Hínsiñeti hamuga san hun hagunbirahóun tidoun Leskuela houn Apurichihatiña Larúeihan Bungiu?

Anhein gúnfulihadün lubéi lúmagiñe 23 darí 65 irumu, heseriwiduña lidan dan dayarüti, buiti hátuadi ani aranseñu hiña lun hidin eseriwida ñein lubéi mégeiwa hamá apurichihatiña, ka uagu mabuinchagüdün hubéi gárada lun hagunbirahóun tidoun Leskuela houn Apurichihatiña Larúeihan Bungiu? Lúmagiñe tagumeserun Leskuela to, gíbeeña milu feru maríeitiña hama íbirigu mamarieidungiña dandu würiña kei wügüriña abuinchagüdütiña gárada lun houdin tidan. Ani mégeiwatiña, wügüriña mamarieidungiña. Amuriaha humá luma Heowá lun líderagunün lun busentima humá heseriwidun lun luma lun háyeihani Lisaani (Sal 40:8; Mt 20:28; Ebü 10:7). Lárigiñe, samina humá ka lan katei gayaraabei hadügüni lun hagidarun lídangiñe hani buligasion dandu lidan hibagari kei lidan huádigimari gayara láamuga hidin tidan Leskuela to.

Ka katei adüga hamaalibei íbirigu ha eresibihaañabaña tídangiñe leskuela to? Añahein hádangiñe óunahoutiña lidoun burí fulasu le ñein lubéi layanuhóua amu iñeñein o lun hídehan lidan Aransehani espechaliti lánina apurichihani lidan uburugu burí wéinamuti. Añaheinhaña hádangiñe iridútiña kei ha ñǘdünbaña leweñegua óunigiruti sirkuitu, o kei óunigirutiña sirkuitu o kei misionerugu. Sunme aünha lan asaminarei ka lan gayaraabei hadügüni lúntima heseriwidun lun Heowá, áyeiha huméi igaburi le larufudunbei profeta Isaíasi: “Anahán, óunahabana” (Isa 6:8).

LÁRIGIÑE HARIHINI BIDÉU MISIONERUGU HÁTIMA ETENIRUBAÑA LUN APURICHIHANI, ÓUNABA HUMÉI ÁLÜGÜDAHANI BURÍ LE:

• 

  Ida liña hanuadirún misionerugu?

• 

  Ka wadagimanu buiti hadügübei misionerugu?

• 

  Ka abiniruni heresibirunbei misionerugu?