Aban sígulu asubudiragüdei Larúeihan Bungiu!
1. Ka ariñawagúbei houn lumutuniña Bungiu lun hadügüni kéiburi san irumu guentó?
1 “Ariha humá, lagumadihaña Urúei! Huguya lunbei hasubudiragüdüni. Ligíati, awisaha, awisaha, awisaha humá luagu Urúei luma luagu larúeihan!” Anihán burí dimurei dǘgüdati lariñagubei íbiri Rutherford, kéiburi aban sígulu guentó, lun línchahaniña íbirigu apurichihei uganu luáguti Larúeihan Bungiu lidan sun fulasu ubouagu. Ani ligía wadügübei! Ítara kei meha kristiánugu ha awinwandubaña lidan furumiñeti sígulu, apurichiha wamaali giñe uganu buiti “lidan sun ubóu” (Kol. 1:23). Lidan san irumu le sügühalibei, ka adüga wamaalibei lun wasubudiragüdüni Larúeihan Bungiu? Ani ida luba wasigirun asubudiragüdei eibu ayarafadeina lan lagunfulirun Larúeihan Bungiu san irumu lúmagiñe lagumeserun agumadiha?
2. Ida liña tídehan wani agumeiraguagüdüni lun lasubudiragüdüniwa Larúeihan Bungiu?
2 Apurichihani lidan dan le sügühalibei. Barüharu wani agumeiraguagüdüni saragu irumu asubudiragüdei Larúeihan Bungiu. Lúmagiñe irumu 1939 tanügei garüdia tótima wayusuruboun iri Garüdia Atalaya. Tasubudiragüdüñein Larúeihan Heowá. Gabügürüguati tayanuhan garüdia to luagu Larúeihan Bungiu luma luagu le lunbei ladügüni. Arufudahatu giñe ¡Despertad! Larúeihanrügüñein lan Bungiu emenigini houn sun gürigia. Ma lueirin wagundan anuhán lan bián garüdia to ásügüragüdüwatimaboun lidoun amu burí iñeñein, afanreinhóua tuguya lidan sun ubóu! (Aruf. 14:6.)
3. Írida humá fiu igaburi le yusu wamaalibei lun wasubudiragüdüni Larúeihan Bungiu.
3 Yúsuhaña lumutuniña Heowá ámuñegueinarügü ligaburi lapurichihóun Larúeihan Bungiu. Lidan lagumeseha, yúsuatu meha karü to gawagutu radiu le gamuriti, programa burí tidan radiu luma laganbahagüle ariñahani (gramófonos portátiles). Wéiriti meha lahuudun ligaburi burí apurichihani le lun lanügǘniwa uganu buiti houn hiibe-agei gürigia lidan aban dan le meha ídanbei mibe hamá íbirigu lun hapurichihani Larúeihan Bungiu (Sal. 19:4). Barühadiwa fiu irumu abuinchagüdei páhina jw.org lau saragu ariñahani lun wasubudiragüdüni Larúeihan Bungiu houn saragu míñunu gürigia, íbini houn ha awinwandubaña lidan burí fulasu le ñein lubéi máhawa lan lun wawadigimari.
4. Ka programa espechaliti aransehóuaalibei?
4 Aransehaaña giñe lumutuniña Heowá programa burí espechaliti lun lapurichihóun uganu luáguti Larúeihan. Kei hénpulu, kéiburi lúmagiñe irumu 1995 áfaaguaadiwa lun wapurichihan mámarügü muna tuagun muna, adüga wamuti giñe párükerugu, lidan tamuñeiragüle karü luma tidan burí bísinisi. Málügili lúmagiñe lagumeserúniwa aban programa espechaliti lánina lapurichihóun lidan guririguaü lidan burí ageiraü wéinamuti lidan sun ubóu. Hapurichihaña giñe lílana saragu damuriguaü lidan guririguaü, dagagüdatiña tarufudaagüle agumeiraguagüdüni o dábula tau burí agumeiraguagüdüni lidan burí fulasu le ñéingiñe lubéi hásügüra saragu gürigia. Íbini ítara, apurichihanimémegili muna tuagun muna ligaburi apurichihani létima wayusurubei lun wasubudiragüdüni Larúeihan Bungiu (Adü. 5:42).
5. Kaba chansi wadarira lidan lagumeseha iseri irumu lánina eseriwiduni le anitebei?
5 Teni wamá lun le lunbei liabin ámuñegü. Lidan iseri irumu lánina eseriwiduni le lunbei lagumeserun lidan nefu-hati, gíbebaña íbirigu agumeserutiña eseriwida kei prekursorugu ha apurichihabaña ǘrüwa-wein-diisi oura sagü hati. Ñéinbadün san hadan? Anhein siñabei lubéi, saminaadün san heseriwidun kei prekursoru ídehati aban o lóugiñe aban hati? Gayara lan yebe heseriwidun kei prekursoru o siñá lan, labinirubadün Heowá luagu furumiñeguarügü áfaaguni le hadügün lun hídehan lun lasubudiragüdüniwa Larúeihan (Mal. 3:10).
6. Ka uagu ábanbei lubéi hati espechaliti diisi-hati irumu 2014?
6 Lidan diisi-hati irumu 2014, lagunfuliruba Larúeihan Bungiu san irumu lúmagiñe lagumeserun agumadiha. Ligía buídubei lubéi luágutimaaba lan Larúeihan Bungiu tayanuha Garüdia Atalaya to lánina diisi-hati. Áfaagua wamá lun wígirunu garüdia to houn sun gürigia ha wayara. Afiñeñu luagu le lunbei liabin ámuñegü, sigí wamá súngubei apurichihei uganu buiti luáguti “Larúeihan Bungiu” houn sun ha busentiña haganbun (Adü. 8:12).