Wáyeihabei san ubebeni le larufudubei Heowá luma Hesusu lidan lidaani Aritaguagülei le?

1. Ka hadügübei gefentiña luagu Heowá lidan lidaani Aritaguagülei?

¹ Gúnfuli lumuti Heowá lisuuni lau ubebeni. Dan le layanuhabei Isaíasi 9:7 luagu burí abiniruni le lunbei lanügüni Larúeihan Bungiu, ariñagati: “Lanarime línsiñehabu Suntigabafu, ligíaba adügei katei le”. Arufudati meha giñe Hesusu, le Liráü Bungiu, aban ubebeni ítarati luagu áhuduraguni inarüniti (Huan 2:13-17; 4:34). Sagü irumu, áfaaguatiña saragu míñunu gefentiña luagu Heowá lun háyeihani ubebeni le larufudubei Heowá luma Hesusu lau haganwoundagüdüni hapurichihan lidan lidaani Aritaguagülei. Hadügübei giñe san ligiaméme irumu le?

2. Kaba wadüga lúmagiñe 14 lidan ǘrüwa-hati ani kaba wibiha anhein wadüga lau ubebeni?

² Wadagimanu lánina tederegehóun amisuragülei. Irumu le, lagumeseruba tederegehóun amisuragülei lubá Aritaguagülei samudi 14 lidan ǘrüwa-hati. Buídubei lun wagumeserun adüga aransehani lúmagiñe guentó lun wídehan lau ubebeni lidan wadagimanu le. Bereseguñu haba lílana burí damuriguaü adügei sun hayaraati lun hafanreinhanu amisuragülei houn sun gürigia ha aganóubaña lidan fulasu le atokarubei houn. Adüga wamá aransehani lun wederegerunu amisuragülei houn gürigia ha aturiahabarun Bíbülia wama, ha wabisidabaña, wapanaagu leskuelarugu, wapanaagu lidan wadagimanu luma houn waduheñu o warufudunu lan houn lídangiñe wani páhina lidan Internet jw.org/cab.

3. Ka gayaraabei wadügüni lun waganwoundagüdüni weseriwidun lidan ǘrüwa luma gádürü-hati?

³ Eseriwida kei prekursorugu ídehatiña. Línchahabadiwa ubebeni le warufudubei lun waganwoundagüdüni wani ministeriu. Chóuruti gíbebaña lan wádangiñe eseriwidutiña kei prekursorugu ídehatiña lidan ǘrüwa luma gádürü-hati, lugundun gayaraabei wanúadirun wapurichihan 30 oura. Gayaraabei wakutihani, lábugiñe furíei, ida luba lan wadügüni katei le danme wadamuridagun lidan Guñoun lánina Háhuduragun Iduheñu lun Bungiu, o danme waturiahan wábugua (Ari. 15:22). Gayaraabei ladügün ubebeni le warufudubei luagu wadagimanu le lun giñe lun habusenrun amu hídehan lidan lau ubebeni. Ánhawa adüga aransehani lun waganwoundagüdüni weseriwidun, wáyeihañeinme ubebeni le larufudubei Hesusu (Mar. 6:31-34).

4. Kaba afayeiruahaü wibiha lau wáyeihani ubebeni le larufudubei Heowá luma Hesusu?

⁴ Anhein wáyeiha ubebeni le larufudubei Heowá luma Hesusu lidan lidaani Aritaguagülei le, wibihiba saragu afayeiruahaü. Gíbetimabaña gürigia úntiña lapurichihóua lidan fulasu le atokarubei woun. Wasandirubei giñe ugundani le lanügübei leseriwidúniwa lun Heowá luma houn amu gürigia (Adü. 20:35). Ani le súdinitimabei, wagundaaragüdübei Heowá luma Hesusu, le Liráü.