba lubéi houdin. Lubaragiñe houdin ayanuha houn saragu gürigia lidan aban, háfuga buídutimabei hayanuhan luma aban o bián gürigia lau duari. Ánhaña ibiha buiti resultóu, gayarati híchuguni hinumerun houn ani ru hameime hanumerun hun.
10. Ida liña gayara lan haluahóun gürigia maganbuntiña lidan burí bísinisi?
10 Gayarati giñe wadügün aban mapa to arufudubalin halíañoun lan burí bísinisi lidan somu fulasu lun tabisidahóun dan le ñein hamá gürigia maganbuntiña. Tidan aban mapa gayarati tarufudún saragu laluguragüle gasolina; tidan amu mapa gayarati larufudún le ñein lubéi tachibúa gamisa, éigagülei, tuma haban chülüdügütiña o amu burí bísinisi. Anhein adügǘwa kada mapa lun kada bísinisi, hasubudirubei apurichihatiña fulasu buidu ani buídutimabei harufudahani inarüni. Kei hénpulu, lárigiñe hariñaguni lun gürigia le eresibirubaliña gürigia tidan haban chülüdügütiña ka lan lébunabei hani bisida, gayarati híchugun fiú agumeiraguagüdüni lun lidan DVD tuma aban amisuragülei lun adamuridaguni lun gayara lan líchugunu houn gürigia maganbuntiña ha achülürübaña ñeinhin. Lidan burí fiú bísinisi, háfuga buídurügübei hálügüdahan anhein anihein lubéi somu nadagimeinti o agañeihati le ayanuhabei lidan seini. Anhein anuhein lubéi somu leskuela houn maganbuntiña lidan fulasu le ñein lubéi hapurichiha, gayarabei hígirun fiú tídangiñe wani agumeiraguagüdüni lidan DVD tun hani líburu-agei.
11. Ka uagu aban lubéi fánreinti súdiniti haluahóun gürigia lidan wani ministeriu?
11 Aban wadagimanu súdiniti. Gayarati labuchadagüdüni haluahóun gürigia ha ayanuhatiña somu iñeñein wawagu. Wéiriti giñe hasansihani gürigia fulasu le ñein lubéi hawinwanda, adügati le lun hénrengu lan takipurúniwa aban lísüta lau fulasu le lunbei ñein lan lapurichihóua. Gama lumoun, eibu dan gíbetimahali fulasu le ñein lubéi súdini lan haluahóun gürigia ha ayanuhatiña amu iñeñein lidan awanha lan lidan apurichihani. Heowá le íchugubalin wadagimanu lánina apurichihani woun, úati himei lan aban gürigia luéi aban (Adü. 10:34). Ani busenti “lun hasalbarun sun gürigia, lun giñe hayabin lun hasubudiruni inarüni” (1 Tim. 2:3, 4). Ligíati, nadagimein wamá luma Heowá luma hama wíbirigu lidan haluahóun gürigia ha ayanuhatiña ámuñegueinarügü iñeñein “ha aganbubalin Lererun Bungiu tau anigi buitu” (Luk. 8:15).
[Rekuáduru le lídanbei páhina 5]
Íderagua wamá wóuniwagua
Anhein busén lubéi somu damuriguaü o sétanu le lánina amu iñeñein ídemuei lun hadarirun amu burí gürigia, gayarati layanuhan íbiri le arihibei lau apurichihani hama wéiyaaña lidan afiñeni ha lídanbaña damuriguaü burí le yarafati. Buítimati hamuga lúmarügü lan damuriguaü le burí yarafabei houn hayanuha o houn ha ñein lubéi gibe hamá gürigia ha ayanuhabalin iñeñein ligía. Hawisarúba apurichihatiña ha lídanbaña damuriguaü burí ligía luagu ánhaña lan adarira aban gürigia le ayanuhati iñeñein ligía lun habürüdüni halía lan leredera lun hederegeruni lun íbiri le arihibei lau apurichihani lun ligía lan ederegerei lun damuriguaü o sétanu le amuriahabei ídemuei hama. Íbirigu ha arihibaña lau apurichihani lidan burí damuriguaü gayarati hadügün buiti aransehani lun lachülürǘn hamoun gürigia ha ayanuhabaña ámuñegueinarügü iñeñein ani lun hadundehaniña lidoun damuriguaü o sétanu le ídanbei layanuhóua hañeñe.
Ani ánhaña adarira gürigia ha ayanuhatiña amu iñeñein (o ha maganbuntiña), ani busentiña hafurendeirun luagu Bungiu mosu habuinchagüdüni ubanaü Sírvase visitar (S-43-S) ouraméme ligía ábame hederegerunu lun sekretariu lidan damuriguaü. Lídehaba le lun leresibirun gürigia ligía ídemuei lun lasubudirun luagu Bungiu lau lóufudagun (ariha huméi km-S 5/11 páh. 3).
[Rekuáduru le lídanbei páhina 6]
Ka adügǘbei lun haluahóun gürigia ha ayanuhatiña amu iñeñein
• Wálügüdahan hama amu gürigia, kéiburi aturiahatiña Bíbülia, waduheñu, wapaanagu lidan wadagimanu.
• Wáluahani iri burí le kamaniti lidan iñeñein ligía tidan líburu burí to ídanboun láfuacha linumerun hagagamurun sun gürigia. Anuhein giñe líburu burí to ídanboun wadarirei hiri gürigia según fulasu le ñein lubéi haganawa, gayarati giñe wadariruni lidan Internet o tidan kónpeni to lani gágamuru.
• Wálügüdahan lau duari lidan burí fulasu le hunren umuti houn sun gürigia, kéiburi líburu-agei, áfisi to lani urúei tuma burí leskuela.
• Wáluahan tidan periodiku anhein anihein lubéi awisahani luagu somu adamuridaguni le lunti ñein hamá gürigia ha ayanuhatiña somu iñeñein.
• Woudin tidan burí budigü o amu burí bísinisi le ñein lubéi góudidadi hamá gürigia ha ayanuhabalin iñeñein ligía.
• Gayarati wamuriahan üma lun wíchugun aban dábula tau burí agumeiraguagüdüni lidan burí bísinisi, tidan luban furendei íñuti o ñein lubéi houdin saragu gürigia ha ayanuhabalin iñeñein ligía árügüda busu o íngiini.
• Anhein anha lubéi lúrudu, gayarati wagañeinhan aban líburu to ñein lubéi hiri gürigia o wayusurun aban páhina lidan Internet le ñein lubéi laluahóua ariñahani.
[Rekuáduru le lídanbei páhina 7]
Ka lunbei wariñaguni dan le woudin áluaha gürigia
Wayanuhan houn gürigia furangu lau umadaguaü lídehaba lun masaminarun hamá wuriba. Anihein dan hu lan warufudun aban agumeiraguagüdüni lidan iñeñein ligía furumiñe.
Lárigiñe habusuragun, gayarati hariñagun: “Wáluahañanu gürigia ha adimurehabaña ______ lun wafuranguagüdüni emenigini le tídanbei Bíbülia houn. Subuditün san somu gürigia le ayanuhabalin iñeñein le?”.
Dan le wáluahan gürigia ha maganbuntiña, gayarati wariñagun: “Buiti binaafin. Gayarati san warufudun aban bideu hun? [Lau aban DVD le gayarati hanügüni húmagua, arufuda humá aban bérusu tídangiñeti Bíbülia houn lidan seini.] Le narufudubei hun, aban bérusu tídangiñeti Bíbülia lidan seini. Anihein saragu bideu wama lun wíderaguniña gürigia ha maganbuntiña asubudira luagu Bungiu, ani mama mosu hafayeihan luagu. Subuditün san somu gürigia maganbunti o ha gaturobulintiña lun haganbun ani gayanuhaditiña lidan seini?”. Anhein maritagun habéi gürigia luagun ni aban maganbunti oura ligía, ru humá hénpulu burí houn —kéiburi lidan wadagimanu, leskuelarugu o lidan fulasu le ñein lubéi heredera— le ñein lubéi hariha somu gürigia maganbunti.