Fánreinti Lánina Álügüdahani
◼ Ka burí adundehani tídangiñeti Bíbülia huubei lidan luáguti layusurún gágamuru lidan adamuridaguni luma lidan ministeriu?
“Gadaaniti sun katei.” (Apur. 3:1.) Huuti gágamuru lun wabürühan o wagúarun houn gürigia furumiñeguarügü oura. Gama lumoun, anihein dan le ídanbei moun lumuti lan wayusuruni gágamuru. Aban hénpulu, lidan wadamuridagun huduguatiwa lun Heowá, resibitiwa adundehani tídangiñe Lererun ani rútiwa gurasu wóuniwagua (2 Lur. 31:12; Sal. 22:22; Rom. 1:11, 12). Gayarati san wéñeguchuni gágamuru dan le awanha lan lidan adamuridaguni ani ariha wameime le abürühóubei woun darí danme furihadiwa tídangiñe Luban Wadamuridagun? Anhein aguraba wabéi laguarúniwa woun luagu somu katei le wéiribei lisudinin ani siñati wéñeguchuni, seti waméi lun meberesenhan lániña ha híbiri.
Lunti wadügüni sun katei “luagu línsiñe uganu le lánina asalbaruni [wo]un” (1 Ko. 9:23). Anirein dan mégeiwa lan layusurúniwa gágamuru lidan wani ministeriu. Aban hénpulu, gayarati layusuruni íbiri le adundehabaliña íbirigu lidan apurichihani lun lagúarun houn íbirigu ha ñǘdünbaña apurichiha lidan amu fulasu. Másiñati himei lani somu íbiri lagúarun houn gürigia ha aturiahabarun Bíbülia luma o ha labisidahabaña lubaragiñe lidin áluahaña, dántima le dise lan fulasu le ñein lubéi heredera. Gama lumoun, lunti duari wamá luéi leberesehaniwa gágamuru dan le wapurichihaña lan lun somu gürigia (2 Ko. 6:3). Ani anhein mosu lubéi wararamagun agurabaha amu íbirigu, mabuidunbei wagúarun o wabürühan luéigiñe gágamuru lun somu wamada. Buídutimabei wetenirun lun apurichihani luma houn íbirigu ha úarabaña wama.
Samina wamá hawagun ha híbiri (1 Ko. 10:24; Fili. 2:4). Moun lumuti wasaminarun masudinin lan chülügia wamá lidoun adamuridaguni le adügǘbei lubaragiñe apurichihani ladügarügü gayara lan wagúarun lun somu íbiri o wabürühan lun luéigiñe gágamuru lun wálügüdahan halíañein lan apurichihani. Libe-agei dan, dan le tarü lan wachülürün mósuya ladügǘn iseri aransehani luáguti kaba lan uma hapurichiha íbirigu. Inarüni gayara lan wadarasaragun ladüga somu turóbuli le wásiñarun aransera. Gama lumoun, dan le wáfaagun lun chülügia wamá arufudatiwa inebesei luagu laransehan Bungiu, lun íbiri le adundehabaliña íbirigu lidan apurichihani luma houn wapaanágu.