Heseriwiduba san kei prekursoru ídehati?

1. Ka uagu aban lubéi lubuidun chansi lidaani Aritaguagülei lun waganwoundagüdüni wani ministeriu?

¹ Aban lubuidun chansi lidaani Aritaguagülei lun waganwoundagüdüni wani ministeriu. Lídantima dan le wararamagua asaminara luagun lueirin línsinñehabu Heowá lau líchuguni Liráü kei lebegi asalbaruni (Huan 3:16). Eteingiruni le wasandirubei tidan wanigi luagu le, hingí lumutiwa lun wayanuha luagu Heowá houn gürigia luma luagu le ladügübei luagu hafulesein gürigia (Isa. 12:4, 5; Luk. 6:45). Ma giñe lueirin ugundani le wasandirubei tidan wanigi lau wagunbirahaniña wabesinanigu, waduheñu hama wasubudiragun lidoun Aritaguagülei! Lárigiñe sun lira, lunti wasigirun íderaguaña burí gürigia ha achülürübaña lidoun Aritaguagülei. Ka uagu máfaagun hubéi lun heseriwidun kei prekursoru ídehati lidan ǘrüwa-hati, gádürü-hati o lidan seingu-hati?

2. Ka uagu buídubei lubéi ǘrüwa-hati lun weseriwidun kei prekursoru ídehati?

² Sagá wamá buiti lídangiñe ǘrüwa-hati. Buídubei ǘrüwa-hati lun leseriwidúniwa keisi prekursoru ídehati, lugundun gayarabei desidírü hamá íbirigu hadügün darandi o dimí-san oura lidan ministeriu lidan hati ligía. Anhein giñe labisidaha óunigiruti sirkuitu hani damuriguaü lidan ǘrüwa-hati, hagunbirahóuba sun íbirigu ha eseriwidutiña kei prekursorugu ídehatiña lidan hati ligía lidoun sun adamuridaguni le ladügübei óunigiruti sirkuitu hama prekursorugu ha adügübaña ǘrüwa-wein-diisi oura sagü hati o hama prekursorugu espechalitiña. Ani lúmagiñe 1 lidan ǘrüwa-hati ladügǘba aban wadagimanu espechaliti lun wamisurahaniña gürigia lidoun Aritaguagülei luagu lounwen Hesusu, le lunbei ladügǘniwa luagu-biama 26 lidan ǘrüwa-hati irumu 2013, ligíati laduraruba wadagimanu le gíbetimati dan sügǘ lau irumu le ásügürübei.

3. Ka aransehani gayarabei ladügǘniwa lúntima waganwoundagüdüni wani ministeriu?

³ Adüga humá aransehani lúmagiñe guentó. Anihán lidaani hadügün aransehani lidan lóurate hadügüni katei lun harihini anhein gayara lubéi hadügün somu burí asansiruni lun heseriwidun kei prekursoru ídehati. Kei megei hubéi lubéi hídehan hiduheñu, ka uagu mayusurun hubalin Áhuduraguni lidan Familia lun hadimurehan luagu le habuserunbei súngubei hadügün ani aranse huméime lóurate hapurichihan? (Ari. 15:22.) Mábürühala harüna anhein siñá lubéi heseriwidun kei prekursoru ídehati. Gayarati san gíbetima lan dan herederun dan le háfuridun apurichiha? Agia san lun hafuridun apurichiha somu weyu labadinagua dimaasu lumagua?

4. Kaba abinirúni weresibira anhein waganwoundagüda wapurichihan lidan ǘrüwa-hati, gádürü-hati, luma lidan seingü-hati?

⁴ Ánhawa aganwoundagüdei dan le wayusurubei lun wapurichihan lidan ǘrüwa-hati, gádürü-hati luma seingü-hati, laganwounduba giñe ugundani le wasandirubei ladüga weseriwidun lun Heowá luma houn gürigi wíledi (Huan 4:34; Adü. 20:35). Gama lumoun létima súdinitimabei lidan lira, gébegibei lan sun áfaaguni le lunbei wadügüni lun Heowá (Ari. 27:11).