Ida liña san larihinina Heowá?
1. Ka uagu ítara tiña lubéi Bíbülia kei aban isubusei?
1 Kada san átiri dan haríagua hungua tidan isubusei? Hibe-agei adüga wamuti sagü weyu, lugundun íderagua tumutiwa isubusei asubudirei ka lan lunbei waranseruni wawougua lun buidu lan wariawagún. Gayarati konparárua tan Bíbülia tuma aban isubusei. Dan le waliihanu, íderagua tumutiwa lun warihini ka lan hawuyeri gürigia wagía múnadagiñe woun, ligiaméme le larihibei Heowá (1 Sam. 16:7; Sant. 1:22-24). “Furangugüda tumuti [Lererun Bungiu] sun waritagun luma sun le wabusenrubei, arufudatéi ka lan tídanbei wanigi.” (Ebü. 4:12.) Dan le waliihanu Bíbülia sagü weyu ani ráramagua wagía asaminara luagu le waliihabei gayarati líderaguniwa lun warihini ka lan lunbei wasansiruni wawougua lun buídutima lan wapurichihan. Ka uagu wariñagei le? (Sal. 1:1-3.)
2. Ida liña gayara lan tíderaguniwa Bíbülia arihei ka lan wagaburibei?
2 Yusu humóun Bíbülia keisi aban isubusei. Abahüdaguni tídangiñeti Bíbülia hawagu lubúeingu Heowá ha úaraguabaña íderagua lumutiwa arihei ka burí lan igaburi aubei lagundaara Bungiu. Kéiburi urúei Dawidi arufudati meha ubebeni luagu liri Bungiu (1 Sam. 17:45, 46). Deregeguati Isaíasi lungua lau ganigi lun lapurichihan lidan aban fulasu hénrenguti (Isa. 6:8, 9). Lanarime ínsiñeni le lasandirubei Hesusu luagu Lúguchi le siélubei ligía adügübei lun larihini lani ministeriu kei aban katei le íchugubei erei luma ugundani, mama kei aban ihürügu (Huan 4:34). Apurichihatiña kristiánugu ha lánina furumiñeti sígulu lau ubebeni, afiñetiña luagu Heowá ani desidírütiña lun mígirun hamani hapurichihan (Adü. 5:41, 42; 2 Ko. 4:1; 2 Tim. 4:17). Íderagua lumutiwa wasaminarun luagun hénpulu burí le lun warihini ka lan wagaburibei, lun gayara lan wabuiduragüdüni ligaburi weseriwidun lun Bungiu.
3. Ka uagu lunti lubéi wadügüni asansiruni le wemegeirubei lau lóufudagun?
3 Aranseha huméi katei le mabuidunti. Ánhawa aríagua woungua tidan isubusei ani maranserun wamuti charati le warihibei wawougua, ni kata wadügübei. Gayarati wamuriahan luma Heowá lun líderaguniwa aríagua woungua keisi lubudubu luma lun wadügüni asansiruni le wemegeirubei wawougua (Sal. 139:23, 24; Luk. 11:13). Kei le murusunrügaali lubéi dan lubá ubóu le ani gíbetiña gürigia mégeitiña hesefurun, mosu wadügüni asansiruni lau lóufudagun (1 Ko. 7:29; 1 Tim. 4:16).
4. Ka asuseredubei lun gürigia le aliihabarun Lererun Bungiu lau duari ani aba lasansiruni igaburi wuribati le larihibei luougua?
4 Súdinitimati le tídanbei wanigi sügǘ lau ligaburi wariawagún, lugundun anigi larihiboun Heowá (1 Fe. 3:3, 4). Ka asuseredubei lun gürigia le aliihabarun Lererun Bungiu lau duari ani aba lasansiruni igaburi wuribati le larihibei luougua? Gürigia ligía aba ‘mabulieidun lani le tubeibei Lererun Bungiu; adüga lumuti le tariñagubei ani gúndaati le tímatimaati’ (Sant. 1:25). Ítara liña, gúndaatimabadiwa lidan wani ministeriu ani buídutimabei wagunfuliruni ladüga warufuduñein “luéirigun Bungiu” kamá isubusei (2 Ko. 3:18).