Ka funa san un súdini lan tema le?
1. Ka katei lunbei wasaminarun luagun dan le waliihanu wani garüdia, ani ka uagu?
1 Adügǘwatu Garüdia Atalaya tuma ¡Despertad! houn gürigia lídangiñetiña sun ubóu. Ligía gibe lubéi tema tidan. Dan le waliihanu, buiti hamuga lun wouchun wasubudiruni ka lan hawuyeri gürigia unbei súdini lan kada arütíkulu ani desidírü wagíame wanügünu houn.
2. Ka burí tema tídangiñe wani garüdia gayarabei línsiñedun houn amu gürigia?
2 Tidan Garüdia Atalaya, akutihóuati san aban tema tídangiñeti Bíbülia le uágubei ayanuhaadiwa lan luma somu wani paaná lidan wadagimanu? Arihaadiwa san somu arütíkulu hawaguti familia le gayarati lahuudun lun somu waduhe? Subuditiwa san somu gürigia le saminati laweiyasuhan lidoun somu fulasu le ayanuhóuati luagu lidan somu arütíkulu tidan ¡Despertad!? Anuhein san somu garüdia to gayarabei wayusurunu lidan somu bísinisi o áfisi to lani urúei lidan fulasu le ñein lubéi wapurichiha? Kéiburi tidan muna burí to ñeinhin lubéi hadarúa gürigia wéiyaaña, gayarati wígirun somu garüdia to ayanuhatu luagu burí turóbuli le lanügübei aweiyaduni. Ani anhein luagu lubéi anarimeni tayanuha somu garüdia, buiti hamuga lun wayusurunu tidan burí aguseragülei o hábiñe súdara.
3. Abahüdaha humá aban sügǘ le arufudubalin lisudinin wígirunu somu garüdia houn gürigia ha gayarabei súdini tan houn.
3 Resultóu. Lárigiñe heresibirunu garüdia ¡Despertad! to lánina diisi-hati 2011 to gíriboun “Cómo criar hijos responsables”, aba haguarun aban feru maríeitiña Sudáfrica tidoun 25 leskuela lidan fulasu le ñein lubéi hapurichiha. Kei resultóu, wein-biamañoun leskuela eresibirutu garüdia ani aba hafanreinhanu houn aturiahatiña. Ligiaméme giñe hadügübei ábanya feru maríeitiña lidan ageiraü ligía, ani ígiratiña giñe garüdia tidan burí leskuela lidan fulasu le ñein lubéi hapurichiha. Tidan aban tídangiñe leskuela tuguya, yusu hamutu máisturugu garüdia burí tuguya lidan hani programa lánina arufudahani luma aliihani. Aba habahüdahani maríeitiña hagía katei le lun óunigiruti sirkuitu, ani aba lamisurahaniña lílana damuriguaü lun hadügüni ligiaméme. Lagumuhóun oura, gíbetu gárada achülürütu tidoun sukursali amuriahoun garüdia tuguya darí lun mosu lan imprimírua tan tanwoun.
4. Ka uagu busén wabéi lun haliihanu sun gürigia wani garüdia?
4 Afuranguagüda tumuti wani garüdia le mini lubéi sügǘ burí le asuseredubei ubouagu ani óunaha tumutiña ha aliihabalun lun haliihanu Bíbülia ani lun hafiñerun luagu Larúeihan Bungiu. Ani wánirügüñoun giñe garüdia adimureha “luagu esefuruni” (Isa. 52:7). Ligíati, busentiwa lun haliihanu sun gürigia ha wayaraatiña. Ani aban buiti manera lun wibihini lun wálügüdagun woungua: ka san un gayara lan súdini lan tema le?”.