ATURIAHANI 7
UREMU 15 Alawaha waméi Lígirama Heowá!
Ka buiti wibihibei lídangiñe feruduna lani Heowá wafigoun?
“Daritiwa ferudun bidan” (SAL. 130:4).
LE LUNBEI WATURIAHANI
Wakutihaba fiu hénpulu tídangiñeti Bíbülia le lunbei líderaguniwa lun gunfuranda wamani ligaburi feruduna lani Heowá kada aban wádangiñe.
1. Dan le lariñagun somu gürigia woun feruduna láadiwa lan, ka uagu gürewei lubéi woun lun wasubudiruni ka lan labusenrubei lariñagun?
ANHEIN charaadiwa lubéi lun aban gürigia, másiñati sandí wamá aban óunwenbu awalidaguni dan le lariñagun gürigia ligía woun: “Feruduna náadibu”. Íbini ítara, gayaraati wálügüdagun woungua kátima lan labusenrubei lariñagun. Anihein dan hénrengu lan woun wasubudiruni ka lan labusenrubei gürigia lariñagun lau dimurei burí le, lugundun ámuñegueinarügüti ligaburi gunfuranda hamani gürigia kátima lan mini lubéi lichugún ferudun. Másiñati lariñaguña lan hun luagu, luéigiñe lan lóubadina, gamadaguamémegidün lan kei súnwandan. O lariñagarügüña lan hun mabusenrunhali lan lasigirun ayanuha luagu le asuseredubei, lau sun lira, mítaranhaali lanme katei kei meha.
2. Ka tariñagubei Bíbülia luagu ferudun le líchugubei Heowá? (Ariha huméi giñe abürüdǘni).
2 Ariñagati meha aban abürühati Sálumu lun Heowá: “Daritiwa ferudun bidan ligía gadüna bubéi lun wíchugun uéiriguni bun” (Sal. 130:4).a Ítara liña! Mítaranti ferudun le líchugubei Heowá kei le wíchugubei wámagua. Úati gíchigaditi ferudun kei Heowá! Ligía íchugubalin ferudun le tímatimaati.
3. Ka uagu wariñaga mítaran lan ferudun le líchugubei Heowá kei le wíchugubei wagía le gürigia? (Isaíasi 55:6, 7).
3 Dan le feruduna lan Heowá aban gürigia, gidá lumuti lifigoun gürigia ligía sunsuinagubei ani ábaya gamadagua lan luma. Wéiriti weteingiruni Heowá luagu mangin lan lau ferudun woun, ani dan feruduna lániwa adüga lumuti sunsuinagubei (aliiha huméi Isaíasi 55:6, 7).
4. Ka adüga láalibei Heowá lun líderaguniwa gunfurandei ídatima liña lan ferudun le líchugubei?
4 Kei mítaran lan ferudun le wíchugubei kei le líchugubei Heowá, ligía gürewei lubéi woun gunfuranda wamani ida liña lan ferudun le líchugubei. Ligía layusurunbei Heowá fiu hénpulu tidan Bíbülia lun líderaguniwa gunfurandei ídatima liña lan feruduna lan. Lidan aturiahani le, warihiba fiu lídangiñe hénpulu burí ligía. Ítara luba wasubudiruni ka burí lan katei adüga láalibei Heowá lun lagidaruni figóu, gayara láamuga gamadaguaya wamá luma. Líderagubadiwa wakutihani hénpulu burí le lun warihini ferudun le líchugubei Heowá lidan ámuñegueinarügü igaburi. Ani lídehaba giñe lúntima laganwoundun ínsiñeni le wasandirubei luagu Heowá, Wáguchi hínsiñehabuti ani le gudemehabubei.
BARǗ LUMUTI HEOWÁ FIGÓU
5. Ka asuseredubei dan le feruduna lani Heowá wafigoun?
5 Liibe-agei dan, ayanuhatu Bíbülia luagu figóu kamá hamuga aban óunwenbu ihürügu. Ariñagati meha urúei Dawidi: “Buchagüda nuriban nuagu; ítara liña nun kei aban anügüni le siñá numuti awanda” (Sal. 38:4). Lau sun lira, ariñagatu Bíbülia feruduna lániña Heowá afigouhatiña ha asakürihabaña (Sal. 25:18; 32:5). Dimurei ebüréu le ásügürawagüdübei lidan bérusu burí le kei “feruduna”, mini lan “iñuraguabéi” o “barübei”. Adügati le lun wasaminarun luagun Heowá kei aban wügüri héreti le iñuragubalin lihürügu figóu wégewagugiñe ani aba lanügüni wawéi.
“Ferudunabéi [“iñuraguabéi”, “barübei”] ” (Sal. 25:18).
6. Halíñoun lanügei Heowá wafigoun?
6 Halíñounti lanügei Heowá wafigoun? Íderagua lumutiwa amu hénpulu le wadarirubei lidan Sálumu 103:12 asubudirei, lugundun ariñagati: “Dísegüda laali wafigoun wawéi, kei ladisedagüdüni labouchagüle weyu luéi lálüdagüle”. Wéiriti lidisegua labouchagüle Weyu luéi lálüdagüle darí lun maweiyasunbei lan adunragua. Arufudati le woun, dan lan feruduna lani Heowá wafigoun, dísegüda lani figóu ligía wawéi darí lumoun lagumuhóun lidise. Ma lueirin awalidaguni le wasandirubei lau wasubudiruni lira, adián?
“Kei ladisedagüdüni labouchagüle weyu luéi lálüdagüle” (Sal. 103:12).
7. Según tariñaguni Bíbülia, ka ladügübei Heowá lau wafigoun? (Mikeasi 7:18, 19).
7 Dan le lanügüni Heowá wafigoun wawéi, rédeiti san lau? Uá, lugundun kei meha lariñaguni urúei Esekíasi lun Heowá: “Chü baali sun nifigoun banagangiñoun” o, kei lariñaguni abürüdǘni: “Gidá baali sun nifigoun ligibugiñegiñe bagu” (Isa. 38:9, 17, TNM; abürüdǘni). Ligíati, dan le wasakürihan, aba lárügüdüni Heowá wafigoun ani aba lahunruni le ñeinhin lubéi marihindigia laali lan. Gayaraati hamuga giñe lásügürawagüdün bérusu le ítara: “Adügaadibu kamá hamuga mafigounhangubeitina”. Íderagua lumutiwa Heowá lúntima gunfuranda wamani katei le lau hénpulu le lídanbei Mikeasi 7:18, 19 (aliiha huméi). Ariñagati ñein chü lani Heowá wafigoun lidoun lilulin-agei barana. Lidan meha tidaani Bíbülia, anhein meha éiguada aban katei lidoun lilulin-agei barana, úati meha ida luba lan lasagarúniwa ñéingiñe, aba meha leferidirun lun súnwandan.
“Chü baali sun nifigoun banagangiñoun” (Isa. 38:17, TNM ).
“Chübei wafigoun lidoun lilulin-agei barana” (Mik. 7:19).
8. Ka furendei wamaalibei?
8 Lau hénpulu burí le, furendeihadiwa dan le lan feruduna lániwa Heowá barǘ lani wafigoun ani aba lan lagidaruni ihürügu ligía wawéi. Ábati lasuseredun le meha lariñagubei Dawidi: “Gúndaatiña gürigia ha feruduna lubaña Bungiu hariban, ani chibawa ligía hafigoun. Gúndaati gürigia le lanügübei Bungiu keisi gürigia mafigounhaangili” (Rom. 4:6-8, Lerérun Búngiu to lánina Iséri Darádu). Anati lira, ligía ferudunbei!
GUMUGUAGÜDA LUMUTI HEOWÁ FIGÓU
9. Ka hénpulu layusurubei Heowá lun líderaguniwa gunfurandei lubafu ferudun le líchugubei?
9 Ariha wamá amu burí hénpulu le tayusurubei Bíbülia lun tíderaguniwa gunfurandei ida liña lan layusuruni Heowá lebegi asalbaruni lun lagumuchaguagüdüni hafigoun gürigia ha asakürihabaña sunsuinagubei. Kéiburi dan le tariñagun chibá lani Heowá figóu harumagüdaléi gürigia le afigouhabei (Sal. 51:7; Isa. 4:4; Her. 33:8). Kati asuseredubei lárigiñe ladügüni Heowá katei le, ligía guánarügü ariñagubalin: “Íbini anhein funa lubéi hifigoun kei lagumuhóun ífunani, náharudagüdübei kei niewe; íbini ítara lan kei gamisa féindiwatu lau funafunaguti, náharudagüdübei kei mouru” (Isa. 1:18). Wéiriti lénrengun lagidarún dáseiti le funafunaguti tuéigiñe gamisa. Ligíati, lau hénpulu furanguti le, lachoururagüdüñein Heowá woun gayara lan ladügün lun merederun lan nírügü lárigirugu figóu wawagu.
“Íbini anhein funa lubéi hifigoun kei lagumuhóun ífunani, náharudagüdübei kei niewe” (Isa. 1:18).
10. Ka amu hénpulu layusurubei Heowá lun líderaguniwa gunfurandei lueirin ferudun le líchugubei?
10 Kei wafurendeiruni lidan aturiahani le lubaragiñebei le, góubaguagüdawati figóu luma dúeiti (Mat. 18:32-35). Ligíati, sagü wafigouhan ligibugiñe Heowá, ítara liña lira kamá hamuga waganwoundagüdüñein wadúeihan. Danti le feruduna lániwa Heowá, ítara liña kéigubeirügü hamuga feruduna liñalin óunwenbu dúeiti ligía, ábati mámaali lan mosu wafayeihan luagu. Mini lan lira, madügüdarunbei lan wawagu lun wafayeihan luagu figóu le feruduna láalibei woun. Ma lueirin awalidaguni le wasandirubei lau gunfuranda wamani ítara liña lan ligaburi feruduna lániwa Heowá!
“Feruduna numuti sun badúeihan” (Mat. 18:32).
11. Ka tabusenrubei Bíbülia tariñagun dan le tayanuhan luagu chibawa lan wafigoun? (Adügaü 3:19).
11 Mama ferudunarügü lumuti Heowá dúeiti lánina figóu, gumuguagüda lumuti giñe (aliiha huméi Adügaü 3:19). Adügati le lun wasaminarun luagun aban gürigia le áfiuragubalin dúeiti le bürüwañubei tuagu aban gárada. Lau sun fiúwaguaali lan dúeiti ligía, arihúamemegili atirimémeñein lan. Ligíati, mama layanuhóuña luagu láfiurawagun aban dúeiti, layanuhóuña luagu lagidarún sunsuinagubei. Lun gunfuranda wamani katei le, haritagua waméi lidan lan meha tidaani Bíbülia, yúsuati aban luwuyeri meha tinta le adügǘbei lau lamigisirun garubun, aban katei badibaditi, luma duna. Ligíati, ménrengunti meha laboraadúniwa le abürüdǘbei láurügü tásügürawagüdün aban mudusi dǘdübeletu luéigiñe. Ligía dan le lubéi meha laboraadúniwa aban dúeiti, gumuguati sunsuinagubei. Kei meha merede lubéi nírügü lárigirugu, úaali meha gayaraati larihini le meha bürüwañubei ñein. Ítara liña meha kamá hamuga úagubeiti dúeiti ligía. Ma inarüni weiri lan eteingiruni le wasandirubei lau wasubudiruni dan le lan feruduna lani Heowá wafigoun, merede lan nírügü lárigirugu? (Sal. 51:9).
“Chibawa láamuga hifigoun” (Adü. 3:19).
12. Ka wafurendeirubei lídangiñe hénpulu luáguti dúeri?
12 Lidan Isaíasi 44:22, yúsuti Heowá ábanya hénpulu lun lafuranguagüdüni le ladügübei lau wafigoun: “Gumuguagüda naali hidurun luma hifigoun, kei lagumuchagun dúeri”. Dan le feruduna lániwa Heowá, ítara liña kéigubeirügü ladouraguña lan aban óunwenbu dúeri lau wafigoun, ítarati, úaali ni aban lunya larihini.
“Gumuguagüda naali hidurun luma hifigoun, kei lagumuchagun dúeri” (Isa. 44:22).
13. Ida liña hasandiragun hungua lau hasubudiruni feruduna lani Heowá hifigoun?
13 Ka wafurendeirubei lídangiñe hénpulu burí le? Dan le lan feruduna lániwa Heowá, moun lumuti lan wasandirun kamá le ígiraali wafigoun aban dáseiti wawagu lun sun wabagari. Kei meha fáyeiwaali lan wafigoun lau lita Hesukrístu, mámaali mosu wafayeihan luagu wafigoun. Gidawaali sunsuinagubei, ítara liña kéigubeirügü hamuga mafigouhangubeitiwa. Ligía ladügübei Heowá lau wafigoun dan le wasakürihan: feruduna lumutiwa le tímatimaati.
ÍGIRATI HEOWÁ LUNYA GAMADAGUA WAMÁ LUMA
Ídehati feruduna lániwa Wáguchi le siélubei lun gayara lan gamadagua wamá luma. (Ariha huméi párafu 14).
14. Ka uagu gayara lubéi wachoururuni feruduna lániwa Heowá sunsuinagubei? (Ariha humóun giñe dibuhu burí).
14 Dan le feruduna lániwa Heowá, gayaraati wachoururuni ábaya lan gamadagua lan wama. Adügati wasubudiruni lira lun masigirun wamá asandiragua woungua lau saragu duru luma lun manufudedun wamá lareidahaba lan igarihabu wabá o laríaahaba lan chansi lun labeichuniwa. Lugundun, maweiyasunbei lira asusereda! Ka uagu chouru wabalin lira? Ladüga Heowá guánarügü meha ariñagubei lun profeta Heremíasi: “Feruduna nubéi hariban, maritagundigiaadiname luagun hafigoun” (Her. 31:34). Írida lumuti meha giñe apostolu Pábulu le lariñagubei bérusu le, dan le lariñagunbei: “Maritagundigiaadiname luagun hafigoun” (Ebü. 8:12). Ka mini lubéi dimurei le?
“Maritagundigiaadiname luagun hafigoun” (Her. 31:34).
15. Lau lariñagun Heowá maritagundigiaali lanme luagun wafigoun, ka labusenrubei lariñagun?
15 Dan le tayusuruni Bíbülia dimurei aritagua, mama súnwandan tayanuhaña lan luagu liábingua wachügüwagun katei le sügühalibei. Anihein dan tayanuhaña lan luagu ladügǘniwa aban katei o luagu laranserúniwa ítaga turobuli. Kéiburi, dan meha le dáwaguañu liña lubéi Hesusu luagu wagabu, ariñagati wügüri wuribati le dáwaguañubei lóubagiñe lun: “Haritaguabatia nuagun danme le lagumeserun barúeihan” (Luk. 23:42, 43). Furanguti meha mama lan lamuriahaña wügüri ligía luma Hesusu lun lasaminarun luagun danme le lagumeserun arúeiha, lariñaguña meha lun lun ladügün somu katei luagu. Ani arihúati meha ligía lan gunfuranda lubéi Hesusu lugundun ariñagati lun láguyuguagüdübei lan. Ligíati, dan le lariñagun Heowá woun luagu maritagundigiaali lanme luagun wafigoun, lariñaguña woun, kei lan feruduna láadiwa lan, madügünhali lanme ni kata ámuñegü lun labeichuniwa luagu figóu le feruduna láalibei woun.
16. Según le tariñagubei Bíbülia, ida liña wasandiragun woungua dan le wasubudiruni feruduna láadiwa lan Heowá?
16 Ariha wamá ábanya hénpulu le tayusurubei Bíbülia lun tíderaguniwa gunfurandei ida liña lan wasandiragun woungua dan le feruduna lániwa Heowá. Kei le gafigoun wabéi súngubei wagía, gayaraati wariñagun “lidamun lan […] figóu” wagía. Danti le feruduna lániwa Heowá, ítara liña kéigubeirügü hamuga aba lan látumuraguni güringüri le aubei lagüraguawa figóu ani aba mámaadiwa lan “lidamun figóu” (Rom. 6:17, 18; Aruf. 1:5). Adügati wasubudiruni feruduna láadiwa lan Heowá lun wasandirun aban óunwenbu ugundani kei le lasandirubei aban idamuni dan le lígirawagüdün.
“Mámaadün [ . . . ] lidamun figóu” (Rom. 6:18).
17. Ka uagu wariñaga ítara liña lan feruduna lániwa Heowá kamá le wareidaguña lídangiñe aban lanarime sandi? (Isaíasi 53:5).
17 (Aliiha huméi Isaíasi 53:5). Lidan lagumuhóun hénpulu le lunbei wakutihani, ayanuhóuati luagu figóu kamá hamuga aban gürigia le gawaguti aban sandi gáfarahati. Lau sun lira, yusu laali Heowá lani Liráü sákürifisiu lun lareidaguagüdǘniwa, ítarati, gayaraayati gamadagua wamá luma íbini yebe adügaali lan wafigouhan lun lagadeirun umadaguaü ligía (1 Fe. 2:24). Ítarati kei weiri lan lugundan aban gürigia lárigiñe lareidagun lídangiñe aban sandi le hanarimeti, ítara liña giñe lueirin wagundan dan le feruduna lániwa Heowá ani ábaya gamadagua wamá luma.
“Luéigiñe burí biti le libihubei wareidagua” (Isa. 53:5).
BUITI LE WASAGARUBEI LÍDANGIÑE FERUDUNA LÁNIWA HEOWÁ
18. Ka furendei wamaalibei lídangiñe hénpulu burí le akutiha wamaalibei tídangiñe Bíbülia luáguti ferudun le líchugubei Heowá? (Ariha huméi rekuáduru “Ida liña feruduna lániwa Heowá?”).
18 Ka furendei wamaalibei lídangiñe burí hénpulu le tayusurubei Bíbülia lun tayanuhan woun luagu ferudun le líchugubei Heowá? Dan le lan feruduna lániwa Heowá, gumuguagüda lani wafigoun sunsuinagubei ani lun súnwandan. Ídehati le lun buidu lan wamadagua luma Wáguchi le siélubei. Lau sun lira, lunti waritaguni mama lan gáñeirügü wamuti ferudun le líchugubei Heowá woun ani maricha wamá lun wadügüdarun luagu lun feruduna lániwa. Aban idewesei lúmagiñeti Heowá lira, le líchugubei woun ladüga wínsiñe lun ani ladüga weiri lan líchigadi (Rom. 3:24).
19. a) Ka uagu lunti lubéi geteingiradi wamá? (Rómana 4:8). b) Kaba wariha lidan leweñegua aturiahani?
19 (Aliiha huméi Rómana 4:8). Wéiriti eteingiruni le wasandirubei ladüga, kei lariñaguni Sálumu 130:4, “daritiwa ferudun” lidan Heowá. Anha, ferudun le tímatimaati! Íbini ítara, anhein busén wabéi lun feruduna lániwa Heowá, mosu gaganbadi wamá lun eweridihani le líchugubei Hesusu: “Anhein ua feruduna humá amu, úabei giñe feruduna lani Húguchi Bungiu hifigoun” (Mat. 6:14, 15). Ligíati mosu lubéi wáyeihani líchigadi Heowá ferudun. Lidan leweñegua aturiahani, warihibei ida luba lan wadügüni lira.
UREMU 46 Seremei, Heowá
a Lidan hererun ebüréu, yúsuati meha aban dimurei le adügübei lun lasubudirúniwa Heowarügüñein lan gayara feruduna lani figóu sunsuinagubei.