Agübürigu, íderagua humaña hisaanigu lun línsiñedun Heowá houn

1, 2. Ka uagu anihein lubéi fiu adundehani tídangiñeti Bíbülia súdinitimati woun?

CHÜLÜHA luéyuri maríei. Ma hawenden maríeitiña ani híchuguña arigei lun adundehani tídangiñeti Bíbülia le líchugubei íchuguti yanu. Biángubei hagía subudi hamaali adundehani le buidu buidu. Lau sun lira, lúmagiñe weyu ligía lun lubaruaguóun, le haganbubei súdinitimahali houn lugundun hagumesera íchigei lidan habagari keisi maríeitiña.

² Ligiaméme asuseredubei dan le hagüriahóun irahüñü. Másiñati aganbaña lan aban feru maríeitiña saragu yanu luagu ida luba lan hagüriahaniña hasaanigu. Lau sun lira, dan le gasaaniguhaaña, aba lasansirun katei. Guentó súdinitimahali adundehani le haganbubei. Ma lueirin hadasin keisi agübürigu! Le linarün katei, dan le lasansirun le gádanbaliwa, sánsiti ligaburi warihini adundehani le tídanbei Bíbülia le wasubudirubei buidu. Ligía waliihabarun Bíbülia “sagü weyu”, wagía lubúeingu Heowá, ítara kei meha hadügüni urúeigu Ísüraeli ani samina wagía hulili luagu le waliihabei (2 Lur. 17:19).

3. Kaba wariha lidan aturiahani le?

³ Agübürigu, anihein aban lídangiñe dasi le súdiniti huma le gayaraabei gani lani aban kristiánu: híderaguniña hisaanigu asubudirei Heowá. Mámarügü lun híchugun ariñahani houn luagu Heowá; mosu híderaguniña lun línsiñedun Heowá houn tídangiñe sun hanigi. Ida luba hadügüni? Lidan aturiahani le, wakutihaba gádürü adundehani le tídangiñeti Bíbülia le gayaraabei líderagunün (2 Tim. 3:16). Warihibei giñe buiti le ibiha hamaalibei agübürigu kristiánugu dan le hafalaruni adundehani le tídanbei Bíbülia.

GÁDÜRÜ ADUNDEHANI HUUTI TÍDANGIÑETI BÍBÜLIA HOUN AGÜBÜRIGU

4. Ka adundehani tídangiñeti Bíbülia íderagubaliña agübürigu lun línsiñedun Heowá houn hasaanigu tídangiñe sun hanigi? (Santiagu 1:5).

⁴ Furumiñe: áluaha huméi ladundehan Heowá. Lun híderaguniña hisaanigu lun línsiñedun Heowá houn, mégeitün lichú aau. Ligíati amuriaha huméi luma (aliiha huméi Santiagu 1:5). Heowá ligía adundehati le tímatimaati. Ka uagu? Ladüga saragu resun. Aban lídangiñe ladüga ligía aban úguchili le chútimabei aau lidan sun ubóu (Sal. 36:9). Le aban ladüga sagatiwa buiti súnwandan lídangiñe adundehani le líchugubei woun (Isa 48:17).

5. a) Ka ídemuei tíchugubei lóundarun Heowá houn agübürigu? b) Ka hafurendeirubei lídangiñe ligaburi hagüriaruniña íbirigu Amorim hasaanigu?

⁵ Lun gayara lan híderaguniña hisaanigu lun línsiñedun Heowá houn, ruti saragu adundehani le tídangiñeti Lererun luma tídangiñe lóundarun le huuti (Mat 24:45). Kei hénpulu, gayaraati hadarirun adundehani huuti lidan fánreinti “Ídemuei houn agübürigu”, le áfuachubei luagu saragu irumu tidan garüdia Agaguduabá! Ani guentó gayaraati hadariruni lidan jw.org. Lidan wani páhina lidan Internet, hadariruba bidéu álügüdahani luma sügǘ, le gayaraabei líderagunün lun híchuguni adundehani le líchugubei Heowá lun hagüriaruniña hisaanigu (Ari. 2:4-6).b

6. Ka lariñagubei aban úguchili luáguti adundehani le leresibirubei úara tuma lani weiriou le tíchugubei lóundarun Heowá?

⁶ Ru haña saragu agübürigu eteingiruni lun Heowá luagu ídemuei le líchugubei houn túmagiñe lóundarun. Ariñagati aban úguchili gíriti Joseph: “Mama aban katei ménrengunti lun hagüriarúniwa ǘrüwa irahüñü lidan inarüni. Au tuma nani weiriou súnwandan wamuriahan luma Heowá lun líderaguniwa. Ani besafu dan furiti burí aban aturiahani o aban bidéu lidan dan le wemegeirunbalin. Sefu laali wabagari lau wáluahani ladundehan Heowá”. Ariha laali Joseph úara tuma lani weiriou íderagua lániña aturiahani burí le luma bidéu burí lun gamadagua hamá hasaanigu luma Heowá.

7. Ka uagu súdini lubéi lun háfaagun agübürigu lun híchugun aban lubuidun hénpulu? (Rómana 2:21).

⁷ Libiaman: apurichiha humá lau le hadügübei luma lau le hariñagubei . Garíaguatiña irahüñü ani falá hamuti sun le hadügübei hagübürigu. Inarüni, úatiña agübürigu macharatiña (Rom. 3:23). Lau sun lira, agübürigu ha chúbaña aau adüga hamuti sun hayaraati lun harufudun aban lubuidun igaburi (aliiha huméi Rómana 2:21). Ariñagati aban úguchili dan layanuhanbei hawagu irahüñü: “Ítara haña irahüñü kei mudusi; rédeiti hachügüwagun le harihibei geyegubei hau”. Ariñagayati giñe: “Ani dan le harihini madügün wamani le warufudahabei houn, hariñagubei woun”. Ligíati, anhein busén wabéi lun línsiñedun Heowá houn wasaanigu, mosu giñe here lan ínsiñeni le wasandirubei luagu Heowá ani lunti giñe larihín.

8, 9. Ka hafurendeirubei lau le lariñagubei Andrew tuma Emma?

⁸ Gayaraati hadügün agübürigu saragu katei lun harufudaha houn hasaanigu lun línsiñedun Heowá houn. Ariha huméi le lariñagubei aban nibureinti gíriti Andrew, le badiseihali ani 17 irumu lau: “Súnwandan harufudahan nagübürigu nun súdini lan furíei. Sagü guñoun, lafurieidun núguchi úara numa íbini anhein furíei haadina lubéi. Súnwandan meha hariñagun nagübürigu woun: ‘Gayaraati hafurieidun lun Heowá sagü habusenrun’. Ligía súdini lubéi furíei nun. Guentó buiti nasandiragun nungua dan le nafurieidun lun Heowá ani ariha numuti keisi aban úguchili le hínsiñehabuti”. Agübürigu, mabulieida huméi ínsiñeni lan le hasandirubei luagu Heowá gayaraati lachülürün tidan hanigi hisaanigu.

⁹ Guentó ariha waméi le tabahüdagubei Emma. Dan le lígirunbaliña túguchi, ígira lumutu túguchu buin lau dúeiti. Ariñagatu Emma: “Besafu dan, lóuguati meha tiseinsun mama. Lau sun lira, súnwandan meha tariñagun woun góunigi lániña Heowá lubúeingu ani líderagubaña lan lau le hemegeirubei. Ani lau le tanúadirubei, rútina fe afiñe tan ítara luba lan. Apurichihatu meha mama lau hénpulu”. Ka wafurendeirubei? Íbini dan le gaturobulin hamá agübürigu, gayaraati harufudahan lau hénpulu (Gal. 6:9).

10. Ka meha dan buídubei lun hayanuhan agübürigu ísüraelina hama hasaanigu? (2 Lúrudu 6:6, 7).

¹⁰ Lǘrüwan: hechu humá ayanuha hama hisaanigu. Ariñagati meha Heowá houn ísüraelina lunti lan hayanuhan luagu houn hasaanigu sagü weyu (aliiha huméi 2 Lúrudu 6:6, 7). Lidan sun weyu hau hama hasaanigu, gachansintiña meha lun harufudahan houn hasaanigu lun línsiñedun Heowá houn. Kei hénpulu, gayaraati meha hásügürün wügüriña irahüñü dan luma háguchi íderaguei ábunagua o alubaha. Ani würiña irahüñü gayaraati meha hásügürüni dan úara tuma háguchu múnada, áhüchagua o aborudaha. Lau hásügürün dan úara, ruti chansi lun hayanuhan luagu saragu katei súdiniti. Kei hénpulu, gayaraati hasaminarun hulili luagu líchigadi Heowá luma luagu ida liña lan lóunigiruniña iduheñu.

11. Ka chansi hámabei agübürigu kristiánugu lun hayanuhan hama hasaanigu?

¹¹ Uguñe weyu, mítaranhaali katei. Lidan saragu ageiraü, lóuguaali dan hásügürün agübürigu hama hasaanigu, másiñati añahein lan agübürigu nadagimein ani añahein isaanigu leskuelarugu. Ligíati, mosu háluahan agübürigu dan lun hásügürüni hama hasaanigu luma lun hayanuhan hama (Efe. 5:15, 16; Fili. 1:10). Ruti áhuduraguni keisi iduheñu chansi lun hadügüni le, ariñagati aban nibureinti gíriti Alexander: “Súnwandan meha laransehani núguchi katei lubá áhuduraguni keisi iduheñu, mígirunti lun ladüraaguni ni kata dan le wásügürübei úara. Ani rédeitiwa ayanuha lárigiñe lagumuchun aturiahani”.

12. Ka lunbei laritaguni hachügüdina tílana muna lidan áhuduraguni keisi iduheñu?

¹² Ka lunbei hadügüni hachügüdina tílana muna lun hásügürüni hasaanigu buidu lidan áhuduraguni keisi iduheñu? Gayaraati haturiahanu iseri líburu hama hasaanigu to gíriboun Winwan humá lau ugundani lun súnwandan. Ánhaadün aturiahoun líburu to úara, másiñati hadariruba lan kaba lan uagu hayanuha. Ani kei busén humá lun habahüdaguni hisaanigu hun le adiherigüdübaaliña, mayusura huméi lóurate áhuduraguni lun hadeinhan houn. Ani ánhaña ariñaga somu katei hun le úati tidan Bíbülia, darangilu humá. Le lunbei hadügüni, teinki humaña luagu hadaarunu hanigi hun ani ínchaha humaña lun hasigirun adügei. Anhein ariñaga hisaanigu hun le hasandirubei, ménrengubei lun híderaguniña.

13. Ka idan amu igaburi gayaraabei híderaguniña agübürigu hasaanigu lun hayarafadun lun Heowá?

¹³ Agübürigu, áluaha humá chansi sagü weyu lun híderaguniña hisaanigu ayarafada lun Heowá. Mama mosu hañuurun aturiahoun Bíbülia hama lun hayanuhan houn luagu Wáguchi Bungiu le hínsiñehabubei. Ariñagatu aban úguchuru gíritu Lisa: “Íderagua wamutiña wasaanigu lun harihini línsiñehabu Heowá lau katei le ladügübei. Kei hénpulu, dan le warihini ligaburi láhurerun walügün ounli adügati lun héherahan, aba waritaguagüdüniña gúndaati lan Bungiu ani hínsiñe lan ibagari lun, ítara kei wagía”.

14. Ka uagu súdini lubéi houn agübürigu lun híderaguniña hasaanigu anúadaha umadagu buítiña? (Ariñawagúni 13:20).

¹⁴ Ligadürün: íderagua humaña hisaanigu lun gamadagu hamá ha buítiña. Furangutu Lererun Bungiu dan le tariñagun gayara lan hadügün umadagu lun wadügün katei buiti o katei wuribati (aliiha huméi Ariñawagúni 13:20). Agübürigu, subudi humutiña san hamadagu hisaanigu? Subudi humutiña san buidu? Ani sügütün san dan hama? Ka gayaraabei hadügüni lun híderaguniña hisaanigu lun gamadagua hamá hama gürigia ha hínsiñebei Heowá houn? (1 Ko. 15:33). Dan le hásügürün aban lubuidun dan hama hiduheñu, agunbiraha humaña amu íbirigu ha buídubei hamadagua luma Heowá (Sal. 119:63).

15. Ka gayaraabei hadügün agübürigu lun híderaguniña hasaanigu lun gamadagua hamá ha buítiña?

¹⁵ Ariha wamá aban hénpulu. Afuranguagüdati aban úguchili gíriti Tony le ladügübei úara tuma lani weiriou lun híderaguniña hasaanigu lun gamadagua hamá ha buítiña: “Barühadiwa meha saragu irumu au tuma nani weiriou agunbirahaña íbirigu ha ámuñegueinarügüti harasan, hechun luma harumudiri. Hóutiwa ani buiti giñe wásügürüni lidan áhuduraguni keisi iduheñu. Afiñetiwa buidu lan igaburi le, lugundun adügati lun wasubudiruniña gürigia ha hínsiñebei Heowá houn ani seriwi hagía lun lau ugundani. Ani rédeihaña giñe íbirigu ha óunigirubalin sirkuitu, misionérugu hama burí amu íbirigu wábiñe. Ariha wamaali íderagua lumutiña lan wasaanigu le habahüdahabei íbirigu ha, luma lubuidun igaburi le harufudubei luma burí sákürifisiu le hadügübei lúntima hasandiragun wasaanigu houngua yarafa lun Heowá”. Agübürigu, adüga huméi sun hiyaraati lun gamadagua hamá hisaanigu umadagu buítiña.

MEFERIDIRA HUMÉI HEMENIGI!

16. Ka katei lunbei gabaroun hamani agübürigu anhein anúadira hasaani lun lígiruni Heowá?

¹⁶ Ánheinti adüga hubalin sun hiyaraati ani aban lariñagun aban hádangiñe hisaanigu hun mabusenrunhali lan leseriwidun lun Heowá? Masaminara humá mouni lan sun áfaaguni le hadügübei keisi agübürigu. Ru lumuti Heowá iyaraani woun kada aban íbini houn hisaanigu, lun hanúadahan anhein heseriwiduba lubéi lun o meseriwidunbaña lan. Anhein lanúadira hisaani lígiruni Heowá, meferidira huméi hemenigin lachülürüba lan aban weyu lun lagiribudun. Haritagua humá luagu isaani le acharagadubei le agiribudubei lumoun lúguchi (Luk. 15:11-19, 22-24). Aba ladisedun nibureinti le luéi üma le buídubei, lau lásügürün dan aba lagiribudun. Ani másiñati hariñagun: “Aban abahüdaguni lira. Masuseredunti katei le lidan ibagari”. Arufuda lumuti hénpulu le lani aban nibureinti le gíriti Elie susere lan burí katei le.

17. Ka dǘgüdaguaü hibihibei lídangiñe le lásügürübei Elie?

¹⁷ Dan le layanuhan Elie hawagu lagübürigu, ariñagati: “Áfaaguatiña lun hadügüni sun hayaraati lun hínsiñe lan Heowá nun tuma Bíbülia, to Lererun. Lau sun lira, dan le aweirideina nan aba maganbadi háadina lan houn nagübürigu”. Aba lagumeserun Elie awinwanda aba lagübüri ibagari ani máhati lun sun adundehani le meha híchugubei lagübürigu lun yebe labuiduragüdüni lumadagua luma Heowá. Aba láfuridun hábiñegiñe ani aba adisedeina lan luéi lilurudun Heowá. Lau sun lira, anihein meha dan ayanuhati tuagu Bíbülia hama lumadagu. Ariñagati Elie: “Aba níchugun fe sagü lan nayanuhan luagu Heowá hama numadagu, saminatimatina Luagu. Lau lásügürün dan, aba áhücheina lan inarüni le tídangiñebei Bíbülia tidan nanigi le hábunagubei nagübürigu tidan”. Dan lárigiñe, aba lagiribudun Elie lidoun inarüni.c Saminatün san luagu ugundani le hasandirubei lagübürigu Elie lárigiñe buga harufudahan lun lúmagiñe liñüraü lun línsiñedun Heowá lun? (2 Tim. 3:14, 15).

18. Ka hisaminanbei hawagu agübürigu ha áfaagubaña saragu lun harufudahan houn hasaanigu lun línsiñedun Heowá houn?

¹⁸ Agübürigu, rúhali Heowá aban lubuidun chansi hun lun hagüriaruniña iseri lubúeingu (Sal. 78:4-6). Subudi wamuti aban lan katei hénrenguti dasi le hadügübei, ligía busentiwa weteingirunün tídangiñe sun wanigi luagu lubuidun huádigimari. Sigí humá adügei sun hiyaraati lun hasigirun íderaguaña hisaanigu lun línsiñedun Heowá houn ani lun hagüriaruniña según lugumadin luma ladundehan (Efe. 6:4). Anhein hadüga, chouru huméi gúndaabei lan Wáguchi hínsiñehabuti le siélubei hau.