WABAGARI KEISI KRISTIÁNUGU
Apurichiha wamá lidan úarani lidan fulasu le ñein lubéi layanuhóua saragu iñeñein
Buítimati hóunabun gürigia lun uganu luáguti Larúeihan Bungiu dan le haganbuni lidan hererun guánarügü. Háfuga ligía meha ladügünbei Heowá, lidan fedu Pentekosutesi le lánina irumu 33, lun haganbuni huríu gúnfulitiña ha achülürübaña “lídangiñe sun fulasu ubouagu” uganu buiti lidan lererun kada aban hádangiñe lau sun chouru lan gariñagadi hamá meha giñe ebüréu o güriegu (Adü 2:5, 8). Uguñe weyu, apurichihatiña lílana burí damuriguaü le ámuñegueinarügüti hañeñe lidan ligiaméme fulasu. Ka lunbei hadügüni íbirigu ha lun hídehan hámagua lun lapurichihóun houn sun gürigia mawesirunga dan ani madügünga lun hasafaragun lílana fulasu le ñein lubéi hapurichiha?
Hayanuhan hámagua (Ari 15:22): Mosu hayanuhan íbirigu ha arihibaña lau apurichihani hámagua lun háluahani igaburi le buídutimabei houn súngubei lun lapurichihóun lidan somu fulasu. Anhein lougua lubéi fulasu le ñein lubéi hapurichiha lílana somu damuriguaü ha ayanuhatiña amu iñeñein, háfuga himei habéi lan lun mapurichihan wamá tidan burí muna to ídanboun lunti lan hapurichihan. Ánheinti wéiriya lubéi fulasu ligía ani díseguati hapurichihan ñein, másiñati himei habéi lan lun wapurichihan tidan sun muna ani ábame lan wawisaruniña danme larufudun somu gürigia le ayanuhati hererun busén lan lasigirun afurendeira (od-S páh. 93 pár. 37). O másiñati hamuriahan ídemuei luma damuriguaü le ñein wabéi lun wáluahani halía lan heredera gürigia ha ayanuhabalin hererun bürǘ hamaamugei tidan lísüta lánina fulasu le yuubei houn lun hapurichihani (km 7/12 páh. 5, rekuáduru). Haritagua huméi gayara lan ayanuhóua lan lóugiñe aban iñeñein tidan tugiaméme muna. Mosu wafalaruni lúrudu lánina lounigirúniwa ariñahani luáguti habagari gürigia lidan ligaburi wawadigimariduni fulasu le ñein lubéi wapurichiha.
Hídehan hámagua (Efe 4:16): Mosu wafalaruni adundehani le líchugubei íbiri le arihibei lau apurichihani. Wíchuguña san aturiahani tídangiñeti Bíbülia lun somu gürigia le ayanuhabei amu iñeñein luéi le ayanuhóubei lidan damuriguaü le ñein wabéi? Másiñati furesetimabei lan lawanserun aturiahati anhein adügǘwa aransehani lun aban lan íbiri le lídangiñeti damuriguaü o sétanu le ñein lubéi layanuhóua lererun íchigei aturiahani lun.
Haranserun (Ari 15:28; 16:1): Ánhadün adarira aban gürigia le ayanuhabei amu iñeñein lidan fulasu le ñein lubéi hapurichiha, adüga huméi sun hiyaraati lun hapurichihan lun. Lun haranserun, samina huméi ka burí lan iñeñein ayanuhóubei lidan fulasu le ñein lubéi hapurichiha, ábameti harariragüdünu Bíbülia luma fiu bidéu lidan iñeñein burí ligía. Gayaraati giñe hayusuruni programa JW Language lun hafurendeirun abusuragua lidan fiu lídangiñe iñeñein ligía.