Góunigi waméi wasaminan
1. Kaba liri adamurini lánina sirkuitu le lunbei ladügǘn lidan irumu lánina eseriwiduni 2013, ani ka lisuunibei programa le?
1 Arufudahati Hesusu houn lani disipulugu lun línsiñedun Heowá houn tau sun hanigi, tau sun hawani luma lau sun hasaminan (Mat. 22:37, 38). Sun adamurini le lánina irumu le, adügǘwati lun líderaguniwa lun wóunigiragun woungua. Kei waganbuni lidan awisahani, iridúati liri adamurini distritu “Góunigi wamóun wanigi”. Liri weyu espechaliti lánina adamurini lubá irumu lánina eseriwiduni 2013 “Góunigi waméi waritagun”, leti adamurini lánina sirkuitu le lunbei lagumeserun leweñegua hati “Góunigi waméi wasaminan” ligíaba liri, sagawati lídangiñe Matéu 22:37. Agurabatiwa líderagubadiwa lan adamurini sirkuitu lun wakutihani le lídanbei wasaminan lun gayara lan lagundaarun Heowá lau.
2. Kaba burí álügüdahani ounabúa lidan programa?
2 Kaba wakutiha. Lárigiñe lagumuchun programa lánina adamurini sirkuitu, busentiwa waritaguni puntu burí le súdinitimabei. Ligíati, buídubei lun wabürühani lóunabagüle álügüdahani burí le:
• Kaba wadüga lun masansirun lan wasaminan luma wóuserun según hasaminan gürigia?
• Ida luba wíderaguniña gürigia lun hesefurun lídangiñe luburiga le lídanbei hasaminan?
• Ka saminaü lunbei gani wamani?
• Ka buiti wasagarubei dan le wígirun dan lun wararamagun asaminara keisi lubudubu?
• Ida luba wígirun lun Heowá lan aransehei wasaminan?
• Ka gayarabei hadügüni wügüriña hama würiña maríeitiña, agübürigu hama isaanigu lun ñein lan darangilaü lidan hafamilian?
• Ida liña wachoururuni aranseñu waña lan lubá luéyuri Heowá?
• Ka mini lubéi waranseruni wasaminan lubá wadagimanu?
• Ka buiti hibihibei ha adügübalin le hafurendeirubei?
3. Ka uagu súdini lubéi lun lidan wamá adamurini le biángubei weyu, lun wíchugun arigei lun programa ani lun wagunfuliruni lidan wabagari sun adundehani le lunbei weresibiruni ñein?
3 Busenti Satanási lagadeiruni wasaminan ani láfaaguña lau sun lere lun ladügüni (2 Ko. 11:3). Ligía mosu lubéi wóunigiruni wasaminan, wagumadiruni waritagun, wáyeihani lisaminan Kristu luma lun wamahadun lun igaburi le lídanbei ubóu wuribati le (1 Ko. 2:16). Adüga waméi sun wayaraati lun ñein wamá biángubei weyu ani ru wagíame arigei lun programa. Wagunfuliruni lidan wabagari sun adundehani le lunbei waganbuni, líderagubadiwa lun waranseruni wasaminan lun wawadigimaridun lau ubebeni luagu Larúeihan Bungiu (1 Fe. 1:13).