Rútiwa seremei lun Heowá ladüga feruduna lani wafigoun

1, 2. Ka uagu wariñaga luagu sun lan le gádanbaliña gürigia genegegua lan luma le asuseredubei lun nibureinti le uágubei layanuha párafu 1?

SAMINA humá luagu aban nibureinti ani rísitiña lagübürigu. Luagu aban weyu, aba lichugún aban ñunsu wuribati lun: luagu hilagua lan lagübürigu lidan aban danaguaü, ani mámarügüñein le asusereda. Aba giñe líchugun fe gasta hamá lan lagübürigu sun haseinsun ani ígira hamá saragu dúeiti. Lubaragiñe lubeiti hígirun seinsu kei alagan, dúeiti hígirubei. Añahati laburiña seinsu aguburahei haseinsun ani busén hamuti lau lóufudagun. Kei weiri lubéi dúeiti le, lásiñarubei nibureinti le afayeira.

² Sun gürigia ubouagu lídanñanu aban kesi ítarati. Ha furumiñetiña wagübürigu Adán tuma Ewa, mafigountiña meha ani hawinwanduña meha lidan aban Paraísu buídumeraüti (Agu. 1:27; 2:​7-9). Gayaraabei yebe hawinwandun lun súnwandan. Sódini aba lasansiragun sun katei, aba heferidiruni lubuidun fulasu le ñein lubéi heredera luma chansi lun hawinwandun lun súnwandan. Kaba méhati alagan hígira houn hasaanigu? Ariñagatu Bíbülia woun: “Ítara kei lídangiñe lan meha aban wügüri [Adán], lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rom. 5:12). Figóu, ligía alagan le lígirubei Adán woun le anügübaliwa lidoun óunweni. Figóu le galagante wabéi, ítara liña kei aban dúeiti le hanarimeti lueirin, ani úati ni aban wádangiñe gayaraati lafayeiruni (Sal. 49:8).

3. Ka uagu tariñaga Bíbülia ítara liña lan figóu kei aban dúeiti?

³ Góubaguagüda lumuti Hesusu figóu luma “dúeiti” (Mat. 6:​12, TNM; Luk. 11:4). Le wabusenrubei wariñagun, dan lan le wafigouhan ítara liña kamá hamuga le wadúeiruñein Heowá, ani mosu wafayeiruni. Lun hamuga madügün lan Heowá aransehani lun lagumuchun lau dúeiti le, wóunweguña hamuga memeniginga (Rom. 6:​7, 23).

4. a) Ánhawa hamuga miderawagún, ida waba yebe? (Sálumu 49:​7-9). b) Ka mini lubéi dimurei figóu tidan Bíbülia? (Ariha huméi rekuáduru le gíribei “Figóu”).

⁴ Wagía guánarügü siñabei yebe wibihiniya le leferidirubei Adán tuma Ewa (aliiha huméi Sálumu 49:​7-9). Lun hamuga míderagun lániwa Heowá, memenigitiwa hamuga lun wawinwandun lun súnwandan ni lun wáguyugun. Ítara liña hamuga wagumuchun kei hagumuchun animaalugu (Apur. 3:19; 2 Fe. 2:12).

5. Ka adüga láalibei Heowá lun líderaguniwa afayeirei dúeiti lánina figóu? (Ariha huméi dibuhu le luágubei).

⁵ Saminaya wamá luagu nibureinti le uágubei wayanuha lidan párafu 1. Ida luba yebe lasandiragun lungua anhein hamuga achülüra aban gürigia rísiti lun lafayeiruni sun dúeiti le igirúbei lun? Chóuruti wéiribei lan yebe leteingiruni nibureinti le gürigia ligía, ani lánharuña hamuga lun lafayeirun dúeiti ligía. Ítarameme Heowá, Wáguchi Bungiu le wéiribei wínsiñe lun, rúhali aban idewesei lun lafayeirun dúeiti lánina figóu le galagante wabéi lúmagiñe Adán. Afuranguagüda lumuti Hesusu le mini lubéi idewesei le, lau lariñagun: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Adügati giñe idewesei le lun buidu lan wamadagua luma Heowá.

6. Kaba burí dimurei tídangiñeti Bíbülia wakutiha lidan aturiahani le, ani ka uagu?

⁶ Ida luba wasagarun buiti lídangiñe lubuidun idewesei le adügübei lun ferudunawa lan wafigoun? Lun wadariruni óunabagülei, wakutihaali le mini lubéi dimurei burí tídangiñeti Bíbülia le: warandarun luma Bungiu, lafayeirún wafigoun, lebegi esefuruni, wesefurúniwa luma warihín kei richaguatiña ligibugiñe Bungiu. Lau wararamagun asaminara luagu burí katei le, líderagubadiwa lúntima weiri lan weteingiradi luagu sun le adüga láalibei Heowá lun feruduna lániwa.

LE LUNBEI WIBIHINI: WARANDARUN LUMA BUNGIU

7. a) Ka amu katei leferidirubei Adán tuma Ewa? b) Ka wemegeirubei kei ladügawagun Adán tuma Ewa? (Rómana 5:​10, 11).

⁷ Mámarügüñein lun lawinwandúniwa lun súnwandan leferidira Adán tuma Ewa. Féridi hamuti giñe lubuidun hamadagua luma Heowá. Lubaragiñe meha hafigounhan, hádangiñetiña meha liduheñu Heowá (Luk. 3:38). Dan le maganbadi habéi, aba habugún hádangiñe liduheñu Heowá. Susereti katei le lubaragiñe meha gasaanigu hamá (Agu. 3:​23, 24; 4:1). Ligía megei habéi ladügawagun Adán lun harandarun luma Heowá (aliiha huméi Rómana 5:​10, 11). Lidan amu dimurei, mégeitiwa lunya gamadagua wamá luma Heowá. Según aban líburu, dimurei arandaruni lidan güriegu le áfuachubei lidan bérusu le, mini lan, “gamadagua lan gürigia luma lágani”. Le aweiridagüdübarun wanigi Heowá lan adügübei aransehani lánina arandaruni lun warandarun luma. Ida liñati ladügüni?

LE ADÜGǗBEI LUN LAFAYEIRÚN WAFIGOUN

8. Ka mini lubéi lafayeirún wafigoun?

⁸ Lafayeirún wafigoun ligía aransehani le ladügübei Heowá lun gayara lan gamadagua hamá gürigia luma. Mini lan, lasansirún aban katei luagu amu le ábanbei lebegi. Lidan amu dimurei, libihinya aban katei le yebe féridihalibei. Adügati giñe lafayeirún wafigoun lun warandarun luma Bungiu luma lun gamadagua wamá luma (Rom. 3:25).

9. Ka meha aransehani ladügübei Heowá luagu fiu dan lun gayara lan ferudunawa lan hafigoun ísüraelina?

⁹ Lidan hadaani ísüraelina adügati meha Heowá aban aransehani luagu fiu dan lun gayara lan feruduna lani hafigoun lúmati lun gayaraaya lan gamadagua hamá luma. Lidan meha Luéyuri Ferudun le adügǘbei aban wéiyaasu lidan irumu, aba meha ladagaragüdün Fádiri Íñutimati animaalu kei sákürifisiu luagu hafulesein ísüraelina. Inarüni siñá lan ferudunawa lan hafigoun ísüraelina sunsuinagubei lau hadagaragüdün animaalugu ladüga gebegitima hamá gürigia sügǘ hau animaalugu. Lau sun lira, aranseñu liña meha Heowá lun feruduna lani hafigoun ísüraelina dan le hasakürihan ani dagagüda hagía animaalu ha lamuriahabaña kei sákürifisiu (Ebü. 10:​1-4). Lanwoun lira, seriwiti meha adagaragüdüni burí le lun laritaguagüdüniña luagu gafigoun hamá ani megei hamá aban aransehani le buítimati le lunbei lagidaruni figóu sunsuinagubei.

10. Ka aransehani ladügübei Heowá lun ferudunawa lan figóu sunsuinagubei?

¹⁰ Ka aransehani ladügübei Heowá lun ferudunawa lan figóu sunsuinagubei? Adügati lun “líchaagun Kristu lungua ábanrügü wéiyaasu lun lagidaruni hafigoun gürigia” (Ebü. 9:28). Ru lumuti Hesusu libagari “lebegime hasalbarun saragu” (Mat. 20:28). Ka mini lubéi lebegi esefuruni?

LEBEGI ESEFURUNI

11. a) Ka mini lubéi dimurei lebegi esefuruni tidan Bíbülia? b) Ka meha katei lunbei lagunfuliruni aban gürigia lun lafayeirun lebegi esefuruni?

¹¹ Dan le tayanuhan Bíbülia luagu lebegi esefuruni tayanuhaña luagu katei le afayeirubei lun ferudunawa lan wafigoun luma lun warandarun luma Bungiu. Anihán katei le unbei lánhara Heowá lunya libihíniwa le yebe féridihalibei. Haritagua waméi féridi lani Adán tuma Ewa chansi lun hawinwandun lun súnwandan. Ligíati, lun lafayeirun wesefurun mosu meha lichugún aban ibagari libe le eferidirubei (1 Tim. 2:6). Lun lafayeirúniwa lira mosu meha ñein lan aban gürigia le agunfuliruti ǘrüwa katei le: 1) lunti mafigoun lan, 2) lunti gayara lan lawinwandun lun súnwandan ubouagu, ani 3) lunti aranseñu lan lun lederegeruni libagari kei sákürifisiu wawagu. Anhein meha lagunfulira aban gürigia ǘrüwa katei le, ítararügübei meha gayara lan ferudunawa lan wafigoun, ani ibihúa ligíame le eferidirubei.

12. Ka uagu gayara lubéi meha lafayeiruni Hesusu lebegi esefuruni?

¹² Ariha wamá ǘrüwa katei le arufudubalin ka lan uagu Hesusu lubéi gürigia le buídutimabei lun lafayeiruni lebegi esefuruni: 1) macharati, “madügünti Kristu ni aban figóu”, 2) gayaraati meha lawinwandun lun súnwandan ya ubouagu, ani 3) aranseñu liña meha lun lederegeruni libagari wawagu (1 Fe. 2:22; Ebü. 10:​9, 10). Aban meha wügüri mafigounti Hesusu, kei Adán lubaragiñebei meha lafigouha (1 Ko. 15:45). Lau lounwen Hesusu wawagu adügati lun gayaraabei lan wibihini le leferidirubei Adán (Rom. 5:19). Ítara liña lubeiti gayara lan lariñawagún luagu Hesusu ligía lan “lagumuhóun Adán”. Ligía lubeiti memegeirúnwati lunya liabin aban gürigia mafigounti lun lafayeiruni le leferidirubei Adán. Lugundun hilati Hesusu “ábanrügü wéiyaasu lun sun dan” (Ebü. 7:27; 10:12).

13. Ka idan amu lan luáriuagua lafayeirún figóu lumoun lebegi esefuruni?

¹³ Ka idan amu lan luáriuagua lafayeirún wafigoun lumoun lebegi esefuruni? Aransehani lun lafayeirún wafigoun ligía katei le ladügübei Bungiu lunya harandarun gürigia luma. Ánheinti lebegi esefuruni ligía ebegi le afayeirúbei lun ferudunawa lan hafigoun gürigia. Fáyeiwati lau lita Hesusu, hitaü le áwiyurubei luagu wafulesein (Efe. 1:7; Ebü. 9:14).

LE IBIHÚBEI: WESEFURÚN LUMA WARIHÍNIWA KEI GÜRIGIA RICHAGUATIÑA

14. Kaba wakutiha guentó, ani ka uagu?

¹⁴ Ka buiti asagarúbei lídangiñe lafayeirún wafigoun? Yúsutu Bíbülia ámuñegeinarügü dimurei lun tayanuhan luagu buiti le ibihúbei lídangiñe. Íbini genegegua lan dimurei burí le lúmagua, ámuñegueinarügüti le mini lubéi lidan aransehani le ladügübei Heowá lun ferudunawa lan wafigoun. Líderagubadiwa wakutihani dimurei burí le lúntima gebegi lan aransehani le ladügübei Heowá woun lun ferudunawa lan wafigoun.

15, 16. a) Tidan Bíbülia, ka mini lubéi dimurei séfuwa wamá? b) Ida liña wasandiragun woungua dan le wasaminarun séfuwaadiwa lan lídangiñe lubafu figóu luma óunweni?

¹⁵ Dan le tariñagun Bíbülia séfuwa wamá, mini lan ígiragüdüwaadiwa lan lídangiñe le gádanbaliwa seremei lebegi esefuruni. Afuranguagüda lumuti apostolu Féduru lau dimurei le: “Salba laadün Bungiu lídangiñe lagübüri ibagari le meha hafurendeirubei hámagiñe hagüchagu; ani subudi humuti buidu luagu mama lan lau katei gagumuchaditi lafayeirúa lebegi asalbaruni le, kei burí golu o pülata; lau lita Kristu lafayeirúa, le adagarawagüdübei kei aban mudún le úati mégeiti luagu” (1 Fe. 1:​18, 19).

¹⁶ Seremei lebegi esefuruni, séfuwaadiwa lídangiñe lubafu figóu luma óunweni le asufuriragüdübaliwa saragu (Rom. 5:21). Óunwenbu weteingiruni Heowá luma Hesusu ladüga hesefuruniwa ani deregeléi Hesusu libagari wawagu (1 Ko. 15:22).

17, 18. a) Ka mini lubéi richagua lan aban gürigia ligibugiñe Bungiu? b) Ka buiti wibihubei lídangiñe?

¹⁷ Ariñagatu Bíbülia richaguaaña lan lubúeingu Heowá, mini lan lira, memegeirúnhaña lan hafayeirun luagu figóu le hadügübei. Masaminara wamá dürügua lani Heowá lilurudun guánarügü lau ladügüni lira. Masaminara wamá giñe gadüna wamani sun le ladügübei wawagu ni luagu gunda lan lau figóu le wadügübei. Aranseñu liña lubéi meha Heowá lun feruduna lani wafigoun, ladüga afiñe wamá luagu le ladügübei Ligía luma Hesusu lun hafayeiruni lebegi esefuruni (Rom. 3:24; Gal. 2:16).

¹⁸ Ka buiti wibihubei lau larihiniwa Heowá kei gürigia richaguatiña? Anúadiraali Heowá hádangiñe lubúeingu ya ubouagu lun harúeihan luma Hesusu sielu ani lirahüñühaña Bungiu (Titu 3:7; 1 Huan 3:1). Feruduna laali Bungiu hafigoun; lidan amu dimurei, kamá hamuga le mafigounhagubeitiña. Ligía gayara lubéi harúeihan lidan Larúeihan Bungiu (Rom. 8:​1, 2, 30). Añahein amu kristiánugu ha hemenigibaña hawinwandun lun súnwandan ya ubouagu ani lumadaguhaña giñe Bungiu. Ani ferudunawaali giñe hafigoun (Sant. 2:​21-23). Hagía ha subudiwabaña kei saragu gürigia ha lúnbaña hásügürün wínwanñu lídangiñe Arümahedón, ani mounwen hañame (Huan 11:26). Hásaaruba giñe dandu gürigia ha richabaña kei ha marichabaña lídangiñe óunweni (Adü. 24:15; Huan 5:​28, 29). Lau lásügürün dan, sunme lubúeingu Heowá ha úaraguabaña ha lúnbaña hawinwandun ya ubouagu gafanranbaña “lidan haweirigun lirahüñü Bungiu” (Rom. 8:21). Kei warihini, adügati aransehani le ladügübei Wáguchi Heowá lun ferudunawa lan wafigoun lun warandarun luma sunsuinagubei. Ma lubuidun abiniruni le! Adián?

19. Ida liña labuidurun gádantiwa seremei le ladügübei Heowá luma Hesusu wawagu? (Ariha huméi giñe rekuáduru “Ligaburi feruduna lániwa Heowá”).

¹⁹ Inarüni ítara liña lan wakesin kei buga nibureinti le uágubei layanuhóua lidan párafu 1, aba lerederun dúeiti lun keisi alagan le siñabei lafayeiruni. Lidan wakesin, sánsiti gádantiwa seremei aransehani le ladügübei Heowá lun ferudunawa lan wafigoun luma lau líchuguni Hesusu libagari wawagu lun lafayeirun wafigoun. Adügati wafiñen luagu Hesukrístu lun wesefurúniwa lídangiñe lubafu figóu luma óunweni. Lanwoun lira, gayaraabei giñe labulieiduni Heowá wafigoun, kamá hamuga mafigounhagubeitiwa. Ani létima buídutimabei, gayaraabei lan gamadagua wamá luma Wáguchi Bungiu Heowá, le hínsiñehabubei.

20. Kaba wariha lidan leweñegua aturiahani?

²⁰ Aba tabuinchun wanigi lau eteingiruni dan le wararamagun asaminara luagu sun le ladügübei Heowá luma Hesusu wawagu (2 Ko. 5:15). Lun hamuga michu lani Hesusu libagari wawagu, memenigitiwa hamuga. Lidan leweñegua aturiahani, wakutihaba fiu bérusu tídangiñeti Bíbülia le gayaraabei líderaguniwa lúntima gunfuranda wamani le mini lubéi feruduna lani Heowá lifigoun kada aban wádangiñe.