Ida luba wayusurunu líburu Kátima san to sensiyutimaboun?

Genegeguatu líburu What Can the Bible Teach Us? (úagiru lidan garifuna) tuma líburu Kátima san. Ligiaméme inarüni tafuranguagüdübei biángubei líburu to. Gama lumoun, sensiyutimati ligaburi lafuranguagüdüniwa ariñahani tidan líburu to. Adügǘwatu lun wíderaguniña ha hénrenguti gunfuranda hamanu líburu Kátima san. Lidan tagumuha líburu, úati lanwoun ariñahani, gama lumoun anihein saragu abürüdǘni le afuranguagüdübalin somu dimurei le áfuachubei lidan kada kapítulu ani lidan aban igaburi sensiyuti. Úati álügüdahani burí lánina ebelaagülei lidan burí kapítulu ani úati giñe rekuáduru lánina águyuguagüdüni. Lubaragiñe lira, ayanuhóuati lidan fiú dimurei luagu inarüni tídangiñeti Bíbülia le akutihóubei lidan kada párafu. Ítara kei lasuseredun tau líburu Kátima san, gayarati wederegerunu líburu to lidan furumiñeguarügü ókaasion, íbini wapurichihaña lan tau amu agumeiraguagüdüni. Ida luba wayusuruni iseri ligaburi tadügǘn líburu to lun wíchugun aturiahani tídangiñeti Bíbülia?

ARIÑAHANI LE SÚDINITIMABEI. Hama hiibe-agei gürigia gayarabei wasigirun íchiga aturiahani kéiñaha wadügüni, lidan amu dimurei, waliihani párafu tídangiñe líburu Kátima san ani adüga wameime álügüdahani lun párafu ligía. Ánheinti masubudirun lubalin gürigia ligía iñeñein le ídanbei lichugúa aturiahani buidu o anhein lougua lubéi laliiradi? Lidan kesi ligía, gayarabei layusurunu apurichihati líburu Kátima san to sensiyutimaboun. Gayarabei layusuruni ariñahani le súdinitimabei le lídanbei kada kapítulu lun líchugun külase ani ínchahaleime aturiahati lun laliihani sun kapítulu lábuguarügü. Liibe-agei dan, gayarati wafuranguagüdüni aban inarüni tídangiñeti Bíbülia lidan keinsi minutu. Míbeti katei lidan ariñahani le súdinitimabei kei lidan kapítulu. Mini lan le mosu lanme laranseruni apurichihati leksióun buidu ani gabarounleime le gádanbalin aturiahati. Ani anhein haturiahan párafu burí le lídanbei kapítulu, gayarati layusuruni apurichihati ariñahani le súdinitimabei lun ladügün aban águyuguagüdüni.

ABÜRÜDǗNI BURÍ: Dimurei burí luma ariñahani le áfuachubei lidan abürüdǘni burí le furiti kei le aubei láfurida lidan kada kapítulu. Gayarabei desidírü lan apurichihati anhein hakutihabei lubéi abürüdǘni dan le haturiahañoun lan líburu.