Kátaña san humadagubaña lidan Interneti?

Aban umadaü, ligía aban gürigia le buídubei lanaagun lungua luma amu ani hínsiñeguatiña hámagua. Lárigiñebei láfaruni Dawidi Goliadi, aba gamadagua lan Yónatan luma Dawidi (1 Sa 18:1). Aba letenirun kada aban hádangiñe lun katei buiti le luágubei le aban, adügati lira lun derebugu lan hamadagua. Ligíati, lun gamada wamá aban buiti umadaü, mosu wasubudiruni gürigia ligía buidu buidu, ani lun lira, mégeitiwa dan luma áfaaguni. Ánheinti lidan Interneti, ménrengunti hadügǘn “umadagu”, buídurügüti lau badunrun aban budún. Lidan Interneti, ménrengunti haramuduni gürigia kátañanu lan, ladüga hagía anúadirubalin kaba lan ariñahani híchiga hawougua. Ligíati lunti lubéi duari wamá dan le wánharun houn umadagu lidan Interneti. Anhein amuriaha aban gürigia le lóuguati hasubudiruni huma lun hánharun lun keisi umadaü lidan Interneti, manufude humá luéi lagañidun lau hamahadun lun o híchugun mebereseni lun. Kei anihein lubéi denchaü lidan burí katei le, añahein gürigia himei hamuti madügün hamá umadagu lidan Interneti. Ligíati, ka lunbei gabaroun humani anhaün anúadira hadügün umadagu lídangiñe Interneti?

LÁRIGIÑE HARIHINI BIDÉU BUIDULÁ BAYUSURUNI PÁHINA HOUNTI UMADAGU, ÓUNABA HUMÉI ÁLÜGÜDAHANI BURÍ LE:

• 

  Ka lunbei gabaroun humani lubaragiñe hafidirun iyawaü luma ariñahani lidan Interneti?

• 

  Ka uéigiñe lunti lubéi duari humá dan le hanúadirun umadagu lidan Interneti?

• 

  Ka uéigiñe lunti lubéi hasubudiruni átiribei lan dan hásügürün lidan Interneti? (Efe 5:15, 16).