“Lau feruduna lani wafigoun” le meha wadügübei

Ábanrügüñein katei adügüti lun gayara lan ferudunawa lan wafigoun, lebegi esefuruni le lafayeirubei Hesusu lau lita (Efe. 1:7). Lanwoun lira, ariñagatu Bíbülia: “Ítara liña labusenrun Bungiu larufuduni woun ida liña lan laricharaguagüdüniwa: Lau feruduna lani wafigoun” (Rom. 3:25). Mini lan le feruduna lániwa Heowá lubaragiñe lederegeruni Hesusu libagari. Ida luba ladügüni Heowá katei le madüraagungalei lilurudun guánarügü le richabei?

Ítara liña katei le lun Heowá kamá hamuga fáyeiwaali lebegi esefuruni ligía, lúmagiñe dan le füramase lani liábinba lan aban “adügawaguni” lun lesefuruniña gürigia ha afiñerubaña luagu (Agu. 3:15; 22:18). Chouru lumuti meha Heowá sunsuinagubei luagu danme lan lachülürün dan aranseñu luba lan Lisaani lun líchuguni libagari kei lebegi esefuruni (Gal. 4:4; Ebü. 10:​7-10). Sun anihán lan meha Hesusu ya Ubouagu kei lóunagüle Bungiu, gabafuti meha lun feruduna lani hafigoun gürigia ha afiñebaña. Íbini mafayeirúnwagili lan meha lebegi esefuruni, subudi lumuti gayara lan douragun sákürifisiu le lunbei meha ladügüni lau hafigoun (Mat. 9:​2-6).