Yusu wamóun Bíbülia buidu kei aban isubusei

Ariñagati disipulu Santiagu ítara tiña lan Bíbülia kei aban isubusei to adügüboun lun waríagun woungua lun warihini ka lan hawuyeri gürigia wagía múnadagiñe wabiti (Sant. 1:​22-25). Ligíati, ida luba wayusurunu isubusei to buidu?

Ráramagua wamá dan le waliihanu Lererun Bungiu. Ánhawa aríagua woungua furesegueina tidan aban isubusei, gayaraati michu wamá fe anhein anihein lubéi somu asansiruni lunti wadügüni lidan ligaburi wasansiragun. Ítarameme, anhoun waliiha Bíbülia furesegueina, marihin wabéi katei le lunbei wasansiruni múnadagiñe wabiti. Lun lira, mosu araramagueina wamá dan le waliihanu.

Dan le waliihanu, samina wamá wawougua mama hawagu amu. Según ligaburi wesetirunu isubusei, gayaraabei warihini ligaburi haríawagun amu luma le lunbei haranseraguni hawougua. Gayaraati lasuseredun aban katei ítarati woun dan le waliihanu Bíbülia, ánhawa asaminara luagu le lunbei haranseruni amu hawougua. Anhein wadüga lira, míderagun lubadiwa lun waransehani wachara.

Gabaroun waméi le wayaraabei adüga. Anhein wariha tidan isubusei lérügü wuribabei wawagu, gayaraabei ladügün katei le lun lábürühan warüna. Lun masuseredun lan aban katei líbeina lira woun dan le waliihanu Bíbülia, gabaroun waméi le wayaraabei adüga (Sant. 3:17).