Góunigi lumutiña Heowá lubúeingu

1. Ka uagu lamuriahan Hesusu luma Heowá lun lóunigiruniña lánigu?

GUÑOUN le lubaragiñebei lounwen Hesusu amuriahati aban katei espechaliti luma Lúguchi le siélubei: lun lan lóunigiruniña ha afalarubalin (Huan 17:15, 20). Inarüni, súnwandan lan ladouragun Heowá hau lubúeingu ani góunigi laaña. Gama lumoun, subudi lumuti meha Hesusu hanarimebei lan lábürühan Satanási lau furundei hawagu disipulugu ani ligía mégeibaña lubéi ídemuei lúmagiñe Heowá.

2. Según Sálumu 33:18-20, ka uagu moun lumuti lubéi wanufudedun luéi turobuli?

² Hanarimeti ladügüdarun ubóu le lábugiñebei lubafu Satanási hawagu kristiánugu inarünitiña. Gayaraati ladügün turobuli burí le lun weferidiruni were luma lun lóuchaguni úaraguni le warufudubei lun Heowá. Kei le lunbei warihini lidan aturiahani le, moun lumuti lun wanufudedun. Góunigi lumutiwa Heowá mini lan, ariha lumuti sun wásügürün ani súnwandan aranseñu liña lan lun líderaguniwa. Wakutihaba bián abahüdaguni tídangiñeti Bíbülia le ariñagubei: “Ánheinti Aburemei góunigi lumutiña ha íchugubaña inebesei lun ani afiñe hagía luagu” (aliiha huméi Sálumu 33:18-20).

DAN LE WASANDIRAGUN WOUNGUA WÁBUGUARÜGÜÑADIWA LAN

3. Ka sügǘ gayaraabei ladügün lun wasandiragun woungua wábuguarügüñadiwa lan?

³ Íbini hádangiñetiwa lan íbirigu ha ítarabaña woun kei iduheñu ha eseriwidubaña lun Heowá, gayaraati aniheinbei lan dan wasandiragun woungua wábuguarügüñadiwa lan. Kei hénpulu másiñati sandigua hamá nibureintiña hábuguarügüñanu lan dan le hafuranguagüdüni hafiñen hagibugiñe sun hapanaagu leskuelarugu o dan le háguyun lidoun amu damuriguaü. Háfuga añahein lan wádangiñe sandiguatiwa woungua lau íruni o maguraasuni, ani saminatiwa mosu lan wagagibudagun luma le wasandirubei wábuguarügü. Másiñati manigi wamá lun wayanuhan hama amu luagu le wasandirubei ladüga wanufude siñabei lan gunfuranda hamaniwa. Anihein dan samina wamá meberesen hamá amu wau. Meberesenga ka lan asuseredubei woun, gayaraati ladügün wasandiragun woungua wábuguarügü lun mere wamá luma lun wírudun. Mabusenrunti Heowá lun wasandiragun woungua ítara. Ka uagu wariñagei le?

4. Ka uagu lariñaga profeta Elíasi: “Áurügaali eredera”?

⁴ Ariha waméi lani profeta Elíasi hénpulu. Anurahati wügüri úaraguati le lau libagari lóugiñe 40 weyu, ladüga fiñún tan Hesawéli táfarubei lan hilagubei (1 Uru. 19:1-9). Aramudaguati lábugua lagadábugiñe dübü, le ñein lubéi lariñaga lun Heowá: “Áurügaali eredera” (1 Uru. 19:10). Saminati yebe ligíarügaali lan profeta erederuti lidan ageiraü, ani mítaranti. Séfuhali meha Abüdíasi 100 profetagu luéi tubafu gáfarahatu Hesawéli (1 Uru. 18:7, 13). Kati uagu lasandiragunbei Elíasi lungua lábugua? Másiñati samina lan áfaragua taaña lan Hesawéli sun profeta ha lesefurubaña Abüdíasi. O másiñati sandigua lan lungua lábugua ladüga ua hamá ni aban ñüdün luéigiñe lóubadina Heowá lárigiñebei le asuseredubei houn lani Baali profetagu lidan wübü Karümélu. Másiñati giñe samina lan ua hamá ni aban asubudiruti denchati lan gádanti o ua hamá ni aban nidiheritiña luagu. Mariñagun tumuti Bíbülia sun le asuseredubei, gama lumoun le wasubudirubei gunfuranda lani Heowá ka lan uagu lasandiragunbei Elíasi lungua lábugua ani subudi lumuti Heowá buidu buidu ida luba lan líderaguni.

5. Ka ladügübei Heowá lun lachoururagüdüni lun Elíasi mama lan lábuguarügüñein?

⁵ Adügati Heowá saragu katei lun líderaguni Elíasi. Kei hénpulu, ínchaha lumuti lun lariñaguni le lasandirubei. Bián wéiyaasu lálügüdüni: “Ka badügübei ya Elíasi?” (1 Uru. 19:9, 13). Lidan bián wéiyaasu le aganba lumuti Heowá Elíasi ani téniti lun le lariñagubei lun. Lárigiñe, aba lóunabuni Heowá Elíasi lau larufuduni lun anihein lan luma ani ligía lan Bungiu gabafutimabei. Ani chóurugüda lumuti giñe Heowá lun Elíasi añahagua lan saragu gürigia Ísüraeli áhuduragutiña lun (1 Uru. 19:11, 12, 18). Chóuruti sandi lan Elíasi aban óunwenbu awalidaguni lárigiñe labahüdaguni lun Heowá le lasandirubei luma lau laganbuni ani óunabalei. Lanwoun lira, ruti Heowá saragu dasi súdiniti lun: lun lidin anúadirei Asaeli lurúeiteme Siria, ani anúadiraleime Heú kei lurúeite Ísüraeli ani Eliséu kei profeta (1 Uru. 19:15, 16). Lau líchuguni Heowá dasi le lun Elíasi, íderagua lumuti lun letenirun lun le súdinitimabei ani ru lumuti giñe Eliséu lun, kei aban paaná buiti. Ka gayaraabei wadügün ánhawa asandiragua woungua wábuguarügüñadiwa lan ani megei wamani lídehan Heowá.

6. Ka gayaraabei wariñagun lun Heowá dan le wasandiragun woungua wábuguarügüñadiwa lan? (Sálumu 62:8).

⁶ Ínchaha lumutiwa Heowá lun wayanuhan luma lidan furíei. Ariha lumuti Heowá ida liña lan wasandiragun woungua ani chóurugüda lumuti woun gayara lan wafurieidun lun furumiñeguarügü oura ani laganbubadiwa lan (1 Tesa. 5:17). Gúndaati Heowá laganbuniña lubúeingu (Ari. 15:8). Ka gayaraabei wariñagun lun Heowá dan le wasandiragun woungua wábuguarügüñadiwa lan? Gayaraati wadaarunu wanigi lun kei ladügüni Elíasi (aliiha huméi Sálumu 62:8). Abahüdaha waméi lun, le adiheridagüdübaliwa luma ida liña lan wasandiragun woungua. Amuriaha wamá luma lun wasubudiruni ka lan lunbei wadügüni. Kéiburi hamuga, anhein nibureingidibu lubéi, ka gayaraabei badügüni anhein sandigua bubéi bungua bábugua ani hanufude buguya lun bayanuhan luagu Heowá leskuelarugu? Gayaraati bamuriahan luma lun líchugun ganigi bun luma lichú aau lun bafuranguagüdüni bafiñen lau inebesei (Luk. 21:14, 15). Ka lunbei hadügüni anhein háfaaguña lubéi lun hígiruni luriban saminaü? Amuriaha humá luma Heowá lun líderagunün ayanuha luma aban íbiri le derebuguti lafiñen luma lun líderaguni íbiri ligía lun gunfuranda lani ida liña lan basandiragun bungua. Gayaraati wadaarunu wanigi lun Heowá, ani teni wagíame arihei ida liña lan lóunabuni wafurieidun ani anha wagíame lun ídemuei le híchugubei amu woun.

7. Ka bafurendeirubei lídangiñe lani Mauricio hénpulu?

⁷ Ruti Heowá dasi súdiniti woun súngubei. Ariha lumuti ani gebegiti lun sun le wadügübei lidan damuriguaü luma le wadügübei lidan apurichihani (Sal. 110:3). Ídehati beresegu wamá lidan weseriwidun lun Heowá lun masandiragun wamá woungua wábuguarügüñadiwa lan. Ka uagu? Ariha waméi likesin aban nibureinti gíriti Mauricio.b Murusun dan lárigiñe labadiseirun Mauricio, aba lagumeserun aban hádangiñe besi lumadagu adiseda luéi Heowá. Abahüdahati: “Narihini ladisedun numada luéi inarüni aba lebelurun machouruni nun, ani aba nálügüdagun nungua anhein nagunfulirubei lubéi füramase le nadügübei lun Heowá, luma anhein nasigiruba lubéi eseriwida lun Heowá. Sandiguatina nungua nábuguarügü ani úabei lan ni aban gayara gunfuranda lánina”. Ka íderagubalin Mauricio lun lasigirun lubaruaguóun? Ariñagati: “Íderagua lumutina napurichihan saragu lun masaminarun nan saragu nuouguoun luma lun merederun nan asaminara wuriba nuougua. Gúndaatina meha napurichihan hama amu íbirigu, ani masandiragunhaadina nungua nábugua”. Ítara liña katei le, íbini madunragunhadiwa lan lun wapurichiha. Ruti giñe erei woun dan le wásügürün dan hama wábirigu apurichiha, abürüha gárada o apurichiha luéigiñe gágamuru. Ka amu katei íderagubalin Mauricio? Aritagua lágili le ladügübei, ariñagati: “Ábatima nawadigimaridun lidan dasi le íchugubei nun lidan damuriguaü. Áfaaguatina lun naranseruni dasi le íchugubei nun lidan damuriguaü luma lun níchuguni buidu. Seremei katei le sandi numuti línsiñehabu Heowá luma hínsiñehabu íbirigu”.

DAN LE LADIHERIDAGÜDÜNIWA ÓUCHAWAGUNI LE HÉNRENGUTI

8. Ida liña wasandiragun woungua dan le wagagibudagun luma óuchawaguni hénrenguti?

⁸ Sun wagía subudi wamuti gaturobulin baadiwa lan lidan lagumuhóun dan (2 Tim. 3:1). Gayaraati taweiridun wanigi ladüga ligaburi turobuli le úmabei wagagibudagua o dan le ídanbei láfuacha. Gayaraati aba lan turobuli lánina maseinsuni, o ladariruniwa somu sandi wuribati wawagu o lounwe somu waduhe. Másiñati dan le lan lasuseredun katei le, sanditiwa íruni ani aba labuinchun wachügü lau idiheri, dántima le liabin waturobulin aban lárigiñe aban. Gama lumoun, aritagua waméi góunigi lumutiwa lan Heowá ani lau lídehan gayaraati wagagibudagun luma furumiñeguarügü óuchawaguni le lunbei liabin.

9. Ka burí lídangiñe óuchawaguni le úmabei lagagibudagua Hobu?

⁹ Ariha waméi likesin Hobu. Lidan murusun dan, gagibuguati wügüri úaraguati le luma saragu óuchawaguni hénrenguti. Lídanrügü aban weyu féridi lumutiña sun libiñanigu, lubúeingu, ani le wuribatimabei, féridi lumutiña lan sun lirahüñü (Hob. 1:13-19). Murusun dan lárigiñe, dan le anihagua lan lau igarigu lárigiñe legeburihan, aba ladagarun aban lanarime sandi luagu (Hob. 2:7). Hanarimeti meha le asuseredubei lun darí lun lariñagun: “Siñá nun, mabusenrunhadina nasigirun abagarida” (Hob. 7:16).

10. Ka ladügübei Heowá lun líderaguni Hobu awandei óuchawaguni? (Ariha huméi dibuhu le luágubei tidáü garüdia).

¹⁰ Aríagu liña Heowá lun sun le asuseredubei lun Hobu. Kei hínsiñe lubéi Hobu lun Heowá, ru lumuti sun le lemegeirubei lun, lun lawanduni óuchawaguni ani lun úaraguameme lan. Ariñagati Heowá lun Hobu luougua weiri lan lichú lau ani góunigi lumuti lan lau ínsiñeni sun katei gabagariti le ladügübei. Íridati saragu animaalugu ha wéinamutiña (Hob. 38:1, 2; 39:9, 13, 19, 27; 40:15; 41:1, 2). Luagu le aban oubaü, óunaha lumuti Heowá Eliú lun líchugun gurasu lun Hobu. Haritaguagüda lumuti nibureinti úaraguati le lun Hobu súnwandan lan líchugun Heowá hafayeiruaha sun ha eseriwidubaña lun lau awanduni. Gama lumoun busenti meha Heowá líchugun Eliú fiu adundehani lun Hobu. Lau ínsiñeni, haritaguagüda lumuti Eliú Hobu moun lumuti lan lasaminarun luouguoun, ani haritaguagüda lumuti giñe lun ni kata lan wagía lóubagiñe Heowá, le Adügübalin sun katei le geyegubei wau (Hob. 37:14). Ruti giñe Heowá aban dasi lun Hobu: lun lafurieidun hawagu ǘrüwa lumadagu ha afigouhabaña (Hob. 42:8-10). Uguñe weyu, ida liña líderaguniwa Heowá dan le wagagibudagun luma óuchawaguni hénrenguti?

11. Ida liña tíchugun Bíbülia gurasu woun dan le wásügürün lídangiñe óuchawaguni?

¹¹ Mayanuhanti Heowá wama gagibuguañu uguñe weyu, kei ladügüni lidan likesin Hobu. Gama lumoun ayanuhati wama tídangiñe Bíbülia, to Lererun (Rom. 15:4). Ruti dǘgüdaguaü woun lau líchugun emenigini woun lubá ámuñegü. Ariha wamá fiu bérusu tídangiñeti Bíbülia le íchugubei gurasu woun dan le gaturobulin wamá. Chóurugüda lumuti Heowá woun, tidan Lererun nírügü —lan óuchawaguni le hénrenguti—madügünbei lan “lun lafanreinraguniwa luéi línsiñehabu” (Rom. 8:38, 39). Füramaseti giñe woun tídangiñe Bíbülia “yarafati Aburemei houn ha agúahabaña luagu”, mini lan, aganba lumuti lan sun hafurieidun (Sal. 145:18). Ariñagati Heowá woun, ánhawa lan afiñera luagu, gayaraati wawandun furumiñeguarügü óuchawaguni ani gayaraati wagundaarun dan le wasufurirun (1 Ko. 10:13; Sant. 1:2, 12). Lanwoun lira, haritaguagüda tumutiwa Lererun Bungiu murusunrügüñein lan dan lidura óuchawaguni, dan le wagoubaguagüdüni luma ibagari magumuchaditi, le lunbei líchuguni Heowá woun ámuñegü (2 Ko. 4:16-18). Füramaseti Heowá woun lagidarubei lan sun lébuna waturobulin: Satanási hama ha ítarabaña kei ligía (Sal. 37:10). Furendeihadün san bérusu tídangiñeti Bíbülia le ínchahabalün lun hagagibudagun luma óuchawaguni le lunbei liabin ámuñegü?

12. Ka lunbei wadügüni lun wayusuruni ídemuei buidu le líchugubei Heowá woun tídangiñe Lererun?

¹² Lun wasagarun saragu buiti lídangiñe ídemuei le líchugubei Heowá woun tídangiñe Lererun, agurabati lun wéchudun aturiahoun Bíbülia ani ráramagua wagíame asaminara luagu le waliihabei. Anhein wawinwanda sun le wafurendeirubei, lederebudagüdübei wafiñen luma wamadagua luma Heowá. Ani líchuguba katei le erei woun lun wawandun. Luagu le aban oubaü, ánhawa afiñera tuagu Lererun, líchugubei Heowá lani sífiri sandu woun. Lau sífiri sandu le, larihúba “lúmagiñe lan Bungiu liabin óunwenbu ubafu le wawagubei” lun wawandun furumiñeguarügü óuchawaguni le ñǘbuinti (2 Ko. 4:7-10).

13. Ida liña líderaguniwa awanda ariñahani lúmagiñeti Bungiu le weresibirubei lúmagiñe “musu úaraguati ani gunfuranda ligía”?

¹³ Lau lídehan Heowá, ruti “musu úaraguati ani gunfuranda ligía” saragu ariñahani woun, bidéu, luma uremu le gayaraabei líderaguniwa lun derebugu lan wafiñen luma lun wóunigiruni wamadagua luma Heowá (Mat. 24:45). Lunti wayusuruni sun idewesei le wemegeirubei le ñǘbuinbei lidan dan lúmagiñe Heowá. Málügili lúmagiñe tariñagun aban íbiri Merigana gunda tan lau ariñahani le lúmagiñeti Bungiu. Ariñagatu: “Lidan bián wein irumu le naubei eseriwida lun Heowá, hóuchawaguati nafiñen saragu wéiyaasu”. Gagibuguatu íbiri to luma óuchawaguni hénrenguti. Gumuti aban wügüri le abugahabei lau lubacharuan lau libagari táruguti. Aba hóunwegun tagübürigu lau aban lanarime sandi ani dagati giñe kánserü tuagu, bián wéiyaasu. Ka íderagubarun awanda? Afuranguagüda tumuti: “Súnwandan lóunigirunina Heowá. Ariñahani le lúmagiñeti Bungiu le neresibirubei lúmagiñe musu úaraguati ani gunfuranda ligía, íderagua lumutina lun nawandun. Seremei lun lira, gayaraati nariñaguni le lariñagubei Hobu: ‘Sun winwan nan, narufudamémebei madurun nan!’” (Hob 27:5).

14. Ida liña layusuruniña Heowá íbirigu lun híderaguniwa dan le wásügürün lídangiñe lénrengunga? (1 Tesalónikana 4:9).

¹⁴ Arufuda lumuti Heowá houn lubúeingu lun hínsiñegua hamá hámagua ani lun híchugun gurasu hámagua lidan lidaani idiheri (2 Ko. 1:3, 4; aliiha huméi 1 Tesalónikana 4:9). Ítara haña wábirigu dandu wügüriña kei würiña kei Eliú, busentiña híderaguniwa lun úaragua wamá dan le wásügürün lídangiñe lénrengunga (Adü. 14:22). Ariha tumuti aban íbiri gíritu Diane katei le tungua. Dan le ladagarun aban lanarime sandi luagu tani weiriei, rútiña lílana damuriguaü dǘgüdaguaü tun ani íderagua hamutu lun derebugu lan tumadagua luma Heowá. Abahüdaguatu: “Dereti meha le násügürübei lidan dan ligía, sun dan ligía aba nasandirun lanügüñadina lan Heowá larünarugu lau ínsiñeni. Íderagua hamutiwa íbirigu ha lílanabaña damuriguaü saragu, ru hamuti sun le wemegeirubei woun lun wawinwandun: Bisida hamutiwa, áwahatiña woun, óubura hamutiwa... Kei mabugahadi nubéi, barǘ hamutiwa adamuridagua luma apurichiha sagü gayara lan nidin”. Ma inarüni hádangiñetiwa lan iduheñu ha óuserubaliwa lau saragu ínsiñeni?

SEREMEI WAMUTI HEOWÁ LADÜGA LÓNIGIRUNIWA LAU ÍNSIÑENI

15. Ka uagu chouru wabalin gayara lan wagagibudagun luma furumiñeguarügü lénrengunga?

¹⁵ Sun wagía wagagibudaguba luma óuchawaguni. Ítara kei warihini, maweiyasunbadiwa agagibudagua luma óuchawaguni wábuguarügü. Ítara kei aban úguchili hínsiñehabuti súnwandan lóunigiruniwa Heowá. Anihein wama, aranseñu liña lun laganbuniwa dan le wamuriahan luma lun líderaguniwa (Isa. 43:2). Chouru wamuti gayara lan wagagibudagun luma furumiñeguarügü lénrengunga ladüga ru lumuti Heowá sun le wemegeirubei woun lun wawandun, kei burí: furíei, Bíbülia, saragu agumeiraguagüdüni, hama íbirigu ha óuserubaliwa lau ínsiñeni.

16. Ka lunbei wadügüni lun lasigirun Heowá óunigirawa?

¹⁶ Wéiriti weteingiruni Wáguchi le siélubei, ladüga góunigi lumutiwa. “Gúndaatu wanigi lidan Aburemei” (Sal. 33:21). Ida liña warufuduni lun Heowá teinki wamani ladüga lóunigiruniwa lau ínsiñeni? Lau wayusuruni sun ídemuei le líchugubei woun buidu buidu. Lun lasigirun Heowá óunigirawa, mosu wadügüni le yuubei woun. Mosu wáfaagun lun gaganbadi wamá lun súnwandan ani mosu wadügüni le buídubei ligibugiñe. Ánhawa adügei, lóunigirubadiwa lun súnwandan (1 Fe. 3:12).