Adundehani lun aturiahani

Kábatima katei súdiniti lunbei hetenirun lun

Ma lirun siñá lan wadireirun dan lun waturiahanu Bíbülia wábuguarügü kei hamuga wabusenrun. Ligíati, kaba íderaguaün lun hayusuruni dan le erederubei hun buidu? Furumiñeti, murusun dan le hadireirúbei lun haturiahan yusu huméi buidu. Buíduti lakutihóun murusun ariñahani buidu, sügǘ lau laliihóun saragu furesegueina.

Lárigiñe, teni humá lun le súdinitimabei (Efe. 5:15, 16). Aniha fiu adundehani le gayaraabei hafalaruni:

• Aliiha humoun Bíbülia sagü weyu (Sal. 1:2). Gayaraati hagumeserun, lau haliihani kapítulu burí le lunbei lakutihóun lidan adamurini le labadinaguabei dimaasu.

• Aturiaha huméi le lunbei lakutihóun lidan adamuridaguni, dandu le tídanbei Garüdia Awisahatu kei le lunbei larihín lidan adamuridaguni le adügǘbei labadinagua dimaasu. Aranse humá buidu lun gayara lan hóunabun lidan adamuridaguni (Sal. 22:22)

• Anhein gadaani hubéi lun haturiaha, houcha humá haliihani ariñahani le iseritimagilibei, kei burí garüdia to hountu sun gürigia, bidéu burí luma sun le áfuachubei lidan jw.org.

• Gumese humá aban aransehani buiti lun haturiaha. Gayaraati háluaha ariñahani luagu somu turobuli le úmabei hagagibudagua, aban lan yebe álügüdahani le hadügübei húniwagua o aban lan ariñahani tídangiñeti Bíbülia le habusenrunbei gunfuranda humá buidu. Hadariruba lanwoun ariñahani lidan fánreinti le gíribei “Actividades para estudiar la Biblia”, lidan jw.org.