Adundehani huuti lun buidu lan lidin woun lidan wabagari

1. Ka uagu megei wabéi sun wagía lichú aau le lúmagiñebei Bungiu? (Ariñawagúni 4:7).

ANÚADIRAADÜN san hadügün somu katei súdiniti lidan hibagari? Anhein ítara liña lubéi, chóuruti amuriaha humá luma Heowá lun líchugun lichú aau hun, ladüga subudi lumuti megei humani (Sant. 1:5). Abürühati urúei Salomón: “Lubaragiñe furumiñeguarügü katei, ibihabá lichú aau” (aliiha huméi Ariñawagúni 4:7). Inarüni, mama layanuhaña luagu furumiñeguarügü lichú aau, layanuhaña luagu lichú aau le ñǘbuinbei lúmagiñe Heowá (Ari. 2:6). Gama lumoun, gayaraati san líderaguniwa lichú aau le ñǘbuinbei lúmagiñe Bungiu lun wagagibudagun luma turobuli le uguñe weyu? Chóuruti gayaraabei lan. Larufudubei aturiahani le woun.

2. Ida luba wibihin lichú aau le inarüniti?

² Aban igaburi le lunbei líderaguniwa lun lachuudun wau mosu waturiahanu ani falá wameime lidan wabagari sun arufudahani le híchugubei bián wügüriña ha subudihabúbaña luagu lichú hau. Furumiñe, ayanuha wamá luagu Salomón. Ariñagatu Bíbülia: “Ruti Aburemei lichú aau luma lualin ichügü lun Salomón” (1 Uru. 4:29). Ani libiaman, wakutihabei lani Hesusu hénpulu, wügüri le chútimabei aau le wínwanhalibei ubouagu (Mat. 12:42). Ariñagati aban profesía luagu: ‘Ñeinbei lani Bungiu sífiri luma súnwandan, líchuguba lichú aau lun, luma lualin ichügü (Isa. 11:2).

3. Kaba wakutiha lidan aturiahani le?

³ Lau lichú aau le líchubei Bungiu lun Salomón luma lun Hesusu, rútiña adundehani le huuti woun súngubei. Lidan aturiahani le, wakutihaba ǘrüwa lídangiñe: warihini seinsu lau lubudubu, warihini wadagimanu lau lubudubu luma wasubudiruni le gayara wabéi adüga lumoun le siñá wabéi adüga.

WARIHINI SEINSU LAU LUBUDUBU

4. Ida liña meha amu lan ligaburi lawinwandun Salomón luéi Hesusu?

⁴ Rísiti meha Salomón ani wínwanti meha geyegu lau katei buíduburiti (1 Uru. 10:7, 14, 15). Ánheinti Hesusu, míbeti meha lumegen nírügü aban muna úatu meha luma (Mat. 8:20). Íbini ítara, dandu Salomón kei Hesusu marihin hamuti umegeguni keisi aban katei súdiniti, ladüga lichú aau le meha hámabei lúmagiñe Heowá liabin.

5. Ka adundehani buiti líchugubei Salomón luagu seinsu?

⁵ Ariñagati Salomón “óunigihati lan seinsu” (Apur. 7:12). Huuti seinsu lun wibihini le wemegeirubei lun wawinwandun ani másiñati wibihin somu katei le adügabéi lun tagundaarun wanigi. Lau sun risi lan meha Salomón, gunfuranda lumuti anihein lan katei le súdinitimati luéi seinsu. Kei hénpulu ariñagati: “Buítimati ladimurehóun buidu luagu gürigia sügǘ lau gama lan golu luma pülata” (Ari. 22:1). Ruti giñe fe, gürigia lan ha hínsiñebei seinsu houn liibe-agei dan magundantiña lau le hámabei (Apur. 5:10, 12). Ruti giñe adundehani luagu moun lumuti lan wíchuguni wafiñen luagu seinsu, lugundun gumuguati (Ari. 23:4, 5).

6. Ida liña meha larihini Hesusu umegeguni? (Matéu 6:31-33).

⁶ Marihin lumuti Hesusu umegeguni keisi aban katei súdiniti. Gúndaati meha lau leigin luma lau latun (Luk. 19:2, 6, 7). Luagu aban dan, adügati Hesusu lun lasaliragun duna diweinme, ani ligía furumiñeti milaguru le ladügübei (Huan 2:10, 11). Ani weyu le lóunwenbei tauñein aban daüguaü to sérutu (Huan 19:23, 24). Lau sun lira, mama meha umegeguni súdinibei lun lidan libagari. Ariñagati houn lani disipulugu: “Úati ni aban gayaraati leseriwidún houn bián iyubudirigu […]. Siñati leseriwidúniwa lun Bungiu luma lun seinsu” (Mat 6:24). Arufudahati Hesusu, ánhawa lan áluahei liricha luma larúeihan Bungiu furumiñe, líchugubei lan le wemegeirubei woun (aliiha huméi Matéu 6:31-33).

7. Ka abiniruni libihubei aban íbiri luáguti ligaburi larihini seinsu?

⁷ Saragu íbirigu buiti lidin houn ladüga hasigiruni adundehani le líchugubei Heowá luáguti seinsu. Ariha waméi le asuseredubei lun Danieli aban íbiri le mamarieidungili. Abahüdaguati: “Dan meha le nibureingidina aba nasaminarun katei lan le lunbei súdini lan nun lidan nibagari neseriwidun lun Heowá”. Kei áfaaguala Danieli lun mibe lan lúmati lidan libagari, yusu laali lidaani luma sun liyaraati lun wadagimanu lánina híderawagun íbirigu luma leseriwidun Betelirugu. Ariñagati: “Le linarün katei, masakürihagidina luagu le nanúadirubei nadügün. Ánhana hamuga busén, gayaraati hamuga nagañeirun saragu seinsu, gama lumoun úabaña yebe habuidun umadagu ha númabaña guentó. Ruti aban óunwenbu ugundani nun níchuguni Larúeihan Bungiu furumiñe lidan nibagari, masandirun nubéi yebe ugundani le lun hamuga nerederun áluaha nagañeirun seinsu. Úati seinsu lidan ubóu le, le gayaraati líchugun ugundani nun kei sun abiniruni le ru laalibei Heowá nun”. Furanguti, ánhawa lan akipurei wamadagua luma Heowá ani mama luma seinsu, buídubei lidin woun.

ARIHA WAMÉI WADAGIMANU KEISI LUBUDUBU

8. Ida liña wasubudiruni ariha lani Salomón wadagimanu keisi lubudubu? (Apurichihati 5:18, 19).

⁸ Ariñagati Salomón wagundaarun lan lau lidere wadagimanu le wadügübei “lúmagiñe Bungiu liabin” (aliiha huméi Apurichihati 5:18, 19). Abürühati giñe: “Sagawati katei buiti lídangiñe sun áfaaguni” (Ari. 14:23). Ani mama ayanuharügüti. Subuditi meha luáguti wadagimanu lun, bunaguati meha palasiu, bunaguati meha sun tuwuyeri wewe to geigúatu tin, adügati giñe lagei duna lun láturaguni linadürigu (1 Uru. 9:19; Apur. 2:4-6). Le linarün katei, mosu meha lawadigimaridun saragu. Chóuruti buidu lan meha lasandiragun Salomón lungua lau ladügüni sun lira, gama lumoun subudi lumuti meha ua lan buídurügü lan lira lun lagundaarun. Lau sun lira, adügati saragu katei lun Heowá. Kei hénpulu, ligía arihibei lau tábunawagun tubuidun ténpulu lun láhudurawagun lun Heowá, aban wadagimanu le adurarubei sedü irumu (1 Uru. 6:38; 9:1). Lárigiñebei ladügün saragu ámuñegueinarügü katei lidan libagari, aban líchugun fe súdinitima lan ladügüni lugundan Heowá. Abürühati: “Gumuha yanu. Ariñawagúaali sun katei. Ruba inebesei lun Bungiu, gúnfulibei lugumadin” (Apur. 12:13).

9. Ka ladügübei Hesusu lun líchuguni wadagimanu lidan lilugaarun?

⁹ Aban meha wügüri nadagimeinti Hesusu. Sarafangei meha ligía dan le nibureingili (Mar. 6:3). Chóuruti teinki hamani lagübürigu ladüga líderaguniña lau wadagimanu luma lidan le hemegeirubei múnada. Kei aban lubéi meha wügüri macharati, gayaraati meha ladügüni wadagimanu buidu, ani chóuruti gíbetiña lan gürigia ha íchugutiña wadagimanu lun. Gayaraati wadiraaruni Hesusu lidan wasaminan lau ugundani le luágubei adügei luadigimari. Gama lumoun mígirunti lun lagidaruni katei le lidaani lun lásiñarun lederebudagüdüni lumadagua luma Bungiu (Huan 7:15). Dan meha le leseriwiduña lubéi lun Bungiu lidan dan dayarüti ru lumuti adundehani le: “Madiherida humá luagu éigini le gagumuchaditi, áluaha huméi éigini le lánina ibagari magumuchaditi” (Huan 6:27). Lidan yanu le líchugubei luagu wübü ariñagati Hesusu: “Óundaragua humá irisini sielu” (Mat. 6:20).

10. Ka denchaü gayaraabei wagagibudagun luma ladüga aban wamá nadagimeinti buiti?

¹⁰ Íderagua lumutiwa lichú aau le líchugubei Heowá woun lun warihini wadagimanu lau lubudubu. Arufudahóuati houn kristiánugu lun aban wamá nadagimeinti buiti ani lun buidu lan wawadigimari (Efe. 4:28). Súnwandan híchugun wayubudirigu fe úaragua wamá ani buidu lan wawadigimari, ani másiñati ariñaga hamá woun hínsiñe lan houn ida liña lan wadügüni katei. Háfuga wasaminarun buídubei lan hamuga waganwoundagüdüni wóurate lidan wadagimanu lun layanuhan wayubudiri buidu hawagu gefentiña luagu Heowá. Gama lumoun, ánhawa adügei, másiñati másügürün háadiwa lanme saragu dan hama waduheñu ni lidan weseriwidun lun Heowá. Lidan kesi le, mosu wadügün somu katei lunya wíchuguni sun katei lidan lubara.

11. Ka lafurendeirubei William lídangiñe lubuidun lani aban wéiyaali lidan afiñeni hénpulu?

¹¹ Furendeiti aban kristiánu nibureingili le gíribei William luagu súdini lan líchuguni wadagimanu lidan lubara. Luagu aban dan, nadagimeinti lun aban wéiyaali lidan afiñeni. Abahüdaguati William luagu íbiri le: “Buiti lani hénpulu luáguti ligaburi larihini wadagimanu kei lubudubu. Nadagimeinti saragu ani gúndaatiña gürigia lau luadigimari. Lau sun lira, dan le lagumuchun weyu, ígira lumuti wadagimanu lidan lubara ani aban letenirun houn liduheñu luma tun lani relihión. Ani le linarün katei, ligía aban hádangiñe gürigia le gúndaatimati le nasubudirubei”.b

WASUBUDIRUNI LE GAYARA WABÉI ADÜGA LUMOUN LE SIÑÁ WABÉI ADÜGA

12. Ida liña larufuduni Salomón subudi lan meha lun le liyaraabei adüga lumoun le siñá lubéi adüga, ani ida liña leferidiruni lubuidun igaburi le?

¹² Sun meha dan le buidu lan lumadagua Salomón luma Heowá, buiti meha ligaburi ladügüni sun katei. Luagu aban dan, dan meha le nibureingili ani míbegili meha dan lau arúeiha, subudi lumuti meha mama lan sun katei lun gayara lubéi lan adüga, ligíati, aba lamuriaha luma Heowá lun ladundehani (1 Uru. 3:7-9).Subudi lumuti meha giñe denchati lan panta lan aban gürigia. Abürühati: “Lárigiñe pantaü liabin günringuaü, lárigiñe anaaguni unguaü liabin ábürühani” (Ari. 16:18). Ma lirun, lau lásügürün dan bulíei lumuti adundehani le líchugubei. Lárigiñe saragu irumu lau arúeiha, aba panta lan aba lagumeserun arufuda mebereseni lau lugumadin Bungiu. Kei hénpulu, dariwati gumadi le houn urúeigu Ebüréu: “Moun lumuti giñe gibe hamá lúmarigu, luéi lacharagadun” (2 Lur. 17:17). Aba maganbadi lan Salomón lun gumadi le, maríeiti hama 700 würiña ani 300 lubúaligu, ani saragu hádangiñe huduguatiña houn amu búngiugu (1 Uru. 11:1-3). Másiñati samina lan machararunbei lan. Meberesenga ka lan lasaminarubei, le linarün, lau lásügürün dan aba ladisedun luéi Heowá ábati wuriba lan lidin lun (1 Uru. 11:9-13).

13. Ka wafurendeirubei lídangiñe ǘnabugu lan Hesusu?

¹³ Ǘnabuguti meha Hesusu ani adüga lumuti katei lau lubudubu. Lubaragiñe liabin Ubouagun, adügati saragu katei buíduburiti lidan leseriwidun lun Heowá. Ariñawagúati tidan gárada houn Kolosana 1:16: “Lídangiñe Kristu ladügei Bungiu sun katei le siélubei luma le ubouagubei”. Genegeti, lárigiñebei lan labadiseirun Hesusu haritagua lumuti sun katei le ladügübei dan meha le sielu lubéi luma Lúguchi (Mat. 3:16; Huan 17:5). Lau sun lira, dan le laritagunbalin sun katei le manaagunti lungua. Ani marihin lumutiña amu kamá le ni kata hagía. Ariñagati houn lani disipulugu “niábiña lun neseriwidun luma lun níchuguni nibagari lebegime hasalbarun saragu” (Mat. 20:28). Ariñagati siñá lan ladügün ni kata le lani lungua (Huan 5:19). Ma meha ǘnabugu lan Hesusu! Ma busentiwa wasigiruni lani hénpulu?

14. Ida liña líderaguniwa dimurei le lariñagubei Hesusu lun wasubudiruni le gayara wabéi adüga lumoun le siñá wabéi?

¹⁴ Arufudahati Hesusu houn lani disipulugu lun hasubudiruni ka lan hayaraabei lumoun le siñá habéi adüga. Lidan aban ókaasion subudigüda lumuti houn: “Íbini ídiburi le hábulugubei abahüdǘwati aban aban” (Mat. 10:30). Ruti dimurei le dǘgüdaguaü woun, dántima le gagaburi wamá wasaminarun wuriba wawougua. Haritaguagüda lumutiwa hínsiñe wamá lun Wáguchi le siélubei ani berese lan wau. Anhein afiñe lubéi Heowá gadüna wamani lun weseriwidun lun luma lun wawinwandun lun súnwandan lidan iseri ubóu, kátawagia lun wasigeneruni?

15. a) Según adundehani le tíchugubei garüdia La Atalaya fiu irumu guentó, ida luba gayara lan waríagun woungua lau lubudubu? b) Ítara kei larihín tidan iyawaü to lídanboun páhina 24, ka abiniruni gayaraabei weferidirun ánhawa asaminara wawougua?

¹⁵ Kei burí 15 irumu guentó, aba tínchahaniwa garüdia La Atalaya lun wasubudiruni le wayaraabei adüga lumoun le siñá wabéi adüga. Ariñagatu: “Inarüni mabusenrun wamá waríagun woungua buídutima wamá hawéi amu darí lun hamuga wanügüniña amu kei ni kata, gama lumoun, mabusenrúntiwa giñe wasaminarun mebegi wamá lun ni kata. Busenrügütiwa giñe gabaroun wamani le gayara wabéi adüga lumoun le siñá wabéi adüga ani moun lumuti lun wasaminarun mebegi wamá lun ni kata. Ariñagatu aban íbiri: ‘Mama aban gürigia wéiriti luriban tigaburi nuguya ani mama giñe aban gürigia lun nariñagun weiri lan lubuidun nigaburi. Ítara niña kei sun gürigia’”.c Rútiwa san fe buidu lan waríagun woungua kei lubudubu?

16. Ka uagu líchiga Heowá adundehani lun lachuudun wau?

¹⁶ Ruti Heowá lichú aau woun tídangiñe Lererun. Adüga lumuti ladüga hínsiñe wamá lun ani busenti giñe lun gunda wamá (Isa. 48:17, 18). Lun buidu lan lidin woun mosu wíchuguni Heowá lidan furumiñe lúgaaru lidan wabagari. Ladügüba katei le lun gunda wamá le tímatimaati. Míbebei waturobulin kei gürigia ha wéiribei línsiñe seinsu houn, línsiñe wadagimanu o ha asaminarubaña hawouguounrügü. Ligíati, chula wau ani gúndaagüda wamóun lanigi Heowá! (Ari. 23:15).