Amu burí chansi lun wíchugun uéiriguni lun Heowá
1. Ka iseri aransehani íderagubadiwa lun gayara lan wíchugun “eteingiruni” o uéiriguni lun Heowá?
1 Kei wasubudiruni, gayarati heseriwidun íbirigu keisi prekursorugu ídehatiña ha adügütiña darandi oura luagu hati sagü irumu lidan ǘrüwa luma gádürü-hati, luma giñe lidan hati le lachülürün óunigiruti sirkuitu abisidahei damuriguaü. Anhein atokara bisida lidan lagumuhóun burí weyu lidan aban hati luma furumiñeti burí weyu lidan hati le asigirubei, gayarabei desidírü hamá apurichihatiña heseriwidun kei prekursoru lidan aban lídangiñe bián hati ligía. Sun ha eseriwidutiña kei prekursorugu ídehatiña gayarabei houdin lidan adamuridaguni le ladügübei óunigiruti sirkuitu hama prekursorugu ha adügübaña ǘrüwa-wein-diisi oura luagu hati luma hama prekursorugu espechalitiña, ani gayarabei ñein hamá lúmagiñe lagumeserun darí lagumuchun. Ítarati, anhein siña lubéi weseriwidun kei prekursoru lau dimí-san oura, wibihiba gádürü chansi lidan irumu lun wíchugun “eteingiruni” o uéiriguni lun Heowá lau weseriwidun kei prekursoru ídehatiña ha adügütiña 30 oura (Sal. 109:30; 119:171).
2. Kaba buiti hibiha íbirigu ha eseriwidubaña kei prekursorugu ídehatiña lídangiñe labisidahani óunigiruti sirkuitu damuriguaü?
2 Lidan lihatira bisida. Guentó gíbetimahaña íbirigu ha lunbei gayara lan heseriwidun kei prekursorugu ídehatiña lidan lidaani labisidahani óunigiruti sirkuitu damuriguaü, luma lun “wíchugun gurasu wóuniwagua” lau wapurichihan luma (Rom. 1:11, 12). Prekursorugu ídehatiña ha nadagimeinbaña labadinagua dimaasu, gayarabei hamuriahan luma lun láfuridun hama samudi o dimaasu o hárügüdün aban weyu lidan dimaasu lun háfuridun apurichiha luma. Ani hibihiba giñe saragu dǘgüdaguaü lau houdin lidan adamuridaguni hama prekursorugu ha adügübaña 70 oura.
3. Ka uagu buidu lubéi lidaani Aritaguagülei lun weseriwidun kei prekursorugu ídehatiña?
3 Lidan ǘrüwa-hati luma gádürü-hati. Ha eseriwidubaña kei prekursorugu ídehatiña luagu 30 oura lidan lidaani Aritaguagülei gachansin haaña guentó lun híchugun ‘úeiriguni lun Bungiu’ (Ebü. 13:15). Buiti ǘrüwa-hati luma gádürü-hati lun waganwoundagüdüni wani ministeriu lau weseriwidun kei prekursorugu ídehatiña. Lidan burí hati le ladügǘwa aransehani lun tafanreinhóun amisuragülei lubá Aritaguagülei. Ani kei le wéiritima lubéi háfuridun íbirigu apurichiha, gíbetimatiña íbirigu lun wapurichihan hama. Ani lárigiñe Aritaguagülei, mosu wasigirun abisidahaña gürigia ha achülürübaña lidoun Aritaguagülei ani busentiña hasigirun afurendeira lun wamisurahaniña lidoun yanu espechaliti. Chóuruti gachansintimahadiwa lan lun wíchugun uéiriguni lun Heowá lau weseriwidun kei prekursorugu ídehatiña. Tínchahabadiwa san wanigi lun wadügüni? (Luk. 6:45.)