Ida luba wasandirun darangilaü dan le wagagibudagun luma lénrengunga

1. Katei san darangilaü le lúmagiñebei Bungiu, ani ka buiti wasagarubei lídangiñe? (Filipuna 4:6, 7).

ANIHEIN aban darangilaü le ibidiñeti houn gürigia. Layanuhaña luagu lidarangilan Bungiu, darangilaü le lasandirubei aban gürigia dan le here lan lumadagua luma Lúguchi le siélubei. Dan le ñein lan lidarangilan Bungiu wama, chóuruti wasandiragun woungua (aliiha huméi Filipuna 4:6, 7). Gúndaatiwa dan le gamadagua wamá hama gürigia ha gamadaguabaña luma Heowá ani gúndaatiwa ladüga ídehati lun derebugu lan wamadagua luma Bungiu “le íchugubei darangilaü” (1 Tesa. 5:23). Dan le wasubudiruni Wáguchi, anihein lidarangilan wama, afiñetiwa luagu, ani gaganbaditiwa lun. Barüti darangilaü le gálumaü tun wanigi dan le wagagibudagun luma lénrengunga.

2. Ka uagu chouru wabalin gayara lan wibihini lidarangilan Bungiu?

² Inarüni san gayara lan lasandirún lidarangilan Bungiu laganagua lénrengunga? Gayaraati san wasandirun gálumaü dan le laburuchagun aban sandi galugurahati, liabin liñawan dan, hageindagun gürigia luagu haricha o wéibaahoun? Adügati lénrengunga le lun halouchun furumiñeguarügü gürigia. Lau sun lira, ru lumuti Hesusu adundehani le houn lani disipulugu: “Madiherida humá, manufude huguyame” (Huan 14:27). Adüga hamaali saragu íbirigu le lariñagubei Hesusu. Lau lídehan Heowá sandihaña darangilaü dan le hagagibudagun luma óuchawaguni, hénrenguti.

DARANGILAÜ LIDAN LIDAANI LABURUCHAGUN SANDI GALUGURAHATI

3. Ida liña lagidaruni sandi galugurahati darangilaü wawéi?

³ Gayaraati lasansiruni sandi galugurahati wabagari sódini. Samina wamá luagu lénrengunga le lanügübei sandi COVID-19 houn saragu gürigia. Según aban aturiahani le adügǘbei, ariñagatiña hóugiñe hamidan gürigia ha álügüdawagubaña gaturobulin hamá luma hadabagu ladüga sandi le. Gíbetimahaña giñe gürigia lau sandi lánina lueirin íruni luma idiheri, gíbeeña gátaditiña, gíbeeña giñe ayusurutiña burí düroga, hagayuahan maríeitiña hámagua ani gánwountimahali hagidaruni gürigia habagari guánarügü. Anhein burugua lubéi sandi galugurahati le lidan fulasu le ñein lubéi bawinwanda, kaba badüga lun masandirun ban saragu íruni luma lun bibihini lidarangilan Bungiu?

4. Ka uagu ru lubéi darangilaü woun, wasubudiruni profesía le lariñagubei Hesusu luagu lagumuhóun dan?

⁴ Ariñagati Hesusu lidan lanme lagumuhóun dan ñeinbei lan “sandi, lidan ámuñegueinarügü fulasu” (Luk. 21:11). Ruti darangilaü wasubudiruni katei le. Ka uagu? Lugundun subudi wamaali lasusereduba lan, ani maweiriduntu wanigi. Ariha wamuti lasusereduña lan katei le, kei le aubei lariñagei Hesusu. Ligía wafalarubalin adundehani le lígirubei houn gürigia ha lúnbaña hawinwandun lidan lagumuhóun dan. Ariñagati: “Manufudedagua humá” (Mat. 24:6).

5. a) Según Filipuna 4:8, 9, ka lunbei wamuriahani luma Heowá dan le laburuchagun sandi galugurahati? b) Ida liña líderaguniwa waganbahani taliihóun Bíbülia?

⁵ Dan le laburuchagun sandi galugurahati, gayaraati wasandirun machouruni luma anufudei. Ligía asuseredubei tun aban íbiri gíritu Desi.b Lárigiñe lounwe tiyaurite, hilá ligía liráü tiyaurite, luma tisurusia ladüga COVID-19, aba meha tanufudedun luéi ladagarun sandi le tuagun luma luéi ladagarun tuagu túguchu ladüga derebuguharu lan meha. Hanufudetu meha giñe teferidiruni tuadigimari, ani aba tálügüdagun tungua halíagiñeba lan tasagara seinsu lun éigini luma lun tafayeirunu rumu to táhayahaboun. Aba tadiheridun saragu darí lun lagidarun tidabagu. Lau sun lira, aba tibihini Desi darangilaü le temegeirubei. Ida? Aba tafurieidun lun Heowá lun darangilu tan luma lun tasaminarun luagu katei buiti (aliiha huméi Filipuna 4:8, 9). Lun taganbahani le lariñagunbei Heowá, ábaha taganbahani taliihóun Bíbülia, ariñagatu: “Lubuidun umalali le hayusurubei aliihatiña gáluma lumuti nidiheri ani haritaguagüda lumutina berese lan Heowá nau” (Sal. 94:19).

6. Ida luba líderaguniwa waturiahan wábuguarügü luma wabasiihan adamuridagua?

⁶ Chóuruti, adüga lan sandi galugurahati lun lasansirun le uágubei wéchuda. Lau sun lira mígira wamá lun ladügün katei le lun wígiruni waturiahan wábuguarügü o lun wabasiihan lidoun adamuridaguni. Wadariruba sügǘ tidan wani agumeiraguagüdüni, lidan burí bidéu le aritaguagüdübaliwa hásügürüña lan wábirigu lídangiñe ligiaméme turobuli ani lau sun lira kíputiña úaraguni lun Heowá (1 Fe. 5:9). Íderagua lumutiwa adamuridaguni lun wabuinchagüdüni wasaminan lau ariñahani le tídangiñeti Bíbülia ani ruti giñe chansi woun lun wíchugun dǘgüdaguaü luma gurasu houn amu ani resibi wameime (Rom. 1:11, 12). Ánhawa asaminara luagu ida liña lan líderaguniña Heowá lubúeingu dan le sandi hamá, dan le hanufude hamá, o dan le hasandiragun houngua hábuguarügü, lederebugudübei wafiñen ani wachoururubei luagu líderagubadiwa lan.

7. Ida luba gayara lan wáyeihani apostolu Huan?

⁷ Adüga waméi sun wayaraati lun yarafa wamá houn wábirigu. Gayaraati ladügün aban sandi galugurahati lun díseñu wamá hawéi amu, íbini dan le hama wamá wábirigu. Lidan kesi líbeina le, gayaraati wasandiragun woungua kei apostolu Huan, le meha busenbei larihini Gayu le lumada lun layanuhan luma (3 Huan 13, 14). Gama lumoun subudi lumuti siñabei lan larihini Gayu, le lumada luagu átiri dan. Ligía aba lubéi ladügüni sun liyaraati: aba lóunahan aban gárada lun. Anhein siñá lubéi waríagun woungua hama wábirigu, gayaraati wagúarun houn lun warihiniña luéigiñe gágamuru o wóunahan somu ariñahani houn lídangiñe. Dan le yarafa wamá houn wábirigu, masandibadiwa wábuguarügüñadiwa lan ani sanditiwa darangilaü. Ánheinti weiri lubéi idiheri le wasandirubei, kaba wadüga? Ayanuha wamá hama wéiyaaña lidan afiñeni ani anha wamá lun dǘgüdaguaü luma gurasu le híchugubei woun lau saragu ínsiñeni (Isa. 32:1, 2).

DARANGILAÜ DAN LE LASUSEREDUN ABAN LIÑAWAN DAN

8. Ida liña gayara lan lagidaruni somu sügǘ le sódiniti darangilaü huéi?

⁸ Anhein sügühadün lubéi lídangiñe somu liñawan dan, hárabaganali o gudáü, másiñati hásügürüña lan lídangiñe saragu idiheri. Anhein hilá lubéi somu hiduhe o féridi humaali lan humegegun, háfuga sandigua humá hungua lau igarigu, íruni o igañi. Lau hasandiragun hungua ítara, úati mini lan hínsiñe lan umegeguni hun o lougua lan hafiñen. Hásügürüña lídangiñe saragu lénrengunga le gayaraabei ladügün lun taweiridagüdünu hanigi fiu gürigia ladüga luriban hóuserun (Hob. 1:11). Meberesenga lénrengunga le wásügürübei, gayaraati wasandirun darangilaü, ariha waméi ka lan lunbei wadügüni.

9. Ida liña líderaguniwa dimurei le lariñagubei Hesusu lun aranseñu wamá lubá furumiñeguarügü katei le sódiniti?

⁹ Añahein gürigia saminatiña, másügürünbaña lan lídangiñe somu sügǘ le sódiniti. Ánheinti wagía gabaroun wamuti le lariñagubei Hesusu. Subudi wamuti laganwounduba lan liñawan dan luma chagaguaü le lanügübei ani fiu wádangiñe gayaraati wasufuriruni. Ariñagati Hesusu houn lani disipulugu lubaragiñe lan liabin lagumuchagüle ubóu ñeinbei lan “óunwenbu burí hárabaganali” luma amu burí katei le anügübei günringuaü (Luk. 21:11). Ariñagati giñe laganwounduba lan wuribani ani ariha wamuti laganwoundun wuribani le, lidan áfarahani, anarimeni luma anarimeni le adügübei lun hanufudedun gürigia (Mat. 24:12). Mariñagunti Hesusu gürigiarügübaña lan ha dísebaña luéi Heowá ásügüra lídangiñe katei le. Lubaragiñe lira, saragu lubúeingu Heowá ha úaraguabaña súfurihaña ladüga chagaguaü burí le lánina liñawan dan (Isa. 57:1; 2 Ko. 11:25). Gayaraati móunigirun lubadiwa lan Heowá lau ladügün milaguru lun lesefuruniwa luéi sun le gayaraabei lasuseredun woun, gama lumoun líchugubei le wemegeirubei woun lun darangilu wamá.

10. Ka uagu wariñaga dan le waranserun lubá somu katei le sódiniti warufuduña lan afiñe wamá luagu Heowá? (Ariñawagúni 22:3).

¹⁰ Lidan aban lamiselu sódiniti, ménrenguntimabei woun lun darangilu wamá anhein aranseñu waña lubéi. Larufuduña funa san katei le lougua lan wafiñen luagu Heowá? Úa mítaranti. Ánhawa aransera buidu lubá somu katei le sódiniti, larufuduña le luagu afiñe wamá lóunigirubadiwa lan Heowá. Ka uagu wariñagei le? Ladüga ru tani Bíbülia adundehani le woun lun lan aranseñu wamá lubaragiñe liabin denchaü (aliiha huméi Ariñawagúni 22:3). Tídangiñe burí garüdia, adamuridaguni luma burí ñunsu; ariñagatu lóundarun Heowá woun lun waranserun lubá wagagibudagun luma furumiñeguarügü liñawan dan.c Kaba wadüga anhein afiñe wabéi luagu Heowá? Wasigirubei adundehani le guentó, lubaragiñe lasuseredun somu katei le sódiniti.

11. Ka wafurendeirubei lídangiñe tani Margaret hénpulu?

¹¹ Samina wamá luagu le asuseredubei tun aban íbiri gíritu Margaret. Aba hariñagun gumadimatiña tun lun táfuridun túbiñegiñe ladüga anihein lan aban óunwenbu gudáü lidan fulasu le ñein lubéi teredera. Kei le hóuchuña lubéi saragu gürigia lun hanurahan ñéingiñe lidan aban, aba labuinchun üma tau karü ani siñati hawanserun lidan üma ligía. Ani anihein meha saragu gumuleli ǘmadarugu ani mosu meha terederun Margaret tidan tugune. Kei le buidu lubéi taranserun, ligía tesefurubei. Barütu meha aban mapa tidan tuposun lun tárügüdün amu üma. Ñǘdünñaharu meha luéigiñe üma ligía lun tasubudiruni lun gayara lan ménrengun lan tanurahan anhein asusereda somu katei sódiniti. Seremei taranserun buidu, ligía tesefurubei.

12. Ka uagu wafalarei adundehani le ichugúbei woun, dan le ñein lan somu katei le sódiniti?

¹² Lun gayara lan hóunigiruniwa luma lun ua lan chagaguaü, gayaraati hariñagun gumadimatiña woun lun werederun wábiñe o lun wáfuridun wábiñegiñe, o híchugun amu burí adundehani lun gayara lan wafalaruni. Añahein amu burí gürigia maganbaditiña lun burí adundehani le ladüga mabusenrun hamá hígirunu haban lau hamegegun. Ánheinti wagía kristiánugu, ida liña wóuserun? Ariñagatu Bíbülia woun: “Keisi lánigu humá Wabureme Kristu, ayumuraguatina hun lun gaganbadi humá lun sun gumadi ya ubouagu. Gúnfuli humá luma lugumadin urúei, kei ligía lan íñutimabei ubara; luma hama gumadimatiña ha lóunahabaña” (1 Fe. 2:13, 14). Rutu giñe lóundarun Heowá adundehani woun lun tóunigiruniwa. Súnwandan taritaguagüniwa lun wíchuguni linumerun wagagamurun létima iserigilitimabei houn wéiyaaña lidan afiñeni lun hasubudiruni halíañadiwa lan ánheindügü asusereda somu katei le sódiniti. Ru wamaali san linumerun wagagamurun houn? Másiñati tíchugun lóundarun Heowá adundehani woun lun werederun wábiñe, lun wáfuridun o lun wibihini le wemegeirubei. Gayaraati giñe tariñaguni woun ídaba lan o ida luba lan wíderaguniña amu. Ánhawa maganbadi, gayaraati ladügün igaburi lira lun wíchuguni wabagari luma habagari wéiyaaña lidan afiñeni lidoun denchaü, íbirigu úaraguatiña ha óunigirubaliwa (Ebü. 13:17). Ariñagatu Margaret: “Chouru naali, lau lan gaganbadi nan lun adundehani le híchugubei wéiyaaña lidan afiñeni tuma lóundarun Heowá sefu lumuti nibagari”.

13. Ka hadügübei saragu kristiánugu ha anurahabaña lun gunda hamá ani darangilu hagía?

¹³ Ladüga chagaguaü lánina liñawan dan, wuribu luma ageindaguni luagu haricha gürigia, hanurahaña saragu íbirigu. Adüga hamuti sun hayaraati lun héchudun luagu iseri ligaburi hawinwandun luma lun mígirun hamani heseriwidun lun Heowá. Sigitiña apurichihei “uganu buiti”, ítara kei hadügüni furumiñetiña kristiánugu ha anurahabaña lidoun ámuñegueinarügü fulasu ladüga éibaahouni (Adü. 8:4). Íderagua lumutiña apurichihani lun hasaminarun luagu Larúeihan Bungiu, mama luagu haturobulin. Ítara liñati gunda hamá ani darangilu hagía.

DARANGILAÜ LIDAN LIDAANI ÉIBAAHOUNI

14. Ka uagu gayara lubéi ladügün éibaahouni lun weferidiruni darangilaü?

¹⁴ Gayaraati lagidaruni éibaahouni saragu katei le adügübei lun wasandirun darangilaü luma ugundani, kei burí wadamuridagun maturobulinga, wapurichihan úouga ni kata le eberesehati, wadügüni wafisiute le lánina sagü weyu manufudeuga luéi harügüdübadiwa lan gumadimatiña. Dan le hagidaruni darangilaü le wawéi, másiñati ladiheridagüdüniwa saragu lau wasaminarun kaba lan asusereda ámuñegü. Maribanti wasandiragun woungua ítara. Lau sun lira, lunti duari wamá luéi ladügün éibaahouni lun weferidiruni wafiñen, kei lariñaguni Hesusu houn lani disipulugu (Huan 16:1, 2). Ligíati, ka gayaraabei wadügüni lun darangilu wamá dan le wéibaahoun?

15. Ka uagu moun lumuti lubéi wanufudedun luéi éibaahouni? (Huan 15:20; 16:33).

¹⁵ Ariñagatu Lererun Bungiu woun: “Héibaahouba lan sun ha busenbaña habagaridun deregeguañu houngua lun Hesukrístu” (2 Tim. 3:12). Hénrenguti lun aban íbiri gíriti Andréi lánharun lun dimurei le dan le hamahadunbei lúrudugu lun apurichihani lidan ageiraü le ñein lubéi lawinwanda. Saminati meha: “Añahein saragu gefentiña luagu Heowá ya; maweiyasunbaña árügüdaawa súngubei”. Lau sun lira madügünti katei le lun darangilu lan. Súnwandanha nidiheri lan. Añahein amu íbirigu, ígira hamuti sun katei lúhaburugu Heowá ani masaminaruntiña luagu marügüdünbaña lan. Subudi hamuti gayara lan hárügüdün ani masandiraguntiña houngua lau saragu idiheri kei Andréi. Ligía lanúadirubei lasigiruni hani hénpulu ani aba lafiñerun sunsuinagubei luagu Bungiu. Murusun dan lárigiñe, aba lasandirun darangilaü, ani guentó gunda hali íbini laganagua saragu turobuli. Gayaraati giñe wasandiragun woungua ítara. Inarüni luagu ariñaga lan Hesusu wéibaahouba lan, gama lumoun chouru lumuti giñe woun gayara lan úaragua wamá (aliiha huméi Huan 15:20; 16:33).

16. Ka adundehani lunbei gaganbadi wamá lun danme le wéibaahoun?

¹⁶ Dan le maha hamá lúrudugu lun wapurichiha, gayaraati tíchugun sukursáli o wéiyaaña lidan afiñeni adundehani lun wóunigiragun woungua, lun wasigirun eresibira ariñahani tídangiñeti Bíbülia luma lun wadügüni sun wayaraati lun wasigirun apurichiha. Lidan kesi le, mosu gaganbadi wamá, íbini ua lan gunfuranda wamani sunsuinagubei ka lan uagu lichugúa adundehani le woun (Sant. 3:17). Ani maweiyasun wamá íchiga ariñahani hawagu wábirigu o luagu dasi le wadügübei lidan damuriguaü houn ha moun lumuti hasubudiruni (Apur. 3:7).

17. Ítara kei apostolugu, ka anúadira wamaalibei lun wadügüni?

¹⁷ Lébunatimabei lageindagun Satanási hama lubúeingu Bungiu ladüga falá hamani “luganute Hesukrístu” (Aruf. 12:17). Mígira wamá lun lanufudedagüdüniwa Satanási luma ubóu le lábugiñebei lubafu. Lapurichihóun luma larufudahóun inarüni íbini laganagua éibaahouni barüti ugundani luma darangilaü woun. Lidan furumiñeti sígulu dan le hariñagubei gumadimatiña huríu houn apostolugu lun mapurichihan hamá, úaraguatiña lun Bungiu ani gaganbadi hagía lun. Sigitiña apurichiha, ani gúndaati hasandiragun houngua (Adü. 5:27-29, 41, 42). Inarüni, dan lan le wéibaahouña lan, lunti duari wamá dan le wapurichiha (Mat. 10:16). Ánhawa áfaagua saragu, wasandirubei darangilaü le adügübei lun gunda lan Heowá luma lun wanügüni uganu le lánina asalbaruni houn amu.

“HUMA LAN LUBUNGIUTE DARANGILAÜ”

18. Halíagiñe liabin darangilaü le wemegeirubei?

¹⁸ Chouru huméi íbini lan lidan dan le hénrengubei gayaraabei wasandirun darangilaü. Lídanme dan ligía, lunti gabaroun wamani lidarangilan lan Bungiu wemegeirubei, mini lan lira, Heowarügüñein lan gayara líchuguni darangilaü ligía woun. Afiñe wamá luagu danme lan le wásügürün lídangiñe lidaani laburuchagun sandi galugurahati, liñawan dan luma éibaahouni. Madiseda wamá tuéi lóundarun Heowá ani samina wamá luagu lubuidun füramasei le lunbei lagunfuliruni ámuñegü. Ánhawa adügei ítara, wámabei “Lubungiute darangilaü” (Fili. 4:9). Lídanme leweñegua aturiahani, warihiba ka lan gayaraabei wadügüni lun wíderaguniña wábirigu lun hasandiruni lidarangilan Bungiu danme le hásügürün lídangiñe lénrengunga.