ATURIAHANI 20
Uganu le tídanbei líburu Arufudúni houn láganigu Bungiu
“Ábati hóundaraguniña urúeigu lidan fulasu le gíribei Arümahedón lidan hererun ebüréu” (ARUF. 16:16).
UREMU 150 Áluaha huméi Bungiu lun hesefurúniwa!
LE LUNBEI WATURAHANIa
1. Según líburu Arufudúni, ka ladügübei Satanási houn lubúeingu Bungiu?
ARUFUDA tumuti líburu Arufudúni gumeseeli lan Larúeihan Bungiu arúeiha sielu ani bugawaali lan Satanási siélugiñe lun ubouagun (Aruf. 12:1-9). Aban awalidaguni lira houn ha awinwandubaña sielu, gama lumoun, barüti saragu turobuli woun wagía le awinwandubei ya ubouagu. Ka uagu? Ladüga arufuda lumuti lanarime ligañi houn lubúeingu Bungiu ha awinwandubaña ya ubouagu (Aruf. 12:12, 15, 17).
2. Kaba íderaguawa lun derebugu lan wafiñen?
2 Ida luba derebugu lan wafiñen laganagua léibaahaniwa Satanási? (Aruf. 13:10). Líderagubadiwa wasubudiruni kaba lan asusereda ámuñegü. Kei hénpulu, tidan líburu Arufudúni, ayanuhati apostolu Huan luagu fiu abinirúni le lunbei weresibiruni yarafa madise. Aban lídangiñe abinirúni ligía, hagünrinchawagun láganiñu Bungiu. Ariha waméi le tariñagubei líburu Arufudúni hawagu luma kaba lan asusereda houn.
YÚSUATI SEINI LUN LAYANUHÓUN HAWAGU LÁGANIGU BUNGIU
3. Ka burí fiu sínbolu arufudúbei tidan líburu Arufudúni?
3 Lidan furumiñeti bérusu tidan líburu Arufudúni arihúati furangu luagu yusua lan arufudúni o seini (Aruf. 1:1). Ayanuhóuati hawagu láganigu Bungiu kamá hamuga animaalugu gáñitiña. Kei hénpulu, ayanuhóuati luagu aba lan “lamudeirun aban mónsturu baranahagiñe; sédüñein lichügü diisi liganchun” (Aruf. 13:1). Lárigiñe, “ábaya narihin ábaya mónsturu lamudeirun múarugugiñe”. Aba ladimurehan kei düragón ani “ábürügüdati watu gemeti siélugiñe” (Aruf. 13:11-13). Ayanuhóuati giñe luagu “aban mónsturu funati” le uágubei wariñu tan aban horu. Mini hamá ǘrüwa mónsturu ha, áganiñu ha awügürihóubaña lun Heowá luma lun Larúeihan luagu saragu dan. Ligía súdini lubéi lun wasubudiruni kátaña lan (Aruf. 17:1, 3).
GÁDÜRÜ MÓNSTURU WÉINAMUTIÑA
Aba háfuridun “baranahagiñe” (Dan. 7:1-8, 15-17). Mini lan arúeihani gabafuti ubouagu hátima gánibaña hama lumutuniña Bungiu lúmagiñe lidaani Danieli (Ariha huméi párafu 4 luma 7).
4, 5. Ida luba líderaguniwa Danieli 7:15-17 lun gunfuranda wamani ka lan mini lubéi sínbolu le tídanbei líburu Arufudúni?
4 Lubaragiñe wakutihani kátaña lan áganiñu ha, mégeitiwa wasubudiruni ka lan mini lubéi sínbolu le. Lun lira, buítimati wígirun lun tafuranguagüdüni Bíbülia woun. Liibe-agei sínbolu le áfuridubei tidan líburu Arufudúni ayanuhóuati luagu tidan amu burí líburu tidan Bíbülia. Kei hénpulu, arihati profeta Danieli lidan aban uénedü “háfuridun gádürü mónsturugu wéinamutiña baranahagiñe” (Dan. 7:1-3). Danieli guánarügü ariñagubei gádürü lan mónsturugu ha mini hamá gádürü “urúeigu” o gumadimatiña (aliiha huméi Danieli 7:15-17). Íderagua lumutiwa ariñahani furanguti le lun gunfuranda wamani mónsturugu lan ha uágubaña layanuhóua tidan líburu Arufudúni mini lan giñe gumadimatiña ha lánina polítika.
5 Akutiha wamá fiu lídangiñe sínbolu le tídanbei líburu Arufudúni. Lidan akutihani le, tíderagubadiwa Bíbülia lun gunfuranda wamani le mini lubéi. Gumese wamá ayanuha hawagu mónsturu. Furumiñe warihaali ka lan mini lubéi kada aban hádangiñe. Lárigiñe warihiba kaba lan asusereda houn burí mónsturugu ha. Ani lagumuhóun wakutihabei sun le wafurendeirubei lídangiñe.
HASUBUDIRÚNIWA LÁGANIGU BUNGIU
MÓNSTURU LE SÉDÜBEI ICHÜGÜ
Aban mónsturu amudeira baranahagiñe sédüñein lichügü, 10 liganchun ani 10 liridin (Aruf. 13:1-4). Mini lan sun arúeihani ubouaguna ha agumadirubaliña gürigia lidan sun dan le sügühalibei. Mini lan sedü ichügü, sedü arúeihani gabafuti ubouagu ani le gániti hama lumutuniña Bungiu (Ariha huméi párafu 6 darí 8).
6. Ka mini lubéi mónsturu le sédübei ichügü le uágubei layanuhóua lidan Arufudúni 13:1-4?
6 Ka mini lubéi mónsturu le sédübei ichügü? (Aliiha huméi Arufudúni 13:1-4). Ariñagatu Bíbülia ítara liña lan mónsturu le kei aban géigusi, le lugudi kei lugudi osu, liabin liyuma kamá liyuma liñún, ani díisiñein liganchun. Ariñawagúati giñe ligiaméme hawagu gádürü mónsturugu ha uágubaña layanuhan Danieli lidan kapítulu 7, lau sun lira, ayanuhatu líburu Arufudúni anihein lan sun katei le luágurügü aban mónsturu. Ligíati, mama ábanrügü arúeihani gabafuti mini lan mónsturu le. Ariñagatu líburu Arufudúni aba lan “lichugúniwa ubafu lun hawagu sun rasa, fulasu, iñeñein luma néchani”. Ligía wéiritimati lubafu sügǘ luéi lubafu aban urúei le arúeihabalin aban ageiraü (Aruf. 13:7). Ligíati, mini lan mónsturu le, sun arúeihani le agumadirubaliña gürigia lidan sun dan le sügühalibei (Apur. 8:9).b
7. Ka mini lubéi lisedün lichügü mónsturu?
7 Ka mini lubéi lisedün ichügü? Íderagua lumutiwa kapítulu 17 tidan líburu Arufudúni, lun gunfuranda wamani le ariñawagúbei luagu aban mónsturu lidan kapítulu 13. Ariñagati Arufudúni 17:10: “[Añahein] sedü urúeigu. Seingü hádangiñe urúeigu hagía, gumuhali harúeihan, aban hádangiñe, larúeihaña guentó, le aban, miábingili. Danme liabin lagumuhóun, larúeihaba luagu murusun dan”. Añahein sedü urúeigu ha layusurubaña Satanási, añahein sedü ítara haña kei “ichügü” lugundun resibihaña saragu ubafu. Ligía arúeihani gabafuti ubouagu le gánihalibei hawagu lumutuniña Heowá. Lidan meha lidaani apostolu Huan, arúeihaali meha seingü lídangiñe arúeihani gabafuti le ani ábürühaali meha giñe: Ehiptu, Asiria, Babilónia, Media luma Pérüsia luma Güresia. Le lisisin Roma, ligía meha arúeihabei lidan lidaani Huan dan le labürüdünbarun líburu Arufudúni. Káteibei bugati lisedün luma lagumuhóun arúeihani gabafuti ubouagu o ichügü?
8. Ka lisedünbei lichügü mónsturu?
8 Kei le aubei warihei, íderagua lumutiwa profesía le tídanbei liliburun Danieli lun wasubudiruni le mini lubéi lisedün luma lagumuhóun lichügü mónsturu. Ka arúeihani gabafuti le agumadihabei ubouagu lidan lagumuhóun dan le “lidan luéyuri Aburemei”? (Aruf. 1:10, TNM). Arúeihani gabafuti Reino Unido luma Meriga. Ligía lisedünbei lichügü mónsturu le uágubei layanuha Arufudúni 13:1-4.
ABAN MÓNSTURU LAU BIÁN GANCHU LUAGU KAMÁ LIGANCHUN MUDÚN
Aba “lamudeirun múarugugiñe” aba “ladimurehan kamá aban düragón”. Ani “ábürügüdati watu gemeti siélugiñe” ani kei profeta lubéi yeeti, adügati milaguru (Aruf. 13:11-15; 16:13; 19:20). Mónsturu le, biámabei liganchun, mini lan, arúeihani gabafuti ubouagu Reino Unido luma Meriga ani profeta giñe yeeti, lugundun “aba leyeeduniña ha ubouagubaña” ani ínchaha lumutiña lun hadügagüdün aban “liyawa mónsturu” le 7 ichügü ani 10 liganchun (Ariha huméi párafu 9).
9. Ka mini lubéi mónsturu le laubei “bián ganchu kamá liganchun mudún”?
9 Ariñawagúati lidan kapítulu 13 lidan Arufudúni le ladügübei lisedün ichügü, lidan amu dimurei, Reino Unido luma Meriga. Ariñawagúati luagu: “Neinñein bián ganchu luagu kei liganchun mudún, gama lumoun ítara liña ladimurehan kamá aban düragón”. Adügati mónsturu le “óunwenbu burí milaguru, ábürügüdati watu gemeti siélugiñe lun múarugun hagibugiñe gürigia” (Aruf. 13:11-15). Lidan kapítulu 16 luma 19, wáwati lun “profeta yeeti” (Aruf. 16:13; 19:20). Ayanuhóuati giñe luagu arúeihani gabafuti le, Reino Unido luma Meriga, tidan liliburun Danieli dan le lariñagubei: “Lagünrinchaguba katei lidan aban igaburi le hénrenguti lafiñerun” (Dan. 8:19, 23, 24,). Ligía asuseredubei lidan Libiaman Wuribu Wéiriti. Le adügübei lun lagumuchun wuribu, tadüga bián bonba wéinamutu to achürǘüboun, to hadügüboun aturiahatiña siensia lídangiñetiña burí ageiraü, Reino Unido luma Meriga. Ítara liña ladügün ageiraü burí gabafuti le, lun lábürühan “watu gemeti siélugiñe lun múarugun”.
ABAN MÓNSTURU FUNATI
Wariñutiña aban horu luagu, Babilónia to Wéiriboun tíribei. Ariñawagúati luagu mónsturu le ligía lan hawidünbei urúeigu (Aruf. 17:3-6, 8, 11). Horu meha to abugurubalin mónsturu, lárigiñe ábame lagünrinchagunu. Mini tan horu sun relihión to ubouaguboun to mama inarünitu. Mini lan mónsturu, Óundaruni Hani Néchani to íderagubaliña urúeigu ubouaguna lun hawanserun (Ariha huméi párafu 10, 14 darí 17).
10. Ka mini tubéi “liyawa furumiñeti mónsturu”? (Arufudúni 13:14, 15; 17:3, 8, 11).
10 Guentó, ariha wamá ámuya mónsturu. Lau sun genegegua lan luma mónsturu le sédübei ichügü, mónsturu le, guchu likolorun luma funati. Ariñagatu líburu Arufudúni luagu aban lan “liyawa mónsturu” ani ligía lan “hawidünbei urúeigu” (aliiha huméi Arufudúni 13:14, 15; 17:3, 8, 11).c Ariñawagúati luagu “urúei” le luagu gabagari lan meha ani úaali, dan lárigiñe ábaya liabin. Genegeti le luma le asuseredubei tun Óundaruni hani Néchani to ídehaboun hama urúeigu ha ubouaguna, to meha asubudirúaboun furumiñe kei Sétanu hani Néchani. Aban úaaru lan dan le lageindawagunbei Libiaman Wuribu Wéiriti. Lau lásügürün dan, ábaya tachülaagun lau iri le aubei wasubudiruboun uguñe weyu.
11. Kaba hadüga mónsturugu polítiku, ani ka uagu moun lumuti lubéi wanufudedun hawéi?
11 Lau le tariñagubei, ínchaha hamutiña mónsturu, ha lánina polítika, gürigia lun hebedaagun lun Heowá luma houn lumutuniña. Ariñagati Huan, ítara haña lan kamá hamuga hóundaraguñanu “sun urúeigu ha ubouagubaña” lubá wuribu le gíribei Arümahedón, “le lánina óunwenbu luéyuri Bungiu le Suntigabafu” (Aruf. 16:13, 14, 16). Lau sun lira, moun lumuti wanufudedun. Lau lóufudagun, lesefurubaña Heowá sun ha ídehabaña lun lawanserun larúeihan (Ese. 38:21-23).
12. Kaba asusereda houn sun mónsturugu?
12 Kaba asusereda houn sun mónsturugu? Ru lumuti Arufudúni 19:20 óunabagülei: “Aban ladaürǘn mónsturu luma profeta yeeti, le buga adügübei milaguru ligibugiñe mónsturu. Lau burí milaguru ligía, eyeeda laña meha profeta ligía ha ígiraguagüdübaña houngua lun labürüdǘn liri mónsturu hawagu, hudugua hagía tun liyawa. Dánduti mónsturu kei profeta yeeti ligía, aban hagurún wínwanñu lidoun lagunu le lídanbei watu gemeti luma súfuru”. Hagünrinchawaguba lun súnwandan danme añahagua lan urúeigu ha láganiñubaña Heowá arúeiha, ábame lagünrinchaguniña lun súnwandan.
13. Ka turobuli úmabei wagagibudagua wagía kristiánugu hadüga gumadimatiña?
13 Le wafurendeirubei. Kei kristiánugu wabéi, mosu úaragua wamá lun Bungiu luma lun Larúeihan (Huan 18:36). Lun wibihini, mosu gaganbadi wamá lun Heowá ani mádaragun wagíame woungua lidoun polítika le lani ubóu le. Gama lumoun gayaraati hénrengu lan katei le, ladüga busentiña gumadimatiña lun luéigiñe wamá hóubadina, dandu lau le wariñagubei luma lau le wadügübei. Ha ígiraguagüdübaña houngua aban lichugún lumakün mónsturu hawagu (Aruf. 13:16, 17). Ánhañati ha gawagubalin makü heferidirubei lufulesein Heowá luma chansi lun hawinwandun lun súnwandan (Aruf. 14:9, 10; 20:4). Ligía súdini lubéi lun gaganbadi wamá lun Heowá sunsuinagubei, meberesenga ánhaña adügüdara gumadimatiña wawagu lun luéigiñe wamá hóubadina.
LAGUMUCHÚN TAU HORU
14. Ka larihibei apostolu Huan le adügübei lun taweiridun lanigi? (Arufudúni 17:3-5).
14 Ariñagati apostolu Huan arihaali lan amu katei le adügübei lun taweiridun lanigi. Ka katei ligía? Aban würi wariñu luagu aban hádangiñe mónsturu le gáñiti (Aruf. 17:1, 2, 6). Ítara liña taríawagun kei aban “óunwenbu horu”, “Babilónia to wéiriboun” ligía tíribei. “Aganawaaña urúeigu ha ubouagubaña lidan ahoruhani tuma” (aliiha huméi Arufudúni 17:3-5).
15, 16. Katoun san “Babilónia to wéiriboun”, ani ida liña wasubudiruni?
15 Katoun san “Babilónia to wéiriboun”? Mama aban óundaruni lánina polítika würi to ladüga ariñagati Arufudúni aban lan tahoruhan hama urúeigu ha ubouagubaña (Aruf. 18:9). Lau wariñu tan luagu mónsturu mini lan busén tan tagumadiruniña. Mama giñe tuguya aban óundaruni lánina bísinisi, ladüga ariñagati Arufudúni wabaruaguounméme ayahuatiña lan “alugurahatiña burí ha ubouagubaña” tárigi (Aruf. 18:11, 15, 16).
16 Tidan Bíbülia, libe-agei dan yúsuati dimurei ahoruhani luma agabarahani lun layanuhóun hawagu ha áhuduragubaña lun amu katei ani mama lun Bungiu. Gayaraati layanuhaña lan hawagu ha ariñagubaña háhuduraguña lan lun Bungiu, lau sun lira, háhuduraguña houn guáriua o hawagu ha gamadaguabaña luma ubóu (Ese. 16:2, 35, 36; Sant. 4:4). Ánheinti dan le tayanuha Bíbülia hawagu gürigia ha úaraguabaña lun Bungiu, yusu tumuti dimurei arumani o gañüngiru (2 Ko. 11:2; Aruf. 14:4). Lidan meha binadu uburugu Babilónia gíbetu meha relihión mama inarünitu ñein. Ligía mini tubéi Babilónia to Wéiriboun sun relihión mama inarünitu. Le linarün katei, tuguya sun relihión mama inarünitu to ubouaguboun (Aruf. 17:5, 18; ariha huméi lanwoun ariñahani tidan líburu Kátima san tarufudahabei Bíbülia?, páhina 219 “Katoun san ‘Babilónia to Wéiriboun’?”).
17. Kaba asusereda tun Babilónia to Wéiriboun?
17 Kaba asusereda tun Babilónia to Wéiriboun? Ariñagati Arufudúni 17:16, 17: “Ani diisi ganchu le barihubei luagu mónsturu, lememe díisibei urúeigu, teyereeguduba horu houn, ábame hígirunu fuíwañu, surusu; héigibei tǘgürügü, ábame hágudunu lau watu gemeti. Ru laali Bungiu tidoun hanigi lun hadügüni le labusenrubei”. Ligíati, ladügüba Heowá lun hayusuruni néchanigu mónsturu koloru guchu luma funati, lidan amu dimurei, Óundaruni hani Néchani, lun hábürühan tuagun relihión mama inarünitu luma lun hagumuchun tau sunsuinagubei (Aruf. 18:21-24).
18. Ka lunbei wadügüni lun mádaragua wamá woungua lidoun katei le tánina Babilónia to Wéiriboun?
18 Ka wafurendeirubei. Súdini lun wárügüdün luagu áhuduraguni “le harumabei le aubei lagundaara Wáguchi Bungiu” (Sant. 1:27). Maweiyasun wamá ígiraguagüda woungua lun arufudahani iyeeniti, le túmagiñeti Babilónia to Wéiriboun, ni lun fedu le ñǘbuinbei túmagiñe, ni lun liwiye hagaburi tílana, ni lun échuni le hámagiñeti máfianu. Ligíati, sigí wamá ariñaga houn gürigia: “Furí humá Babilóniagiñe”. Ánhaña áfurida ñéingiñe, mafanranbaña lidan tifigoun Babilónia to Wéiriboun (Aruf. 18:4).
ABEICHÚNI LE LUNBEI LIBIHINI LÉTIMA LÁGANI BUNGIU
ABAN ÓUNWENBU DÜRAGÓN FUNATI
Aba líchugun Satanási ubafu lun mónsturu le sédübei ichügü (Aruf. 12:3, 9, 13; 13:4; 20:2, 10). Ladaürǘba Satanási, létima lágani Heowá luagu 1,000 irumu lidan fusu le mébehabei. Lárigiñemeti ábame lagurún “lidoun lagunu le laubei watu gemeti luma súfuru” (Ariha huméi párafu 19 luma 20).
19. Katei san “óunwenbu düragón funati”?
19 Ayanuhatu giñe líburu Arufudúni luagu “aban óunwenbu düragón funati” (Aruf. 12:3). Awuribuhati düragón le luma Hesusu hama lánigu ánheligu (Aruf. 12:7-9). Ábürühati giñe hawagun lumutuniña Heowá ru ligía ubafu houn urúeigu ubouaguna (Aruf. 12:17; 13:4). Katei san düragón le? Ligía le “binadu hewe ligira le gíribei Mafia o Satanási” (Aruf. 12:9; 20:2). Ligía abugurubaliña sun láganiñu Bungiu.
20. Kaba asusereda lun düragón?
20 Kaba asusereda lun düragón? Ariñawagúati lidan Arufudúni 20:1-3, aba lan lachüürüni aban ánheli Satanási lidoun fusu le mébehabei le ñein lubéi ladaürǘwa. Ladaürǘba Satanási luagu 1,000 irumu lun “meyeehandigia laaña lan néchanigu” darí lagumuchun dan ligía. Lagumuhóun ábame lagurúniwa lidoun lagunu le laubei “watu gemeti luma súfuru”. Mini lan le lagumuchúba lau lun súnwandan (Aruf. 20:10). Mame buídubei ibagari úouga Mafia hama lumafianu!
21. Ka uagu gunda wabéi lau le waliihabei tidan líburu Arufudúni?
21 Ma gúndaagüda lumutiwa wasubudiruni le mini lubéi arufudúni le tídanbei líburu Arufudúni? Amu luéi wasubudiruni kátaña lan láganibaña Heowá, ariha wamaali giñe kaba lan asusereda houn. Ligíati, ‘gúndaatiña gürigia ha aliihabalin hama ha aganbubalin laliihóun uganu le, le eresibirúabei lúmagiñe Bungiu, adüga hagía gasu lau katei le bürüwañubei ya’ (Aruf. 1:3, LBID). Kábati abinirúni heresibira gürigia ha úaraguabaña danme le lagumuchun Bungiu hau láganiñu? Warihibei lidan lǘrüwan aturiahani.
UREMU 23 Gumeselá Heowá Larúeihan
a Tidan líburu Arufudúni, yúsuati sínbolu lun layanuhóun hawagu láganigu Bungiu, ani íderagua tumutiwa liliburun Danieli gunfurandei ka lan mini lubéi sínbolu burí le. Lidan aturiahani le, lagoubaguagüdüwaba fiu profesía le tídanbei liliburun Danieli luma fiu le tídanbei líburu Arufudúni. Líderagubadiwa asubudirei kátaña lan láganiñubaña Bungiu. Lárigiñeme ábame warihini ida luba lan lagumuchún hau.
b “10 ganchu” ligía aban katei le achoururagüdübalin sun lan gumadimatiña mini lubéi mónsturu le sédübei ichügü. Tidan Bíbülia, liibe-agei dan mini lan númeru 10 aban katei le dayarüti sunsuinagubei.
c Amu liyawa mónsturu le luéi le furumiñeti mónsturu, ladüga manügünti ridi luagu liganchun (Aruf. 13:1). Ladüga hádangiñe sedü urúeigu liabin ani hagía íchugubaña ubafu lun (lidan jw.org ariha huméi ariñahani “¿Qué es la bestia de color escarlata del capítulo 17 de Apocalipsis?”).