1 | Furíei: “Ígira huméi sun katei lun Bungiu”
ARIÑAGATU BÍBÜLIA: “Madiheri humá luagu ni kata; ígira huméi sun katei lun Bungiu, lugundun lóunigiruñadün le tímatimaati” (1 FÉDURU 5:7).
Le mini lubéi
Agunbiraha lumutiwa Heowá lun wadimurehan luma luagu furumiñeguarügü katei le adiheridagüdübaliwa (Sálumu 55:22). Gayaraati wafurieidun luagu waturobulin meberesenga anhein ñüraü lubéi o weiri lan. Anhein nidiheri wabéi luagu aban katei, nidiheriti giñe Heowá luagu. Wafurieidun lun Heowá, ligía furumiñetibei katei le gayaraabei wadügüni lun líderaguniwa lunya darangilu lan wasaminan (Filipuna 4:6, 7).
Ida lubati líderaguniwa katei le?
Lidan wasufuriruña lan ladüga lisandi ichügü, gayaraati wasandiragun woungua wábuguarügüñadiwa lan lugundun mama súnwandan gunfuranda hamani amu gürigia le wásügürübei (Ariñawagúni 14:10). Ánheinti Bungiu, gunfuranda lumutiwa dan le wadaarunu wanigi lun lidan furíei lun wabahüdaguni lun ida liña lan wasandiragun woungua. Aríagu liña Heowá woun, gunfuranda lumuti wagarigu luma lénrengunga le wásügürübei, ligía busén lubéi lun wafurieidun lun luagu furumiñeguarügü katei le adügübei lun wadiheridun (2 Krónikasi 6:29, 30).
Dan le wayumuragun lun Heowá, ábatima wachoururuni busén lan lóunigiruniwa. Gayaraati wasandiragun woungua kei meha abürühati Sálumu le ariñagubei lun Bungiu: “Ariha baali nirun; subudi bumuti nidiheri” (Sálumu 31:7). Láurügü wasubudiruni luagu berese lan Heowá lau le gádanbaliwa, líderagubadiwa lun mábürühan lan warüna lidan dan hénrenguti le ídanbei wawinwanda. Ani mama ariharügü lumuti Bungiu wasufurirun. Ligíatima gunfurandabalin le gádanbaliwa sügǘ lau furumiñeguarügü, ani íderagua lumutiwa lun wadariruni gurasu luma dǘgüdaguaü le wemegeirubei tidan Bíbülia.