Ida luba aban wamá umadaü buiti?

GAGIBUGUAADÜN san luma somu turobuli, ani sandiguaadün hungua ua hamá ni aban lun híderagunün? Íbini wawinwanduña lan lidan “weyu hénrenguti” le lánina “lagumuhóun dan” le adügübei lun wasandirun íruni, mama mosu wagagibudagun luma turobuli le lánina ibagari wábuguarügü (2 Tim. 3:1). Ariñagatu Bíbülia gayara lan wadarirun ídemuei hámagiñe umadagu buítiña lidan “lidaani idiheri” (Ari. 17:17).

IDA LUBA HÍDEHAN UMADAGU BUÍTIÑA?

Gamadaguati meha apostolu Pábulu hama ha ñǘdünbaña luma lidan luéiyasun ani íderagua haméi lidan ámuñegueinarügü igaburi (Kol. 4:​7-11). Dan meha le furisunrugu lubéi uburugu Roma, íderagua hamuti lidan katei le siñá lubéi adüga. Kei hénpulu, barǘ lumuti meha Epafurodítu katei le hóunahabei íbirigu ha Filipubaña lun Pábulu (Fili. 4:18). Ñǘdünti giñe Tíkiku ederegeroun gárada to lóunahaboun Pábulu lun ámuñegueinarügü damuriguaü (Kol. 4:7). Seremei hídehan umadagu ha, gayara lubéi lagunfulirun Pábulu lau lani ministeriu dan meha le ladaürǘnbei lúbiñe luma tidan furisun. Anti wagía? Ida luba aban wamá umadagu buítiña?

Uguñe weyu, arufuda hamuti saragu íbirigu lau le hadügübei gebegitima hamá umadagu buítiña. Ariha waméi le tásügürübei aban prekursora to gíriboun Elísabet, to awinwanduboun Esüpáña. Dan le ladarirúnbei kánserü le máraninabei tuagu túguchu, anuhein meha aban íbiri to arufuduboun aban tan umadaü buitu lau tóunahan súnwandan lubuidun burí bérusu tídangiñeti Bíbülia tun Elísabet luéigiñe gágamuru. Ariñagatu Elísabet: “Adügati dimurei burí le lun masandiragun nan nungua nábuguarügü ani ruti erei nun lun nagagibudagun luma turobuli le, sagü weyu” (Ari. 18:24).

Gayaraati wederebudagüdüni wamadagua hama wíbirigu lau wíderaguniña lidan heseriwidun lun Heowá. Kéiburi, gayaraati san wídehan lun wanügüniña somu íbirigu derebuguhaña apurichiha o adamuridagua? Gayaraati aban lan lubuidun chansi lira lun wíchugun gurasu wámagua (Rom. 1:12). Lau sun lira, añahein íbirigu ha siñati háfuridun hábiñegiñe. Ida luba warufuduni aban wamá umadagu buítiña houn?

UMADAGU WAMÁ BUÍTIÑA HOUN HA SIÑABEI HÁFURIDUN HÁBIÑEGIÑE

Añahein íbirigu siñati hadamuridagun ladüga luriban hadariragun houngua o ladüga amu katei le gádanbaliña. Ligía meha asuseredubei lun David aban meha íbiri le laubei kánserü ani barüti lóugiñe sisi hati eresibira kimioterapia. Sun meha aniha lan eresibira kimioterapia aba meha ladamuridagun ligía tuma Lidia to lani weiriou luéigiñe Interneti.

Ida liña híderaguniña lílana damuriguaü íbirigu ha? Dan le lagumuchun adamuridaguni, añahein hádangiñe íbirigu ha tídanbaña Luban Adamuridaguni barǘ hamuti hadaani lun hayanuhan hama íbirigu ha luéigiñe Interneti. Lanwoun lira, óunahatiña giñe íbirigu mensahitu lun David luma tun Linda lárigiñe adamuridaguni lun hariñagun burí houn buidu lan óunabagülei le híchugubei. Ida liña lasandiragun David tuma Linda houngua? Sandiguatiña houngua hínsiñe hamá houn hamadagu.

Gayaraati wadügün aransehani hama íbirigu ha siñabei háfuridun hábiñegiñe, lun wapurichihan úara hama. Gayaraati warufuduni mabulieidagungidiwa lan hawéi íbirigu ha lau wadügün lirahüñü asansiruni lidan wani ministeriu (Ari. 3:27). Gayaraati wapurichihan hama lau wabürühan gárada úara hama o lau wapurichihan luéigiñe gágamuru hama. Luagu le aban oubaü, gayaraati hadügün wéiyaaña lidan afiñeni aransehani lun hebelurun íbirigu ha luéigiñe Interneti lidoun adamuridaguni le adügǘbei lubá apurichihani. Ruti David tuma Lidia seremei lun Bungiu luagu aransehani le. Ariñagati David: “Láurügü konektarü nan hama íbirigu lubá apurichihani, naganbuni dimurei tídangiñeti Bíbülia luma furíei le adügǘbei ruti erei woun”. Ánheinti añahein lubéi aturiahatiña Bíbülia wama? Anhein wariha luagu buídubei lan, gayaraabei wanügüniña aturiahatiña hábiñoun íbirigu ha siñabei háfuridun hábiñegiñe, lun wíchugun aturiahani houn ñein.

Dan le wásügürün dan hama wábirigu ha siñabei háfuridun hábiñegiñe, ariha wamuti lubuidun igaburi le hawagubei ábati lederebugudun wamadagua hama. Kéiburi, dan le warihiniña ayusuroun Lererun Bungiu lun hachülürün tidoun hanigi gürigia ábati garíaguadi wamá houn ladüga subudi le hawagubei. Dan le wíderaguniña wábirigu lidan igaburi le aba giñe haganwoundun wamadagu (2 Ko. 6:13).

Ruti Titu le lumada Pábulu saragu gurasu lun lau lerederun lurugabu (2 Ko. 7:​5-7). Haritaguagüda lumutiwa katei le gayara lan wíchugun gurasu houn wamadagu lau le wariñagubei, lau le wadügübei hawagu luma lau werederun harugabu dan le hemegeiruni (1 Huan 3:18).

UMADAGU WAMÁ BUÍTIÑA LIDAN LIDAANI ÉIBAAHOUNI

Rútiña wábirigu ha Rúsiabaña aban lubuidun hénpulu lau híderagun hámagua. Ariha waméi le asuseredubei lun Serguéi luma tun Tatiana to lani weiriou. Aba hebelurun polisía hábiñoun lun hasagarahanu haban, ani lárigiñe aba hanügüniña lun hálügüdaguniña. Furumiñe, aba hígiragüdünu Tatiana, ani aba tagiribudun túbiñoun. Abahüdagua lumuti Serguéi le asuseredubei lárigiñebei tachülürün Tatiana múnadoun: “Aba tachülaagun aban íbiri ganigitu. Lau lóufudagun, aba hachülaagun íbirigu ani aba híderaguniwa apakühei sun katei wábiñe”.

Ariñagati Serguéi: “Súnwandan hínsiñe lan le lariñagubei Ariñawagúni 17:17 nun, le ariñagubei: ‘Aban umadaü, súnwandan buidu lan, ítara liña kei aban íbiri lidan lidaani idiheri’. Dagatimaati dimurei le nuagu uguñe weyu, lugundun nagagibudaguña luma éibaahouni; subudi numuti nábuguarügü lan siñá nubéi lan sügǘ le awanda. Rúhali Heowá umadagu ganigitiña nun ani mígirun hamagidina nábugua”.a

Lidan lagumuhóun dan le ídanbei wawinwanda mégeitiwa umadagu ha gayaraati warabachun hawagu. Ani lídantimame saragu asufuriruni mégeitima wabaña. Ligíati, lúmagiñe guentó lun lubaruaguóun adüga waméi sun wayaraati lun umadagu wamá buítiña (1 Fe. 4:​7, 8).