Sigí wamá éibuga lidan inarüni

1. Ka uagu buidu lubéi lun wayanuhani ida liña lan wasubudiruni inarüni?

“IDA liña san basubudiruni inarüni?” Chóuruti óunaba wamaali lan álügüdahani le saragu wéiyaasu, adián? Kamaniti ladügǘn álügüdahani le dántima le wasubudirun amu íbirigu. Hínsiñeti woun waganbuniña wábirigu ida liña lan hasubudiruni inarüni ani hínsiñe lan Heowá houn. Ani hínsiñeti giñe woun wabahüdahani houn ka lan uagu hínsiñe lubéi woun gefén wamá luagu Heowá (Rom. 1:11). Haritaguagüda lumutiwa yanu burí le gunda wamá luagu gefén wamá luagu Heowá. Derebugüda lumuti giñe wasigirun abagarida “úaragua luma inarüni”, mini lan le wabusenrun wawinwandun lun wagundaaragüdüni Heowá luma labiniruniwa (3 Huan 4).

2. Kaba wariha lidan aturiahani le?

² Lidan aturiahani le, wakutihaba fiu resun ka lan uéigiñe hínsiñe lubéi inarüni woun. Warihibei giñe ida luba lan wasigirun arufudei gebegi lan lubuidun idewesei le woun. Ani lagumuhóun, seremei wabéi Heowá saragu lau lachawahaniwa lidoun inarüni (Huan 6:44). Ani busentimabadiwa wayanuhan luagu inarüni houn amu.

KA UAGU HÍNSIÑE LUBÉI “INARÜNI” WOUN

3. Kátima lébunatimabei hínsiñe lan inarüni woun?

³ Anihein saragu resun wama ka lan uagu hínsiñe lubéi inarüni woun. Le súdinitimabei hínsiñe lan Heowá woun le úmagiñebei liabin inarüni. Seremei Bíbülia to Lererun, furendeihadiwa aban lan Bungiu suntigabafu ligía le adügübalin sielu luma Ubóu. Ani lóugiñe sun katei, ligía Wáguchi le siélubei, le hínsiñehabubei woun ani nidiheri ligía wawagu (1 Fe. 5:7). Subudi wamuti ‘gudemehabu lan, gaguraasun lan, weiri lan lidan ínsiñeni luma inarüni!’ (Afu. 34:6). Hínsiñeti irichaü lun Heowá (Isa. 61:8). Gáriti lun larihiniwa asufurira ani layumahaña lagumuchun lau asufuriruni danme le lachülürün dan le direi laalibei lun ladügüni (Her. 29:11). Aguraba wamuti lachülürün lubuidun weyu ligía! Ligíati hínsiñe lubéi Heowá woun saragu.

4, 5. Ka uagu lariñaga apostolu Pábulu ítara liña lan wemenigin kei aban óunguru?

⁴ Ábaya resun ka lan uagu hínsiñe lubéi inarüni woun ladüga wéiriti líderaguniwa lidan wabagari. Ariha wamá aban hénpulu. Laganagua arufudahani le furendei wamaalibei tídangiñe Bíbülia anihein emenigini lubá ámuñegü. Lun larufuduni Pábulu lebegi emenigini le, abürühati: “Ágüdaha lumutu emenigini le wawani deregüdagu, keisi lágüdahanu óunguru ugunei” (Ebü. 6:19). Ítara kei lágüdahanu aban óunguru waporu, ágüdaha lumutiwa giñe emenigini le tídanbei Bíbülia ani adügati lun darangilu wamá dan le wagagibudagun luma lénrengunga.

⁵ Dan meha le lariñagunbalin Pábulu dimurei le lasaminaruña meha luagu hemenigi kristiánugu anuadirúaaña ha lúnbaña houdin sielun. Gama lumoun huuti giñe dimurei le houn kristiánugu ha agurabubaña lun hawinwandun lun súnwandan ya ubouagu danme le paraísuhali (Huan 3:16). Chóuruti adüga lan emenigini lun lawinwandúniwa lun súnwandan lun gasuuni lan wabagari.

6, 7. Ida liña líderagunu Yvonne le tariñagubei Bíbülia luagu ámuñegü?

⁶ Ariha waméi tikesin aban íbiri gíritu Yvonne. Kei le mama lubéi lidan inarüni tagüriara, lúmagiñe tiñüraü hanufudetün meha luéi óunweni. Aritagua taagili luagu aba lan taliihan aban líburu ani le lan aweirigüdübarun tanigi saragu: “Lachülürüba lan aban weyu lun úa lan haruga”. Ariñagatu: “Mígirunti meha dimurei le lun narumugun, aba meha nasaminarun luagu ámuñegü. Aba burí nariñagun núniwagua: ‘Mafiñentina anhein lérügüñein lubéi ibagari. Ka san nadügübei ya ubouagu?’. Mabusenruntina meha nounwe!”.

⁷ Dan le aweirideina tubéi Yvonne aba tasubudiruniña gefentiña luagu Heowá. Ariñagatu: “Aba nagumeserun afiñera gayara lan nawinwandun lun súnwandan lidan Paraísu ubouagu”. Íderagua lumutu saragu tasubudiruni inarüni, ariñagayatu: “Merederun haadina marumugunga asaminara luagu ámuñegü o luagu óunweni”. Maweiriduhaaru wanigi luagu gebegi lan inarüni tun Yvonne saragu, ani hínsiñeti tun lun tayanuhan luagu temenigin houn amu gürigia (1 Tim. 4:16).

8, 9. a) Ida liña larufuduni wügüri le uágubei labahüdaha Hesusu gebegi lan irisini le ladarirubei lun? b) Ka hasandirubei luagu inarüni?

⁸ Uganu buiti luáguti Larúeihan Bungiu ligía giñe aban lídangiñe fánreinti lidan inarünti le tídanbei Bíbülia. Ariñagati Hesusu ítara liña lan inarüni luáguti Larúeihan Bungiu kei aban irisini le aramudaguati. Ariñagati giñe Matéu 13:44: “Ítara liña arúeihani le lánina sielu kei irisini le aramudúañubei lábugiñe múa. Ladarirei aban wügüri irisini ligía, ábaya laramuduni ñeinmeme; le lueirin lugundan, aba lidin, aba laluguruni sun le lúmabei, aba lagañeihani fulasu ligía”. Kei le aubei warihei mama meha láluahaña wügüri ligía irisini. Ani dan le ladariruni aban ladügün aban óunwenbu sákürifisiu lun lerederun lau: aba laluguruni sun lúmati. Ka uagu ladügei le? Ladüga gunfuranda lani gebegi lan irisini ligía saragu, sügǘ luéi furumiñeguarügü katei le gayaraabei líchuguni leweñegua.

⁹ Sandi humuti san ligiaméme luagu inarüni? Chóuruti ítara liña lan! Subudiwati ua lan ni kata le líchugubei ubóu le, le gayaraati wagounbaguagüdüni luma ugundani le lanügübei weseriwidun lun Heowá luma emenigini lun lawinwandúniwa lun súnwandan lidan Larúeihan Bungiu. Ligíati, buídubei furumiñeguarügü sákürifisiu le wadügübei lun waganwoundagüdüni wamadagua luma Heowá. Aban lubuidun chansi gamadagua wamá luma Heowá. Úati ni kata íchuguti ugundani woun luéidügü wagundaaragüdüni Heowá lidan sun katei (Kol. 1:10).

10, 11. Ka ínchahabalin Michael adüga asansiruni lidan libagari?

¹⁰ Adügaaña saragu kristiánugu sákürifisiu wéinamuti lun gayara lan hagundaaragüdüni Heowá. Añahein amu ígira hamaali aturiahani luma uéiriguni le lídanbei ubóu le. Híbiri ígira hamaali laluahóun irisini luma umegeguni. Añahein amu sansi hamuti habagari sunsuinagubei dan le hasubudirunbalin Heowá. Ligía meha ladügübei Michael, aban íbiri le adügagubei lungua Gefenti dan le laweiridunbei. Dan meha le nibureingili aba lafurendeirun karate. Ariñagati: “Gúndaatina meha lau núgubu. […] Ani anihein meha dan aba nasandiragun nungua siñá lan nagañeinruniwa”. Aba lagumeserun aturiahoun Bíbülia, ani aba lafurendeiruni ka lan lisaminanbei Heowá luagu anarimeni (Sal. 11:5). Aritagua lágili dan le lan hachülürünbei aban feru maríeitiña arufudaha lun tuagu Bíbülia. Mariñagun hamá lun lun lan lígiruni karate. Tenirügüntiña lun harufudahani inarüni lun”.

¹¹ Éibutima lafurendeirun Michael luagu Heowá éibutima línsiñedun lun. Hingí lumutu lanigi lasubudiruni arufuda lan Bungiu gudemehabu houn lubúeingu. Gunfuranda lumuti meha Michael mosu lan lasansiruni libagari sunsuinagubei. Ariñagati: “Subudi numuti meha hénrengubei lan nun nígiruni Karate. Gama lumoun, subudi numuti meha anhein lan nadüga lagundaaruba lan Heowá, ani chouru numuti le lan súdinitimabei neseriwidun lun Heowá”. Gebegiti inarüni le ladarirubei Michael lun ani ínchaha lumuti lun ladügün asansiruni wéinamuti lidan libagari (Sant. 1:25).

12, 13. Ida liña líderagunün inarüni le tídanbei Bíbülia Mayli?

¹² Lun larufudún lebegi inarüni le tídanbei Bíbülia agoubaguagüda tumuti luma lanpu le durunguati lidan luburiga (Sal. 119:105; Efe. 5:8). Wéiriti lebegi tun Mayli, to lílana ageiraü Azerbaiyán ídemuei le teresibirubei luagu durunguagüda taali lan Lererun Bungiu tibagari. Ámuñegueinarügütu hani tagübürigu relihión: túguchi musulmán ani túguchu huríu. Ariñagatu Mayli: “Subudi numuti anihein lan Bungiu, gama lumoun, anihein meha katei le úati gunfuranda nani. Aba burí nálügüdagun nungua: ‘Ka uagu ladügawa Bungiu? Ka lisuunibei hasufurirun gürigia lidan sun habagari lárigiñe aba hasigirun asufurira lidan máfiougati?’ Ariñagatiña gürigia sun lan le asuseredubei lugundan lan Bungiu, adügati katei le lun nasaminarun: ‘Títere funa san wagía lúhaburugun Bungiu? Gúndaati funa san lau larihiniwa asufurira?’”.

¹³ Sigitu Mayli áluaha óunabagülei lun álügüdahani le tadügübei. Dan lárigiñe aban tánharun lun taturiahanu Bíbülia ani aba tadügagun tungua gefentu luagu Heowá. Ariñagatu: “Seremei lun inarüni le tídanbei Bíbülia, guenlé ábanhadina gürigia to gúndaatu”. Ítara kei Mayli, sun wagía ha eseriwidubaña lun Heowá alawaha wamuti “le agúarubei hun lídangiñe luburiga lun lidoun lueirin larugounga le líchugubei” (1 Fe. 2:9).

14. Ka gayaraabei wadügüni lúntima línsiñedun inarüni woun (Ariha huméi giñe rekuáduru “Amu burí hénpulu”).

¹⁴ Hénpulu le harihibei lidan párafu burí le arufuda lumuti woun gebegi lan inarüni. Chóuruti samina wamá luagu ámuya hénpulu. Ka uagu madireirun wabéi dan lun wakutihani wábuguarügü ámuya resun lun línsiñedun inarüni woun? Éibutima línsiñedun inarüni woun éibutimaame warufuduni ínsiñeni le wasandirubei luagu.

IDA LIÑA WARUFUDUNI HÍNSIÑE LAN INARÜNI WOUN

15. Ida luba warufuduni wínsiñehabu luagu inarüni?

¹⁵ Aban igaburi lun warufuduni wínsiñehabu luagu inarüni lau waturiahanu Bíbülia súnwandan tuma wani agumeiraguagüdüni. Meberesenga átirihali lan dan wau lidan inarüni, súnwandan anihein lan lunti wafurendeiruni. Ariñagatu furumiñetu Garüdia Awisahatu to áfuriduboun lidan inglesi: “Ítara liña inarüni kei aban fuluri lidan ibagari le ítarabei kei fulasu mageirawati geyegu liña lau hidurun wuribati le lánina iyeeni ani ítagaraü yebe lañaradagun fuluri. Anhein samina hubéi hadariruni mosu agagudúañu humá; [...] anhein busén hubéi hibihini mosu hélemuchun. Ua lan gufuruma humá lau ábanrügü fuluri lánina inarüni. [...] Sigí humá abudaha; sigí humá áluaha”. Lun waturiahan, mosu wáfaagun, ani wasagaruba saragu buiti anhein wadüga.

16. Ka ligaburi aturiahani buídubei hun? (Ariñawagúni 2:4-6).

¹⁶ Mama sun wagía lun hínsiñe lan aliihani luma aturiahani woun, gama lumoun amuriahati Heowá wama lun ítarameme wamá áluahei subudi lun gunfuranda wamani inarüni buidu (aliiha huméi Ariñawagúni 2:4-6). Anhein wadüga lau ubebeni buídubei lidin woun súnwandan. Ariñagati aban íbiri gíriti Corey dan le lan laliihanu Bíbülia, aba lan leteniruntima lun ábanrügü bérusu. Afuranguagüdati: “Ariha numuti abürüdǘni le luágubei lugudina páhina, ani áluaha au lanwoun ariñahani. […] Ítara liña nasagarun buiti lídangiñe le naliihabei”. Yusu waméi yebe ligaburi aturiahani le o mayusurun, ánhawa adireira dan ani áfaagua wagía lun waturiahanu Bíbülia, warufudubei hínsiñe lan inarüni woun (Sal. 1:1-3).

17. Ka mini lubéi lawinwandúniwa inarüni (Santiagu 1:25).

¹⁷ Inarüni ua lan buídurügü lan waturiahani inarüni. Lun wasagarun saragu buiti lídangiñe le, lunti wadügüni le wafurendeirubei, mini lan le wawinwanduni inarüni. Ítararügübei ladüga inarüni lun gunda wamá (aliiha huméi Santiagu 1:25). Ida luba wachoururuni wawinwanduñein lan inarüni? Ariñagati aban íbiri ka lan katei lunbei wakutihani wóuniwagua lun warihini ka lan katei wadügübei buidu luma ka lan gayaraabei wabuiduragüdün. Afuranguagüda lumuti apostolu Pábulu ítara: “Lunti wabagaridun úaragua luma katei le furendei wamaalibei” (Fili. 3:16).

18. Ka uagu wáfaagua saragu lun wasigirun “abagarida lidan inarüni”?

¹⁸ Samina wamá luagu sun katei buíduburiti le asuseredubei woun dan le wadügüni óunwenbu áfaaguni lun “wabagariduni inarüni”. Mámarügü lun wabuiduragüdüni wabagari, gudagüda wamutu giñe lanigi Heowá luma hanigi wábirigu lidan afiñeni (Ari. 27:11; 3 Huan 4). Úati amu resun le buídutimati lun línsiñedun inarüni woun luma lun wawinwanduni!