Ru wamá uéiriguni lun Heowá

1. Ka un hetenira besafu gürigia uguñe weyu?

ARIHA wamaali luagu besafu lan gürigia hóunguarügüñein hetenira. Kei hénpulu, añahein ayusurutiña páhina lánina ladügǘn umadagu lidan Internet ladüga busentiña lun hetenirun gürigia houn luma lun le hadügübei. Lau sun lira, besafu gürigia míchutiña uéiriguni lun Heowá. Lidan aturiahani le, warihuba ka lan mini lubéi lichugún uéiriguni lun Heowá, luma ka lan uagu wadügei. Wafurendeiruba giñe ida luba lan wíchuguni lun Heowá uéiriguni le ladünabei, ani ida luba lan líchugun Heowá uéiriguni lun liri yarafa madise.

KA MINI LUBÉI LICHUGÚN UÉIRIGUNI LUN HEOWÁ?

2. Ida liña larufuduni Heowá luéirigun lidan wübü Sinaí? (Ariha huméi giñe dibuhu le luágubei tidáü garüdia).

² Tidan Bíbülia, dimurei le ayusurúbei lun uéiriguni gayaraati layanuhaña lan luagu le adügübei lun uéirigu lan aban gürigia. Murusun dan lárigiñe hesefuruniwa ísüraelina lídangiñe amudirawaguni Ehiptu, arufuda lumuti Heowá luéirigun lidan aban igaburi le hanarimeguti. Samina wamá luagu sügǘ ligía: míñunu ísüraelina aba meha hóundarun lugudina wübü Sinaí lun haganbuni le lunbei lariñaguni Heowá houn. Aba liabin aban dúeri dagumeti adagara lábulugu wübü, aba ladadagarun wübü lau anarimeni. Ábati lamudeirun gumuleli kamá lídangiñe aban régigi. Ñeinñein giñe labirihaniga luma wayuhuru. Aganbúati giñe tinwinrúniwa fidu le héreti (Afu. 19: 16-18; 24:17; Sal. 68:8). Chóuruti aba lan taweiridun hanigi ísüraelina dan le larufuduni Heowá luéirigun.

3. Ka mini lubéi lichugún uéiriguni lun Heowá?

³ Agia wagía? Gayaraati san wíchugun uéiriguni lun Heowá? Anha, chóuruti gayara lan. Gayaraati wíchugun uéiriguni lun Heowá dan le wayanuha houn gürigia luagu lanarime lubafu luma giñe luagu lubuidun burí ligaburi. Rútiwa giñe uéiriguni lun luagu sun katei le wadügübei seremei lun lubafu (Isa. 26:12). Ruti urúei Dawidi aban lubuidun hénpulu woun libügürü katei le. Lidan aban furíei le ladügübei hagibugiñe ísüraelina, ariñagati: “Bungiu Baba, wéirigutibu ani gabafutibu, íñugutibu ani úaraguatibu! Lugundun bani sun katei le siélubei luma le ubouagubei”. Dan le lagumuchunbalin Dawidi lafurieidun, “ábati lagumeserun sun damuriguaü eremuha lun Bungiu” (1 Kro. 29:​11, 20).

4. Ida liña líchugun Hesusu uéiriguni lun Heowá?

⁴ Dan le ya lubéi Hesusu ubouagu, ruti uéiriguni lun Heowá le Lúguchi lidan ámuñegueinarügü igaburi. Kei hénpulu, súnwandan lariñagun lúmagiñe lan Lúguchi libihei sun ubafu lun gayara lan ladügün milaguru (Mar. 5:​18-20). Ruti meha giñe uéiriguni lun Heowá lidan ligaburi lóuseruniña amu gürigia. Luagu aban weyu ñeinñein meha Hesusu arufudaha tidan haligilisin huríu, ani haganagua ha ñéinbaña ñeinñoun meha aban würi, disiwídü irumu tau lau aban sífiri wuribati tuagu. Lemuharu ladüga sífiri ligía, siñá tásuurun ni murusun. Gunfuranda lumuti Hesusu lueirin igarigu le tasandirubei würi to, darí lun tagudemedagun lun. Ábati lariñagun tun lau ínsiñeni: “Würi, areidaguaadibu”. Ábati líchuguni lúhabu tuagu, lidan oura ligía aba tásuurun “aba tagumeserun adimureha buidu luagu Bungiu” (Luk. 13:​10-13). Wéiriti meha eteingiruni le tasandirubei würi to luagu areidaguaaru lan, aba tíchugun uéiriguni lun Heowá, ani ítara kei tuguya, anihein giñe saragu resun wama lun giñe wíchugun uéiriguni lun Heowá.

KA ÍNCHAHABADIWA LUN WÍCHUGUN UÉIRIGUNI LUN HEOWÁ?

5. Ka ínchahabaliwa lun inebe lan Heowá woun?

⁵ Rútiwa uéiriguni lun Heowá ladüga weiri lan inebesei le wasandirubei luagu. Anihein saragu resun wama lun inebe lan Heowá woun. Aban Bungiu suntigabafu Heowá ani mébehati lere (Sal. 96:​4-7). Furanguti larihín lueirin lichú lau lidan burí katei le adüga láalibei. Ru laali ibagari woun luma sun katei le wemegeirubei lun lágüdahaniwa (Aruf. 4:11). Úaraguati giñe (Aruf. 15:4). Buiti sun le ladügübei ani súnwandan lagunfuliruni sun le füramase lubéi (Hos. 23:14). Ligía lariñagunbei profeta Heremíasi: “Hadan sun chu tau hama urúeigu ubouagu, úati ni aban kei buguya” (Her. 10:​6, 7). Furanguti mosu lan inebe lan Wáguchi le siélubei woun. Mámarügü lun inebe lan woun, mosu giñe hínsiñe lan woun.

6. Ka uagu hínsiñe lubéi Heowá woun?

⁶ Rútiwa uéiriguni lun Heowá ladüga hínsiñe lan woun tídangiñe sun wanigi. Anihein saragu igaburi buiti luagu Heowá le adügübei lun línsiñedun woun. Kei hénpulu, areidati Heowá ani gudemehabu ligía (Sal. 103:13; Isa. 49:15). Dan le wasufurirun, gáriti giñe lun (Sak. 2:8). Íderagua lumutiwa lun wayarafadun lun, luma lun gamadagua wamá luma (Sal. 25:14; Adü. 17:27). Lanwoun lira, ǘnabuguti ani “lemuti lun larihini sielu luma múa, iñuragua lumutiña Aburemei gudemetiña múarugugiñe” (Sal. 113:​6, 7). Ma gadünati aban Bungiu ítarati lun lichugún uéiriguni lun? (Sal. 86:12).

7. Ka lubuidun chansi wámabei?

⁷ Rútiwa uéiriguni lun Heowá ladüga busentiwa lun hasubudiruni amu gürigia. Hiibe-agei gürigia ibidiñeti inarüni luáguti Bungiu houn. Ka uagu? Lugundun daruguaali Satanási lau hasaminan gürigia lau ladügün lun larufudahóuniwa iyeeni luagu Bungiu (2 Ko. 4:4). Adügaali lun hasaminarun gürigia aban lan Bungiu gáñiti Heowá ani beigua lániña gürigia, meberesen lan wau ani ligía lan gadurunbei luagu wuribani le asuseredubei ubouagu. Ánheinti wagía, subudi wamuti inarüni. Ani gachansintiwa lun wíderaguniña gürigia asubudirei káteitimañein lan Bungiu luma lun wíchugun uéiriguni lun (Isa. 43:10). Lidan Sálumu 96, ayanuhóuati luagu lichugúniwa uéiriguni lun Heowá. Sunme awanha lan akutiha fiu bérusu lídangiñe, samina humá luagu fiu igaburi le ídanbei gayara lan wíchuguni uéiriguni le ladünabei Heowá lun.

IDA LUBA WÍCHUGUNI UÉIRIGUNI LE LADÜNABEI HEOWÁ LUN?

8. Ka fiu igaburi ídanbei wíchiga uéiriguni lun Heowá? (Sálumu 96:​1-3).

⁸ (Aliiha huméi Sálumu 96:​1-3). Rútiwa uéiriguni lun Heowá lau le wariñagubei luagu. Ínchaha lumutiña bérusu le lubúeingu Bungiu lun heremuhan lun, halawahani liri, hadimurehan luagu lesefuhan luma luagu luéirigun hagibugiñe sun néchanigu. Dan le wadügüni sun katei le wíchuguña uéiriguni lun Wáguchi Bungiu le siélubei. Dandu huríu ha úaraguabaña kei kristiánugu ha lánina furumiñeti sígulu, adüga hamuti sun hayaraati lun hayanuhan luagu sun katei buiti le ladügübei Heowá hawagu luma luagu lubuidun ligaburi (Dan. 3:​16-18; Adü. 4:29). Ida luba wáyeihaniña?

9, 10. Ka larufudahabei le asuseredubei tun Angelina woun? (Ariha humóun giñe iyawaü).

⁹ Ariha waméi le asuseredubei tun aban íbiri Merigana gíritu Angelina.a Ayanuhatu luéigiñe lóubadina liri Heowá lau ganigi lidan fulasu le ñein lubéi tawadigimarida. Kei meha le iserigiru lan lidan wadagimanu, aba hagunbirahóun sun ha iserigiñabaña lidoun aban adamuridaguni, tuguya haganagua, lun habahüdahan hawougua lun hasubudiruniña ha híbiri hapaaná. Barütu fiu iyawaü lun tarufudahanu lun larihíniwa ugundani le tasandirubei lau teseriwidun kei gefentu luagu Heowá. Lubaragiñe lira, aba lásügürün aban tupaaná tubaragiñe le agüriarúbei kei gefenti luagu Heowá, aba lagumeserun adüga bula luagu wafiñen. Ariñagatu Angelina: “Aba tádühan nanigi kamá hamuga le tachubara, ábati nariñagun núnguarügü: ‘Siñati nerederun maniñu, mosu nariñaguni houn káteitimañein lan Heowá!’”.

¹⁰ Dan le lagumuchunbei layanuhan tupaaná, aba tabuluchagun Angelina lun tadügün aban liraüraü furíei. Lárigiñe, lau gamadóuni aba tariñagun lun: “Anihein aban katei le ídanbei úara wamá lidan. Nuguya giñe sun, kei gefentu luagu Heowá nagüriarúa, ani anahamémegua eseriwida kei gefentu”. Ábati lámuñedagun ligibu, lau sun lira ayanuhatu lau darangilaü. Ábati tarufudun fiu iyawaü buíduburitu houn luagu burí katei le tadügübei lidan teseriwidun lun Heowá, ayanuha tuguya lau inebesei luagu tafiñen (1 Fe. 3:15). Dan le tagumuchubalin tiyanun, darangilu haali meha tupaaná, ariñaga ligía mabulieidun lágili lan lubuidun lásügürüni dan meha le lagüriarúnbei kei gefenti luagu Heowá. Ariñagatu Angelina: “Gadünati Heowá lun layanuhóun luéigiñe lufulesein. Buiti chansi lira!”. Ibihaadiwa aban lubuidun chansi lun walawahani Heowá, íbini dan le hayanuhan amu wuriba luagu.

11. Ida liña hafalaruni lubúeingu Bungiu lidan sun dan le sügühalibei adundehani le ariñawagúbei lidan Sálumu 96:8?

¹¹ (Aliiha huméi Sálumu 96:8). Rútiwa uéiriguni lun Heowá lau le wámabei. Súnwandan híchugun lubúeingu Bungiu ha inarünitiña uéiriguni lun lau igaburi le (Ari. 3:9). Kei hénpulu, rútiña meha ísüraelina budagia lun tábunawagun luma lun tounigirún ténpulu (2 Uru. 12:​4, 5; 1 Kro. 29:​3-9). Añahein meha lani Kristu disipulugu ha “ayusurubalin hámati” lun hetenirun lun le lemegeirubei luma lun le hemegeirubei lani apostolugu (Luk. 8:​1-3). Ani, lidan furumiñeti sígulu, óunahatiña giñe kristiánugu ídemuei lun híderaguniña hábirigu (Adü. 11:​27-29). Uguñe weyu, gayaraati giñe wíchugun uéiriguni lun Heowá lau budagia le wíchugubei lau gundaü.

12. Ida liña wíchugun uéiriguni lun Heowá lau wani budagia? (Ariha humóun giñe iyawaü).

¹² Ariha wamá aban sügǘ le arufudubalin ida liña lan wíchugun uéiriguni lun Heowá lau wani budagia. Lidan irumu 2020, lídanñein meha denchaü habagari saragu míñunu gürigia luéi hounwen lau ilamaü ladüga aban lanarime lumabeigan Sinbabue. Haganagua anuhein meha aban íbiri gíritu Prisca. Lau sun meha weiri lan lumabeigan, sigitu íbiri to apurichiha sagü luagu-ǘrüwa luma wándaradi, íbini lidan lidaani awouhani. Adügatiña meha tubesinanigu bula tau ladüga tásügürün dan apurichiha lubaragiñe tetenirun lun tichari, ábaha hariñagun tun: “Lau bigaburi le, bóunweba bilama!”. Ábati tariñagun houn lau ichouruni: “Maweiyasunbei Heowá acharara houn lubúeingu”. Fiu dan lárigiñe, aba tóunahan lóundarun Heowá éigini tun Prisca luma amu burí katei le temegeirubei, seremei budagia le ichugúbei. Aba taweiridun hanigi fiu hádangiñe tubesinanigu ani aba hariñagun tun: “Mágurun lumutibu Bubungiute, busentiwa wasubudirun luagu”. Ani gumesetiña sedü hádangiñe abasiiha lidoun adamuridaguni.

13. Según Sálumu 96:​9, ka lunbei wadügüni lun wíchugun uéiriguni lun Heowá?

¹³ (Aliiha huméi Sálumu 96:9). Rútiwa uéiriguni lun Heowá lau ligaburi wóuserun. Mosu meha haruma hamá lufadirinigu Heowá dan le heseriwidun tidan sanduariu luma tidan ténpulu, ligíati mosu lubéi meha hachibagun houngua (Afu. 40:​30-32). Wagía sun áfaaguatiwa giñe lun haruma lan wágubu ani le súdinitimabei lun haruma wamá ligibugiñe Bungiu (Sal. 24:​3, 4; 1 Fe. 1:​15, 16). Lunti giñe wadügüni sun wayaraati lun wagidaruni ‘binadu wagaburi’ lúmati lun wadaüragun lau ‘iseri igaburi’. Lidan amu dimurei, aba wígiruni luriban igaburi luma liwiye échuni, ábati wafurendeirun asaminara luma óusera lidan aban igaburi le arufudubalin lubuidun ligaburi Heowá (Kol. 3:​9, 10). Lau lídehan Bungiu íbini gürigia ha adügütiña katei wíyeti ani hanarime hagía, gayaraati hasansirun ani arufuda hagíame aban iseri igaburi.

14. Ka larufudahabei le asuseredubei lun Jack woun? (Ariha humóun giñe iyawaü).

¹⁴ Ariha waméi le asuseredubei lun Jack, aban meha wügüri furundeti hanufudewa ligía luéi le unbei hariñaga Mafia. Ladüga lanarime katei wuribati le ladügübei, aba lasiadirún lun lounwen. Sun lagurabahañein lan dan lun lafarún, aba lánharun laturiahanu Bíbülia luma aban íbiri le achülühabei apurichiha furisunrugu. Íbini meha adüga lan Jack katei wuribati, aba lasansirun, ani lau lásügürün dan aba labadiseirun kei gefenti luagu Heowá. Kei weiri lan asansiruni le ladügübei, ayahuahatiña fiu hádangiñe óunigirutiña furisun danbei le lanügǘnbei lun lafarún. Ariñagati aban úfisi le nadagimeinbei ñein furisunrugu: “Jack meha aban hádangiñe adaürǘtiña létima hanufudewati luéi, ani guentó ligía aban hádangiñe ha buídutimabaña”. Dimaasu lárigiñe lafarún, aba harihin íbirigu ha alidihabalin adamuridaguni tidan furisun aban adaürǘti le meha machülüheidibei adamuridagua. Ka uéigiñe lachülüra weyu ligía? Ladüga aba taweiridun lanigi lau asansiruni le ladügübei Jack ani busenti meha giñe lasubudiruni ka lan lunbei ladügüni lun láhuduragun lun Heowá. Furanguti gayara lan ladügün ligaburi wóuserun lun lichugúniwa uéiriguni lun Wáguchi Bungiu le siélubei (1 Fe. 2:12).

IDA LUBA LÍCHUGUN HEOWÁ UÉIRIGUNI LUN LIRI YARAFA MADISE?

15. Kaba ladüga Heowá yarafa madise lun líchugun uéiriguni lun liri sunsuinagubei? (Sálumu 96:​10-13).

¹⁵ (Aliiha huméi Sálumu 96:​10-13). Gumuti Sálumu 96 ayanuha luagu Heowá kei aban Urúei le aguseragüdübei lau irichaü. Ida luba líchugun Heowá uéiriguni lun liri yarafa madise? Lau laguseragüdün lau irichaü. Málühali agumucha tau Babilónia to Wéiriboun ladüga tawiyeduni liri le sándubei (Aruf. 17:​5, 16; 19:​1, 2). Másiñati ñéinbaña lan hádangiñe ha lúnbaña harihini tagünrinchawagun relihión mama inarünitu óundarutiña wamoun lun háhuduragun lun Heowá. Lárigiñe, lidan Arümahedón, lagumuchuba Heowá lau ubóu le lábugiñebei lubafu Satanási. Lagumuchuba hau sun ha iyereehabúbaña lun ani wíyeda haméi liri, ánhañati sun ha hínsiñehabubaña lun ani gaganbadi hagía lun, gunda hagía lau híchugun uéiriguni lun, lesefurubaña (Mar. 8:38; 2 Tesa. 1:​6-10). Lárigiñe Milu Irumu le lánina Larúeihan Kristu, danme le lagumuchun lagumuhóun óuchawaguni, larihúba Heowarügüñein lan garicha lun láhudurawaguniwa lun (Aruf. 20:​7-10). Lídanme dan ligía, labuinchuba “sun ubóu lau lisubudinwa luéirigun Wabureme, ítara kei labuinchagüdüni duna barana” (Abak. 2:14).

16. Ka aranseñu hubéi lun hadügün? (Ariha huméi giñe dibuhu).

¹⁶ Maame lubuidun danme líchuguni sun ubóu uéiriguni le ladünabei Heowá lun! Sunme awanha lan agurabaha lun lachülürün weyu ligía, mosu wadügüni sun wayaraati lun wíchugun uéiriguni lun Wabungiute. Lun líderaguniwa Musu Úaraguati lun wíchugun uéiriguni lun Heowá, anúadira laali Sálumu 96:8 lun ligía lan bérusu lánina irumu 2025, le ariñagubei ítara: Ru huméi uéiriguni le ladünabei Heowá lun.