Afiñebá feruduna láadibu lan Heowá

1, 2. Ka ladügübei Heowá dan le feruduna lani wafigoun, ani ida liña wasandiragun woungua dan le ladügüni lira? ( le luágubei tidáü garüdia).

SANDIGUATI meha urúei Dawidi lungua lau aban lanarime duru ladüga meha charati le ladügübei (Sal. 40:12; 51:3). Gama lumoun, aba lasakürihan tídangiñe sun lanigi ani aba feruduna lani Heowá (2 Sam. 12:13). Dan le gunfuranda lubalin Dawidi feruduna laali lan Heowá lifigoun, aba lasandirun ugundani luma aban lanarime awalidaguni (Sal. 32:1).

² Wagía giñe sun, gayaraati wasandiruni ugundani ligía luma saragu awalidaguni. Ruti darangilaü woun wasubudiruni gayara lan feruduna lani Heowá wafigoun —íbini weiri lan figóu ligía— asaküriharügaadiwa ligía tídangiñe sun wanigi, gufese waméi ani adüga waméi sun wayaraati lun madügündigia wamaali lan (Ari. 28:13; Adü. 26:20; 1 Huan 1:9). Ruti gurasu woun wasubudiruni dan le lan feruduna lani Heowá wafigoun, aba labulieiduni sunsuinagubei. Ítara liña kamá hamuga le mafigounhangubeitiwa (Ese. 33:16).

3, 4. Ida liña meha tasandiragun Jennifer tungua? Kaba wariha lidan aturiahani le?

³ Gama lumoun, másiñati anihein lan dan hénrengu lan woun wafiñerun feruduna láadiwa lan Heowá. Ariha waméi tikesin Jennifer. Lidan meha inarüni tagüriarúa. Lau sun lira, dan le meha aweirideina tubéi, aba tacharagadun. Átiri irumu lárigiñe, aba tagiribudun lúhaburugun Heowá, lau lásügürün dan aba tabadiseirun. Ariñagatu: “Wéiriti meha nerederun áluaha umegeguni ani wíyeti meha nanügüni nibagari. Gátaatina meha ani anihein meha aban igaburi wuribati nuagu. Furanguti meha nun asakürihaadina lan tídangiñe sun nanigi ani amuriahaadina meha ferudun luma Heowá, ani subudi numuti arumadaha laali lan lani Hesusu sákürifisiu nibagari. Gama lumoun, anuhagua meha nanigi íchiga duru nuagu”.

⁴ Anihein san dan tíchugun banigi duru buagu ladüga somu charati le meha badügübei? Haritaguabá busén lan Heowá lun wachoururuni ítara kei lachoururuni Dawidi luagu arufuda lan Heowá gudemehabu woun ani feruduna lániwa. Lidan aturiahani le warihibei ka lan uagu súdini lubéi lun wachoururuni feruduna láadiwa lan Heowá, ani warihibei giñe kaba lan íderaguawa lun wibihini.

KA UAGU SÚDINI LUBÉI WACHOURURUNI FERUDUNA LÁADIWA LAN HEOWÁ?

5. Ka labusenrunbei Mafia lun wafiñerun? Ru humá aban hénpulu.

⁵ Anhein chouru wabalin feruduna láadiwa lan Heowá, méiguadunbadiwa tidoun lisadaran Satanási. Haritagua waméi ladügübei lan sun liyaraati lun wígiruni weseriwidun lun Heowá. Kei hénpulu, aban tídangiñe sádara to layusuruboun, láfaagun lun wafiñerun adügaadiwa lan aban figóu wéiriti ani úabei lan feruduna lániwa Heowá. Samina wamá luagu aban wügüri le meha Korintubei le arounrubei tuma lúmari lúguchi. Ladüga ladügüni katei le, aba lasagarúniwa lídangiñe damuriguaü (1 Ko. 5:1, 5, 13). Lárigiñe katei le, aba lasakürihan wügüri le. Gama lumoun, busenti yebe Satanási lun úa lan feruduna hamani íbirigu wügüri le ni lun hígirun lun lagiribudun lidoun damuriguaü. Lun hamuga susere lan katei le, másiñati libihiña lan hamuga Satanási lun lafiñerun wügüri le máraninaali lan luáguti. Ábameti hamuga lasandirun “saragu íruni” darí lun lígiruni leseriwidun lun Heowá. Masansirungili ligaburi Mafia, ni ligaburi lisaminan ni sádara to layusuruboun. Le buídubei, “subudi wamani luriban laritagun” (2 Ko. 2:5-11).

6. Kaba íderaguawa agidarei ihürügu le lanügübei figóu wawariua?

⁶ Masandirun háadiwame ihürügu luagu figóu le wadügübei anhein chouru wabalin feruduna láadiwa lan Heowá. Mama katei wuribati lasandiragun gürigia lungua lau duru dan le lafigouhan (Sal. 51:17). Buiti lira, lugundun ínchaha lumutiwa igaburi lira lun wasansiruni wagaburi luma lun wadügüni le buídubei (2 Ko. 7:10, 11). Gama lumoun, ánhawa asandira saragu duru, íbini lárigiñe asakürihaadiwa lan, gayaraabei ladügün lira lun lábürühan warüna darí lun wígiruni weseriwidun lun Heowá. Ánheinti dan le wachoururuni feruduna láadiwa lan Heowá, gayaraati wasigirun wabaruaguóun masaminarunga luagu figóu le meha adüga wamaalibei. Ítarati, weseriwiduba lun Heowá kei le aubei labusenra: lau aban saminaü darangilati luma lau saragu ugundani (Kol. 1:10, 11; 2 Tim. 1:3). Ariha waméi guentó ka lan gayaraabei líderaguniwa kada aban wádangiñe lun wachoururuni feruduna láadiwa lan Heowá.

KA GAYARAABEI LÍDERAGUNIBU LUN BACHOURURUNI FERUDUNA LÁADIBU LAN HEOWÁ?

7, 8. Ka lariñagubei Heowá luougua lidan Áfuriduni 34:6, 7, ani ka ichouruni líchugubei dimurei burí le woun?

⁷ Ráramaguaba asaminara luagun ka lan lariñagubei Heowá luougua. Tenibá lun le lariñagubei Heowá lun Moisesi luagun wübü Sinaí (aliihabéi Áfuriduni 34:6, 7).a Lídangiñe sun katei le lariñagubei Heowá luougua, kátima un letenira? Aba lariñagun luougua gudemehabu lan ani gaguraasun ligía. Lau lira lidan wasaminan, afiñetibu san lamahaduña lan hamuga aban Bungiu le hínsiñehabuti lun feruduna lani aban gürigia le asandirubei ínsiñeni luagu ani asakürihaali tídangiñe sun lanigi luagu figóu le ladügübei? Maweiyasunbei Heowá, aban Bungiu le gudemehabuti, óusera ítara.

⁸ Gayaraati wafiñerun luagu Heowá sunsuinagubei dan le lariñagun gudemehabu lan lugundun súnwandan lariñaguni inarüni (Sal. 31:5). Ligíati, anhein hénrengu lubéi bun bafiñerun luagu feruduna láadibu lan Heowá, saminabá luagun katei le: anhein chouru bubalin gudemehabu lan Heowá, ani feruduna lumutiña lan sun gürigia ha asakürihabaña, gayaraati bachoururuni luagu feruduna lubadibu lan giñe.

9. Ka larufudahabei Sálumu 32:5 woun luagu ligaburi feruduna lani Heowá wafigoun?

⁹ Ráramaguaba asaminara luagun le tarufudahabei Bíbülia luagu ligaburi feruduna lan Heowá. Kei hénpulu, aba lariñagun Dawidi lun Heowá: “Aba nagufeseruni nifigoun luma sun nuriban, […] buguyati, Nabureme, aba ferudunabánina” (aliihabéi Sálumu 32:5). Dimurei ebüréu le ásügürawagüdübei lidan bérusu le kei “ferudun”, gayaraati wariñagun luagu mini lan giñe “liñuragun” o “lanügǘniwa”. Ligíati, dan le feruduna lubalin Heowá Dawidi, ítara liña kamá hamuga lagidaruña lan Heowá aban ihürügu luéi. Adügati meha le lun lasandirun Dawidi ugundani luma aban lanarime awalidaguni (Sal. 32:2-4). Ánhawa asaküriha tídangiñe sun wanigi, gayaraabei wasandiruni ligiaméme. Moun lumuti wasigirun asaminara luagu figóu le meha wadügübei lugundun le linarün katei, gidá laali Heowá ihürügu ligía wawéi.

10, 11. Ka larufudahabei Sálumu 86:5 woun luagu Heowá?

¹⁰ (Aliihabéi Sálumu 86:5). Ariñagati Dawidi lun Heowá: “Buguya Nabureme, buítibu ani gíchigadi buguya ferudun”. Ariñagatu aban agumeiraguagüdüni “ligaburi lan Bungiu gíchigadi lan ferudun”. Ka uagu buidu lubéi lóuseruniña Heowá gafigountiña ha asakürihabaña? Sigiti bérusu le ariñaga: “Buítibu hama sun ha ayumuragubaña bun”. Kei warihini lidan aturiahani le lubaragiñebei le, ínsiñeni magumuchaditi le lasandirubei Heowá hawagu lubúeingu, ligía ínchahabalin lun líderaguniña lubúeingu luma lun aranseñu lan lun feruduna lániña lárigiñe hasakürihan lídangiñe figóu le hadügübei (Isa. 55:7). Anhein hénrengu lubéi bun bafiñerun luagu feruduna láadibu lan Heowá, másiñati líderagubadibu lan saminaü le: “Subudi numuti aranseñu liña lan Heowá lun feruduna lániña sun gürigia ha asakürihabaña tídangiñe sun hanigi ani amuriaha hagía gudemehabu luma. Ligía gayara lubéi nachoururuni luagu feruduna láadina lan giñe Heowá”.

¹¹ Luagu le aban oubaü, arufudahatu giñe Bíbülia woun subudi lan lun Heowá ka lan wabuñabei ani gunfuranda lani chará wamá. Ruti lira saragu gurasu woun (Sal. 139:1, 2). Sigí wamá afurendeira luagu inarüni le lau wakutihani ámuya sálumu le labürüdübei Dawidi, le lunbei líderaguniwa achoururei busén lan Heowá feruduna lániwa.

HARITAGUABÉI LE LASUBUDIRUBEI HEOWÁ BUAGU

12, 13. Según Sálumu 103:14, ka lasubudirubei Heowá ani ka labusenrubei ladügün?

¹² (Aliihabéi Sálumu 103:14). Ariñagati Dawidi subudi lan lun Heowá “múa lan wabuñabei”. Lau dimurei le, afuranguagüda lumuti ka lan lébunabei aranseñu liña lan Bungiu lun feruduna lániña ha asakürihabaña: subudi lumuti buidu luagu chará wamá. Ligíati, akutiha waméi bérusu le buidu buidu.

¹³ Abürühati Dawidi subudi lan lun Heowá “káteitimañadiwa lan”. Adüga lumuti Heowá Adán “lídangiñe múa”, ani subuditi lun Heowá ka lan mini lubéi katei le: lau sun mafigouhan hamá meha gürigia dan le ladügünbaliña, anihein katei le hemegeirubei hadügün kéiburi hawaragun, heigin luma harumugun. Mama sun katei gayara hamuti adüga houngua, anihein katei megei hamuti lúmagiñe Bungiu (Agu. 2:7). Gama lumoun, lúmagiñe lafigouhan Adán tuma Ewa wéiritimahali wemegeiruni lídehan Bungiu, ladüga galagante wamani hafigoun le adügübei lun wadügün katei wuribati. Leti mini lubéi bérusu le, gunfuranda lani Heowá anihein burí lan dan hachararun gürigia, gama lumoun, ánhawa asaküriha, línchahabei katei le lun larufudun gudemehabu woun ani feruduna láwame (Sal. 78:38, 39).

14. a) Ka larufudahabei Sálumu 103:12 woun luagu ligaburi feruduna lani Heowá wafigoun? b) Ida liña larufuduni lani Dawidi hénpulu feruduna lániwa Heowá sunsuinagubei? (Arihabéi rekuáduru “Dan le feruduna lani Heowá wafigoun, aba labulieiduni”).

¹⁴ Ka ámuya katei larufudahabei Sálumu 103 woun luagu ligaburi feruduna lániwa Heowá? (Aliihabéi Sálumu 103:12). Ariñagati Dawidi dan le lan feruduna lániwa Heowá, aba ladisedagüdüni wafigoun wawéi, “kei ladisedagüdüni labouchagüle weyu luéi lálüdagüle”. Lidan amu dimurei, ítara liña katei le kei lidisegua labouchagüle weyu luma lálüdagüle. Ka wafurendeirubei lídangiñe le? Ariñagatu aban líburu luagu bérusu le: “Anhein dísegüdawaali lubéi wafigoun wawéi, gayaraati wachoururuni bulieilá lan sunsuinagubei”. Anihein burí dan, láurügü murusun íhemeni aba burí liabin somu saminaü wachügüwagun. Gama lumoun, dan le feruduna lani Heowá wafigoun, meredeti ni murusun lárigirugu. Nírügü líhemen. Aba labulieiduni wachara sunsuinagubei. Máguyuguagüda lumuti woun (Ese. 18:21, 22; Adü. 3:19).

15. Ka gayaraabei badügüni anhein abunhagua lubéi asandira duru luagu figóu le meha badügübei?

¹⁵ Anhein abunhagua lubéi asandira duru luagu figóu le meha badügübei, ráramaguaba asaminara luagu le lariñagubei Sálumu 103, líderagubadibu lun bachoururuni feruduna láadibu lan Heowá. Álügüdaguaba bungua: “Anhein subudi lubéi lun Heowá gafigoun nan, ani aranseñu liña lun feruduna lánina lárigiñe nasakürihan, ka uagu siñá lubéi ferudunagua nan núniwagua? Luagu amu oubaü, anhein bulíei laali lubéi Heowá figóu le meha nadügübei lidan dan le sügühalibei ani maweiyasunbei águyuguagüdei nun, ma lunti hamuga nadügüni ligiaméme?”. Masigiti Bungiu asaminara luagu figóu le meha badügübei. Kati uagu buguyaba lubéi asaminara luagun? (Sal. 130:3). Lárigiñe chouru baali lan feruduna láadibu lan Heowá, gayaraati ferudunagua ban búniwagua ani bulíeibeime le sügühalibei.

16. Ka uagu dencha lubéi lerederun gürigia asaminara luagun charati le meha ladügübei? (Arihabóun giñe iyawaü).

¹⁶ Haritaguabéi dan lan le lerederun aban gürigia asaminara luagu figóu le meha ladügübei, ítara liña le kamá hamuga aban gürigia le abugahabei aban karü ani anihán aríagua lárigoun. Maribanti larihin abugahati lanagangiñoun lun larihin ka lan gürigia ñǘbuinbei lanagangiñe. Lau sun lira, anhein busén lubéi labugahan buidu, mosu lakipuruni larihin lubaruaguóun. Ítarameme, buídubei lun basaminarun luagu figóu le meha badügübei lun gayaraabei lan báfaagun lun madügündigia bani. Gama lumoun, ánhabu eredera asaminara luagu charati le meha badügübei, gayaraabei ladügün lira lun míchaagun ban bungua lun beseriwidun lun Heowá. Ligíati, rubei barihin luagun le bigibugiñebei: üma le anügübei lidoun iseri ubóu, le ñeinba lubéi úaali lanme “aritaguti luagun” katei le mabuidunti (Isa. 65:17; Ari. 4:25).

SIGIBA AFIÑERA FERUDUNA LÁADIBU LAN HEOWÁ

17. Ka uagu lunti lubéi wafiñerun tídangiñe sun wanigi hínsiñe wamá lun Heowá ani gayara lan feruduna lániwa?

¹⁷ Sun wagía lunti wasigirun afiñera hínsiñe wamá lun Heowá ani aranseñu liña lan lun feruduna lani wafigoun (1 Huan 3:19). Ka uagu? Lugundun lasigiruba Mafia áfaagua lun wafiñerun mínsiñe wamá lun Bungiu ani maweiyasunbei lan lun feruduna lani wachara. Le labusenrubei libihin, lun wígiruni weseriwidun lun Heowá. Keiti le subudi laali lan murusunrügaali lan dan lubá, wéiritimarügübei lálugun lun wadisedun luéi Heowá (Aruf. 12:12). Maweiyasun wamá ígiraguagüda woungua lun Mafia!

18. Ka gayaraabei badügüni lun bachoururuni hínsiñe ban lun Heowá ani busén lan lun feruduna lánibu?

¹⁸ Lidan aturiahani le lubaragiñebei le, ariha wamuti ka lan gayaraabei líderagunibu arihei hínsiñe ban lun Heowá. Lidan aturiahani le, akutiha wamaali ka lan gayaraabei badügüni lun bachoururuni tídangiñe sun banigi feruduna láadibu lan Heowá. Ráramaguaba asaminara luagu le lariñagubei Heowá luougua luma luagu le tarufudahabei Bíbülia luagu ligaburi feruduna lániwa. Mabulieidabei subudi lan lun chará ban ani aranseñu liña lun larufudun gudemehabu bun. Haritaguabéi giñe dan lan le feruduna lániwa Heowá, adüga lumuti sunsuinagubei. Ánhabu adügei sun le, gayaraabei bariñaguni dimurei le lau saragu ichouruni kei meha ladügüni Dawidi: “Seremei, Heowá, luagu feruduna bani ‘sun nifigoun luma sun nuriban!’” (Sal. 32:5).