Inebelá le hasaminarubei amu woun | Ida liña tíderaguniwa Bíbülia?
“Lun ñein lan darangilaü ubouagu mosu inebe lan hasaminan amu woun” (UNESCO Declaration of Principles on Tolerance, 1995).
Ánheinti dan le mineben lan hasaminan amu woun, adügati lira lun ñein lan iyereehabúni, darí lun ñein lan anabahani, houserúniwa amu wuriba luma anarimeni.
Lau sun lira, ámuñegueinarügüti hasaminan gürigia luagu le mini lubéi inebe lan hasaminan amu woun. Añahein saminatiña lunti lan wánharun lun sun luwuyeri échuni luma ligaburi hanügüni gürigia habagari. Añahein amu saminatiña, ítara kei tariñaguni Bíbülia, lunti lan inebe lan haricha gürigia woun lun hanúadiruni ida luba lan hanügüni habagari luma kaba lan hafiñera, íbini masaminarun wamá kei hagía.
Gayaraati san tíderaguniña Bíbülia gürigia ha uguñebaña weyu lun inebe lan hasaminan amu houn?
Le tarufudahabei Bíbülia luagu larufudún inebesei lun le hasaminarubei amu
Ínchaha tumutiwa Bíbülia lun inebe lan le hasaminarubei amu woun. Ariñagatu: “Subudiwa humá kei gürigia areidatiña” (Filipuna 4:5). Ariñagatu Bíbülia woun lunti lan wóuseruniña amu lau areiduni, lau inebesei ani móuserun wamañame lau marichaü. Gürigia ha afalarubalin adundehani le, másiñati múaran lan le hasaminarubei hama amu, íbini ítara, ígiratiña lun hanúadiruni gürigia ida luba lan hanügüni habagari.
Lau sun lira, arufudatu Bíbülia ru lan Bungiu lúrudu houn gürigia libügürü ida luba lan hanügüni habagari. Ariñagatu: “Arufuda laali Bungiu le buídubei bun” (Mikeasi 6:8). Ariñaga tumuti giñe woun ka lan adundehani líchugubei Bungiu ani íderagua tumutiña gürigia anügei ibagari lidan igaburi le buídutimabei (Isaíasi 48:17, 18).
Míchuti Bungiu ubafu lun ni aban gürigia lun líchugun lidurun amu. Ariñagatu Bíbülia: “Ábanrügüñein aguseragüdüti, le íchugubalin lúrudu ligía [...] kátañadibugia lun badarirun lidurun amu?” (Santiagu 4:12). Ígira lumuti Bungiu kada aban wádangiñe lun lanúadiruni le labusenrunbei ladügün lau libagari (2 Lúrudu 30:19).
Le tariñagubei Bíbülia luagu inebesei
Ariñagatu Bíbülia lunti lan “inebe hamá sun gürigia [woun]” (1 Féduru 2:17). Ligíati, gürigia ha afalarubalin adundehani le tídanbei Bíbülia lidan habagari, óusera hamutiña sun gürigia lau inebesei meberesenga hafiñen luma ligaburi hanügüni habagari (Lúkasi 6:31). Úati mini lan lira úara hamá ha afalarubalin le tariñagubei Bíbülia luma le hafiñerubei kada gürigia o anha hamá lun le hanúadirubei kada gürigia hadügün. Lubaragiñe hóuseruniña amu wuriba o lau minebenehabuni, adüga hamuti sun hayaraati lun háyeihani ligaburi lóuseruniña Hesusu amu.
Kei hénpulu, aban weyu dúnguati Hesusu tuma aban würi to lílana amu relihión ani múaranti meha ligaburi lisaminan luma tafiñen. Magundanti meha giñe Hesusu lau ligaburi tanügüni würi to tibagari lugundun tawinwanduña meha luma aban wügüri le mama tani weiriei. Íbini ítara, adimurehati tuma lau inebesei (Huan 4:9, 17-24).
Ítara kei meha ladügüni Hesusu, aranseñu haña kristiánugu lun hafuranguagüdüni lébuna hafiñen houn ha ánhatiña haganbun, lau sun lira, adüga hamuti lau inebesei (1 Féduru 3:15). Ariñagatu Bíbülia houn kristiánugu moun lumuti lan hafosuruniña amu lun hánharun lun le hasaminarubei. Ariñagatu Bíbülia “moun lumuti gadan lani wuribu aban lubúein Bungiu; lubaragiñe lira, lunti buidu lan hama sun gürigia,” íbini hama ha ámubei hafiñen luéi (2 Timotéu 2:24).
Le tariñagubei Bíbülia luagu iyereehabúni
Ariñagatu Bíbülia woun: “Houcha humá lun lidan humá darangilaü hama sun gürigia” (Ebüréu 12:14). Aban gürigia le áluahabalin darangilaü, máhati lun iyereehabúni. Lau sun madügün lan ni kata le múaranti luma lafiñen, áfaaguati lun lawinwandun lidan darangilaü hama amu (Matéu 5:9). Darí lun ínchaha tániña Bíbülia kristiánugu lun hóuseruniña háganiñu lau ínsiñehabuni íbini wuriba lan hóuseruniña gürigia hagía (Matéu 5:44).
Ariñagatu Bíbülia iyereegu lan lun Bungiu lun hadügün gürigia wuribani houn amu (Ariñawagúni 6:16-19). Yusu tumuti Bíbülia dimurei “mínsiñe” ya lun tayanuhan luagu weiri lan liyereegun lun Bungiu lun ladügǘniwa katei wuribati. Arufudatu Bíbülia aranseñu liña lan Bungiu lun feruduna lániña gürigia ha busenbaña hasansiruni ligaburi hawinwandun lun úaragua lan luma lilurudun, busenti giñe líderaguniña (Isaíasi 55:7).
Bérusu burí tídangiñeti Bíbülia le ayanuhati luagu inebe lan le hasaminarubei amu woun
Titu 3:2: “Lun dilí lan hóuserun, areida hagíame, lun ǘnabugu hamá lidan hóuseruniña sun gürigia”.
Aban gürigia le areidati, óunabati lau aban igaburi diliti íbini amu lan ligaburi hasaminan ha híbiri luéi ani ídehati ítara lun harufudagun gürigia inebesei hámagua.
Matéu 7:12: “Súnwandanla lubeiti hadügün houn amu kei le habusenrubei lun hadügün hun”.
Sun wagía hínsiñeti woun lun inebe lan wasaminan houn amu. Lun hasigirun afurendeira luagu adundehani le lídanbei bérusu le, ariha huméi ariñahani le gíribei “¿Qué es la Regla de Oro?”
Hosué 24:15: “Anúadaha humá uguñe kaba lan un heseriwida”.
Ídehatiwa lun ñein lan darangilaü dan le inebe lan haricha amu woun lun hanúadiruni kaba lan hadüga.
Adügaü 10:34: “Úati […] himei lan Bungiu aban gürigia luéi aban”.
Mamahanti Bungiu lun aban gürigia ladügarügü wügüri lan o würi lan o ladüga lirasan, linasiñun o liñeñe. Inebetiña amu houn ha busenbaña háyeihani Bungiu.
Abakúku 1:12, 13: “Siñati [l]ánharun [Bungiu] lun wuribani”.
Mígirunbei Bungiu lun hasigirun gürigia wuribatiña adaagua wuribani gumugua dan. Lun hasigirun afurendeira, ariha huméi bidéu Ka uagu lígira Bungiu lun ñein lan asufuriruni?
Rómana 12:19: “Ígira huméi lun Bungiu lan afayeigüda luagu. Tariñahare Lererun Bungiu: “Au lunbei nafayeiragüdüniña gürigia luagu hariban, liña Aburemei”.a
Míchuti Bungiu üma lun ni aban lun lafayeiragüdün wuribani luagu wuribani. Ladügüba Bungiu irichaü lidan dan le buídutimabei. Lun hasigirun afurendeira luagu katei le, aliiha huméi ariñahani le gíribei “¿Alguna vez se hará justicia en el mundo?”
a Heowá líribei Bungiu (Sálumu 83:18, Traducción del Nuevo Mundo). Ariha huméi ariñahani le gíribei “Ka san Heowabei?”