Urúeigu gáganiguatiña lidan lagumuhóun dan

Saragu burí profesía le lídanbei dibuhu lauti abürüdǘni le ayanuhati luagu burí sügǘ le susereti lidan ábameme dan. Súngubei arufudati wawinwanduña lan lidan “lagumuhóun dan” (Dan. 12:4).

Aban dibuhu lauti abürüdǘni le ídanbei larufudúa profesía luáguti lurúeite nórute luma lurúeite suru lúmagiñe lidan irumu 1870 darí uguñe weyu lidan wadaani.

Bérusu burí tídangiñeti Bíbülia: Aruf. 11:7; 12:13, 17; 13:1-8, 12.

Profesía: Luagu saragu sígulu lábugiñeñein lubafu “mónsturu” ubóu. Lidan lagumuhóun dan ibihati “mónsturu” aban chaünti luagu lisedün lábulugu. Dan lárigiñe, aban lareidagun liwounun lisedün lichügü ani “sun gürigia” aba hafalaruni mónsturu. Yusu lumuti Satanási mónsturu le lun lageindagun “hama tirahüñü” würi.

Lagunfulirun: Lárigiñebei Guran, aba hachülaagun urúeigu ubouagu ha ebedaagutiña lun Heowá. Saragu sígulu lárigiñe, lidan lidaani Furumiñeti Wuribu Wéiriti, aba ledebilidun arúeihani gabafuti le lani Gürán Büretáña. Gama lumoun ibihayati erei dan le lóundarubei Meriga lumoun. Lídantima lagumuhóun dan le, yusu lumutiña Satanási sun urúeigu ha ubouagubaña lun léibaahaniña lubúeingu Bungiu.
Bérusu burí tídangiñeti Bíbülia: Dan. 11:25-45.

Profesía: Lidan lagumuhóun dan le ageindaguati lurúeite nórute luma lurúeite suru hámagua luagu ubafu.

Lagunfulirun: Ageindaguati ageiraü Yámani dandu luma ageiraü Gürán Büretáña kei luma Meriga. Lidan irumu 1945 dandu Unión Sowiétika hama ha lúmagiñebaña, aba hagíaña lan lurúeite nórute. Lidan irumu 1991, aba liabin Unión Sowiétika ǘnabun ani aba lárügüdüni Rusia hama ha lúmagiñebaña ubaraü kei lurúeite nórute.
Bérusu burí tídangiñeti Bíbülia: Isa. 61:1; Mal. 3:1; Luk. 4:18.

Profesía:Óunaha lumuti Heowá lani “óunagülei” lun laranseruni üma lubá lagumeserun Larúeihan Mesíasi. Gumeseti sétanu le arihúbei kei óunagülei “apurichihei iseri uganu houn gudemetiña”.

Lagunfulirun: Lúmagiñe irumu 1870, dandu Russell kei ha óundarubaña luma aba haturiahanu Bíbülia lúntima hafuranguagüdüni inarüni le tarufudahabei. Lidoun burí irumu 1880, aba híchugun fe luagu súdini lan lun hapurichihan lubúeingu Bungiu. Aban híchugun ariñahani kéiburi luagu “Busenwatiña 1,000 apurichihatiña” luma “Anuadirúaaña lun hapurichihan”.
Bérusu burí tídangiñeti Bíbülia: Mat. 13:24-30, 36-43.

Profesía: Lábunagun aban wügüri türigu licharirugu. Lárigiñe aba liabin lágani lun lábunun híduru wuribati labadinagua türigu. Aba láhüchün híduru wuribati ani aban marihúnwaali lan türigu. Lidan lidaani alubahani, aba lafanreinrawagun türigu luéi híduru wuribati.

Lagunfulirun: Lúmagiñe irumu 1870, furangutimahaali larihíniwa amu hamá kristiánugu inarünitiña hawéi kristiánugu mama inarünitiña. Lidan lagumuhóun dan le, hóundarawaguña kristiánugu inarünitiña ani fareinwaguatiña hawéi kristiánugu ha mama inarünitiña.
Bérusu burí tídangiñeti Bíbülia: Dan. 2:31-33, 41-43.

Profesía: Ugudi lauti gürabu luma múa luáguñein aban guáriua le adügǘbei lau ámuñegueinarügü luwuyeri ubuñei.

Lagunfulirun: Mini lan múa, gürigia furumiñeguarügü ha lábugiñebaña lubafu Gürán Büretáña luma Meriga ha ebedaagubaña houn urúeigu ha. Adügati katei le lun mayusurun hamani urúeigu ha habafu lau éregu kamá hamuga aban gürabu.
Bérusu burí tídangiñeti Bíbülia: Mat. 13:30; 24:14, 45; 28:19, 20.

Profesía: Alubahóuati “türigu” areidúa ligía “tidoun lagei”, ani iridúati “musu úaraguati ani gunfuranda ligía” “lun larihin hau ha lúbiñebaña”. Gumeseti lapurichihóun “uganu buiti le luáguti larúeihan Bungiu” aburuchagua “lidan sun ubóu”.

Lagunfulirun: Lidan irumu 1919 iridúati musu úaraguati lun larihin hau lumutuniña Bungiu. Lúmagiñe dan ligía, ábatima haganwoundagüdüni Aturiahatiña Bíbülia hapurichihan. Uguñe weyu, apurichihatiña gefentiña luagu Heowá lidan lóugiñe 200 ageiraü ani adügatiña agumeiraguagüdüni tídangiñeti Bíbülia lidan lóugiñe 1,000 iñeñein.
Bérusu burí tídangiñeti Bíbülia: Dan. 12:11; Aruf. 13:11, 14, 15.

Profesía: Ariñagati aban mónsturu lauti bián ganchu lun ladügǘniwa “aban liyawa mónsturu” ani “ábati líchugun ibagari” lun.

Lagunfulirun: Adügati arúeihani gabafuti ubouagu Gürán Büretáña luma Meriga lun ladügǘniwa aban Sétanu hani Néchani. Ru hamuti lílana amu ageiraü hídehan tun. Lau lásügürün dan, aba giñe lóundarun lurúeite nórute tumoun óundaruni to, gama lumoun lídanrügü irumu 1926 darí 1933. Ibiha lumuti Sétanu hani Néchani uéiriguni le yuubei lúnrügü Larúeihan Bungiu, ítara kei lasuseredun dan lárigiñe tun Óundaruni hani Néchani.
Bérusu burí tídangiñeti Bíbülia: Dan. 8:23, 24.

Profesía: Aban urúei hanarimeti luriban le agünrinchaguti “katei lidan aban igaburi le hénrenguti lafiñerún”.

Lagunfulirun: Adügaali arúeihani gabafuti ubouagu le lani Gürán Büretáña luma Meriga saragu damichi. Kei hénpulu, lidan Libiaman Wuribu Wéiriti, adügati Meriga saragu günringuaü le masusereduñahagili lau lachüürün bián bonba gagünrinchaguaditu luagun aban lídangiñe ageiraü le lágani Gürán Büretáña luma Meriga.
Bérusu burí tídangiñeti Bíbülia: Dan. 11:31; Aruf. 17:3, 7-11, 16.

Profesía: Lamudeirun “mónsturu funati” le díisibei iganchun lídangiñe fusu le mébehabei, ani ligía liwidunbei urúei. Ayanuhatu liliburun Danieli luagu urúei le kei “katei háhünenati ani le gagünrinchaguagüdadibei”.

Lagunfulirun: Rédeitu Sétanu hani Néchani mawadigimaridunga lidan Libiaman Wuribu Wéiriti. Lárigiñebei wuribu, aba ladügǘniwa lun ñein tan Óundaruni hani Néchani. Ítara kei lasuseredun tun Sétanu hani Néchani, ibiha tumuti Óundaruni hani Néchani uéiriguni le yuubei lúnrügü Larúeihan Bungiu. Tábürühaba Óundaruni hani Néchani tuagun relihión.
Bérusu burí tídangiñeti Bíbülia: 1 Tesa. 5:3; Aruf. 17:16.

Profesía: Híchugubei néchanigu ñunsu “lídanñein darangilaü luma achoururuni sun katei”, lárigiñe, ábame lábürühan “diisi ganchu” luma “mónsturu” tuagun “horu” ani aba hagumuchun tau. Lárigiñe, ábame hagünrinchawagun néchanigu.

Lagunfulirun: Hariñaguba néchanigu adügaaña lan lun ñein lan darangilaü luma achoururuni. Lárigiñe, sunme néchanigu ha íchugubalin hídehan tun ONU ábame hagünrinchagunu sun óundaruni to lánina relihión mama inarünitu. Ítara luba lagumeserun furumiñeti fánreinti le lánina óunwenbu asufuriruni. Lagumuchuba asufuriruni le danme le lagünrinchaguni Hesusu sun katei le lábugiñebei lubafu Satanási lidan Arümahedón.
Bérusu burí tídangiñeti Bíbülia: Ese. 38:11, 14-17; Mat. 24:31.

Profesía: Lebelurun Gogu lidoun hamúan lumutuniña Bungiu. Lárigiñe aba hóundaraguniña ánheligu kristiánugu ‘anuadirúaaña’.

Lagunfulirun: Lábürühaba lurúeite nórute hama ha híbiri urúeigu ubouaguna hawagun lumutuniña Bungiu. Fiu dan lárigiñe hábürühan hawagun, hóundarawaguba kristiánugu anuadirúaaña sielu, ha añahaguabaña ya ubouagu.
Bérusu burí tídangiñeti Bíbülia: Ese. 38:18-23; Dan. 2:34, 35, 44, 45; Aruf. 6:2; 16:14, 16; 17:14; 19:20.

Profesía: ‘Lagañeiruni’ le wariñubei luagu “gabayu haruti” wuribu lau lagünrinchaguni Gogu hama lisudaranigu. Aba lagurún mónsturu lidoun “lagunu le laubei watu gemeti”, günringuawa ligía lueirin guáriua.

Lagunfulirun: Láfuridun Hesusu, le lurúeite Larúeihan Bungiu, ageindagua luagu hafulesein lumutuniña Heowá. Úara hama 144,000 hama giñe ánheligu, hagünrinchagubaña sun lánigu Gogu, lidan amu dimurei, sun lílana polítika ha lábugiñebaña lubafu Mafia.