Gayaraati san ladügün aturiahani íñuti luma seinsu lun buidu lan hibagari ámuñegü?

Gíbetiña gürigia saminatiña ha lan aturiahabaña saragu ani risi hagía buídubei lan habagari ámuñegu. Saminatiña anhein lan aturiaha gürigia tidan luban furendei íñutu, buídutimabei lan hóuserun lidan hawadigimari, hadan haduheñu luma lidan fulasu le ñein lubéi heredera. Saminatiña giñe, lau lan aban lubuidun furendei íñuti gayaraabei lan hadarirun aban wadagimanu le fáyeiti, ani éibutima gibe lan seinsu lagañeinrun gürigia gúndatimabei lan.

LE HANÚADIRUBEI SARAGU HADÜGÜN

Abahüdahati aban wügüri lídangiñe ageiraü China le gíribei Zhang Chen: “Afiñetina meha sin lan aban títulu tídangiñe luban furendei íñutu maweiyasunbadina lan meha áfurida lídangiñe gudemei, ani ábanrügübei lan wadagimanu fáyeiti íchiga aban ibagari luma ugundani le gumuti nun”.

Lun gayara lan libihín aban ibagari buiti ámuñegü, saragu gürigia busentiña haturiahan tidan luban furendei íñutu to subudiwatu, íbini anhein lunti lubei haweiyasuhan lidoun amu ageiraü. Ligía meha kamanitimabei darí lachülürün COVID-19 le adügübei lun hénrenguhaali lan aweiyasuhani. Ariñagati aban ariñahani lidan irumu 2012 túmagiñe Organización para la Cooperación y el Desarrollo Económico: “Aturiahatiña ásiana hóugiñebaña hamidan 52% hádangiñe sun ha aturiahabaña bóungudi luéi hageira lidan sun ubóu”.

Gíbetiña agübürigu adügatiña sákürifisiu le wéinamuti lun haturiahan hasaanigu tidan luban furendei íñutu lidan burí amu ageiraü. Haritaguati Qixiang, aban wügüri taiwana,: “Míbeti meha haseinsun nagübürigu. Íbini ítara, óunaha hamutiña gádürügubei hasaanigu aturiaha Meriga”. Lun lafayeirún sun aturiahani le, dáguatiña liduheñu houngua, kei amu gürigia, lidoun saragu dúeiti.

LE IBIHÚBEI

Inarüni gayaraati ladügün aturiahani lun wibihin somu awalidaguni lun labuiduruntima wabagari, lau sun lira, mama súnwandan wabihinini le wagurabubei. Kei hénpulu, lárigiñe saragu irumu lidan saragu sákürifisiu luma luéinamun dúeiti, gíbetiña madari hamuti wadagimanu le habusenrubei. Ariñagatu aban nadagimeintu lidan ñunsu gíritu Rachel Mui tun Business Times Singapur: “Likesin wadagimanu haganagua ha eresibihabaña tídangiñe furendei íñutu, genegeti ligía lan aban turóbuli le aganwoundeinabei”. Ariñagati Jianjie, aba aturiahati tidan luban furendei íñutu le awinwandubei Taiwán: “Añahein saragu mosu hárügüdün furumiñeguarügü wadagimanu le múaranbei luma le haturiahabei”.

Añahein daritiña wadagimanu lidan le haturiahabei, lau sun lira, gayaraati mibihin hamani ibagari le meha hayumahabei. Ñǘdünti Niran, aban wügüri tailandiana, tidan luban furendei íñutu ageiraü Reino Unido. Dariti aban wadagimanu lidan le laturihabei. Abahüdaguati: “Kei nagurabuni, seremei naturiahan daritina aban wadagimanu le fáyeiti buidu. Gama lumoun, lun nagañeinrun saragu seinsu, mosu meha náfaagun saragu, nadagimein au saragu oura. Lagumuhóun, aban tígiragüdüniña kónpeni hibe-agei nadagimeintiña au haganagua. Aba níchugun fe ua lan wadagimanu anügüti ichouruni luagu buídubei lan wabagari ámuñegü”.

Íbini ha rísibaña, ha ibiha hamaalibei le únbei hagúara “aban lubuidun ibagari” mosu giñe hagagibudagun luma turóbuli hadan haduheñu luma sandi o wéiri lan hadiheridun luagu haseinsun. Ariñagati Katsutoshi, aban wügüri Haponna: “Íbini gibe lan meha niseinsun, magundantina meha ladüga gimugatiña meha gürigia nun ani óusera hamutina meha wuriba”. Ariñagatu Lam, aban würi to awinwanduboun Bietnamu: “Arihatina saragu gürigia áfaagua lun hadarirun wadagimanu le fáyeiti buidu lun gaseinsun hamá. Le linarün katei do, gíbetimati katei lun hachügü, lueirin íruni, luriban átuadi ani machourunti hasandiragun houngua”.

Ítara kei Franklin, gunfuranda hamaali saragu gürigia: mama lan furendei íñuti ni seinsu súdinitimabei lidan ibagari. Fiu hádangiñe gürigia ha, lubaragiñe hetenirun lun umegeguni, áfaaguatiña lun buidu lan habagari ámuñegü lau buidu lan hóuserun, kéiburi lau hadügün katei buiti hawagu amu. Anihán funa san katei le lunbei wadügüni lun buidu lan wabagari ámuñegü? Wibihubei óunabagülei lidan leweñegua arütíkulu.