Ka uagu lunti lubéi wáluahan adundehani?

1. Kaba íderaguawa lun buidu lan le lunbei wanúadiruni luma lun buidu lan lidin woun? (Ariñawagúni 13:10; 15:22).

SUN wagía busentiwa lun buidu lan le lunbei wanúadiruni, lúmati lun buidu lan lidin woun lidan le lunbei wadügüni. Arufudahatu Lererun Bungiu woun lun lan wibihini katei le mosu wamuriahan adundehani (aliiha huméi Ariñawagúni 13:10; 15:22).

2. Ka füramase lubéi Heowá woun?

² Úati ni aban buídutimati ladundehan luéi Wáguchi, Heowá. Ligía buídubei lubéi lun wafurieidun lun amuriaha lichú aau. Ariñagati woun: “Buágunñein narihin […]; narufudubei üma le lunbei bafalaruni bun” (Sal. 32:8). Mini lan le berese lan Heowá wau lun líchuguni adundehani le wemegeirubei woun luma lun líderaguniwa lun wíchuguni lidan wabagari.

3. Kaba álügüdahani ounabúa lidan aturiahani le?

³ Lidan aturiahani le tayusurúba Lererun Bungiu lun lounabún gádürü álügüdahani le gayaraabei wadügüni wóuniwagua: 1) “Ka igaburi nemegeirubei lun nasagarun buiti lídangiñe adundehani le neresibirubei?”, 2) “Kataña gayarabei híchugun adundehani buiti nun?”, 3) “Ka uagu buidu lubéi lun aranseñu nan lun nánharun lun amu ligaburi saminaü?” lúmati 4) “Ka uagu moun lumuti lubéi nígirun lun ámuba lan anúadira nuagu?”.

“KA IGABURI NEMEGEIRUBEI?”

4. Ka igaburi wemegeirubei anhein busén wabéi wasagarun buiti lídangiñe adundehani le weresibirubei?

⁴ Lun wasagarun buiti lídangiñe lubuidun adundehani le weresibirubei, mosu ǘnabugu wamá. Subudi wamuti buídutimabei lan le lunbei wanúadiruni ánhawa áluaha adundehani luma somu gürigia le subudihabúti wawéi. Anhein ua lubuidun burí igaburi le wawagu, siñabei líderaguniwa Heowá ani mawinwandun wabéi giñe adundehani le waliihabei tidan Lererun (Mik. 6:8; 1 Fe. 5:5). Ánheinti ǘnabugu wabéi, aranseñu waba lun waganbuni luma lun wafalaruni furumiñeguarügü adundehani le ñǘbüinbei tídangiñe Bíbülia.

5. Ka burí katei gayaraabei hamuga meha ladügün lun lanaagun urúei Dawidi lungua?

⁵ Ariha wamá ka lan gayaraabei wafurendeirun lídangiñe lani urúei Dawidi hénpulu, le meha ǘnabugubei lau sun ibiha lan saragu katei ani gibe ligía liyara adüga. Saragu irumu lubaragiñe aban lan urúei, subudiwati meha kei aban gáfareiti árüpa, ani áfarati meha lun urúei Saulu (1 Sam. 16:​18, 19). Dan le lanúadirunbalin Heowá Dawidi lun ligíaba lan urúei leweñegua Saulu, aba labuinchagüdüni lau ubafu luma lau sífiri sandu (1 Sam. 16:​11-13). Ani gúndaatiña gürigia lau ladüga lagañeiruniña saragu áganigu, kéiburi Goliadi le hígandei (1 Sam. 17:​37, 50; 18:7). Lun hamuga meha barüguati Dawidi lungua, gayarati hamuga lasaminarun: “Lau sun le ibiha náalibei lidan nibagari, mabusenruntina lariñawagún ni kata nun”. Lau sun lira, mítaranti meha Dawidi.

6. Ida liña wasubudiruni anha lan meha Dawidi lau sun lugundan lun adundehani le ichugúbei lun? (Ariha huméi giñe dibuhu).

⁶ Dan meha le urúeihali Dawidi, aba lóundaragun hama wügüriña ha uágubaña lafiñera lun híchugun adundehani lun (1 Kro. 27:​32-34). Ani ítara liña, lugundun súnwandan aranseñu liña lan meha lun laganbun lubuidun adundehani, meberesenga anhein aban lubéi wügüri íchugubalin lun odi aban lan würi. Ligía meha asuseredubei tuma Awigaili to lani Nawali weiriou, aban wügüri rófuti, hángiti ani meteingirati. Ǘnabuguti meha Dawidi, ani aba ladügüni le tariñagubei Awigaili lun. Ani seremei laganbunu, adügati lira lun madügün lan aban óunwenbu charati (1 Sam. 25:​2, 3, 21-25, 32-34).

7. Ka wafurendeirubei lídangiñe lani urúei Dawidi hénpulu? (Apurichihati 4:13; ariha humóun giñe iyawaü).

⁷ Ka wafurendeirubei lídangiñe hénpulu le líchugubei urúei Dawidi? Luagu aban oubaü, lau sun anihein lan somu iyaraani wawagu luma ubafu, moun lumuti wasaminarun subudi wamaali lan sun katei ani memegeirun wamá lun lichugún adundehani woun. Luéigiñe le aban oubaü, lunti aranseñu wamá lun waganbun furumiñeguarügü adundehani, meberesenga ka lan íchugubalin woun (aliiha huméi Apurichihati 4:13). Ítarati, hénrengutimabei wadügün charati wéinamuti le lunbei ladügün damichi woun luma houn amu gürigia.

“KA GAYARAABEI LÍCHUGUN ADUNDEHANI BUITI NUN?”

8. Ka uagu buidu lubéi ladüga urúei Dawidi lau láluahan adundehani luma Yónatan?

⁸ Ariha wamá ámuya katei le gayaraabei wafurendeiruni lídangiñe lani Dawidi hénpulu. Aganba lumuti meha adundehani hámagiñe 1) gürigia ha buídubei hamadagua luma Heowá luma 2) hámagiñe gürigia ha gunfuranda habalin buidu ka lan gádanbalin. Kei hénpulu, dan le meha labusenrunbei Dawidi lasubudiruni anhein gayaraabei lubéi larandarun luma urúei Saulu, áluahati adundehani luma Yónatan, le liráü Saulu. Ka uagu Yónatan lubéi gürigia létima lunbei líderaguni Dawidi lidan kesi le? Ladüga buidu lan meha lumadagua Yónatan luma Heowá ani subudilei lúguchi buidu buidu (1 Sam. 20:​9-13). Ida luba wáyeihani lani Dawidi hénpulu?

9. Anhein megei wabéi aban adundehani, kaba uma wamuriahei? Ru humá aban hénpulu (Ariñawagúni 13:20).

⁹ Dan le megei wamá adundehani luagu somu katei, buiti lun wamuriahani adundehani ligía lúmagiñe aban gürigia le 1) buiti lumadagua luma Heowá ani 2) lúmagiñe aban gürigia le subudihabúti lun tema ligía (aliiha huméi Ariñawagúni 13:20).a Kéiburi, aban íbiri nibureinti le busenti lamarieidun. Kaba uma lamuriahan adundehani? Gayaraati libihin adundehani lúmagiñe aban lumada le mamarieidungili anhein yusu lubalün umadaü ligía Bíbülia lun líchuguni adundehani ligía lun. Lau sun lira, chóuruti buídutimabei lan adundehani le lunbei leresibiruni hámagiñe aban feru maríeitiña ha subudihabúbaña lun buidu ani buiti hamadagua luma Heowá, ani ha barühaña saragu irumu maríeiñu.

10. Kaba wariha guentó?

¹⁰ Akutiha wamaali ka lan burí igaburi wemegeirubei lúmati ka lan gayarabei líchugun adundehani buiti woun. Ariha wamá guentó ka lan uagu lunti lubéi wánharun lun amu ligaburi saminaü, lúmati anhein buidu lubéi lun wamuriahan hama amu lun hariñaguni woun ka lan lunbei wadügüni.

“KA UAGU BUIDU LUBÉI LUN NÁNHARUN LUN AMU LIGABURI SAMINAÜ?”

11, 12. a) Ka katei lunbei madügün wamani? b) Ka ladügübei Reoboámü dan le lunti lan lanúadirun somu katei súdiniti?

¹¹ Anihein dan amuriaha hamá gürigia adundehani hama amu lun hanúadiruni kaba lan hadüga, ani le linarün, subudi hamaali le lunbei hadügüni, busenrügütiña lariñawagún houn le habusenrunbei haganbun. Le adügübalin lira, mabusenrunti lánharun lun amu ligaburi saminaü. Gayaraati leseriwidun luriban hénpulu le líchugubei urúei Reoboámü woun kei eweridihani.

¹² Aba larúeihan Reoboámü Ísüraeli lárigiñe lounwen Salomón, le lúguchi. Lidan meha dan ligía, aban meha ageiraü awanseti Ísüraeli. Lau sun lira, aba meha hekeharun ísüraelina luagu Salomón lugundun líchugun lidere dan houn. Ligía hamuriahanbei luma Reoboámü lun lahualidagüdüniña lídangiñe lidere dan le líchugubei Salomón houn. Aba lariñagun urúei houn lun híchugun dan lun lun lasaminaruni. Buiti yebe lagumeserun, lugundun aba láluahan adundehani hama wéiyaaña mutu, ha meha íchugubaña adundehani lun Salomón le lúguchi (1 Uru. 12:​2-7). Gama lumoun, maganbun lumuti adundehani le ichugúbei lun. Ka uagu? Ladüga funa san anúadira laali lan le labusenrunbei ladügün ani busenrügüti lariñawagún lun le labusenrubei laganbun? Anhein ítara liña lubéi, háfuga ligía lan adügübei lun lálügüdüniña lumadagu, nibureintiña líledigu, ha ariñagubalin lun le labusenrubei laganbun (1 Uru. 12:​8-14). Aba ladügüni Reoboámü le hariñagubei nibureintiña ha lun, ábati hebedaagun saragu ísüraelina lun. Lúmagiñeti ñéingiñe lun lubaruaguóun, aba ñein lan saragu turobuli lidan larúeihan Reoboámü (1 Uru. 12:​16-19).

13. Kaba íderaguawa asubudirei anhein aranseñu waña lubéi lun wánharun lun amu ligaburi saminaü?

¹³ Ka gayaraabei wafurendeirun lídangiñe le asuseredubei lun Reoboámü? Furendeitiwa ánhawa lan amuriaha adundehani, lunti lan wadügüni aranseñu lun wánharun lun adundehani ligía, mini lan le, manúadirun wamagili lan le lunbei wadügüni. Álügüdagua wamá woungua: “Ánhana áluaha adundehani ani mariñawagúati nun le nabusenrubei naganbun, namahaduba san lun adundehani ligía lau lóufudagun?”. Ru wamá aban hénpulu.

14. Ka katei moun lubéi lun wabulieiduni? Ru humá aban hénpulu (ariha huméi giñe dibuhu).

¹⁴ Samina wamá luagu aban íbiri le ibihibei aban wadagimanu le fáyeiti ani mosu lásügürün saragu dan dise hawéi liduheñu. Lubaragiñe lánharun lun wadagimanu ligía, aba lamuriaha adundehani luma aban wéiyaali lidan afiñeni. Yusu lumutu wéiyaali lidan afiñeni le Bíbülia lun laritaguagüdüni lun íbiri le hamadagua lan liduheñu luma Heowá ligía lan dasi súdinitimabei le unbei mosu lan letenirun lun (Efe. 6:4; 1 Tim. 5:8). Lau lóufudagun, aba lasaminarun íbiri le múaran lan le labusenrubei ladügün luma adundehani le líchugubei wéiyaali lidan afiñeni lun, aba lasigirun álügüdaña amu íbirigu darí lun ladeirun aban íbiri le ariñagubalin lun le labusenrunbei laganbun. Le san lúgubu láluahaña lan íbiri le adundehani, o láluahaña lun lariñawagún lun le labusenrubei laganbun? Mabulieida waméi geyeedaguadi tan anigi (Her. 17:9). Anihein dan, mabusenruntiwa waganbuni adundehani létima wemegeirubei.

“LUNTI SAN NAMURIAHAN HAMA AMU LUN HANÚADIRUN NUAGU?”

15. Ka katei moun lubéi lun wadügüni, ani ka uagu?

¹⁵ Agurabati Heowá lun lanúadiruni kada kristiánu le labusenrunbei ladügün (Gal. 6:​4, 5). Kei le aubei warihei, lubaragiñe lanúadirun gürigia ladügün aban katei, lunti láluahani tadundehan Bíbülia luma lun láluahan giñe adundehani hama íbirigu ha derebuguti hafiñen. Le lunbei madügün wamani, wamuriahan hama lun hanúadirun wawagu. Ligíati, mídinbadiwa lumoun aban gürigia le afiñetiwa luagu lun wálügüdüni: “Kaba hamuga san badüga lidan nilugaarun?”. Luagu amu oubaü, mabusenruntiwa wóufudahan anúadira katei masaminarunga luagu.

16. Ka meha katei lunbei hadügüni kristiánugu ha Korintubaña? (1 Korintuna 8:7; 10:​25, 26).

¹⁶ Ariha waméi le asuseredubei lidan furumiñeti sígulu lidan damuriguaü le Korintubei. Mosu meha hanúadirun kristiánugu hagía kaba lan hadüga lau úi le másiñati dagagüdawaali lan houn guáriua. Abürühati Pábulu houn: “Inarüni luagu ni kata hamá guáriua ubouagu; mama hamá búngiugu ladüga subudi wamuti luagu ábanrügüñein lan Bungiu” (1 Ko. 8:4). Ligía añahein lubéi hádangiñe gañei hamuti úi ligía íbini másiña lan dagagüdawaali lan houn guáriua. Añahein amu, aba magañeihan hamani úi ligía lun hakipuruni hasaminan darangilañu (aliiha huméi 1 Korintuna 8:7; 10:​25, 26). Mosu meha lanúadiruni kada gürigia kaba lan ladüga. Mariñagunti meha Pábulu houn korintuna lun lan hanúadirun hawagu amu ni lun háyeihani le hadügübei amu. Lubaragiñe lira, aba lariñaguni dimurei le wadarirubei lidan Rómana 14:​10-12 houn: “Kada [ . . . ] aban wádangiñe, laguseruba luougua luma Bungiu”.

17. Ka gayaraabei lasuseredun anhein áyeiharügü wabalin le hadügübei amu? Ru humá aban hénpulu (ariha humóun giñe iyawaü).

¹⁷ Ka sügǘ lenege le akutiha wamaalibei gayaraabei lasuseredun uguñe weyu? Samina wamá luagu lagaranihóuniwa lau burí katei ñǘbüriti le asagarúbei lídangiñe hitaü. Sun kristiánugu lunti hanúadirun anhein hánharuba lubéi lun o máhabaña lan.b Másiñati hénrengubei lan woun gunfuranda wamani katei le buidu buidu. Lau sun lira, ligía aban katei le lunbei lanúadiruni kada aban wádangiñe keisi kristiánu (Rom. 14:4). Anhein hamuga wáyeiharügü le hadügübei amu, siñabei hamuga wanúadaha lau lichú aau. Lugundun, lun buidu lan le lunbei wanúadiruni, furumiñe, mosu wakutihani tidan Bíbülia ariñahani le ayanuhabei luagu le gádanbaliwa (Ebü. 5:14). Ánheinti wariha mégeigidiwa lan ídemuei lun gunfuranda wamani katei le buidu buidu, buídubei wadüga lun wamuriahan adundehani hama íbirigu ha derebugu tafiñen.

SIGIMÉME WAMÁ AMURIAHA ADUNDEHANI

18. Ka burí katei adüga láalibei Heowá wawagu?

¹⁸ Ígirati Heowá lun wanúadiruni le lunbei wadügüni. Arufudati lau lira weiri lan lafiñerun wawagu. Ru laaru Lererun woun hama umadagu ha derebugu tafiñen ha gayarabei híderaguniwa lun gunfuranda wamani ida luba lan wafalaruni adundehani le tídanbei Bíbülia lidan wabagari. Ítara liña lagunfuliruni lidasin kei Úguchili (Ari. 3:​21-23). Ida luba warufuduni lun Heowá seremei wamani luagu sun katei le ru laalibei woun?

19. Ida luba wagundaaragüdüni Heowá?

¹⁹ Wéiriti hagundan agübürigu dan le harihiniña hasaanigu eseriwida lun Heowá ani ederebudagüdei hafiñen luagu, luma dan le harihiniña óusera lau lichú aau ani aranseñu hagía lun híderaguniña amu. Ítarameme, gúndaati Wáguchi le siélubei dan le larihiniwa ederebudagüdei wafiñen luagu luma lau wamuriahan adundehani ani anúadira wagía katei burí le íchugubei uéiriguni lun.