Ka tariñagubei líburu Arufudúni luagu ámuñegü?

1. Ka katei súdiniti lunbei hanúadiruni sun gürigia?

UGUÑE weyu, sun gürigia mosu hanúadirun aban katei súdiniti: anhein luéigiñebaña lubéi lóubadina Heowá, Bungiu le garichabei lun larúeihani sun ubóu, o anhein luéigiñebaña lubéi lóubadina Satanási, le salufuribei, létima lágani Bungiu. Siñati werederun manúadahanga, lugundun lídangiñe le lunbei wanúadiruni dipeni lan anhein wibihibei lubéi ibagari magumuchaditi o mibihin wabéi lan (Mat. 25:31-33, 46). Lídanme “óunwenbu asufuriruni”, sunme lubúeingu Heowá ha úaragubaña heresibiruba aban makü lánina ibagari (Aruf. 7:14; Ese. 9:4, 6). Ani gürigia ha ibihubalin lumakün mónsturu hagünrinchawaguba (Aruf. 14:9-11).

2. a) Ka un línchahawa Ebüréu 10:35-39 lun wadügüni? b) Ida liña tíderaguniwa líburu Arufudúni?

² (Aliiha huméi Ebüréu 10:35-39). Anhein anúadira hubéi luéigiñe humá lóubadina Larúeihan Heowá, buiti hadüga. Chóuruti busén humá híderagun amu lun hadügüni ligiaméme. Ligíati, gayaraati lahuudun le tariñagubei líburu Arufudúni hun. Ariñaga tumuti líburu to woun kaba lan asusereda houn ha ebedaagubaña lun Heowá. Ani afuranguagüda tumuti abinirúni le lunbei habihini ha ídehabaña lau úaraguni lun lawanserun Larúeihan. Líderagubadiwa wakutihani sun ariñahani súdiniti le, lugundun líderagubadiwa lun wachoururuni busén wamá wasigirun eseriwida lun Heowá. Lanwoun lira, gayaraati wayusuruni le wafurendeirubei lun wínchahaniña amu lun hanúadiruni le buídubei luma lun mígirun hamani heseriwidun lun Heowá.

3. Kaba burí álügüdahani wóunaba lidan aturiahani le?

³ Wóunabubei álügüdahani le lidan aturiahani le: Kaba asusereda houn ha ídehabaña lun lawanserun Larúeihan Bungiu? Ani kaba asusereda houn ha íderagubalin mónsturu funati le uágubei tayanuha líburu Arufudúni?

LE LUNBEI HERESIBIRUNI HA ÚARAGUABAÑA

4. Ka larihubaña Huan úara luma Hesusu sielu?

⁴ Arihati apostolu Huan aban arufudúni hau bián sétanu gürigia ha luéigiñebaña lóubadina Larúeihan Heowá ani aba labiniruniña lau líchugun ibagari magumuchaditi houn. Le furumiñeti, añahein 144,000 gürigia lidan (Aruf. 7:4). Sagawatiña ubouagugiñe lun harúeihan luma Hesusu. Sun hagía harúeihabei Ubóu siélugiñe (Aruf. 5:9, 10; 14:3, 4). Lidan arufudúni ligía, ariha lumutiña Huan úara luma Hesusu rara ligibuagu wübü Sión sielu (Aruf. 14:1).

5. Kaba asusereda yarafa madise houn kristiánugu anuadirúaaña ha ubouagubaña?

⁵ Lúmagiñe lidan hadaani apostolugu darí guentó, anuadirúaaña saragu milu gürigia lun hádangiñe hamá 144,000 (Luk. 12:32; Rom. 8:17). Ariñawagúati lun apostolu Huan fiúrügübaña lan kristiánugu anuadirúaaña eredera ubouagu lidan lagumuhóun dan. Lubaragiñe lagumeserun óunwenbu asufuriruni, líchugubei Bungiu lagumuhóun seyu hawagu kristiánugu anuadirúaaña ha añaheinguabaña ubouagu, mini lan le gunda lan Bungiu hau (Aruf. 7:2, 3; 12:17). Lárigiñe lagumeserun óunwenbu asufuriruni, hanügǘba anuadirúaaña ha ubouagubaña sielun lun hóundaragun hama ha híbiri lílana 144,000 ha óunwegubaña lau úaraguni. Harúeihaba luma Hesusu lidan Larúeihan Bungiu (Mat. 24:31; Aruf. 5:9, 10).

6, 7. a) Ka amu sétanu larihibei Huan, ani ka wasubudirubei hawagu? b) Ka uagu lunti lubéi hetenirun kristiánugu anuadirúaaña hama “saragu gürigia” lun le lariñagubei Arufudúni kapítulu 7?

⁶ Lárigiñe larihini sétanu le siélubei, arihati Huan “saragu gürigia”. Gíbetiña gürigia hagía darí lun siñá lan habahüdǘn (Aruf. 7:9, 10). Ka wasubudirubei hawagu? Ariñawagúati lun Huan: “Añahán ha sügühañabaña luéigiñe óunwenbu asufuriruni, ha chibá hamaaruboun hadaüragun, harumagüda hamóun lau lita Mudún” (Aruf. 7:14). Lárigiñe hásügürün lídangiñe óunwenbu asufuriruni, hawinwanduba “saragu gürigia” ha ubouagu ani hibihuba saragu abinirúni (Sal. 37:9-11, 27-29; Ari. 2:21, 22; Aruf. 7:16, 17).

⁷ Meberesenga anhein anuadirúaadiwa lubéi lun wawinwandun sielu o lun werederun ubouagu, sun wagía lunti waríagun woungua lidan arufudúni le afuranguagüdüwabei lidan kapítulu 7 tidan líburu Arufudúni. Ábanbei dan lánina saragu ugundani houn lubúeingu Bungiu ha lídanbaña bián sétanu le. Wéiribei wagundan lau wanúadirun wídehan lidan lawanserun Larúeihan Heowá. Ka amu katei tariñagubei líburu Arufudúni woun luagu óunwenbu asufuriruni? (Mat. 24:21).

LE LUNBEI HERESIBIRUNI HA EBEDAAGUBAÑA LUN BUNGIU

8. Ida luba lagumeserun óunwenbu asufuriruni, ani ida luba hóunabun hiibe-agei gürigia?

⁸ Kei warihini lidan aturiahani le lubaragiñebei le, málühali óundaruni lánina polítika ábürüha tuagun Babilónia to Wéiriboun, sun relihión mama inarüniti le ubouagubei (Aruf. 17:16, 17). Ligíaba lagumeseha óunwenbu asufuriruni. Ladügüba san katei le lun hagumeserun saragu gürigia eseriwida lun Heowá? Uá, según Arufudúni kapítulu 6, ha meseriwidunbaña lun Heowá, hagumeseruba áluaha ídemuei hámagiñe urúeigu ubouaguna luma túmagiñe óundaruni lánina bísinisi, ha únbaña tagúara Bíbülia wübü lidan kapítulu le. Kei le mídinbaña lubéi gürigia ha luéigiñe lóubadina Larúeihan Bungiu, larihubaña Heowá keisi láganiñu (Luk. 11:23; Aruf. 6:15-17).

9. Ka uagu haweiridagüdüboun lubéi lumutuniña Heowá hanigi gürigia danme le lachülürün óunwenbu asufuriruni, ani kaba asusereda lárigiñe?

⁹ Chóuruti haweiridagüdüboun lan lubúeingu Heowá ha úaragubaña hanigi gürigia lidan lidaani óunwenbu asufuriruni. Hagíarügübaña eredera ubouagu eseriwida lun Heowá ani máhabaña híchuguni hídehan lun “mónsturu” (Aruf. 13:14-17). Danme le harihini ha ebedaagubaña lun Heowá úaraguni le harufudubei, ábame hagañidun. Lárigiñe, ábame hóundaragun saragu néchanigu lun hábürühan hawagun lumutuniña Heowá lidan sun ubóu. Ayanuhatu Bíbülia luagu wuribani le kei lawuribuhan Gogu le Magoguna (Ese. 38:14-16).

10. Según Arufudúni 19:19-21, Kaba ladüga Heowá danme le labürühóun hawagun lumutuniña?

¹⁰ Kaba ladüga Heowá danme le labürühóun hawagun lumutuniña? Ligía guánarügü ariñagubei: “Hanarimebei ladunragun nigañi” (Ese. 38:18, 21-23). Afuranguagüda lumuti Arufudúni kapítulu 19 kaba lan asusereda lárigiñe. Lóunahabei Heowá Lisaani lun lageindagun haweigiñe lumutuniña luma lun lagañeiruniña láganiñu. Ani mama lábuguarügübei Hesusu, ñéinbaña “súdaragu ha siélubaña” luma, lidan amu dimurei, ánheligu ha siélubaña hama 144,000 (Aruf. 17:14; 19:11-15). Ida lubati lagumuchun wuribu le? Sun gürigia tuma burí óundaruni ha ebedaagubaña lun Heowá hagünrinchawaguba sunsuinagubei (aliiha huméi Arufudúni 19:19-21).

LÁRIGIÑEME WURIBU, LEFEDUHÓUBA ABAN MARÍEI

11. Ka katei buídutimabei le uágubei tayanuha líburu Arufudúni?

¹¹ Ida luba hasandiragun kristiánugu úaraguatiña houngua danme le harihini hagíarügüñanu lan eredera wínwanñu ubouagu lárigiñeme lagumuchúniwa hau sun láganiñu Bungiu? Maame hagundan! Ñeinbei aban lueirin ugundani sielu danme le lagumuchún tau Babilónia to Wéiriboun, lau sun lira, ñeinbei amu resun lúntima gunda hamá (Aruf. 19:1-3). Anihein aban katei le buídutimabei tidan líburu Arufudúni: “lamarieidun Mudún” (Aruf. 19:6-9).

12. Ídabame san lefeduhóua lamarieidun Mudún? (Arufudúni 21:1, 2).

¹² Ídaba san lefeduhóua maríei le? Íbini siéluhaña lanme sun 144,000 lubaragiñe lagumeserun Arümahedón, mámabei ligía lidaani lefeduhóun lamarieidun Mudún (aliiha huméi Arufudúni 21:1, 2). Lefeduhóuba maríei le lárigiñe wuribu lánina Arümahedón, danme le lagumuchúniwa hau sun láganiñu Bungiu (Sal. 45:3, 4, 13-17).

13. Ka mini lubéi lamarieidun Mudún houn ha gafanranbaña lidan?

¹³ Ka mini lubéi lamarieidun Mudún houn ha gafanranbaña lidan? Lidan aban maríei óundaraguati aban wügüri tuma aban würi. Ítarameme liña lóundarun Urúei, Hesukrístu, lidan maríei tuma “ladari”, 144,000. Lauba sügǘ súdiniti le, lagumeseruba Hesusu arúeiha úara hama 144,000 ubouagu luagu 1,000 irumu (Aruf. 20:6).

ABAN UBURUGU LE BUÍDUMERAÜTI LUMA LE LUNBEI WIBIHINI ÁMUÑEGÜ

14, 15. Ka uma hagoubaguagüdawa 144,000 lidan Arufudúni kapítulu 21? (Ariha humóun iyawaü to luáguboun tidáü garüdia).

¹⁴ Lidan Arufudúni kapítulu 21, góubaguagüdawatiña 144,000 luma aban uburugu buídumeraüti le gíribei “Iseri Herusalén” (Aruf. 21:2, 9). Lidan uburugu le, “dúusuñein dübü lebu baríeiru ligía, lau hiri duusu lani Kristu apostolugu bürüwañu luagu”. Chóuruti wéirigüda lanu katei le lanigi Huan. Kati uagu? Lugundun ariha lani Huan liri bürüwañu luagu aban lídangiñe dübü ligía. Ma lubuidun chansi! (Aruf. 21:10-14; Efe. 2:20).

¹⁵ Menege lumuti ni aban uburugu uburugu le. Leti lémeribei uburugu ligía lauti golu, dúusugubei bena ligía duusu pérüla, ánheinti lubarieirun luma lebu baríeiru ligía lauti dübü buíduburiti, ani úati charati lidan lamisurahóun uburugu (Aruf. 21:15-21). Aban líchugun Huan fe mégeigili lan aban katei. Katei funa san? Ariñagati: “Marihintina ni aban ténpulu lidan uburugu ligía, ladüga Wabureme Bungiu le Suntigabafu luma Hesukrístu ténpulubei ñein. Memegeirunti uburugu ligía larugounga lúmagiñe weyu ni lúmagiñe hati, ladüga le guánarügü luéirigun Bungiu ruti larugounga lun; Hesukrístuti lilanpunbei uburugu ligía” (Aruf. 21:22, 23). Ha lílana iseri Herusalén harihibei Heowá guánarügü (Ebü. 7:27; Aruf. 22:3, 4). Ligía lariñawagúnbei Heowá lan luma Hesusu litenpulunbei uburugu ligía.

16. Kaba burí au abiniruni hagundaara sun gürigia lídanme lidaani Larúeihan Bungiu le lánina Milu Irumu?

¹⁶ Gúndaatiña kristiánugu anuadirúaaña dan le hasaminarun luagu uburugu le. Lunti giñe hagundaarun kristiánugu ha hemenigibaña hawinwandun ya ubouagu lun súnwandan lau uburugu le. Ani lídanme Arúeihani lánina Milu Irumu, lanügüba saragu abiniruni ubouagu. Arihati lumuti Huan abiniruni le kei “aban duna harumati le íchugubei ibagari” luagu bián louba duna anuhoun “tídibu wewe” le íchugubei ibagari ani seriwiti tubana wewe tuguya “lun lagaranihóun houn néchanigu” (Aruf. 22:1, 2). Sun gürigia ha lúnbaña hawinwandun lidan dan ligía, gachansinbaña lun hagundaarun lau sun burí idewesei le. Éibume lásügürün dan agidareina luba figóu hawéi. Úaalime ni sandi ni igarigu ni ayahuni ni íruni (Aruf. 21:3-5).

17. Kaba eresibirei abiniruni le lunbei lanügüni Arúeihani lánina Milu Irumu? (Arufudúni 20:11-13).

¹⁷ Kaba eresibirei lubuidun abiniruni burí le? Furumiñe, ha lúnbaña hásügürün wínwanñu lídangiñe Arümahedón hama irahüñü ha lúnbaña hágurahoun lidan iseri ubóu. Mámarügübaña hagía. Lidan kapítulu 20 tidan líburu Arufudúni füramasewati háguyuguba lan hilaaña (aliiha huméi Arufudúni 20:11-13). Háguyuguba sun lubúeingu Bungiu ha richaguabaña, ha óunwegubaña úaraguañu lun, hama ha maricharagunbaña, ha meha machansibaña lun hafurendeirun luagu Bungiu (Adü. 24:15; Huan 5:28, 29). Mini lan san le háguyuguba lan sun ha hilaguaañabaña lídanme Arúeihani le lánina Milu Irumu? Uá. Sun ha gachansinbaña lun heseriwidun lun Heowá lubaragiñe hóunwegun ani madügün hamuti máguyugunbaña. Resibi humuti chansi lun hawinwandun lidan Paraísu, gama lumoun, arufuda hamuti lau le hadügübei ua lan yu lan houn (Mat. 25:46; 2 Tesa. 1:9; Aruf. 17:8; 20:15).

LAGUMUHÓUN LE LUNBEI LASUSEREDUN

18. Ida habame san gürigia lídanme lagumuchagüle 1,000 irumu?

¹⁸ Danme le lagumuchun 1,000 irumu, sun ha awinwandubaña ubouagu mafigounhañame. Masufurirunhañame ladüga galagante hamani figóu lúmagiñe Adán (Rom. 5:12). Lagidarúba íñarawaguni le lánina figóu le lígirubei Adán sunsuinagubei. Ítarati, lídanme lagumuchagüle 1,000 irumu, gayaraabei lariñawagún hawagu ha awinwandubaña lidan dan ligía habagariduba lan lugundun mafigounhañame (Aruf. 20:5).

19. Ka uagu mégeiwa lubéi aban lagumuhóun óuchawaguni?

¹⁹ Subudi wamuti mafigoun lan Hesusu ani úaraguati lun Bungiu íbini hóuchagua lani Satanási. Agia gürigia hame mafigounhaña, herederuba san úaraguañu lun Bungiu danme le lóuchaguniña Satanási? Kada aban hádangiñe mósume hóunabuni álügüdahani le darime lagumuchun 1,000 irumu, danme le lígirawagüdün Satanási lídangiñe ladaürǘniwa (Aruf. 20:7). Sun ha úaragubaña lídanme lagumuhóun óuchawaguni le, heresibiruba ibagari magumuchaditi ani hagundaaruba lau esefuruni le tímatimaati (Rom. 8:21). Hame lúnbaña hebedaagun lagumuchúba hau ítara kei lagumuchúba lan lau Satanási hama lumafianu (Aruf. 20:8-10).

20. Ida liña hasandiragun hungua lárigiñe hakutihani profesía burí le tídanbei líburu Arufudúni?

²⁰ Ida liña hasandiragun hungua lárigiñe wakutihan murusun tídangiñe líburu Arufudúni? Ma barüti ugundani woun “waríagun woungua” awinwanda dan le aniha lan profesía burí le agunfulira? Ayumahatün san hagunbirahan amu gürigia lidoun áhuduraguni le harumabei le lúmagiñebei Wabungiute? (Aruf. 22:17). Lárigiñe wakutihani lubuidun katei le lunbei lasuseredun ámuñegü, chóuruti buin waña lan lau ubebeni ani busentiwa wariñaguni lememe lariñagubei apostolu Huan: “Ítarala. Higabu Wabureme Hesusu” (Aruf. 22:20).