Ida luba gayara lan feruduna wamaniña amu ítara kei ladügüni Heowá?

1, 2. a) Ka dan ídanbei hénrengu lan woun lun feruduna wamaniña amu? b) Ida liña tarufuduni Denise feruduna taali lan wügüri ligía?

HÉNRENGUTI san hun lun feruduna humaniña ha achararubaña hun? Saragu wádangiñe hénrenguti katei le woun, dántima le ladügǘn o lariñawagún somu katei le gáribei woun. Lau sun lira, gayaraati wígiruni igarigu le wasandirubei lun feruduna wamaniña ha achararubaña woun. Ariha waméi tikesin aban íbiri gíritu Denise,a to ferudunabalin aban wügüri le adügübei lun tasufurirun aban lanarime danaguaü. Lidan irumu 2017, aba tidin Denise lau sun tani weiriei habu tisaanigu abisidahoun Warwick. Dan le hagiribuduña lan hábiñoun, aba lasuseredun aban óunwenbu danaguaü, aba tabuguchun aban karü tuagu hakarün. Aba labidiñedagun tau Denise; ani dan le tagagudúnbei, aba tíchugun fe hanarime lan habuleseirun tisaanigu ani hilá lan Brian, le tani weiriei. Dan le tayanuhan Denise luagu le tasandirubei, ariñagatu: “Ma meha lueirin nigarigu, ibidiñe ligía nun kaba lan nadüga”. Lárigiñe aba tíchugun fe mama lan ladüga mekeeni, ni ladüga bacharuaü ni ladüga yusu lan wügüri ligía düroga labuguchubei tuagun hakarün, mama labusenrun. Ligíati, aba tayumuragun Denise lun Heowá lun líchugun darangilaü tun luma lun magañidun tan luma wügüri ligía.

² Aba lanügǘn wügüri ligía ligibugiñoun lúrudu, ani mama labusenrun wügüri ligía lasuseredunbei le asuseredubei, aba lariñagun aban úfisi tun Denise mégeiwa lan lun tabahüdaguni le asuseredubei, lun larihíniwa anhein gadurun lubéi wügüri ligía. Ariñagatu: “Lauya nabahüdaguni le asuseredubei, sanditina kamá hamuga hadaaraguñein nuwounu lun hachagarún aban sagü salu luagun”. Fiu dimaasu lárigiñe, aba tidin Denise agusera aranseñu lun tafuranguagüdüni le asuseredubei, ligibugiñe wügüri le adügübei lun galamiserun tan. Ka tariñagubei? Aba tariñagun lun aguseragüdüti lun lóuseruni wügüri ligía lau gudemehabu.b Dan le lásurunbei tayanuha aba layahuaha aguseragüdüti ariñageina: “Wein-seingü hali irumu nau aguseragüda ani maganbuñahagidina lariñawagún aban katei ítarati lidan aban aguseruni. Mamuriahantiña haduheñu ha asufurirubaña lun louserúniwa le gadurunbei lau gudemehabu. Anihán furumiñeti wéiyaasu naganbun dimurei buin lau ínsiñehabuni luma ferudun”.

3. Ka íderagubarun Denise lun feruduna tani gürigia ligía?

³ Ka íderagubarun Denise lun feruduna tani gürigia ligía? Lau tasaminarun luagu ligaburi feruduna lan Heowá (Mik. 7:18). Anhein weiri lubéi weteingiruni Heowá lau aranseñu liña lan lun feruduna lániwa, líderagubadiwa katei le lun aranseñu wamá lun feruduna wamaniña amu.

4. Ka labusenrubei Heowá lun wadügün? (Éfesuna 4:32).

⁴ Aranseñu liña Heowá lun feruduna lániwa ani busenti giñe lun wadügüni ligiaméme (aliiha huméi Éfesuna 4:32). Agurabati giñe lun aranseñu wamá lun feruduna wamaniña ha achararubaña woun (Sal. 86:5; Luk. 17:4). Lidan aturiahani le, wayanuhaba luagu ǘrüwa katei le lunbei líderaguniwa lun feruduna wamaniña ha achararubaña woun.

MÍCHIGA WAMÁ MEBERESENI LUAGU LE WASANDIRUBEI

5. Ida liña hamuga wasandiragun woungua dan le ladügün aban gürigia aban katei le gáriti woun? (Ariñawagúni 12:18).

⁵ Másiñati lariñagun o ladügün aban gürigia somu katei le gáribei woun saragu, ani gáritimati dan le aban lan besi wamada o aban lan waduhe (Sal. 55: 12-14). Anihein dan, bulesei lumutiwa dimurei le ariñawagúbei woun (aliiha huméi Ariñawagúni 12:18). Anihein dan wabusenrun warihini wagarigu kei ni kata. Lau sun lira, anhein hamuga wadüga ítara, ítara liña hamuga kamá wímiraguña woungua tau aban gusiñu ani aba wígirunu charuñu luagu wawounu. Ligíati, anhein wariha le wasandirubei kei ni kata magidabei wagarigu.

6. Dan le lachararun aban gürigia woun, ka furumiñeti katei wadügübei?

⁶ Dan le lachararun aban gürigia woun, háfuga aba wagañidun lau lóufudagun. Ariñagatu Bíbülia gayaraati lan lasuseredun aban katei ítarati woun. Lau sun lira, ariñagatu giñe moun lumuti lan wígiraguagüdün woungua lun igañi (Sal. 4:4; Efe. 4:26). Ka uagu? Ladüga liibe-agei dan, dan le wagañidun adügatiwa katei le moun lumuti. Ani manügün lumutiwa igañi adüga katei buiti (Sant. 1:20). Haritagua waméi le: mama ligiaméme wagañidun luma aban gürigia lidan lagumeseha, lumoun werederun gáñiñu luma súnwandan.

7. Ka amu katei gayaraati wasandiruni dan le lachararún woun?

⁷ Dan le labuleseirunu aban gürigia wanigi, sanditiwa amu burí igarigu. Kei hénpulu, ariñagatu aban íbiri gíritu Ann: “Dan le meha ñǘraügidina, aba lígirunu núguchi núguchu lun lerederun tuma hiñaru to meha óuyuahabadina. Sanditina ua hamá abusenrutina. Ani dan le gasaanigu habéi, aba nasandirun kamá hamuga sánsiwaadina”. Afuranguagüdatu aban íbiri gíritu Georgette ida liña lan tasandiragun tungua dan le tíchugunbei fe gámari lan tani weiriei tigibuagu: “Bulesei lumutu katei le nanigi. Gamadaguatina meha luma lúmagiñe wañüraü. Ani seriwitiwa meha biángubei wagía úara kei prekursorugu!”. Ariñagatu aban íbirigu gíritu Naomi: “Masaminaruntina yebe lachararuba lan nani weiriei nun. Dan le lariñagunbalin nun laríaguña lan iyawaü lánina agamariduni aramudaguarügü sanditina meha yeeda láadina lan”.

8. a) Ka burí fiu resun wámabei lun feruduna wamaniña ha achararubaña woun? b) Ka buiti wibihubei dan le feruduna wamaniña amu? (Ariha huméi rekuáduru “Ánheinti weiri lubéi basufurirun ladüga le adügǘbei bun?”).

⁸ Mabafutiwa luagu le hariñagubei o le hadügübei amu, lau sun lira gayaraati wadügün lun maweiridagun lan katei. Ka katei buídutimabei lun wadügüni? Feruduna wamaniña ha achararubaña woun. Ka uagu? Ladüga línsiñe Heowá woun, ani busenti lun feruduna wamaniña amu. Ánhawa ígiraguagüda woungua lun igañi ua ligía feruduna wamaniña amu, wóuseruña kei ibidiougua tau ani ladügüña hamuga katei le lun lañawarihan wátuadi (Ari. 14:​17, 29, 30). Ariha waméi le tariñagubei aban íbiri gíritu Christine: “Dan le nígiraguagüdün nungua lun igañi, masanditina ugundani, méigintina buidu marumugun nuguya buidu. Hénrenguti giñe nun lun nárügüdagun nungua, aba mabuidun lan léibugun katei lidan nibagari keisi maríeitu ani manügagun nuguya nungua buidu hama amu”.

9. Ka uagu lunti lubéi mígiraguagüdün wamá woungua lun igarihabu?

⁹ Ánheinti mamuriahan gürigia le adügübei wuribani woun ferudun wama, ka lunbei wadügüni? Íbini ítara, gayaraati wadügün somu katei lun mígiraguagüdün wamá woungua lun igarihabu. Ariñagatu Georgette, to uáguboun wayanuha lidan párafu 7: “Sügüti fiu dan lubá nárügüdagun nungua lun lagidarun igarihabu luma iyereehabúni le meha nasandirubei luagu le meha nánibei weiriei. Lárigiñe lagidarun igarihabu luma iyereehabúni le nuéi aba nasandirun aban óunwenbu darangilaü”. Dan le mígiraguagüdün wamá woungua lun igarihabu, móuserun wamutiña amu lau luriban. Barüti giñe buiti woun, adügati lun wasigirun wabaruaguóun ani ábaya gunda lan wabagari (Ari. 11:17). Lau sun lira, gayaraati wuribagili lan hasandiragun hungua luagu le adügǘbei hun ani maranserungidün lun feruduna humani le adügübei wuribani hun. Ariha waméi le gayaraabei hadügüni.

KA LUNBEI WADÜGÜNI LUN MASANDIRUN WAMÁ IGARIHABU?

10. Ka uagu megei wabéi dan lun lagidarun igarihabu wawéi? (Ariha huméi giñe dibuhu).

¹⁰ Kaba íderaguawa lun masandirun wamá igarihabu? Furumiñeti katei le gayaraabei wadügüni, wígirun lun lásügürün dan. Samina wamá luagu aban gürigia le súfurihalibei aban lanarime danaguaü. Lárigiñe lagaranihan surusia lun, mégeiti dan lun lareidagun. Ítarameme, mégeitiwa dan lun lagidarun igarihabu wawéi lúmati lun aranseñu wamá tídangiñe sun wanigi lun feruduna wamaniña ha achararubaña woun (Apur. 3:3; 1 Fe. 1:22).

11. Ida luba líderaguniwa furíei lun feruduna wamaniña amu?

¹¹ Libiaman katei le gayaraabei wadügüni, wamuriaha luma Heowá lidan furíei lun líderaguniwa lun feruduna wamaniña ha achararubaña woun.c Afuranguagüdatu Ann, to uáguboun layanuhóua lidan párafu 7, ida liña lan líderagunu furíei, tariñaga: “Aba namuriahan luma Heowá lun feruduna lániña sun niduheñu luagu katei le madügün wabéi buidu. Lárigiñe, aba nabürühan aban gárada lun núguchi luma tun iseri lani weiriou le ñein lubéi nariñaga houn luagu feruduna nániña”. Ariñagatu Ann hénrengu lan tun tadügüni katei le, lau sun lira ariñagayatu: “Agurabatina lau lan náfaagun lun náyeihani Heowá lidan feruduna lániña gürigia, gayara lan lachülürün aban dan lun labusenrun núguchi tuma lani weiriou lun hafurendeirun luagu”.

12. Ka uagu lunti lubéi wafiñerun luagu Heowá mama luagu le wasandirubei? (Ariñawagúni 3:​5, 6).

¹² Lǘrüwan katei le gayaraabei wadügüni, wafiñerun luagu Heowá, mama luagu le wasandirubei (aliiha huméi Ariñawagúni 3:​5, 6). Subudi lumuti Heowá ka lan katei buídutimabei woun (Isa. 55:​8, 9). Maweiyasunbei amuriaha somu katei wama le lunbei ladügün wuribati woun. Ligíati, dan le línchahaniwa lun feruduna wamaniña amu, gayaraati wachoururuni lanügüba lan buiti woun (Sal. 40:4; Isa. 48:​17, 18). Ánhawati ñüdün lau le wasandirubei, gayaraabei úabei lan feruduna wamaniña amu (Ari. 14:12; Her. 17:9). Ariñagatu Naomi, to iridúboun lidan párafu 7: “Furumiñe saminatina yebe garicha nan lun ua lan feruduna nani, nani weiriei, ladüga laríagun iyawaü lánina agamariduni. Hanufudetina meha luéiya ladügüni wuribani ligía nun o labulieiduni sun le súfuri naalibei ladüga. Ariñagatina meha núniwagua gunfuranda lani Heowá le nasandirubei. Lau sun lira, lau lásügürün dan aba nagumeserun gunfurandei íbini lan gunfuranda lani Heowá le nasandirubei úati mini lan gunda lan lau. Subudi lumuti ida liña lan nasandiragun nungua ani magidabei lan igarigu le nasandirubei lau lóufudagun, lau sun lira, busenti lun feruduna nániña ha achararubaña nun”.d

BUÍDUGÜDA WAMÉI LE WASAMINARUBEI LUMA LE WASANDIRUBEI

13. Según Rómana 12:​18-21, ka lunbei wadügüni?

¹³ Dan le feruduna wamaniña gürigia ha adügübaña damichi woun úati buídurügü lan lun mayanuhan wamá luagu le asuseredubei. Mosu wadügün amu katei. Anhein giñe luma lubéi aban íbiri gaturobulin wamá, le lunbei wadügüni waransehani turobuli ligía lun warandarun luma (Mat. 5:​23, 24). Lubaragiñe wagañidun luma, lunti warufudun gudemehabu lun, ani lubaragiñe wasandirun iyereehabúni luagu, lunti feruduna wamani (aliiha huméi Rómana 12:​18-21; 1 Fe. 3:9). Kaba íderaguawa lun wibihini katei le?

14. Ka lunbei wáfaagun lun wadügüni, ani ka uagu?

¹⁴ Mosu wáfaagun lun warihiniña gürigia ha adügübaña wuribani woun kei larihiniña Heowá. Téniti Heowá lun igaburi buiti le hawagubei gürigia (2 Kro. 16:9; Sal. 130 :3). Ligíati, ánhawa áluaha katei buiti hawagu amu, wadarirubei, ánhawa giñeti áluaha katei wuribati hawagu, wadarirubei giñe. Según igaburi le wabusenrubei warihin hawagu ligíaba wadarira. Ánhawa etenira lun katei buiti le hawagubei amu, ménrenguntimabei woun feruduna wamani hachara. Ítara liña lariñaguni aban íbiri gíriti Jarrod: “Ménrenguntimati nun feruduna nani aban íbiri dan le nasaminarun luagu katei wuribati le ladügübei lumoun saragu katei buiti le hínsiñebei nun luagu”.

15. Ka uagu buidu lubéi wariñagun houn gürigia ha achararubaña woun feruduna wamaaña lan?

¹⁵ Anihein amu katei le gayaraabei wadügüni: wariñagun lun gürigia le achararubei woun feruduna wamani. Ka uagu súdini lubéi wadügüni katei le? Teni wamá lun le tariñagubei Naomi: “Aba lálügüdünina nani weiriei, ‘Feruduna báadina san?’. Dan nariñagaali lan yebe lun ‘Feruduna náadibu’, aba nachakürün, aba lásiñarun nariñaguni lun, feruduna naali lan. Aba níchugun fe úagili lan feruduna nani sunsuinagubei. Lauti lásügürün dan, ligíaali gayara lan nariñaguni lun ‘Feruduna numutibu’. Masaminarungubei numuti yebe lanarime buiti le gayaraabei lanügüni bián dimurei le woun. Aba lasandirun aban óunwenbu awalidaguni darí lun layahun, ánheinti nuguya aba nasandirun aban óunwenbu darangilaü. Lúmagiñe dan ligía, ábaya nagumeserun afiñera luagu, ani guenlé buíduyali wanaagun woungua”.

16. Ka furendei wamaalibei luáguti feruduna wamaniña amu?

¹⁶ Busenti Heowá lun feruduna wamaniña ha achararubaña woun (Kol. 3:13). Íbini ítara, anihein dan hénrengu lan woun wadügüni. Lau sun lira, wibihibei anhein wadüga katei le: 1) míchiga wamá mebereseni luagu le wasandirubei, 2) áfaagua wamá lun masandirun wamá igarihabu, ani 3) lunti wabuiduragüdüni le wasaminarubei luma le wasandirubei (ariha huméi rekuáduru “Ǘrüwa katei le gayaraabei líderaguniwa lun feruduna wamaniña amu”).

SAMINA WAMÁ LUAGU BUITI LE WIBIHUBEI DAN LE FERUDUNA WAMANIÑA AMU

17. Ka buiti wasagarubei dan le feruduna wamaniña amu?

¹⁷ Anihein saragu resun wama lun feruduna wamaniña amu. Ariha wamá fiu lídangiñe. Furumiñe, áyeiha wamuti ani gúndaagüda wamuti Wáguchi Heowá le gudemehabubei (Luk. 6:36). Libiaman, seremei wamuti Heowá luagu aranseñu liña lan lun feruduna lániwa (Mat. 6:12). Ani lǘrüwan, buídubei wátuadi ani buídutimabei wanaagun woungua hama amu.

18, 19. Ka buiti lanügübei feruduna wamaniña ha achararubaña woun?

¹⁸ Dan le feruduna wamaniña amu, gayaraati wibihin saragu buiti le magurabun wamuti. Ariha waméi le asuseredubei tun Denise, to uáguboun wayanuha lidan lagumeseha aturiahani le. Ibidiñeti yebe tun busén lan gürigia le abuguchúbei tuagu hakarün láfaragun lungua lárigiñe aguseruni. Gama lumoun, aba taweiridun lanigi ladüga feruduna tani Denise, ligía lubeiti, aba lagumeserun aturiahoun Bíbülia hama gefentiña luagu Heowá.

¹⁹ Másiñati aban lan lídangiñe katei le hénrengubei woun lidan wabagari feruduna wamaniña ha achararubaña woun. Lau sun lira, gayaraati giñe ábanbei lan katei wéiriti lebegi (Mat. 5:7). Ligía lubeiti, áfaagua wamá lun wáyeihani Heowá luma lun feruduna wamaniña amu tídangiñe sun wanigi.