Aranseedün san tídangiñe sun hanigi lun hederegeruni hibagari lun Heowá?

1, 2. Ka lunbei ladügǘn lubaragiñe badisei?

LIDAN seingü irumu le sügühalibei, badiseihaña kei gefentiña luagu Heowá hóugiñe aban míñunu gürigia. Saragu hádangiñe furendei hamuti inarüni dan meha le ñǘbürigiña kei meha disipulu Timotéu (2 Tim. 3:​14, 15). Añahein amu furendei hamuti inarüni dan le wéinamugaaña, o derebugu haña. Luagu aban dan, anuhein meha aban würi to aturiahabarun Bíbülia hama gefentiña luagu Heowá, aba tabadiseirún dan meha le 97 lubéi irumu tau.

² Haturiahañoun san Bíbülia? Odi gefentiña luagu Heowá bagübürigu ani harufudahañein inarüni bun? Lidan furumiñeguarügü kesi, másiñati hasaminaruña lan habadiseirun. Ani buiti katei le! Gama lumoun, anihein somu katei lun hadügüni lubaragiñe habadiseirun: hederegeragun hungua lun Heowá. Lafuranguagüdübei aturiahani le luagu ka lan mini lubéi ederegeraguni unguaü. Layanuhaba giñe ka lan uagu moun lumuti lubéi hanufudedun lun hederegeragun hungua lun Heowá luma lun habadiseirun anhein aranseedün lubéi lun hadügüni.

KA MINI LUBÉI EDEREGERAGUNI UNGUAÜ?

3. Írida humá fiu gürigia ha meha deregeguaañabaña houngua lun Bungiu lidan tidaani Bíbülia.

³ Tidan Bíbülia, mini lan ederegeraguni unguaü díreiwa lan aban katei o gürigia lun aban eseriwiduni sagüráuti, lidan amu dimurei, díreiwati lun leseriwidun lun Bungiu. Aban meha néchani díreiwaali lun Heowá Ísüraeli. Lau sun lira, añahein meha fiu ísüraelina díreiwatiña lun heseriwidun lun Heowá lidan aban igaburi espechaliti. Kei hénpulu, anúadira lumuti Heowá Aarón lun ligía lan fádiri íñutimati. Ligíati, anihein lubéi meha aban abürüdǘni lauti golu tuagu lubunedun, le ariñagubei anuadirúaali lan kei fádiri (Fad. 8:9). Díreiwatiña giñe nasaréu lun heseriwidun lun Heowá lídanya aban igaburi espechaliti. Ligíati, dimurei nasaréu lídangiñe dimurei ebüréu nasír liabin, le mini lubéi “díreiwaali” o “deregeguaali lungua” lun leseriwidun lun Heowá. Afuranguagüda lumuti Lilurudun Moisesi lunti lan hasigirun ítaga lúrudu (1 Lur. 6:​2-8).

4. a) Ka mini lubéi woun wederegeragun woungua lun Heowá? b) Ka mini lubéi labulieiduni gürigia káteiñein lan? (Ariha huméi giñe dibuhu).

⁴ Woun, mini lan wederegeragun woungua wanúadirun lani wamá Hesusu disipulugu luma lun wíchuguni lugundan Bungiu furumiñe lidan wabagari. Ka mini lubéi le? Ariñagati Hesusu: “Le busenti lafalarunina, bulieiléi káteiñein lan” (Mat. 16:24). Dimurei güriegu le ásügürawagüdübei kei “bulieiléi káteiñein lan” gayaraati giñe lásügürawagüdün kei “míchugun lani lugundan lidan furumiñeti lúgaaru”, lidan amu dimurei, lun maha lan lun le hínsiñebei lun. Dan le hederegeragun hungua lun Heowá, mosu hariñagun uá lun sun katei le aubei magundan lan Bungiu (2 Ko. 5:​14, 15). Lidan katei le anihein “layumahan ǘgürügü”, kéiburi, magíaguni (Gal. 5:​19-21; 1 Ko. 6:18). Aban san ihürügu máhawa lan lun katei le? Uá, mámabei aban ihürügu anhein hínsiñe lubéi Heowá hun ani chouru humeime lanügüba lan lúrudu le katei buiti hun (Sal. 119:97; Isa. 48:​17, 18). Ariñagati aban íbiri le gíribei Nicholas: “Gayaraati barihini lilurudun Heowá kamá hamuga badaürǘña ani migirúntibu lun badügüni le babusenrubei, o gayaraati barihini kei aban baríeiru le óunigirubalibu luéi héiginibu liñún”.

5. a) Ida liña lederegeragun aban gürigia lungua lun Heowá? b) Ida liña amu lan ederegeraguni unguaü luéi badisei? (Ariha humóun giñe iyawaü).

⁵ Ida liña san lederegeragun aban gürigia lungua lun Heowá? Lau ladügün aban furíei lun Heowá le ñein lubéi füramase lan lun lúnrügüba lan láhuduragua ani ladügǘniwa lan lugundan súdinitima lun lidan libagari. Lidan amu dimurei, ladügüña aba füramasei lun Heowá luagu hínsiñebei lan lun tídangiñe sun lanigi, tau sun luani, lau sun lisaminan luma lau sun lere (Mar. 12:30). Lábuguarügüba gürigia ligía ladügei füramasei le; aban daradu le ladügübei gürigia ligía luma Heowá. Ánheinti badisei, hagibugiñe sun gürigia ladügǘwa; ítarati hasubudirubei sun gürigia luagu deregeguaadün lan hungua lun Heowá. Aban katei sériuti füramasei lánina ederegeraguni unguaü. Chóuruti busén humá hagunfulirun lau füramasei le, ani agurabati Heowá lun hadügüni (Apur. 5:​4, 5).

KABA ÍNCHAHAÜN LUN HEDEREGERAGUN HUNGUA LUN HEOWÁ?

6. Ka ínchahabalin somu gürigia lun lederegeragun lungua lun Heowá?

⁶ Ínsiñeni le hasandirubei luagu Heowá ligíaba ínchahaün lun hederegeragun hungua lun. Ínsiñeni le, mama aban ínsiñeni gásügürati, lubaragiñe lira, ligía aban ínsiñeni le aganwoundeinabei eibu hafurendeirun luagu Heowá luma laganwoundun “subudi” luma “gunfurandaü” le larufudahabei lani sífiri hun (Kol. 1:9). Lau haturiahanu Lererun Bungiu chouru humaali 1) aban lan Bungiu inarüniti Heowá, 2) ligía lan abürügüdübarun Bíbülia lau lani sífiri sandu luma 3) anuhein lan aban óundaruni luma, ani yusu lumutu lun lagunfuliruni lugundan.

7. Ka agurabubei lúmagiñe aban gürigia le ederegeragubei lungua lun Heowá?

⁷ Anhein lasaminaruña lubéi aban gürigia lederegeragun lungua lun Heowá, agurabúati lun subudi laali lan arufudahani ménrengunti le tídanbei Bíbülia, gaganbadi ligíame lun lilurudun Bungiu ani ayanuha ligíame luagu lafiñen houn amu gürigia según le gádanbalin (Mat. 28:​19, 20). Lanwoun lira, lasandiruba aban lanarime ínsiñeni luagu Heowá, ani layumahaba tídangiñe sun lanigi lúnrügüba lan Heowá láhuduragua. Gayaraati san lariñawagúniwa ligiaméme huagu? Anhein hínsiñe lubéi Heowá hun lau sun here, masaminarunbadün hederegeragun hungua lun, ni lun habadiseirun lúnrügü hagundaaraguagüdüniña gürigia ha íchugubaña aturiahani tídangiñeti Bíbülia hun. Ánheinti nibureingidibu lubéi, mabadiseirúnbadibu lúnrügü bagundaaragüdüniña bagübürigu ani madügün bubéi giñe ladügarügü habadiseirúña lan bumadagu.

8. Ka lánibei geteingiradi luma ederegeraguni unguaü? (Sálumu 116:​12-14).

⁸ Anhaün asaminara luagu sun katei le adüga láalibei Heowá huagu, ladügüba geteingiradi humá lun hederegeruni hibagari lun (aliiha huméi Sálumu 116:​12-14). Ariñagatu Bíbülia: “Sun buiti le ichugúbei woun, le úabei mégeiti luagu”, lúmagiñe Heowá liabin (Sant. 1:17). Idewesei le wéiritimabei le líchugubei Heowá woun, lóunahani Lisaani lun lounwen wawagu. Seremei lubuidun idewesei le gayaraabei gamadagua humá luma Bungiu luma lun hawinwandun lun súnwandan (1 Huan 4:​9, 10, 19). Ítara liña, lau hederegeruni hibagari lun Heowá harufudei heteingiradi lun luagu óunwenbu ínsiñeni le larufudubei hun luma sun katei le adüga láalibei huagu (2 Lur. 16:17; 2 Ko. 5:15). Luagu katei le tayanuha líburu Winwan humá lau ugundani, lidan arufudahani 46 puntu 4, le giñe ñein lubéi láfuacha aban bidéu le ǘrüwati minutu le gíribei Idewesei le gayaraabei wíchuguni lun Bungiu.

ARANSEEDÜN SAN LUN HEDEREGERAGUN HUNGUA LUN BUNGIU LUMA LUN HABADISEIRUN?

9. Ka uagu moun lumuti lubéi hasandiragun hungua hafosurúña lan lun hederegeragun hungua lun Heowá?

⁹ Gayaraati sandigua humá hungua maranserungidün lan lun hederegeragun hungua lun Bungiu luma lun habadiseirun. Másiñati mégeigili lan hadügün asansiruni lidan hibagari lun gaganbadi humá lun Heowá, o megei humá dan lun héredagüdüni hafiñen (Kol. 2:​6, 7). Haritagua huméi mama lan sun aturiahatiña lun hawanseruba lan lau lóufudagun. Ani mama sun nibureintiña lun hawanseruba lan lidan hamadagua luma Heowá lau lóufudagun. Ligíati akutiha huméi le gádanbalün lau sun hinarün, ani magoubaguagüda humá hungua hama amu (Gal. 6:​4, 5).

10. Ka gayaraabei hadügüni anhein maranserungidün lubéi lun hederegeragun hibagari lun Heowá luma lun habadiseirun? (Ariha huméi giñe rekuáduru le gíribei “Anhein gefentiña lubéi luagu Heowá bagübürigu”).

¹⁰ Anhein ariha hubéi maranserungidün lan lun hederegeruni hibagari lun Heowá, sigí humá áfaagua lun hibihini. Amuriaha humá luma Heowá lun líderagunün adügei asansiruni le hemegeirubei (Fili. 2:13; 3:16). Gayaraati hachoururuni laganbubei lan hafurieidun ani lóunabubei lan (1 Huan 5:14).

KA UAGU MACHOURURUN HABALIN FIU GÜRIGIA HEDEREGERUNI HABAGARI LUN HEOWÁ LUMA LUN HABADISEIRUN?

11. Kaba ladüga Heowá lun líderaguniwa lun úaragua wamá lun?

¹¹ Añahein gürigia ha aranseeña lun hederegeruni habagari lun Heowá luma lun habadiseirun, gama lumoun, madügün hamuti. Másiñati hanufude hamá hadügün aban figóu wéiriti le gayaraabei ladügün lun habugún lídangiñe damuriguaü. Lau sun lira, ariñagatu Bíbülia líchugubei lan Heowá sun le hemegeirubei lubúeingu houn “ítara luba gayara lan hagaburidun keisi lunti lan hagaburidun lánigu Wabureme, adügei le aubei lagundaara súnwandan” (Kol. 1:10). Ligíati, chouru huméi líchugubei lan Heowá erei le hemegeirubei hun lun hadügüni le buídubei. Adügañaha laali houn saragu lubúeingu (1 Ko. 10:13). Ligía lébubei mibe hamá gürigia adügütiña figóu wéiriti lun habugún. Lau lídehan Heowá gayaraati úaragua wamá lun.

12. Kaba íderaguawa lun méiguadun wamá lidoun aban figóu wéiriti?

¹² Kei le chará wabéi, sun wagía sandí wamuti ayumahani lun wadügün katei wuribati (Sant. 1:14). Gama lumoun, dan le hagagibudagun luma aban óuchawaguni, mama mosu héiguadun lidoun; huguyaba anúadirei le lunbei hadügüni o le lunbei madügün humani. Añahein gürigia ariñagutiña siñá lan wárügüdagun woungua, iyeeni lira. Gayaraati wafurendeirun árügüdagua woungua lidan le wasandirubei luma le wadügübei. Anihein saragu katei le gayaraabei líderaguniwa: wafurieidun lun Heowá sagü weyu, ñein lan aban programa lánina aturiahani wábuguarügü wama, woudin adamuridagua luma apurichiha. Anhein hechu wabéi adügei sun katei le, hérebadiwa lun wagunfuliruni le füramase wabéi lun Heowá lau wederegeruni wabagari lun. Mabulieida waméi mama lan wábuguarügüñadiwa lidan wuribu le; anihein Heowá wama (Gal. 5:16).

13. Ka lubuidun hénpulu líchubei Hosé woun?

¹³ Ménrengunbei woun lun úaragua wamá lun Heowá ánhawa asaminara lúmagiñe guentó kaba lan wadüga danme le wagagibudagun luma aban óuchawaguni. Daritiwa hénpulu tidan Bíbülia le hani gürigia ha adügübalin katei le, charatiña meha giñe kei wagía. Hosé meha aban hádangiñe. Súnwandan meha tariñagun lúmari Potifárü lun Hosé lun larounrun tuma. Gama lumoun, subudi lumuti meha kaba lan ladüga lidan kesi le. Ariñagatu Bíbülia “máhati Hosé” larounrun tuma ani aba burí lariñagun tun: “Siñati lubeiti nadügün aban katei wuribati ítara lun nafigouhan ligibugiñe Bungiu” (Agu. 39:​8-10). Arufudati sun katei le subudi lan lun Hosé ida luba lan lóunabun danme buga lagagibudagun luma óuchawaguni, íbini lubaragiñe tálugun lúmari Potifárü lun tóuchaguni. Ligíati, dan le lachülürünbei oura ligía, ménrengunti lun lariñagun tun uá.

14. Ida luba wafurendeirun amahada lun sun katei le iyereegubei lun Heowá?

¹⁴ Ida luba gayara lan wáyeihani Hosé lun aranseñu wamá lun úaragua wamá? Lau wasaminarun lúmagiñe guentó kaba lan wadüga danme le wagagibudagun luma aban óuchawaguni. Lunti wafurendeirun amahada lau lóufudagun lun sun katei le iyereegubei lun Heowá, mararamagun wagíame asaminara ni murusun luagun (Sal. 97:10; 119:165). Líderagubadiwa katei le lun méiguadun wamá lidoun aban figóu wéiriti. Danme le wagagibudagun luma óuchawaguni, subudi wamaalime buidu kaba lan wadüga.

15. Ida luba harufuduni luagu huguya lan aban hádangiñe ha “áluahabalin Heowá lau sun hinarün”? (Ebüréu 11:6).

¹⁵ Gayaraati subudi humani darí humaali lan inarüni ani busén humá heseriwidun lun Heowá tau sun hanigi. Gama lumoun, anihein san somu katei le eredehabalün luéi hederegeruni hibagari lun Heowá luma lun habadiseirun? Gayaraati hadügüni le ladügübei urúei Dawidi le ayumuragubei lun Heowá ani ariñagati ítara: “Bungiu, arihabána, arihabóun nanigi; hóuchaguabana, subudibéi nisaminan; arihabá anhein luáguñadina lubéi lémeri wuribani, alidihabana luéigiñe üma magumuchaditi” (Sal. 139:​23, 24). Lau háfaagun lun hederegeragun hungua lun Heowá luma lun habadiseirun, harufuduña háluahañein lan Heowá lau sun hinarün. Ani chóurugüda tumuti Bíbülia woun biní lániña Heowá sun ha adügübalin katei le (aliiha huméi Ebüréu 11:6).

SIGÍ HUMÁ AYARAFADA LUN HEOWÁ

16, 17. Ida liña lachawahaniña Heowá harahüñü Gefentiña lidoun damuriguaü? (Huan 6:44).

¹⁶ Ariñagati Hesusu Heowá lan achawahabaliña gürigia hadoun lumutuniña (aliiha huméi Huan 6:44). Ma lubuidun dimurei le! Samina humaali san le mini lubéi dimurei le hun? Arihati Heowá katei buiti luagu kada gürigia le lachawahabei hadoun lumutuniña. Ariha lumutiña kada lubúeingu kei “lani”, o ‘lanúadirun lun lánibadün lan’ (2 Lur. 7:6). Ítara liña giñe larihinün.

¹⁷ Nibureintiña, anhein harufudahañein lubéi bagübürigu inarüni bun, másiñati basaminarun abunha lan lidan damuriguaü mama ladüga lachawahanibu Heowá, ladüga bagübürigu lan anügübalibu ñeinhin. Gama lumoun, arihabéi le tariñagubei Bíbülia: “Yarafa humá lun Bungiu, ábame giñe layarafadun hun” (Sant. 4:8; 1 Kro. 28:9). Mini lan dimurei le, ánhabu lan ayarafada lun Heowá furumiñe, layarafaduba giñe bun. Marihin lumutibu Heowá kei aban hádangiñe bandi gürigia. Sun gürigia ha lídanbaña damuriguaü añahán lubéi ñein ladüga lachawahaniña Heowá aban aban. Íbini harahüñü Gefentiña. Dan le ládaruni gürigia furumiñeti pasu ani aba layarafadun lun Heowá, aba giñe layarafadun Heowá lun, kei lariñaguni Santiagu 4:8 (arihabéi giñe 2 Tesalónikana 2:13).

18. Kaba wariha lidan leweñegua aturiahani? (Sálumu 40:8).

¹⁸ Dan le labadiseirunbei Hesusu, aba larufudagun lungua ligibugiñe Lúguchi lau sun lugundan lun ladügüni sun le lamuriahabei Lúguchi luma (aliiha huméi Sálumu 40:8; Ebü. 10:7). Danme le hederegeruni hibagari lun Heowá ani badisei huguya, larufuduba katei le háyeihañein lan ligaburi Hesusu. Líderagubadün leweñegua aturiahani lun hasigirun eseriwida lun Heowá lau úaraguni lárigiñe habadiseirun.