Súdinigili san inarüni?

Genegeti san hun hénrengutimahali lan lasubudirúniwa ka lan inarüni luéi le mámabei inarüni? Uguñe weyu, añahein saragu ígiratiña lun labuguruniña le hasandirubei luma le hasaminarubei sügǘ lau hárügüdün luagu le inarünibei. Ani añahein giñe bandi gürigia ha afiñerubaña úati lan inarüni.

Mama iseriti saminaü le. Sügühali kéiburi 2,000 irumu guentó, lúmagiñe lálügüdüni gumadimati Ponsiu Pilatu Hesusu: “Káteiti inarünibei?” (Huan 18:38). Lau sun magurabun lani Pilatu lóunabagüle, súdiniti álügüdahani le. Rutu Bíbülia óunabagülei lun álügüdahani le gayaraabei ladügün lun taweiridun hanigi íderagualaüme lidan aban ubóu ídanbei mafiñerúaali lan luagu inarüni.

Anihein funa san inarüni?

Anha. Yusu tumuti Bíbülia dimurei “inarüni” lun tayanuha luagu katei le gayaraabei lachoururúniwa inarüniti lan luma lun tayanuha luagu katei le richabei. Arufudahatu giñe Heowáa lan Bungiu le úmagiñebei liabin inarüni, ani watu lun “Lubungiute inarüni” (Sálumu 31:5). Tidan Bíbülia ladarirúa inarüni le lúmagiñeti Bungiu ani góubaguagüdawati inarüni le luma ligemeri leiti lugundun adundeha lániwa labadinaguagiñe sun ayuridaguni le lídanbei ubóu le (Sálumu 43:3; Huan 17:17).

Ida luba hadariruni inarüni?

Mabusenrunti Bungiu lun wánharun lun inarüni le tídanbei Bíbülia ladüga ibidiñe lan woun kaba lan un wánhara. Lubaragiñe lira agunbiraha lumutiwa lun wayusuruni wasaminan lun wakutihani inarüni (Rómana 12:1). Busenti lun wasubudiruni luma lun línsiñedun woun ‘lau sun wasaminan’, ani ínchaha lumutiwa lun wachoururuni inarüniti lan le wafurendeirubei tídangiñe Bíbülia (Matéu 22:37, 38; Adügaü 17:11).

Halíagiñe liabin iyeeni?

Ariñagatu Bíbülia luagu Satanási, le Mafia, le lágani Bungiu, ligía lan agumeserubei lau iyeeni, ani watu lun le “lúguchibei iyeeni” (Huan 8:44). Eyeehati meha luagu Bungiu dan le layanuhabei hama furumiñetiña gürigia (Agumesehani 3:1-6, 13, 17-19; 5:5). Lúmagiñe dan ligía, anihagua Satanási aburuchaguagüda iyeeni luma aramudei inarüni luáguti Bungiu (Arufudúni 12:9).

Ka uagu kamanitimahali lubéi heyeehan gürigia uguñe weyu?

Lidan wadaani, le unbei tagúara Bíbülia “lagumuhóun dan”, gánwountimahali leyeeduniña Satanási gürigia. Kamaniti lun heyeeduniña gürigia amu lun hagidaruni le hámabei hawéi (2  Timotéu 3:1, 13). Uguñe weyu kamaniti giñe iyeeni tidan tibe-agei relihión ubouagu. Kei tariñaguni Bíbülia lidan aban profesía luagu dan le ídanbei wawinwanda: “Ábame hálugun saragu arufudahatiña lun harufudahani lérügü habusenrubei haganbun houn. Híchugubei hanagan luagun inarüni” (2 Timotéu 4:3, 4).

Ka uagu súdini lubéi inarüni?

Inarüni lébunabei afiñeni haganagua gürigia. Dan le ua lan afiñeni haganagua gürigia dürügua lumuti hamadagua. Ariñagatu Bíbülia busén lan Bungiu lun inarüni lan lébuna wáhuduragun lun. Ariñagatu: “Ha áhuduragubaña lun, [Bungiu] lunti hadügüni lau sun hani sífiri luma hanarün” (Huan 4:24). Lun hafurendeirun ida luba lan líderagunün inarüni le tídanbei Bíbülia asubudirei iyeeni le tídanbei relihión luma ida luba lan hesefurun luéi, aliiha huméi ariñahani le gíribei “Iyeeni burí le adisedagüdübaliwa luéi Bungiu”.

Ka uagu busén lubéi Bungiu lun nasubudiruni inarüni?

Busenti Bungiu lun hesefurun, ani lun lira mégeitün hasubudiruni inarüni luagu (1 Timotéu 2:4). Anhaün hafurendeira luagu lilurudun Bungiu luáguti le wuribabei luma le buídubei ani falá humeime lidan hibagari, buídubei humadagua luma (Sálumu 15:1, 2) Óunaha lumuti Bungiu Hesusu ubouagun lun líderaguniña gürigia afurendeirei inarüni. Busenti Bungiu lun gaganbadi wamá lun larufudahan Hesusu (Matéu 17:5; Huan 18:37).

Lagumuchaguba san Bungiu lau iyeeni?

Anha. Iyereguti lun Bungiu dan le heyeeduniña gürigia amu lun hagidaruni le hámabei hawéi. Ariñagaali lagumuchuba lan hau gürigia yéetiña (Sálumu 5:6). Danme le ladügüni Bungiu lira, lagunfuliruba giñe lau füramasei le: “Lerederuba inarüni lun sun dan” (Ariñawagúni 12:19).