Ida luba wayusurunu garüdia Aganba huméi Bungiu?

Adügǘwatu garüdia Aganba huméi Bungiu lau saragu dibuhu lun tíderaguniwa arufudahei inarüni le súdinitimabei tídangiñe Bíbülia houn gürigia ha únbaña hénrengu lan gunfuranda hamani le haliihabei. Lídanñein biama páhina kada leksióun ani anihein dibuhu le saminawati buidu tidan, máküwati súngubei lun larufudúniwa dibuhu le lunbei lakutihóun lárigiñe.

Gíbetimati ariñahani tidan garüdia Aganba huméi Bungiu ábame hawinwandun lun súnwandan sügǘ lau le tídanbei Aganba huméi Bungiu, gama lumoun, ligiaméme burí dibuhu tídanbei biángubei. Gayaraati tayusurún garüdia to lun laturiahóun hama gürigia ha galiiraditimaatiña. Tuguya giñe hayusuruboun hiibe-agei íbirigu dan le haturiahan hama gürigia íbini garüdia lan Aganba huméi Bungiu hayusuruboun ha aturiahabaña hama. Lidan fiu lídangiñe tubana garüdia to, anihein burí rekuáduru lau lanwoun ariñahani lun lakutihóun hama gürigia anhein emegeirúa.

Gayaraati lapurichihóun tau bián garüdia to furumiñeguarügü weyu, íbini mama lan tuguya auboun lapurichihóua lidan hati. Danme híchugun aturiahani tídangiñeti Bíbülia, yusu huméi burí dibuhu le tídanbei lun hafuranguagüdüni le tariñagubei Bíbülia. Adüga humá álügüdahani lun aturiahati óunaba láamuga lun giñe gayara lan harihini anhein gunfuranda lubalin le hariñagubei lun. Aliiha huméi bérusu tídangiñeti Bíbülia le lídanbei lagumuchagüle kada páhina ani afuranguagüda huméi. Danme lásurun haturiahanu garüdia to, aturiaha humóun líburu Kátima san tarufudahabei Bíbülia? íderagua humaamugei aturiahati awansera darime labadiseirun.