Íderagua wamaña sun ha ásügürübaña lídangiñe lénrengunga

1. Ka ladügübei Heowá liibe-agei dan lun lóunabuni hafurieidun lubúeingu?

SUBUDI humuti san, gayara lan layusurunün Heowá lun lóunabuni lafurieidun somu íbiri? Meberesenga anhein weseriwiduña lubéi keisi wéiyaaña lidan afiñeni, ídehatiña lidan damuriguaü, prekursoru, apurichihatiña, nibureintiña, derebuguhaña, wügüriña o würiña. Dan le lamuriahan aban gürigia le hínsiñeti Heowá lun ídemuei luma, liibe-agei dan yusu lumutiña Heowá wéiyaaña lidan afiñeni hama amu lubúeingu lun ítara hamá kei “aba óunwenbu dǘgüdaguaü” lun gürigia ligía (Kol. 4:11). Wéiriti lebegi weseriwidun ítara lun Heowá luma houn wábirigu. Gayaraati wadügüni dan le liabin aban sandi galugurahati, liñawan dan o éibaahouni.

DAN LE LABURUCHAGUN SANDI GALUGURAHATI

2. Ka uagu gayara lubéi hénrengu lan wíderaguniña wábirigu dan le laburuchagun sandi galugurahati?

² Lidan lidaani sandi galugurahati, másiñati hénrengu lan wíderagun wóuniwagua. Kei hénpulu, gayaraati busén wamá wabisidahaniña wábirigu hábiñe, gama lumoun siñati wadügüni. O Másiñati busén wamá wagunbirahaniña íbirigu ha maseinsuntiña eiga wábiñe, siñati giñe wadügüni lira. Másiñati busén wamá wíderaguniña amu, gama lumoun gayaraati hasufuriruña lan waduheñu. Íbini ítara, busentiwa wíderaguniña wábirigu, ani gúndaati Heowá dan le larihin adüga wamani sun wayaraati lun wíderaguniña amu (Ari. 3:27; 19:17). Ligíati, ka gayaraabei wadügüni?

3. Ka gayaraabei wafurendeirun lídangiñe hénpulu le híchugubei wéiyaaña lidan afiñeni ha lílana damuriguaü le ñein tubéi Desi? (Heremíasi 23:4).

³ Le gayaraabei hadügüni wéiyaaña lidan afiñeni. Anhein heseriwiduña lubéi kei aban wéiyaali lidan afiñeni lunti hasubudiruniña íbirigu ha lílana damuriguaü le ñein hubéi buidu ha ítarabaña kei mudún (aliiha huméi Heremíasi 23:4). Ariñagatu Desi, to uáguboun layanuhóua lidan aturiahani le lubaragiñebei le: “Wéiyaaña lidan afiñeni ha etenirubaña lun sétanu lánina apurichihani le ñein nubéi héchutiña meha apurichiha numa luma hama ha híbiri íbirigu, ani adügatiwa meha saragu katei úara”.b Seremei lau hadügüni katei le, ménrengunti meha houn íbirigu ha lun híderagunu Desi dan le laburuchagunbei sandi COVID-19 le ñein lubéi hóunwegua fiu hádangiñe tiduheñu ladüga sandi le.

4. Ka uagu gayara lubéi híderagunu wéiyaaña lidan afiñeni Desi, ani ka wafurendeirubei lídangiñe sügǘ le?

⁴ Afuranguagüdatu Desi: “Buiti meha nanaagun nungua hama wéiyaaña lidan afiñeni, ligía ménrengun lubéi nun nabahüdaguni houn le nasandirubei luma le adügübei lun nadiheridun”. Ka buiti hasagarubei wéiyaaña lidan afiñeni lídangiñe sügǘ le? Furendeitiña mosu lan hóunigiruniña íbirigu ha ítarabaña kei mudún luma lun gamadagua hamá houngua hama lubaragiñe liabin lidaani lénrengunga. Anhein siñá lubéi habisidahaniña íbirigu hábiñe ladüga sandi galugurahati, aríaaha humá amu igaburi lun hayanuhan hama íbirigu. Haritaguatu Desi: “Anihein dan, wátiña saragu wéiyaaña lidan afiñeni nun óunaha hagía ariñahani lidan ligiaméme weyu. Bérusu burí le hóunahabei nun chülüti tidoun nanigi, lau sun subudi nani bérusu ligía buidu”.

5. Ka gayaraabei hadügüni wéiyaaña lidan afiñeni lun hasubudiruni le hemegeirubei íbirigu, ani ida luba híderaguniña?

⁵ Aban lídangiñe igaburi le gayaraabei líderaguniña wéiyaaña lidan afiñeni lun hasubudiruni ka lan hemegeirubei íbirigu lau hadügün álügüdahani le manügünbei busiganu houn (Ari. 20:5). Mégeitiña funa san somu ídemuei kéiburi éigini o árani? Gayaraati funa san heferidiruni hawadigimari o haban? Mégeitiña san ídemuei lun habuinchagüdünu gárada lun hibihin somu ídemuei lúmagiñe urúei? Lidan tikesin Desi, íderagua hamutu fiu íbirigu lidan le temegeirubei. Gama lumoun létima íderagubarun ídemuei le teresibirubei hámagiñe wéiyaaña lidan afiñeni lidan tumadagua luma Heowá luma lun buidu lan tasandiragun tungua. Ariñagatu: “Furíeitiña meha wéiyaaña lidan afiñeni numa. Maritagun naali dimurei le hariñagubei, gama lumoun le naritagubei ida liña lan nasandiragun nungua. Ítara liña kamá hamuga lariñaguña Heowá nun ‘Anahein buma’” (Isa. 41:10, 13).

6. Ida luba wíderagun wóuniwagua lidan damuriguaü? (Ariha humoun iyawaü).

⁶ Le gayaraabei hadügüni lílana damuriguaü. Subuditi woun, wéiyaaña lan lidan afiñeni hagíaba lan furumiñetiña ha lúnbaña hetenirun lun le hemegeirubei wábirigu. Lau sun lira, amuriahati Heowá wámagiñe sun wagía lun wíchugun dǘgüdaguaü luma lun wíderaguniña amu (Gal. 6:10). Íbini aban katei ñǘraüti arufuda lumuti wínsiñehabu ani wéiriti lebegi lun aban gürigia le sándibei. Gayaraati hadügün irahüñü gárada o dibuhu lun híchugun dǘgüdaguaü lun aban íbiri. Gayaraati giñe híchaagun nibureintiña houngua lun hadügün mandou tun aban íbiri to mégeibalin. Ha híbiri gayaraati hábougun éigini lun somu gürigia le sándibei ñüdün hagíame íchigei lun lúbiñoun. Lau sun lira lunti gabaroun wamani dan lan le laburuchagun aban sandi galugurahati, sun lílana damuriguaü mégeitiña dǘgüdaguaü. Ligía buidu lubéi werederun murusun dan lárigiñe adamuridaguni lun wayanuhan hama íbirigu, tidan lan yebe luban wadamuridagun o luéigiñe lan zoom. Mégeitiña giñe wéiyaaña lidan afiñeni dǘgüdaguaü. Añahein fiu íbirigu abürühatiña gárada lun heteingiruniña wéiyaaña lidan afiñeni, ladüga gawountima lan hadasin dan le laburuchagun sandi galugurahati. Ma lubuidun wáfagun lun wafalaruni adundehani tídangiñeti Bíbülia le: “Rúmeme humá lubéi gurasu luma erei húniwagua” (1 Tesa. 5:11).

WÍCHUGUN IDEMUEI LIDAN LIÑAWAN DAN

7. Ka gayaraabei ladügün liñawan dan houn gürigia?

⁷ Gayaraati ladügün liñawan dan lun lasansirun habagari gürigia sódini. Másiñati heferidiruni hamegegun, haban o somu haduhe. Ani susereti giñe katei le houn wábirigu. Ida luba gayara lan wíderaguniña?

8. Ka lunbei hadügüni wéiyaaña lidan afiñeni hama agübürigu lubaragiñe liabin liñawan dan?

⁸ Le gayaraabei hadügüni wéiyaaña lidan afiñeni. Wéiyaaña íderagua humaña íbirigu aransera lubá liñawan dan. Chouru huméi subudi hamani sun lílana damuriguaü ka lan lunbei hadügüni lun hesefurun luma lun hawisahan halíañanu lan. Ariñagatu Margaret, to uáguboun layanuhóua lidan aturiahani le lubaragiñebei le: “Lidan aban yanu luáguti le lemegeirubei damuriguaü, haritaguagüda hamutiwa wéiyaaña lidan afiñeni luagu magumuchungili lan lidaani gudáü, ani lun lan wanurahan lau lóufudagun, ánhaña ariñaga gumadimatiña woun lun wanurahan o anhein dencha lubéi katei”. Rúwati yanu le woun lidan dan le ñein lubéi lemegeirúa ladüga seingü dimaasu lárigiñe ábaya lagumeserun aban lanarime gudáü. Agübürigu, danme le háhuduragun keisi iduheñu, ayanuha humá ka lan lunbei hadügüni kada aban hídangiñe danme le lasuseredun liñawan dan. Anhein aranseñu hubéi úara hama hisaanigu, ménrenguntimabei darangilu humá danme le liabin lidaani lénrengunga.

9. Ka lunbei hadügüni wéiyaaña lidan afiñeni dandu lubaragiñe kei lárigiñe liñawan dan?

⁹ Anhein hugía lubéi lichügüdinabei aban lídangiñe sétanu lánina apurichihani, maguraba humá lun lagumeserun liñawan dan lun hibihini linumerun hagagamurun íbirigu le iseritimabei ha lábugiñebaña haríaahan. Adüga humá aban lísüta ani echeküha humoun súnwandan. Ítarati, danme le lagumeserun liñawan dan gayaraabei hagúarun lun kada íbiri luma lun hetenirun lun le hemegeirubei. Óunaha hamuti giñe ariñahani le houn íbirigu ha arihibaña lau hawadigimari wéiyaaña lidan afiñeni lun gayara lan layanuhan wéiyaali le luma óunigiruti sirkuitu. Dan le lawadigimariduniwa úara, barüti saragu buiti. Lárigiñe gudáü, sügüti óunigiruti sirkuitu le ñein tubéi Margaret 36 oura marumugunga atouhei hawadigimari wéiyaaña lidan afiñeni ha áluahabaña 450 íbirigu ha áfuridubaña hábiñegiñe lun hasubudiruni halíañanu lan luma lun hetenirun lun le hemegeirubei (2 Ko. 11:27). Seremei lun lubuidun wadagimanu ligía, dariwatu muna houn sun ha emegeirubaña muna.

10. Ka uagu súdini lubéi houn wéiyaaña lidan afiñeni hóunigiruniña íbirigu? (Huan 21:15).

¹⁰ Anihein aban dasi súdiniti le lunbei hadügüni wéiyaaña lidan afiñeni lun híderaguniña íbirigu lidan hamadagua luma Heowá luma híchugun ídemuei houn dan le hásügürün lídangiñe lénrengunga (1 Fe. 5:2). Dan le lasuseredun liñawan dan, furumiñeti katei le lunbei hadügüni wéiyaaña lidan afiñeni lun hachoururuni anhein magadiñe habéi íbirigu, anhein anihein lubéi éigini hama, anhein gadaüragun habéi luma anhein anihein lubéi somu fulasu le ñein lubéi gayara lan hawinwandun. Másiñati lau lan lásügürün saragu dan mégeibaña lan íbirigu ídemuei lidan háhuduragun lun Heowá luma lidan amu burí katei le hemegeirubei (aliiha huméi Huan 21:15). Harold, aban hádangiñe lílana sétanu le arihibei tau Sukursáli, le ayanuhabei hama saragu íbirigu ha ásügürübaña lídangiñe liñawan dan, ariñagati: “Barüti saragu dan lun hárügüdagun íbirigu ha houngua lárigiñe hásügürün lídangiñe liñawan dan. Lau lásügürün dan gayaraati hárügüdagun gürigia ha houngua, gama lumoun gayaraabei haritagun luagun le hásügürübei, luagu lan yebe aban haduhe le óunwebei, aban lan yebe katei wuribati le asuseredubei houn haduheñu o aban sügǘ wuribati le hawinwandubei. Gayaraati ladügün aritaguni lun lagiribudun igarigu. Lau sun lira, úati mini lan lougua lan hafiñen; úati mégeiti ánhaña asaminara ítara”.

11. Kaba ídemuei hemegeira iduheñu luágurügü murusun dan?

¹¹ Súdiniti lun hasigiruni wéiyaaña lidan afiñeni adundehani le: “Hayahua hama ha ayahubaña” (Rom. 12:15). Íbirigu ha ásügürübaña lídangiñe liñawan dan mégeitiña lun haritaguagüdüniwa hínsiñe hamá lun Heowá luma houn íbirigu. Gayaraati híderaguniña wéiyaaña lidan afiñeni iduheñu ha lílana damuriguaü lun merede lan hadügüni lugundan Heowá, kéiburi lun hafurieidun, haturiahanu Bíbülia, lun houdin adamuridagua luma lun houdin apurichiha. Gayaraati giñe híchugun agübürigu dǘgüdaguaü houn hasaanigu lau híderaguniña lun gunfuranda hamani anihein lan katei le lásiñerubei liñawan dan agünrinchagua. Agübürigu, haritaguagüda humaña hisaanigu gamadaguabei lan Heowá hama súnwandan, ñeinbei lan hama ani mígirun lubaña. Afuranguagüda huméi houn añahein lan íbirigu ha ítarabaña kei iduheñu lidan sun ubóu aranseñu lun híderaguniña (1 Fe. 2:17).

12. Ka lunbei hadügüni lílana damuriguaü lun hídehan luma sétanu le arihibei lau líchugun ídemuei dan le lasuseredun liñawan dan? (Ariha humoun iyawaü).

¹² Le gayaraabei hadügüni lílana damuriguaü. Anhein asusereda liñawan dan yarafa lun fulasu le ñein lubéi heredera, álügüda humaña wéiyaaña lidan afiñeni ka lan gayaraabei hadügüni lun hídehan. Gayaraati hídehan lau hagunbirahan íbirigu hádangiñe ha anurahabaña hageiragiñe lun herederun húbiñe o hagunbirahaniña ha ídehabaña dan le lasuseredun liñawan dan. Háfuga gayara lan hídehan lidan lafanreinhóun éigini luma burí katei le hemegeirubei íbirigu. Ánheinti asusereda liñawan dan dise luéi fulasu le ñein lubéi hawinwanda, gayaraabei giñe gachansin humá lun hídehan. Ida? Gayaraati hafurieidun hawagu íbirigu ha ásügürübaña lídangiñe furumiñeguarügü lénrengunga luma lun hídeha dan le lasuseredun liñawan dan luma lau híchugun budagia lun lamainirún apurichihani (2 Ko. 1:8-11; 8:2-5). Anhein gayara lubéi haweiyasuhan lidoun fulasu ligía, álügüda humaña wéiyaaña lidan afiñeni ka lan gayaraabei hadügün lun hídehan. Ánhounti agunbirahóua lun hídehan lidan dasi le, másiñati larufudahóuba lan le lunbei hadügüni hun, lun hídehan lidan dan luma fulasu le ñéintima lubéi lemegeirúa.

DAN LE HÉIBAAHOUN

13. Ka lénrengunga úmabei hagagibudagua wábirigu lidan fulasu le ñein lubéi máhawa lan lun wapurichihan?

¹³ Adügati éibaahouni lúntima hénrengu lan habagari wábirigu. Íbirigu ha awinwandubaña lidan fulasu le ñein lubéi máhawa lan lun wapurichihan hásügürüña lídangiñe turobuli lánina maseinsuni, sandi luma hóunwegun haduheñu. Ladüga lúrudu le íchugubei lidan burí ageiraü ligía, másiñati siñá lan houdin wéiyaaña lidan afiñeni ayanuha lau darangilaü hama íbirigu ha mégeibaña hibihin dǘgüdaguaü. Ligía asuseredubei lun Andréi, le uágubei layanuhóua lidan aturiahani le lubaragiñebei le. Aban íbiri to lílana sétanu le lánina apurichihani tásügürüña meha lídangiñe turobuli lánina maseinsuni ani lárigiñe aban lasuseredun aban danaguaü tun. Mégeitu meha tibugún saragu wéiyaasu ani siñati tawadigimaridun. Íbini siñá lan hayarafadun íbirigu tun ladüga lúrudu le híchugubei gumadimatiña ladüga laburuchagun sandi galugurahati, adüga hamuti íbirigu sun hayaraati lun híderagunu, ani subudi lumuti Heowá ka lan temegeirubei.

14. Ida liña harufuduni wéiyaaña lidan afiñeni afiñe hamá luagu Heowá?

¹⁴ Le gayaraabei hadügüni wéiyaaña lidan afiñeni. Furíeiti Andréi lun Heowá ani adüga lumuti sun le gayara lubéi adüga. Ida liña san lóunabuni Heowá? Adügati lun hídehan amu íbirigu ha gayaraabei hánhingichun lun hadügüni le hayaraabei adüga lun hídehan. Añahein fiu íbirigu aba hanügünu lumoun surusia ani ha híbiri ídehatiña lau híchugun seinsu le temegeirubei tun biní lumuti Heowá sun úaraguni le harufudubei luma sun ídemuei le híchugubei lau ganigi (Ebü. 13:16). Wéiyaaña lidan afiñeni, danme le máhawa lan lun wapurichihan, amuriaha humá ídemuei (Her. 36:5, 6). Lau sun lira lubaragiñe hadügün furumiñeguarügü katei, furíei humá lun Heowá. Líderagubadün lun gayara lan hetenirun lun le hemegeirubei íbirigu.

15. Ka lunbei wadügüni lun lidan wamá aban lidan lidaani éibaahouni?

¹⁵ Le gayaraabei hadügüni lílana damuriguaü. Lidan lidaani éibaahouni, Másiñati gayaraabei lan wóundarun lídanrügü lirahüñü sétanu. Ligíati létima súdinibei lun lidan wamá darangilaü hama amu. Luma lan Satanási wageindagua, mama wámagua. Feruduna waméi hachara wábirigu ani aranse waméi furumiñeguarügü turobuli wádangua lau lóufudagun (Ari. 19:11; Efe. 4:26). Sétiñu wamá lun wíchugun ídemuei wóuniwagua (Titu 3:14). Ídemuei le líchugubei sétanu lánina apurichihani le ñein lubéi Andréi tun aban íbiri adügati lun buidu lan hasandiragun sun íbirigu hagía houngua. Ídehati lubuidun igaburi le lúntima úaragu hamá keisi iduheñu (Sal. 133:1).

16. Según le lariñagubei Kolosana 4:3, 18, ka lunbei wadügüni hawagu wábirigu ha agagibudagubaña luma éibaahouni?

¹⁶ Seriwitiña saragu milu wábirigu lun Heowá lau sun maha hamá gumadimatiña lun wapurichihan. Añahein fiu furisunrugu ladüga hafiñen. Furíei wamá dandu hawagu íbirigu ha kei hawagu haduheñu luma hawagu íbirigu ha íchugubalin habagari lidoun denchaü lun híderaguniña íbirigu ha, lidan hamadagua luma Heowá, luma lidan le hemegeirubei, luma hawagu ha ídehabaña tidan luban aguseragüdüni (aliiha huméi Kolosana 4:3, 18).c Furíei wamá hawagu wábirigu ladüga gabafuti furíei (2 Tesa. 3:1, 2; 1 Tim. 2:1, 2).

17. Ida luba gayara lan waranserun guentó lubá éibaahouni?

¹⁷ Gayaraati haranserun huguya hama hiduheñu guentó lubá liabin éibaahouni (Adü 14:22). Masaminara humá luagu sun katei wuribati le gayaraabei lasuseredun. Lubaragiñe lira, derebuguda huméi humadagua luma Heowá ani íderagua humaña hisaanigu lun hadügüni ligiaméme. Ánhaadün asandira idiheri lidan somu dan, ayanuha humá luma Heowá (Sal. 62:7, 8). Ayanuha humá keisi iduheñu luagu sun burí resun le wámabei lun wafiñerun luagu Heowá.d Ítara kei buidu lubéi lun haranseruniña hisaanigu lubaragiñe lasuseredun liñawan dan, mosu giñe haranseruniña luba éibaahouni ani arufudaha huguyame houn lun hafiñerun luagu Heowá. Ítara luba ganigi hamá ani darangilu hagíame.

18. Kaba wibiha ámuñegü?

¹⁸ Adügati lidarangilan Bungiu lun chouru lan wasandiragun woungua (Fili. 4:6, 7).Yusu lumuti Heowá katei le lun darangilu wamá laganagua sandi galugurahati, danme le lasuseredun liñawan dan, o danme le liabin éibaahouni. Yusu lumutiña wéiyaaña lidan afiñeni, lun hóunigiruniña íbirigu ha ítarabaña kei mudún buidu, ani rúaali dasi woun súngubei lun wíderagun wóuniwagua. Aranse lumutiwa darangilaü le lun wagagibudagun luma óuchawaguni hanarimetimati le lunbei liabin ámuñegü, “saragu asufuriruni” laganagua (Mat. 24:21). Lídanme dan ligía, súdinitimabei lun darangilu wamá luma lun wíderaguniña amu lun giñe darangilu hamá. Gama lumoun lárigiñeme lásügürün saragu asufuriruni, másügürün háadiwame lídangiñe dan hénrenguti le adügübei lun wadiheridun. Ligíaalime wagundaarun lau le labusenrubei Heowá lichugún woun súnwandan: darangilaü le lunbei ladurarun lun súnwandan (Isa. 26:3, 4).