Huutu Lererun Bungiu lun tarufudahan
1. Kaba liri adamurini sirkuitu le lunbei ladügǘn lidan irumu lánina eseriwiduni 2014, ani kaba álügüdahani ounabúa lidan?
1 Heowá ligía Wamaisturunbei le buídutimabei ligibuagu sun ubóu (Isa. 30:20, 21). Arufudahati woun tau Bíbülia, Lererun to labürügüdǘboun, úatu amu líburu buídutimatu tuéi. Ida luba san lanügün le tarufudahabei buiti woun lidan wabagari, wasaminan, ligaburi wasandiragun woungua luma lidan wamadagua luma Bungiu? Lichugúba óunabagülei lun álügüdahani le lidan adamurini sirkuitu le lunbei ladügǘn lidan irumu lánina eseriwiduni 2014, le gíribei “Huutu Lererun Bungiu lun tarufudahan”, le asagarúbei lídangiñe 2 Timotéu 3:16.
2. Kaba burí álügüdahani íderaguawa asubudirei ka burí lan puntu méinitimabei lídangiñe programa?
2 Puntu méiniti le lídanbei programa. Líderagubadiwa álügüdahani burí le asigirubei lun wasubudiruni ka burí lan puntu méinitimabei lídangiñe programa:
• Ka lánibei arufudahani lúmagiñeti Bungiu efekütu lidan wabagari? (Isa. 48:17, 18.)
• Ka gayarabei wachoururuni ánhawa adüga asansiruni lidan wabagari lun weseriwidun lun Heowá lidan dan dayarüti? (Mal. 3:10.)
• Ka lunbei wadügüni dan le wadunragun luma “amu luwuyeri arufudahani”? (Ebü. 13:9.)
• Ida luba wáyeihani ligaburi ‘larufudahan’ Hesusu? (Mat. 7:28, 29.)
• Ka uagu lunti lubéi harufudahan ha arufudahabaña lidan damuriguaü hóuniwagua? (Rom. 2:21.)
• Ka un tahuuda Lererun Bungiu? (2 Tim. 3:16.)
• Ka lánibei ‘ladadagaragüdüniña’ Bungiu néchanigu efekütu hawagu gürigia? (Ahe. 2:6, 7.)
• Ka katei lachoururubei Heowá gayara lan wadügüni? (Efe. 5:1.)
• Ka uagu lunti lubéi wáfaagun lun madireirun wamá luéi arufudahani le ñǘbuinbei lúmagiñe Heowá? (Luk. 13:24.)
3. Ka uagu weiri lubéi lisudinin meferidirun wamá ni aban yanu lídangiñe programa lánina adamurini le lunbei lachülürün lidan dan?
3 Murusunraü lubaragiñe bérusu le ídangiñebei lasagarúa liri adamurini le, ayanuhóuati luagu ida luba lan katei lidan lagumuhóun luéyuri ubóu le. Abürühati Pábulu libügürü dan hénrenguti le: “Ha wuribabaña hama ha geyeehadibaña, haribadatimaba; ítarameme haba eyeeha luma eyeedúa” (2 Tim. 3:13). Anhein mabusenrun wabéi weyeedún, wéiriti lisudinin waganbuni le larufudahabei Bungiu woun ani falá wameime lidan wabagari. Ligíati, adüga waméi sun wayaraati lun meferidirun wamá nírügü aban yanu lídangiñe programa le le lunbei lachülürün lidan dan.