Ladügǘn le buídubei: Dariwati adundehani le chóuruti tidan Bíbülia

Ánhawa anúadira según le wasaminarubei o según le hasaminarubei amu, ibidiñebei woun anhein buídubei lan lasalirun. Afuranguagüda tumuti Bíbülia ka lan uagu lasusereda katei le. Rutu giñe ariñahani woun le huuti le gayaraabei ladundehaniwa lun gunda lan wabagari.

MEGEI WAMUTI LADUNDEHAN BUNGIU

Afuranguagüdatu Bíbülia, adüga lániña Heowáa gürigia lun hafalaruni ladundehan, madügǘntiwa lun wagía guánarügüba lan adundehei wabagari (Heremíasi 10:23). Ligía lígirunbalin tidan Bíbülia le wemegeirubei lun gayara lan wadügüni le buídubei. Kei weiri lubéi wínsiñe lun, busenti lóunigiruniwa luéi igarigu luma íruni le lanügübei wanúadirun wuriba (2 Lúrudu 5:29; 1 Huan 4:8). Lanwoun lira, ligía Adügübaliwa ani wéiriti lichú lau, kei subudi lubaliwa ru lumuti adundehani létima wemegeirubei woun (Sálumu 100:3; 104:24). Ligíati, mafosurun lumutiña Bungiu gürigia lun hafalaruni lilurudun.

Ru lumuti Heowá lun Adán tuma Ewa, ha furumiñetiña gürigia, sun le hemegeirubei lúntima gunda hamá (Agumesehani 1:28, 29; 2:8, 15). Ruti giñe fiu adundehani houn le ménrengunti ani agurabati yebe gaganbadibaña lan lun. Lau sun lira, ígirati lun hagíaba lan anúadira anhein hafalara (Agumesehani 2:9, 16, 17). Híruti, himei hamani Adán tuma Ewa lun hawinwandun kei habusenrun mama kei labusenruni Heowá (Agumesehani 3:6). Ida liñati lidin houn gürigia lau hadügüni le hasaminarubei ligía lan buídubei? Buiti san lidin houn? Uá. Lau lásügürün dan, arihúaali manügün lan maganbadi lun lilurudun Bungiu darangilaü ni ugundani le tímatimaati (Apurichihati 8:9).

Ru tumuti Bíbülia adundehani le wemegeirubei woun lun wadügüni le buídubei meberesenga halíagiñe lan wayabin (2 Timotéu 3:16, 17; ariha huméi rekuáduru “Aban líburu houn sun gürigia”). Ariha wamá fiu lídangiñe.

Ariha waméi ka lan uagu lariñawagúa “luganute lan Bungiu” tídanbei Bíbülia (1 Tesalónikana 2:13). Heiba lidoun jw.org ani ariha huméi bidéu Ka abürügüdǘbarun Bíbülia?

ABAN LÍBURU HOUN SUN GÜRIGIA

Buiti lun wasaminarun ladügüba lan aban Bungiu le wéiriti lichú lau, le hínsiñehabuti, lun lachülürün ladundehan houn sun gürigia. Ariha waméi ariñahani burí le:

Lóugiñe 3,500 Anihán iñeñein burí le ídanbei gayara lan tadarirúniwa Bíbülia o fánreinti tídangiñe, le adügübei lun aban tan líburu tótima ásügüragüdüboun lidan sun ubóu.
Lóugiñe 5,000 míñunu Anihán tinumerun Bíbülia to afanreinhóuatu, le adügati lun tuguya tan líburu tótima afanreinhóuatu lidan dan le sügühalibei.

Mariñaguntu Bíbülia buídutima hamá ha lílana aban rasa, néchani, o sétanu gürigia hawéi amu. Le linarün katei, aban líburu hountu sun gürigia.

Aliiha humóun Bíbülia lidan Internet (anuhein lidan lóugiñe 250 iñeñein) lidan jw.org.

KA UAGU SAMINA HABÉI FIU GÜRIGIA MASUDININ TAN BÍBÜLIA?

Afiñetiña fiu gürigia siñati lan tadundehaniwa Bíbülia lidan wabagari. Anihán fiu katei le hariñagubei:

Le hariñagubei: “Múaranti ariñahani le tídanbei Bíbülia”.

Inarüni: Háfuga anihein lan fiu abahüdaguni tidan Bíbülia le genegeti múaran lan. Lau sun lira, ánhawa akutihei bérusu le lubaragiñebei luma le lárigiñebei, dan luma échuni le lánina dan ligía, ligaburi hasaminarun ha abürühatiña luma burí amu katei, warihiba úaragua lan sun katei tidan Bíbülia.

Anhein busén hubéi harihin fiu hénpulu, heiba lidoun jw.org lun haliihani ariñahani “¿Se contradice la Biblia?”.

Le hariñagubei: “Gürigia ha aliihabarun Bíbülia adügatiña katei wuribati. Mini lan lira, madundehan tániña Bíbülia lidan aban igaburi le buiti”.

Inarüni: Mama tadüga Bíbülia wuriba lubéi hóuserun gürigia ha mafalarunbalin tadundehan lidan habagari. Ariñagatu Bíbülia lidan aban profesía gíbebaña lan gürigia, íbini tábutigu relihión haganagua, mafalarun habéi lan le tariñagubei lidan habagari. Ariñagatu giñe, “ladimurehóuba wuriba luagu üma le inarünibei hadüga”, mini lan, luagu arufudahani burí le tídanbei Bíbülia (2 Féduru 2:1, 2).

Anhein busén hubéi harihin aban hénpulu ida liña lan hadisedun saragu alidihatiña relihión luéi le tarufudahabei Bíbülia, heiba lidoun jw.org lun haliihani ariñahani “La religión, ¿un gran negocio?”.

Le hariñagubei: “Adügatu Bíbülia lun minebenehabu hamá fiu gürigia houn ha mítaranbaña kei hagía”.

Inarüni: Ínchaha tumutiwa Bíbülia lun inebe hamá amu woun. Máhatu lun burí igaburi líbeina le:

Lun iñu lan wanaagun woungua hawéi amu (Filipuna 2:3).
Lun warufudun minebenehabuni houn ha ámubei hafiñen luma ligaburi hanügüni habagari wawéi (1 Féduru 2:17).
Lun wafosuruniña amu lun hasaminarun kei wagía (Matéu 10:14).

Ariñagatu Bíbülia óusera lániña Bungiu gürigia buidu súnwandan luma lau irichaü, ani busenti lun wáyeihani (Rómana 9:14).

Anhein busén hubéi lanwoun ariñahani heiba lidoun jw.org lun haliihani ariñahani “Inebelá le hasaminarubei amu woun | Ida liña tíderaguniwa Bíbülia?”.

YUSU LUMUTU BUNGIU LERERUN LUN LADUNDEHANIWA

Ayanuhatu Bíbülia woun ida liña lan lanügagun Bungiu lungua hama gürigia lidan dan le sügühalibei. Seremei le waliihabei tidan, subudigüda tumuti woun ida liña lan larihini Bungiu le buídubei lumoun le wuribabei, le gayaraabei lanügün buiti woun lumoun le gayaraabei lanügün wuribati woun (Sálumu 19:7, 11). Ítarati, sagatiwa adundehani méiniti le íderagubaliwa lun wanúadirun buidu lidan wabagari sagü weyu.

Kei hénpulu, ariha waméi adundehani le adarirúbei lidan Ariñawagúni 13:20: “Ha óundaragutiña hama chu tau, lachuuduba hau, ánhaña ha óundaragubaña hama ibidiougua tau, heferidiruba”. Húugili adundehani le uguñe, kei meha lahuudun lidan dan le sügühalibei ani ligía aban lídangiñe saragu adundehani le húugili woun le wadarirubei tidan Bíbülia (ariha huméi rekuáduru “Huuti adundehani le tídanbei Bíbülia súnwandan”).

Háfuga hálügüdagun hungua: “Ida luba nachoururuni húugili lan uguñe weyu adundehani le tídanbei Bíbülia?”. Lidan ariñahani le lunbei lasigirun, warihuba fiu hénpulu le lánina ibagari.

a Heowá líribei Bungiu (Sálumu 83:18, TNM).

HUUTI ADUNDEHANI LE TÍDANBEI BÍBÜLIA SÚNWANDAN

Íbini sügühali lan kéiburi 2,000 irumu lúmagiñe lagumuchún tabürüdǘn Bíbülia, húugiru uguñe weyu. Masansirungili le hemegeirubei gürigia. Súnwandan busén hamá lun gunda hamá luma lun gunda lan habagari (Apurichihati 1:9). Gayaraati líderaguniwa lubuidun adundehani le tídanbei Bíbülia ibihei katei le, ladüga súnwandan huutu.

Buidu lan wóuserun

Busentiwa lun “buidu lan wóuserun lidan sun katei” (Ebüréu 13:18).
“Le meha híwerubei, hebé líweruhan, luadigimarida lau arumani” (Éfesuna 4:28).

Wanaagun woungua buidu hama amu

“Moun lumuti wáluahani le buídubei woungua, lunti wáluahani le buídubei houn amu” (1 Korintuna 10:24).
“Gaguraasun humá hubaruagua, ferudunagua huguyame húmawagua” (Kolosana 3:13).

Anúadira buidu

“Afiñetiña ha mabuidunbaña ichügü luagu sun le ariñawagúbei houn; ánhaña ha buídubaña ichügü, ariha hamuti buidu halía lan héibuga” (Ariñawagúni 14:15).
“Ha buídubaña ichügü harihini denchaü hegeyedun luéi; ánhañati ha ibidiouguabaña aau, ñǘdünrügütiña lubaroun ábati hasufuriruni damichi” (Ariñawagúni 22:3).