Sun gürigia busentiña lun buidu lan habagari ámuñegü
Ida liña hayumahani hibagari hama hiduheñu ámuñegü? Chóuruti busén humá aban ibagari lau ugundani, lubuidun átuadi luma darangilaü. Anihán burí katei le habusenrubei hibe-agei gürigia: lun buidu lan habagari ámuñegü.
Lau sun lira, saminatiña saragu gürigia hénrengu lan libihín katei le. Ariha hamaali gayara lan lasansirun katei lau lóufudagun. Kei burí ladüga sandi COVID-19, gádeitimahali habagari saragu gürigia, gíbetimahali gudemei ani gíbeeña gürigia eferidiruti habagari. Ligíati hasaminarunbei saragu gürigia siñabei lan buidu lan habagari ámuñegü.
Laganagua sun machouruni le, añaha mémegua gürigia adügei sun hayaraati lun buidu lan habagari ámuñegü. Añahein afiñetiña luagu erei burí le aramudaguati, kei buri luagu hasinun luma ubunuruni. Gíbetiña chouru hamuti líchugubei lan furendei íñuti luma seinsu sun le habusenrubei houn. Añahein amu saminatiña lun lan buidu lan habagari buidurügülá lun aban hamá gürigia ha buítiña.
Lidan linarün katei, gayaraabei funa san ladügün somu lídangiñe katei le lun hibihin aban ibagari buiti? Lun hasubudiruni, samina humá luagun le:
Ka burí san katei gamaniharibei lau hibagari lubá ámuñegü?
Gayaraati san ladügün aturiahani íñuti luma seinsu lun buidu lan hibagari ámuñegü?
Ladügüba san aban humá gürigia buiti lun buidu lan hibagari ámuñegü?
Halíaba san hadarira adundehani chóuruti lun hibihin aban ibagari buiti ámuñegü?
Tíderagubadün garüdia to lun hadariruni óunabagülei burí le.