Gayaraati wachoururuni líchuguba lan Heowá gurasu woun

1. Ida liña meha habagari huríu ha adaürǘbaña Babilónia?

SAMINA wamá murusunraü ida liña lan meha hasandiragun huríu houngua ha meha adaürǘbaña Babilónia. Ariha hamaali meha lagünrinchawagun Herusalén le hageira. Ladüga hafigoun luma hafigoun hagüchagu aba hanügǘn keisi idamuni lidoun amu ageiraü (2 Kro. 36:​15, 16, 20, 21). Ñein Babilónia gayaraati meha hadügüni katei le lánina sagü weyu le kamanibei lidan ibagari (Her. 29:​4-7). Lau sun lira, mama meha aban katei ménrengunti, lugundun mama meha ibagari ligía hanúadirubei. Ligía lariñagunbei aban hádangiñe: “Dan le meha ñun wamá laru duna Babilónia, ayahuatiwa dan le waritagun luagun Sión” (Sal. 137:1). Furanguti megei hamá meha huríu lun lichugún gurasu houn, lau sun lira, kaba meha íchigei houn?

2, 3. a) Ka ladügübei Heowá hawagu huríu ha meha anügǘbaña adaürǘwa? b) Kaba wariha lidan aturiahani le?

² Aranseñu liña Heowá “lun líchugun gurasu woun súnwandan” (2 Ko. 1:3). Ligíati, sun ha ayarafadubaña lun hínsiñetiña lun, ani busenti líchugun gurasu houn. Subudi lumuti meha Heowá hánharuba lan fiu hádangiñe huríu ha adaürǘbaña Babilónia lun lererehan ani háhuduraguba lan meha lun kei aubei lagundaara (Isa. 59:20). Ligíati, lóugiñe 100 irumu lubaragiñe meha hanügǘn huríu adaürǘwa Babilónioun, adügati meha Heowá lun labürüha Isaíasi aban líburu. Ida luba meha tahuudun liliburun Isaíasi houn huríu? Ariñagati profeta Isaíasi: “Ítara liña lariñagun Wabungiute: ‘Ámaliha humaña numutuniña’” (Isa. 40:1). Ítarati yusu lumutu meha Heowá liliburun Isaíasi lun líchuguni gurasu le meha hemegeirubei huríu ha adaürǘbaña.

³ Ítara kei meha huríu ha anügǘbaña hageiragiñe, anihein giñe dan megei wamá lichugún gurasu woun. Lidan aturiahani le, wakutihaba ǘrüwa igaburi le ídanbei líchiga Heowá gurasu houn huríu ha anügǘbaña adaürǘwa: 1) füramaseti meha feruduna lubaña lan ha asakürihabaña, 2) ruti meha aban emenigini houn lubúeingu, ani 3) íderagua lumutiña meha lun manufudedun hamá. Lidan kada aban lídangiñe igaburi le, warihuba adüga lani Heowá ligiaméme uguñe weyu lun líchugun gurasu woun.

GUDEMEHABUTI HEOWÁ ANI FERUDUNA LUMUTIWA

4. Ida liña meha larufudun Heowá gudemehabu houn huríu ha asakürihabaña? (Isaíasi 55:7).

⁴ Heowá “ligía Wáguchibei le gudemehabubei woun” (2 Ko. 1:3). Ani arufuda lumuti meha dan le lariñagunbei houn huríu ha meha adaürǘbaña feruduna lubaña lan ha asakürihabaña (aliiha huméi Isaíasi 55:7). Ariñagati: “Gudemehabutina bun lau ínsiñeni le magumuchaditi” (Isa. 54:8). Ida luba meha ladügüni? Íbini mosu lan meha hasufurirun sun huríu ladüga hamaganbadin, füramaseti meha Heowá houn meredebaña lan Babilónia lun sun dan. Lachülürüba meha dan lun háfuridun ñéingiñe (Isa. 40:2). Chóuruti ru lan dimurei burí le saragu gurasu houn huríu ha meha asakürihabaña.

5. Ka uagu chóurutima wabalin sügǘ hau meha huríu feruduna lani Heowá wafigoun?

⁵ Ka wafurendeirubei? Aranseñu liña Heowá lun feruduna lániwa sunsuinagubei. Subudi hamuti huríu ha meha adaürǘbaña katei le, ánheinti wagía uguñe weyu chóurutima wamuti. Ka uagu wariñagei le? Lugundun subudi wamani sun le adüga láalibei Heowá lun feruduna lániwa. Saragu sígulu lárigiñebei lariñaguni Isaíasi dimurei burí le, aba lóunahani Wáguchi Bungiu le siélubei Lisaani ubouagun lun líchuguni libagari hawagu sun ha asakürihabaña. Lani Hesusu sákürifisiu lébunabei lachibun wafigoun sunsuinagubei (Adü. 3:19; Isa. 1:18; Efe. 1:7). Ma lueirin lugudemehabu Wabungiute!

6. Ka uagu ru lubéi gurasu woun wasaminarun luagu lugudemehabu Heowá? (Ariha humóun giñe iyawaü).

⁶ Gayaraati líchugun dimurei burí le lariñagubei Heowá lidan Isaíasi 55:7 saragu gurasu woun anhein adügaadiwa lubéi somu figóu wéiriti ani awanhagua asandiragua woungua wuriba íbini asakürihaadiwa lan. Añahein sandiguagiña houngua ítara, dántima hasufuriruña lan ladüga somu figóu le meha hadügübei. Gama lumoun, anhein gufese wamaali lubéi wafigoun ani madügün wamaali figóu ligía, gayaraati wachoururuni feruduna láadiwa lan Heowá. Ani dan le feruduna láadiwa Heowá aba lanúadirun lun maritagundigiaali lan luagu wafigoun (ariha huméi giñe Heremíasi 31:34). Ligíati, anhein masaminarunhali lubéi Heowá luagu wafigoun, moun lumuti wasaminarun luagun. Lun le wadügübei guentó letenira Heowá, mama lun figóu le meha wadügübei (Ese. 33:​14-16). Ani haritagua waméi málühali lan Wáguchi le gudemehabubei agidarei sun turobuli le lanügübei figóu le meha wadügübei.

7. Kaba ínchahawa lun wayanuhan hama wéiyaaña lidan afiñeni anhein adügaadiwa lubéi aban figóu wéiriti?

⁷ Ka lunbei wadügüni anhein sandigua wabéi woungua lau duru ladüga adügaadiwa lan aban figóu wéiriti ani magufeserun wamagili? Ínchaha tumutiwa Bíbülia lun wálugun ídemuei hama wéiyaaña lidan afiñeni (Sant. 5:​14, 15). Lau sun lira, háfuga hénrengubei lan lun wabahüdaguni houn figóu le wadügübei. Ligíati, haritagua waméi yusu lániña Heowá wügüriña úaraguatiña ha lun híderaguniwa ani hóuserubadiwa lau ínsiñeni luma lau gudemehabu, ítara kei ladügüni Heowá. Ligíati ánhawa asaminara luagu katei le ani asakürihaadiwa, ménrengunbei woun wayanuhan hama. Ariha wamá ida liña lan larufudun Heowá gudemehabu ani ru ligía gurasu lun aban íbiri gíriti Arthur ladüga somu figóu wéiriti le meha ladügübei.a Ariñagati Arthur: “Sügütina kei burí aban irumu aríagua iyawaü lánina agamariduni. Aban weyu, aba naganbun aban yanu luáguti laruman saminaü, lárigiñe naganbuni yanu ligía aba nagufeseruni le nadügübei tun nani weiriou luma houn wéiyaaña lidan afiñeni. Aba nagidarun aban lueirin ihürügu nuáriua, lau sun lira, sigitina asandira saragu duru ladüga le meha nadügübei. Chóurugüda hamuti wéiyaaña lidan afiñeni nun busengili lan Heowá lun lumada nan ani erereha lan woun ladüga hínsiñe wamá lun. Chülüti lubuidun burí dimurei le hariñagubei nun tidoun nanigi ani íderagua lumutina lun gunfuranda nani feruduna láadina lan Heowá”. Uguñe weyu, seriwiti Arthur kei prekursoru ani aban giñe hádangiñe ídehatiña lidan damuriguaü. Ruti gurasu woun wasaminarun ánhawa lan asaküriha tídangiñe sun wanigi luagu figóu le wadügübei feruduna lubadiwa lan Heowá!

RUTI HEOWÁ EMENIGINI WOUN

8. a) Ka emenigini líchugubei Heowá houn huríu ha meha adaürǘbaña? b) Según Isaíasi 40:​29-31, ida liña meha hasandiragun huríu houngua luagu emenigini le líchugubei Heowá houn ha asakürihabaña?

⁸ Másiñati samina hamá meha huríu magiribudúnhaña lan hageiroun lugundun méchuntiña meha Babilóniana ígiragüdaña adaürǘtiña (Isa. 14:17). Lau sun lira, ruti meha Heowá emenigini houn lubúeingu: füramaseti meha houn láfuridagüdubaña lan Babilóniagiñe. Ani úati ni aban gayaraati leredehani! (Isa. 44:26; 55:12). Lun Heowá, ítara haña meha Babilóniana kei aban lagu kaliki (Isa. 40:15). Dan le láfurun aban gürigia luagu kaliki, aba lagumuchagun! Ida luba meha líderaguniña emenigini le huríu ha adaürǘbaña? Líchuguba meha gurasu houn, ani mámarügü lira, lugundun ariñagati Isaíasi: “Ha hemenigibaña luagu Aburemei, súnwandan hibihuba lan iseri erei” (aliiha huméi Isaíasi 40:​29-31). Líchuguba meha emenigini le iseri erei houn ani “gayaraabei háhamahan kei ágila”.

9. Ka achoururagüdübalin houn huríu ha adaürǘbaña lasagarubaña lan Heowá Babilóniagiñe?

⁹ Chóurugüda lumuti meha Heowá houn huríu ha adaürǘbaña lagunfulirubei lan sun le füramasei lubéi houn. Ida? Samina wamá luagu sun burí profesía le meha harihibei huríu agunfulira. Kei hénpulu, subudi hamuti meha huríu ragǘ hamani asiriana arúeihani le lánina 10 türibu le lani Ísüraeli, ani aba hanügǘn sun lílana adaürǘwa (Isa. 8:4). Ariha hamuti giñe ida liña lan hagünrinchaguni babilóniana Herusalén ani lárigiñe aba hanügǘn huríu Babilónioun keisi idamuni (Isa. 39:​5-7). Subudi hamuti meha giñe ida liña lan lígiruni urúei Babilóniana Sedekíasi marihinga ani aba lanügüni Babilónioun (Her. 39:7; Ese. 12:​12, 13). Gúnfuliti sun le meha lariñagubei Heowá (Isa. 42:9; 46:10). Adügati meha sun katei le lun hachoururuni huríu lasagarubaña lan Heowá Babilóniagiñe.

10. Kaba íderaguawa lun furangu lan wakipuruni wemenigin lidan wasaminan lidan lagumuhóun dan le?

¹⁰ Ka wafurendeirubei? Anhein maguraasun wabéi, gayaraati líchugun wemenigin gurasu luma erei woun. Wawinwanduña lidan dan hénrenguti ani wagagibudaguña hama láganiñu Bungiu ha gabafutiña, lau sun lira moun lumuti wígiraguagüdün woungua lun anufudei. Rúhali Heowá aban lubuidun emenigini woun luagu wawinwanduba lan lun súnwandan lidan darangilaü luma ichouruni. Mosu wakipuruni füramasei burí le lidan wasaminan luma tidan wanigi. Anhein madügün wamá ítara, ítara liña hamuga kamá warihiña aban fulasu buídumeraüti luéigiñe aban funedera bídüriu le bürüwati. Kaba íderaguawa lun furangu lan wemenigin lidan wasaminan, lidan amu dimurei, warumadahani bídüriu le luágubei funedera? Lau gabügürügua lan wasagarun dan lun wadiraaruni lidan wasaminan lubuidun ibagari le lunbei wawinwanduni lidan iseri ubóu. Lun wibihini lira, aliiha wamá ariñahani, ariha wamá burí bidéu ani aganbaha wamá uremu le ayanuhabei luagu wemenigin. Ani abahüdaha waméi lun Heowá ka burí lan füramasei wayumahabei lun lagunfulirun lidan iseri ubóu.

11. Ida liña tibihin aban íbiri erei lun tagagibudagun luma aban sandi máraninati?

¹¹ Ariha waméi tani Joy hénpulu, aban íbiri to lauboun aban sandi máraninati. Abahüdaguatu ida liña lan líchugun emenigini gurasu luma erei tun, ariñagatu: “Dan le nasandiragun nungua siñá lan nun, aba nadaarunu nanigi lun Heowá ani aba nabahüdaguni sun le násügürübei lun ani chouru numuti lau gunfuranda lánina. Óunaba lumutina Heowá lau líchugun “óunwenbu ubafu” nun (2 Ko. 4:7). Aríaguatu giñe tungua tawinwanduña lan lidan iseri ubóu le ñeinba lubéi “mariñagunbei [lan] ni aban lílana fulasu: ‘Sándiñadina’” (Isa. 33:24). Anhein giñe wariñaga sun le wasandirubei lun Heowá ani kipu wameime wemenigin lidan wasaminan, wibihiba erei lun wawandun sun luwuyeri turobuli le ñǘbuinti.

12. Ka resun wámabei lun wafiñerun luagu Heowá luma luagu le füramase lubéi? (Ariha humóun giñe iyawaü).

¹² Ítara kei huríu ha meha adaürǘbaña Babilónia, gébunati giñe wafiñerun luagu Heowá luma luagu sun le füramase lubéi. Samina wamá luagu sun profesía le agunfulirubei uguñe weyu. Kei hénpulu, anihein aban arúeihani gabafuti ubouagun le uágubei lariñawagúa “here luba lan [ . . . ], mere ligíame” (Dan. 2:​42, 43). Warihiñein giñe anihein lan “hárabaganali lidan saragu fulasu”, ani wapurichihañein giñe uganu buiti “lidan sun ubóu” (Mat. 24:​7, 14). Lau warihini lagunfulirun profesía burí le ruti gurasu woun ani derebugüda lumuti wafiñen luagu lagunfuliruba lan le líbiri füramasei, le füramasei laalibei Heowá.

ÍDERAGUA LUMUTIWA HEOWÁ LUN MANUFUDEDUN WAMÁ

13. a) Ka meha lénrengunga úmabei hagagibudagua huríu eibu ayarafadeina lan higirawagüdǘn? b) Según Isaíasi 41:​10-13, ida liña líchugun Heowá gurasu houn huríu ha adaürǘbaña Babilónia?

¹³ Ruti meha Heowá gurasu houn huríu ha adaürǘbaña Babilónia lau líchugun aban lubuidun emenigini houn, lau sun lira subudi lumuti meha ehenrengudeina luba lan katei houn, eibu ayarafadeina lan hígirawagüdüniwa. Ariñagaali meha Heowá lidan lanme dan ligía lárügüdübei lan aban urúei gabafuti sun ageiraü le geyegubei lau Babilónia ani lárigiñeme aba lanme lárügüdüni urúei ligía, Babilónia (Isa. 41:​2-5). Gébunati meha san lun hanufudedun huríu? Lubaragiñe meha lasuseredun sun lira adügaali meha Heowá lun labürüdǘniwa dimurei le, le lunbei meha líchugun gurasu houn, ariñagati: “Manufudedabá, ladüga anahein buma; manufudedabá au Bubungiutebei” (aliiha huméi Isaíasi 41:​10-13). Ka meha uagu lariñaga houn: “Au Bubungiutebei”? Mama meha lun laritaguagüdüniña lunti lan háhuduragun lun, lariñagunbalin lun haritaguni anihein lan hama lun líderaguniña (Sal. 118:6).

14. Ka amu katei ladügübei Heowá lun líderaguniña huríu ha meha anügǘbaña Babilónioun lun manufude hamá?

¹⁴ Adügati meha Heowá ámuya katei lun líderaguniña huríu ha meha adaürǘbaña Babilónia lun manufudedun hamá: haritaguagüda lumutiña meha luagu óunwenbu lubafu luma luagu lanarime lisubudin. Amuriahati meha hama lun harihin sielun, ariñaga ligía meha houn mama lan adügarügü lumutiña waruguma subudi lumutiña giñe ani ruti hiri kada aban (Isa. 40:​25-28). Ligíati, chóuruti giñe subudi lani ka lan hiri kada aban hádangiñe lubúeingu. Anhein gabafu lubéi lun ladügüniña waruguma, gabafuti giñe lun líderaguniña lumutuniña. Ligía lubeiti, moun lumuti meha hanufudedun huríu ha anügǘbaña Babilónioun.

15. Ka ladügübei Heowá lun líderaguniña huríu ha adaürǘbaña Babilónia lun aranseñu hamá?

¹⁵ Ruti giñe Heowá adundehani houn lubúeingu lun aranseñu hamá lubá danme le háfuridun Babilóniagiñe. Lidan amu bérusu tidan liliburun Isaíasi ariñagati houn lumutuniña: “Belú humá húbiñoun hadouragueime bena haugua. Aramudagua humá luagu murusun dan, darí lásügürün ligañi Wabureme” (Isa. 26:20). Háfuga gúnfuliti bérusu le lidan furumiñeti wéiyaasu dan le lárügüdübalin urúei Siru Babilónia. Ariñagati aban gürieguna abahüdahati luagu binadu sügǘ, dan le lan lábürühanbei Siru luagu Babilónia, ariñaga lan houn lisudaranigu lun “háfaraguniña gürigia ha bóugudibaña [tuéi haban]”. Ma funa lueirin hanufude gürigia ha meha aganóubaña Babilónia! Háfuga sefu hamuti huríu ha adaürǘbaña Babilónia habagari, lugundun gaganbadi hamá lun ladundehan Heowá.

16. Ka uagu moun lubéi wanufudedun luagu le lunbei lasuseredun lidan saragu asufuriruni? (Ariha humóun giñe iyawaü).

¹⁶ Ka wafurendeirubei? Málühali saragu asufuriruni agumesera, ani ligíaba dan le hénrengutimabei ubouagu. Danme le lagumeserun ábame hasandirun gürigia lueirin anufudei ani ibidiñe ligíame houn kaba lan hadüga. Ánheinti wagía manufudedunbadiwa, lugundun subudi wamuti Heowá lan Wabungiutebei. Wiñurubei wagibu lau afiñeni lugundun subudi wamuti madiseeli lanme luéyuri wasalbarun (Luk. 21:28). Ani wasigiruba afiñera luagu Heowá íbini danme le lábürühan Gogu wawagu, aban sétanu hani néchanigu. Layusurubaña Heowá lani ánheligu lun lóunigiruniwa ani líchuguba adundehani woun lun gayara lan wesefuruni wabagari. Ida luba lichugún adundehani woun? Ibidiñegili woun. Másiñati weresibirubei lan adundehani le lidan damuriguaü. Másiñati anihán lanme rumu le ñeinba lubéi wadarirei ichouruni le uágubei lariñawagúa “belú humá húbiñoun hadouragueime bena haugua”. Ida luba aranseñu wamá lubá le lunbei liabin? Mosu yarafañu wamá houn wábirigu, gaganbadi wagíame lun sun burí adundehani le ñǘbuinbei túmagiñe lóundarun Heowá ani chouru wameime anuhán lan óundaruni to ladundehaboun Heowá (Ebü. 10:​24, 25; 13:17).

17. Ka gayaraabei hadügüni lun háluahani gurasu le líchugubei Heowá?

¹⁷ Lau sun meha hénrengu lan ibagari houn huríu ha adaürǘbaña Babilónia, ru lumuti Heowá gurasu le hemegeirubei houn. Ani ligiamémeba ladüga wawagu. Meberesenga kaba lan asusereda ámuñegü, sigí humá árügüda luagu Heowá. Mabulieida huméi gudemehabu lan Heowá. Áfaagua humá lun meferidirun humani hemenigin. Kei Heowá lan Wabungiutebei, úati ni kata le lunti ladügün lun wanufudedun.