Sigí humá afalarei Hesusu lárigiñe habadiseirun

1, 2. Ida liña buídutima lan libagari aban gürigia dan le labadiseirun?

DAN le labadiseirun aban gürigia, aba ábanhali lan hádangiñe liduheñu Heowá. Ma lueirin ugundani! Ha gúndaabaña lau lubuidun hamadagua luma Heowá, chóuruti úara lan hasaminan luma dimurei le lariñagubei Dawidi le abürühabalin Sálumu le, le ariñagubei: “Fuleseiwatiña gürigia ha banúadirubaña aba banügüniña aganóua bubadu” (Sal. 65:4).

² Mígirunti Heowá lun hebelurun furumiñeguarügü lidoun libürürün. Kei warihini lidan aturiahani le lubaragiñebei le, anúadiraali Heowá layarafadun houn gürigia ha arufudubaña busén hamá gamadagua hamá luma (Sant. 4:8). Dan le hederegeragun houngua lun Heowá ani aba habadiseirun, aba hadügün aban umadaguaü espechaliti luma. Ani ariñagati Heowá houn: “Hóuchagua humana lidan katei le, ábame nadaaraguni lubenari sielu lun nóunahani lubuidun-agei abiniruni huagun” (Mal. 3:10; Her. 17:7, 8).

3. Ka lueirin buligasion wánibei wagía kristiánugu ha deregeguaañabaña houngua lun Bungiu ani badisei hagía? (Apurichihati 5:4, 5).

³ Lagumeserarügüña heseriwidun lun Heowá badisei. Sun kristiánugu ha deregeguaañabaña houngua lun Bungiu, mosu hadügüni sun hayaraati lun hagunfulirun lau füramasei le hadügübei lun heseriwidun lun Heowá luma lun úaragua hamá lun, íbini dan le ladügüdarúniwa hawagu lun hadügün katei wuribati o dan le hagagibudagun luma óuchawaguni (aliiha huméi Apurichihati 5:4, 5). Mosu giñe hafalaruni lani Hesusu hénpulu lau úaraguni gaganbadi huguyame lun lugumadin (Mat. 28:19, 20; 1 Fe. 2:21). Líderagubadiwa aturiahani le lun wibihini katei le.

“FALÁ HUMÉI” HESUSU SÚNWANDAN ÍBINI LAGANAGUA TUROBULI LUMA ÓUCHAWAGUNI

4. Ka labusenrubei Hesusu lariñagun dan le lariñagunbei hawanduba lan lani disipulugu sun luwuyeri asufuriruni? (Lúkasi 9:23).

⁴ Masaminara humá lárigiñe lanme habadiseirun maturobulinbadün lan lidan hibagari. Le linarün katei, furanguti lariñaguni Hesusu hawanduba lan lani disipulugu sun luwuyeri asufuriruni sunme añaha lan afalarei sagü weyu (aliiha huméi Lúkasi 9:23, LBID). Lariñaguña meha san Hesusu hasufuriruba lan lánigu sagü weyu? Uá, mítaranti. Le labusenrubei lariñagun, íbini lan heresibiruba lan abiniruni, hagagibudaguba giñe luma lénrengunga ani ñeinbei lídangiñe, lanügüba saragu igarigu houn (2 Tim. 3:12).

5. Ka abiniruni füramase lubéi Hesusu houn ha adügübaña sákürifisiu luagu Larúeihan Bungiu?

⁵ Másiñati rúhaña lan hiduheñu lidere dan hun lun meseriwidun humá lun Heowá o adügaadün lan somu sákürifisiu lun mibe lan húmati lun híchuguni Larúeihan Bungiu lidan furumiñeti lúgaaru lidan hibagari (Mat. 6:33). Anhein ligía lubéi asuseredubei hun, gayaraati hachoururuni subudi lani Heowá sun le adüga humaalibei luagu (Ebü. 6:10). Másiñati ariha humaali lan inarüni lan dimurei le lariñagubei Hesusu: “Ninarün hau luagu furumiñeguarügü lan le ígirutu luban, o lamulenu, o líbugañanu, o lítunu, o lúguchi, o lúguchu, o lirahüñü, o lufulasun nuéigiñe o luéigiñe lan uganu le lánina asalbaruni, leresibiruba san wéiyaasu sügǘ lau guentó lidan ubóu le: Muna, amulenu, íbugañanu, ítunu, úguchurugu, isaanigu, luma fulasu, lau sun léibaahouniwa; resibi ligíame ibagari magumuchaditi” (Mar. 10:29, 30). Chóuruti gíbetimati lan abiniruni le resibi humaalibei sügǘ lau sákürifisiu le adüga humaalibei (Sal. 37:4).

6. Ka uagu mosu lubéi hasigirun ageindagua luma ‘luriban ayumahani’ lárigiñeme habadiseirun?

⁶ Lárigiñe habadiseirun, hasigiruba ageindagua luma ‘luriban ayumahani’ (1 Huan 2:16). Ladüga ladügawagun wamá Adán. Másiñati aniheinbei lan dan hasandiragun hungua kei lasandiragun apostolu Pábulu lungua, le ariñagubei: “Lidan nisaminan, hínsiñeti lilurudun Bungiu nun; gama lumoun arihatina luagu anihein lan ábanya lúrudu lidan núgubu, ageindaguti luma nisaminan; katei ligía, igaburi lánina figóu le nídanbei, le gámabalina dáüwañu” (Rom. 7:22, 23). Háfuga wuriba lan hasandiragun hungua ladüga mosu lan hageindagun luma luriban ayumahani. Lau sun lira, anhaün asaminara luagun füramasei le hadügübei lun Heowá dan le hederegerunbalin hibagari lun, líchugubei erei le hemegeirubei hun lun mábürühan humá lidoun óuchawaguni. Le linarün katei, ladügüba füramasei le lun ménrenguntima lan hun hárügüdagun hungua danme le hagagibudagun luma óuchawaguni. Ka uagu wariñagei le?

7. Ka uagu líderagubadiwa lubéi wederegeragun woungua lun Heowá lun úaragua wamá lun?

⁷ Dan le lederegeruni aban gürigia libagari lun Heowá, mámaali lúniwagua labagarida. Mini lan lira, máhaali lan lun ayumahani le mínsiñebei lun Heowá (Mat. 16:24). Ítara, danme le wagagibudagun luma aban óuchawaguni, meredebadiwa asaminara ka lan lunbei wadügüni. Ábanrügübei katei wadüga: úaragua wamá lun Heowá. Busenbadiwa wagundaaragüdüni. Dan le lederegeruni aban gürigia libagari lun Heowá, aba lamahadun lun le líbiri katei. Ábameti ítara lan kei meha Hobu, íbini meha gagibugua lan luma lénrengunga le hanarimeti, ariñagati lau ichouruni: “Sun winwan nan, narufudamémebei luagu úaragua nan” (Hob. 27:5, TNM).

8. Ka uagu líderagubadiwa lubéi wararamagun asaminara luagu füramasei le wadügübei dan le wederegeragunbei woungua lun Heowá?

⁸ Líderagubadiwa wararamagun asaminara luagu füramasei le wadügübei lun Heowá dan le wederegeragunbei woungua lun, lun wibihin erei lun mábürühan wamá lidoun óuchawaguni. Kei hénpulu, madarihanbadiwa gürigia maríeitiña. Kei deregeguaadiwa lan woungua lun Heowá, madügünhadiwa katei líbeina le. Keiti mígirun wabéi lun láhüchün luriban ayumahani tidan wanigi, mámaali mosu wageindagun lárigiñe lun wasagaruni luriban ayumahani ligía ñéingiñe. Wadiseduba luéi hémeri “ha salufuribaña” (Ari. 4:14, 15).

9. Ka uagu líderagubadiwa lubéi wararamagun asaminara luagu füramasei le wadügübei dan le wederegerubei woungua lun Heowá lun wakipuruni wamadagua luma lidan furumiñeti lúgaaru?

⁹ Ánhawati adarira aban wadagimanu le lunbei mígirun lan lun wabasiihan lidoun sun adamuridaguni? Furanguti óunabagülei. Saragu dan lubaragiñe wadarirun aban wadagimanu ítarati, anúadiraadiwa máhabadiwa lan lun. Ligíati, mánharunbadiwa lun aban wadagimanu ítarati, ani lárigiñe ábame werederun áluaha ida luba lan wíchuguni Heowá lidan furumiñeti lúgaaru. Gayaraabei líderaguniwa lani Hesusu hénpulu. Ítara kei lanúadirun Hesusu lagundaaraguagüdüni Lúguchi, bunagua wamaali giñe lidan wasaminan máhabadiwa lan lun furumiñeguarügü katei le subudi wamuti magundan lan Heowá lau, Bungiu le unbei wederegeragua woungua (Mat. 4:10; Huan 8:29).

10. Ida luba líderaguniwa Heowá lun wáyeihani Hesusu súnwandan lárigiñe wabadiseirun?

¹⁰ Le linarün katei, líderagubadiwa turobuli luma óuchawaguni lun warufudun aranseñuwaña lan lun wafalaruni Hesusu súnwandan. Ani subudi wamuti líderagubadiwa lan Heowá lun wibihini katei le, ladüga ariñagatu Bíbülia: “Gúnfuliti Bungiu, mígirunbei lun hibihin óuchawaguni le hásiñarun awanda. Lubaragiñe lira, danme liabin óuchawaguni, larufudubei giñe Bungiu hun ida luba lan háfuridun lídangiñe; ítara luba gayara lan hawanduni” (1 Ko. 10:13).

KA LUNBEI HADÜGÜNI LUN HAFALARUNI HESUSU SÚNWANDAN?

11. Katei san aban lídangiñe katei buídutimati le gayaraabei hadügüni lun hafalaruni Hesusu súnwandan? (Ariha humóun giñe iyawaü).

¹¹ Seriwiti meha Hesusu lun Heowá tau sun lanigi ani yarafati meha lakipuragun lungua lun lau lídehan furíei (Luk. 6:12). Anhaün échuda adügei katei le, lídehaba lúntima hayarafadun lun Heowá, hadügüñame aban lídangiñe katei buítimati le gayaraabei hadügüni lun hafalaruni Hesusu lárigiñe habadiseirun. Ariñagatu Bíbülia lunti lan wasigirun abagarida “úaragua luma katei le furendei wamaalibei”, meberesenga átirihali lan wawanserun (Fili. 3:16). Ñeinbei dan haganbun sügǘ hawagu íbirigu ha aganwoundagüdübalin heseriwidun lun Heowá. Másiñati ñüdün hamá tidan Leskuela houn Apurichihatiña Larúeihan Bungiu o aba lan háguyun lidoun fulasu le ñein lubéi lemegeirúa hídehan apurichihatiña. Gayaraati san hadügüni ligiaméme? Anhein ítara liña lubéi, hubaruaguóun humá! Súnwandan hálugun lubúeingu Heowá lun haganwoundagüdüni heseriwidun lun (Adü. 16:9). Ánheinti siñá lubéi hadügüni guentó? Masaminara humá gebegitima lan le hadügübei ha aganwoundagüdübalin heseriwidun luéi le hiyaraabei adüga. Awanduni súdinitimabei lidan weseriwidun lun Heowá (Mat. 10:22). Mabulieida huméi gunda lan Heowá lau híchuguni le buídutimabei húmagiñegua lun según le gádanbalün luma le hiyaraabei adüga. Ítara luba gayara lan hafalaruni Hesusu súnwandan lárigiñe habadiseirun (Sal. 26:1).

12, 13. Ka gayaraabei hadügüni anhein hariha heferidiruñein lan ubebeni le huágubei? (1 Korintuna 9:16, 17; ariha huméi giñe rekuáduru “Ka lunbei wadügüni lun wasigirun lidan éibaaguni lánina ibagari?”).

¹² Ánheinti sandí hubéi mámaali lan tídangiñe hanigi hafurieida o masandi humaali lan ugundani le meha hasandirubei lidan apurichihani o dan le haliihanu Bíbülia? Anhein asusereda katei le hun lárigiñe habadiseirun, masaminara humá féridi humaali lan lani Heowá sífiri sandu. Kei le chará wamá, ñeinbei dan wasandiragun woungua ítara. Anhaün ariha hagumeseruña lan eferidirei ubebeni le meha huágubei, ráramagua humá asaminara luagu lani apostolu Pábulu hénpulu. Íbini meha áfaagua lan lun láyeihani Hesusu, subudi lumuti meha ñeinbei lan dan hénrengu lan lun lun ladügüni le buídubei (aliiha huméi 1 Korintuna 9:16, 17). Ariñagati: “Anhein nadüga lau sun magundani, nagunfulirarügüña lau wadagimanu le líchugubei Bungiu nun”. Lidan amu dimurei, aranseñu liña meha Pábulu lun lagunfulirun lau lani ministeriu meberesenga ida liña lan lasandiragun lungua.

¹³ Ítarameme, kei chará wabéi, moun lumuti wafiñerun luagu le wasandirubei dan le wanúadiruni kaba lan wadüga. Lubaragiñe lira, lunti aranseñu wamá lun wadügüni le buídubei íbini dan le henren lan woun. Anhaün asigira adügei le buídubei, lau lásügürün dan, gayaraabei lasansirun le hasandirubei. Líderagubadün haturiahan hábuguarügü, hafurieidun lun Heowá, habasiihan lidoun adamuridaguni luma hapurichihan lun hafalaruni Hesusu súnwandan lárigiñe habadiseirun. Lanwoun lira, danme harihini lílana damuriguaü hadügüni katei le, línchahabaña giñe lun hadügüni (1 Tesa. 5:11).

“ARÍAGUA HUMÁ HUNGUA”

14. Ka lunbei hakutihani kada átiri dan ani ka uagu? (2 Korintuna 13:5).

¹⁴ Lárigiñe habadiseirun, buídubei lun haríagun hungua kada átiri dan lun harihini ida liña lan ligaburi hanügüni hibagari luma hechun (aliiha huméi 2 Korintuna 13:5). Kei hénpulu, teni humá anhein hafurieiduña lubéi sagü weyu, anhein haliihañoun lubéi Bíbülia, anhein habasiihaña lubéi adamuridagua ani anhein hapurichihaña lubéi. Áluga humá ida luba lan gíbetima lan buiti hasagarun lídangiñe dasi burí le luma lun hínsiñetima lan hun. Gayaraati hálügüdagun hungua: “Gayaraaguatina san nungua lun nafuranguagüdüni arufudahani ménrengunti le tídanbei Bíbülia? Ka gayaraabei nadügüni lúntima hínsiñe lan ministeriu nun? Furanguti san le namuriahabei luma Heowá lidan furíei ani arufuda ligía afiñe nan luagu sunsuinagubei? Áfaaguatina san lun meferidirun nan adamuridaguni? Ka gayaraabei nadügüni lúntima netenirun lun le ariñawagúbei lidan adamuridaguni lúmati lun buídutima lan óunabagülei le níchugubei?”.

15, 16. Ka larufudahabei le lásügürübei Robert hun?

¹⁵ Buiti giñe lun haríaagun hungua lun hasubudiruni ka lan asansiruni lunbei hadügüni. Ariha wamá aban sügǘ le arufudubalin súdini lan wadügüni katei le. Ariñagati aban íbiri gíriti Robert: “Dan meha le 20 lubéi irumu nau, nadagimeintina meha fiu oura luagu weyu. Aban weyu lárigiñe wadagimanu, aba tagunbirahanina aban nani paaná túbiñoun. Ariñagatu kei lan wábuguarügübadiwa lan, gayaraabei lan wásügürüni buidu. Furumiñe, aba yebe negeyehani dimurei tun, lagumuhóun, aba nariñaguni tun furangu ka lan uagu mídinbadina lubéi”. Mábürühanti Robert lidoun óuchawaguni le ani buiti ladüga. Lárigiñe, aba lasaminarun luagu le asuseredubei ani aba líchugun fe gayara lan hamuga buga buídutima lan lahandilihani kesi le. Ariñagati: “Móunabuntina lau lóufudagun ni furangu kei meha ladügüni Hosé dan le tálugunbei lani Potifárü weiriou lun larounrun tuma (Agu. 39:7-9). Le linarün katei, magurabuntina yebe hénrengubei lan nun nariñagun tun uá. Íderagua lumutina le asuseredubei lun narihini mosu lan meha nederebudagüdüni numadagua luma Heowá”.

¹⁶ Samina humá aba lan hagagibudagun luma aban óuchawaguni ani mábürühantün lidoun. Íbini mábürühan humá, ka uagu madügün hubalin lememe ladügübei Robert? Álügüdagua humá hungua: “Barütina san saragu dan lubá nariñagun inó?”. Anhaün ariha anihein lan katei le lunti habuiduragüdüni lidan hibagari, mábürühala harüna. Lubaragiñe lira, samina humá luagun buiti le lanügübei híchugun fe luagu anihein lan lunti hasansiruni. Hayanuha luma Heowá ani adüga huméi le mégeiwabei lúntima gaganbadi humá lun (Sal. 139:23, 24).

17. Según larufuduni le lásügürübei Robert, kaba lanüga úaragua wamá lun liri Heowá?

¹⁷ Mama ñein lagumucha le lásügürübei Robert. Sigiti ariñaga: “Dan le namahadunbei lun agunbirahani le tadügübei nani paaná nun, aba tariñagun: ‘Mábürühantibu giñe!’. Aba nálügüdünu ka lan tabusenrubei tariñagun. Aba tariñagun nun ariñaga lan aban tumada tun —le meha Gefenti— sun lan nibureintiña ha gefentiña luagu Heowá biangua lan hagibu, ani ánhaña lan adarira aban chansi lun hadügüni le wuribabei, hadügübei lan sin hasaminaruni bián wéiyaasu. Ligíati tariñagunbei lun tumada luagu tóuchagubadina lan. Ma nugundan lau mawiyedun nani liri Heowá!”.

18. Ka aranseñu hubéi lun hadügüni lárigiñe habadiseirun? (Ariha huméi giñe rekuáduru “Bián ariñahani huuti”).

¹⁸ Dan le hederegeruni hibagari lun Heowá ani badisei huguya harufuduñein busén humá híchugun uéiriguni lun liri meberesenga kaba lan asusereda. Gayaraati hachoururuni aríagu liña lan Heowá lun sun turobuli le úmabei hagagibudagua luma óuchawaguni le hawandubei. Ariha lumuti luagu háfaaguña lan lun úaragua humá lun ani labinirubadün ladüga lira. Mabulieida huméi: líchugubei lani sífiri sandu hun lun hadügüni le buídubei (Luk. 11:11-13). Lau lídehan Heowá, gayaraabei hafalaruni Hesusu súnwandan lárigiñe habadiseirun.